| Library / Tipiṭaka / तिपिटक • Tipiṭaka / संयुत्तनिकाय (टीका) • Saṃyuttanikāya (ṭīkā) |
१२. सहायकसुत्तवण्णना
12. Sahāyakasuttavaṇṇanā
२४६. सम्मा संसन्दनवसेन एति पवत्ततीति समेति, सम्मादिट्ठिआदि। सम्मा चिररत्तं चिरकालं समेति एतेसं अत्थीति चिररत्तंसमेतिका। तेनाह ‘‘दीघरत्त’’न्तिआदि। इदानि इमेसन्ति एतरहि एतेसं। अयं सासनधम्मो अज्झासयतो पयोगतो च सम्मा संसन्दति समेति, तस्मा मज्झे भिन्नं विय सममेव न विसदिसं। किञ्च ततो एव बुद्धेन भगवता पवेदितधम्मविनये एतेसं पटिपत्तिसासनधम्मो सोभति विरोचतीति अत्थो। अरियप्पवेदितेति अरियेन सम्मासम्बुद्धेन सम्मदेव पकासिते अरियधम्मे। सम्मदेव समुच्छेदपटिप्पस्सद्धिविनयानं वसेन सुट्ठु विनीता सब्बकिलेसदरथपरिळाहानं वूपसमेन।
246. Sammā saṃsandanavasena eti pavattatīti sameti, sammādiṭṭhiādi. Sammā cirarattaṃ cirakālaṃ sameti etesaṃ atthīti cirarattaṃsametikā. Tenāha ‘‘dīgharatta’’ntiādi. Idāni imesanti etarahi etesaṃ. Ayaṃ sāsanadhammo ajjhāsayato payogato ca sammā saṃsandati sameti, tasmā majjhe bhinnaṃ viya samameva na visadisaṃ. Kiñca tato eva buddhena bhagavatā paveditadhammavinaye etesaṃ paṭipattisāsanadhammo sobhati virocatīti attho. Ariyappavediteti ariyena sammāsambuddhena sammadeva pakāsite ariyadhamme. Sammadeva samucchedapaṭippassaddhivinayānaṃ vasena suṭṭhu vinītā sabbakilesadarathapariḷāhānaṃ vūpasamena.
सहायकसुत्तवण्णना निट्ठिता।
Sahāyakasuttavaṇṇanā niṭṭhitā.
सारत्थप्पकासिनिया संयुत्तनिकाय-अट्ठकथाय
Sāratthappakāsiniyā saṃyuttanikāya-aṭṭhakathāya
भिक्खुसंयुत्तवण्णनाय लीनत्थप्पकासना समत्ता।
Bhikkhusaṃyuttavaṇṇanāya līnatthappakāsanā samattā.
निट्ठिता च सारत्थप्पकासिनिया
Niṭṭhitā ca sāratthappakāsiniyā
संयुत्तनिकाय-अट्ठकथाय निदानवग्गवण्णना।
Saṃyuttanikāya-aṭṭhakathāya nidānavaggavaṇṇanā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / संयुत्तनिकाय • Saṃyuttanikāya / १२. सहायकसुत्तं • 12. Sahāyakasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / १२. सहायकसुत्तवण्णना • 12. Sahāyakasuttavaṇṇanā
