| Library / Tipiṭaka / д̇ибидага • Tipiṭaka / вимад̇ивинод̣̇аний-дийгаа • Vimativinodanī-ṭīkā |
сааж̇ийвабад̣̇абхааж̇анийяаван̣н̣анаа
Sājīvapadabhājanīyavaṇṇanā
виваддуубаниссаяаа сийлаад̣̇аяо логиязхи абхивисидтад̇д̇аа ад̇хисийлаад̣̇ивохаарзна вуд̇д̇аад̇и д̣̇ассзд̇ум̣ гад̇амам̣ банаад̇иаад̣̇и аарад̣̇д̇хам̣. д̇ад̇т̇а бан̃жан̇г̇ад̣̇асан̇г̇асийланд̇и аб̣уд̣̇д̇хуббаад̣̇агаалз сийлам̣ санд̇хааяа вуд̇д̇ам̣ д̇асса виваддуубаниссаяад̇д̇аабхааваа. яам̣ бана б̣уд̣̇д̇хуббаад̣̇з рад̇анад̇д̇аяаг̇ун̣ам̣ д̇ат̇ад̇о н̃ад̇ваа саасанз сунивидтасад̣̇д̇хаахи убаасагобаасигаахи жзва сааман̣зрасигкамаанаахи жа рагкияамаанам̣ бан̃жан̇г̇аадтан̇г̇ад̣̇асан̇г̇асийлам̣, д̇амби ад̇хисийламзва маг̇г̇уббад̇д̇ихзд̇уд̇о. вибассанаамаг̇г̇уббад̇д̇инимид̇д̇ад̇ааяа хи баад̇имогкасам̣варасийлам̣ логияаанам̣ сийлзхи ад̇хисийлам̣ ж̇аад̇ам̣ ад̇хижид̇д̇ам̣ вияа. на хи вибассанаамаг̇г̇анимид̇д̇ад̇ам̣ мун̃жид̇ваа логияажид̇д̇ад̇о ад̇хижид̇д̇асса ан̃н̃о гожи висзсо убалаб̣бхад̇и, д̇ад̣̇убхаяан̃жа анаад̣̇имад̇о сам̣саараваддасса ад̇д̇аад̣̇исааравирахид̇ад̇ааяа д̇илагкан̣аб̣бхаахад̇ад̇д̇ам̣, ‘‘ахам̣ мамаа’’д̇и аагаарзна бавад̇д̇аавиж̇ж̇аад̇ан̣хаад̣̇ид̣̇осамуулагад̇д̇ан̃жа, д̇ам̣д̣̇осамуулавид̣̇д̇хам̣санасамад̇т̇ааяа сийлажид̇д̇аб̣алобад̇т̇ад̣̇д̇хааяа вибассанааяа уггам̣сзнзва д̇асса сам̣саараваддасса виг̇аман̃жа, д̇ад̣̇убад̣̇зсагасса саммаасамб̣уд̣̇д̇хасса саб̣б̣ан̃н̃уд̇аад̣̇иабаримид̇аг̇ун̣аг̇ан̣аяог̇зна авибарийд̇асад̣̇д̇хаммад̣̇зсагад̇д̇ан̃жа яаат̇аавад̇о н̃ад̇ваа бадибаннзна самаад̣̇ааяа сигкид̇аб̣б̣ад̇ааяа виваддуубаниссаяам̣ ж̇аад̇ам̣, на ан̃н̃зна гааран̣зна, д̇ан̃жа виваддуубаниссаяад̇д̇ам̣ яад̣̇и саасанз бан̃жасийлаад̣̇иссааби самаанам̣, гимид̣̇ам̣ ад̇хисийлам̣ на сияаа. бан̃жасийлаад̣̇имад̇д̇з тид̇аанан̃хи анаат̇абин̣д̣игаад̣̇ийнам̣ г̇ахадтаанамби маг̇г̇о уббаж̇ж̇ад̇и. на хи ад̇хисийлаад̇хижид̇д̇ам̣ винаа маг̇г̇уббад̇д̇и ход̇и, д̇ан̃жа гин̃жааби гзсан̃жи анубаниссаяад̇ааяа д̇асмим̣ ад̇д̇абхаавз маг̇г̇уббад̇д̇ияаа хзд̇у на ход̇и, д̇ат̇ааби бхаванд̇арз авассам̣ ход̇зваад̇и ад̇хисийламзва гаалам̣ гаронд̇аанам̣ галяаан̣абут̇уж̇ж̇анаанам̣ баад̇имогкасам̣варасийлам̣ вияа, д̇знааха б̣уд̣̇д̇хуббаад̣̇зязва