| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
2. රාජකාරාමවග්‌ගො
2. Rājakārāmavaggo
1. සහස්‌සභික්‌ඛුනිසඞ්‌ඝසුත්‌තවණ්‌ණනා
1. Sahassabhikkhunisaṅghasuttavaṇṇanā
1007. ධම්‌මිකත්‌තා දෙසවාසීහි අනුකම්‌පිතො රාජාති රාජකො, තස්‌ස ආරාමො රාජකාරාමො, තස්‌මිං. භූමිසීසං සෙට්‌ඨප්‌පදෙසො, යත්‌ථ වසන්‌තො ලාභග්‌ගයසග්‌ගප්‌පත්‌තො හොතීති තෙසං අධිප්‌පායො.
1007. Dhammikattā desavāsīhi anukampito rājāti rājako, tassa ārāmo rājakārāmo, tasmiṃ. Bhūmisīsaṃ seṭṭhappadeso, yattha vasanto lābhaggayasaggappatto hotīti tesaṃ adhippāyo.
වාරාපෙහීති පටිසෙධෙහි. යුජ්‌ඣාපෙතුන්‌ති කලහං කාරාපෙතුං. පුන ආගච්‌ඡන්‌තාති අපරස්‌මිං සංවච්‌ඡරෙ ආගච්‌ඡන්‌තා. උබ්‌බට්‌ටෙත්‌වාති මහතී වීචියො උබ්‌බට්‌ටෙත්‌වා. යථා තස්‌ස සකලමෙව රට්‌ඨං එකොදකීභූතං හොති, එවං කත්‌වා සමුද්‌දමෙව ජාතං. තෙන වුත්‌තං ‘‘සමුද්‌දමෙව අකංසූ’’ති.
Vārāpehīti paṭisedhehi. Yujjhāpetunti kalahaṃ kārāpetuṃ. Puna āgacchantāti aparasmiṃ saṃvacchare āgacchantā. Ubbaṭṭetvāti mahatī vīciyo ubbaṭṭetvā. Yathā tassa sakalameva raṭṭhaṃ ekodakībhūtaṃ hoti, evaṃ katvā samuddameva jātaṃ. Tena vuttaṃ ‘‘samuddameva akaṃsū’’ti.
ඉසීනමන්‌තරං කත්‌වාති ඉසීනං කාරණං කත්‌වා, ඉසීනං හෙතූති අත්‌ථො, ඉසීනං වා අන්‌තරභෙදං කත්‌වා. තථා ලොකෙ කොලාහලස්‌ස පත්‌ථටතං විභාවෙන්‌තො භගවා ‘‘මෙ සුත’’න්‌ති ආහ පච්‌චක්‌ඛතො ජානම්‌පි. උච්‌ඡින්‌නොති කුලච්‌ඡෙදෙන උච්‌ඡින්‌නො. න කෙවලං සයමෙව, අථ ඛො සහ රට්‌ඨෙහි. විභවන්‌ති විනාසං උපගතො.
Isīnamantaraṃ katvāti isīnaṃ kāraṇaṃ katvā, isīnaṃ hetūti attho, isīnaṃ vā antarabhedaṃ katvā. Tathā loke kolāhalassa patthaṭataṃ vibhāvento bhagavā ‘‘me suta’’nti āha paccakkhato jānampi. Ucchinnoti kulacchedena ucchinno. Na kevalaṃ sayameva, atha kho saha raṭṭhehi. Vibhavanti vināsaṃ upagato.
තං සන්‌ධායෙතං වුත්‌තන්‌ති තං යථාවුත්‌තං පසෙනදිනා කොසලරාජෙන කාරිතං විහාරං සන්‌ධාය එතං ‘‘රාජකාරාමෙ’’ති වුත්‌තං.
Taṃ sandhāyetaṃ vuttanti taṃ yathāvuttaṃ pasenadinā kosalarājena kāritaṃ vihāraṃ sandhāya etaṃ ‘‘rājakārāme’’ti vuttaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 1. සහස්‌සභික්‌ඛුනිසඞ්‌ඝසුත්‌තං • 1. Sahassabhikkhunisaṅghasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. සහස්‌සභික්‌ඛුනිසඞ්‌ඝසුත්‌තවණ්‌ණනා • 1. Sahassabhikkhunisaṅghasuttavaṇṇanā