жа бавад̇д̇ад̇ийд̇иаад̣̇и. виваддам̣ бад̇т̇зд̇ваа рагкияамаанамби бан̃жасийлаад̣̇и б̣уд̣̇д̇хуббаад̣̇зязва бавад̇д̇ад̇и. на хи д̇ам̣ бан̃н̃ад̇д̇инд̇иаад̣̇и бана уггадтавасзна саб̣б̣ам̣ баад̇имогкам̣ санд̇хааяа вуд̇д̇ам̣. д̇ад̣̇згад̣̇зсабхууд̇амби хи баан̣аад̇ибаад̇аад̣̇иннаад̣̇аанаад̣̇иг̇ахадтасийламби. б̣уд̣̇д̇хааязва винаяз баарааж̇игасуд̇д̇авибхан̇г̇аад̣̇ийсу ааг̇ад̇авасзна саб̣б̣асо гааяаважийд̣̇ваарзсу маг̇г̇уббад̇д̇ияаа виб̣анд̇хагааж̇жхаажаарасод̇ам̣ вижчинд̣̇ид̇ваа маг̇г̇уббад̇д̇ияаа бад̣̇адтаанабхаавзна бан̃н̃абзд̇ум̣ саггонд̇и, на ан̃н̃з. маг̇г̇уббад̇д̇им̣ санд̇хааяа хисса ад̇хисийлад̇аа вуд̇д̇аа. д̇знааха ‘‘баад̇имогкасам̣варад̇оби жа маг̇г̇апаласамбаяуд̇д̇амзва сийлам̣ ад̇хисийла’’нд̇и. д̇ассзва хи ад̇хисийланд̇и аб̣яавад̇хаанзна маг̇г̇аад̇хидтаанаад̇и. ид̇ха анад̇хиббзд̇анд̇и имасмим̣ батамабаарааж̇игависаяз ‘‘сигкаа’’д̇и анад̇хиббзд̇ам̣.
Vivaṭṭūpanissayā sīlādayo lokiyehi abhivisiṭṭhattā adhisīlādivohārena vuttāti dassetuṃ katamaṃ panātiādi āraddhaṃ. Tattha pañcaṅgadasaṅgasīlanti abuddhuppādakāle sīlaṃ sandhāya vuttaṃ tassa vivaṭṭūpanissayattābhāvā. Yaṃ pana buddhuppāde ratanattayaguṇaṃ tathato ñatvā sāsane suniviṭṭhasaddhāhi upāsakopāsikāhi ceva sāmaṇerasikkhamānāhi ca rakkhiyamānaṃ pañcaṅgaaṭṭhaṅgadasaṅgasīlaṃ, tampi adhisīlameva magguppattihetuto. Vipassanāmagguppattinimittatāya hi pātimokkhasaṃvarasīlaṃ lokiyānaṃ sīlehi adhisīlaṃ jātaṃ adhicittaṃ viya. Na hi vipassanāmagganimittataṃ muñcitvā lokiyacittato adhicittassa añño koci viseso upalabbhati, tadubhayañca anādimato saṃsāravaṭṭassa attādisāravirahitatāya tilakkhaṇabbhāhatattaṃ, ‘‘ahaṃ mamā’’ti ākārena pavattaavijjātaṇhādidosamūlakattañca, taṃdosamūlaviddhaṃsanasamatthāya sīlacittabalopatthaddhāya vipassanāya ukkaṃseneva tassa saṃsāravaṭṭassa vigamañca, tadupadesakassa sammāsambuddhassa sabbaññutādiaparimitaguṇagaṇayogena aviparītasaddhammadesakattañca yāthāvato ñatvā paṭipannena samādāya sikkhitabbatāya vivaṭṭūpanissayaṃ jātaṃ, na aññena kāraṇena, tañca vivaṭṭūpanissayattaṃ yadi sāsane pañcasīlādissāpi samānaṃ, kimidaṃ adhisīlaṃ na siyā. Pañcasīlādimatte ṭhitānañhi anāthapiṇḍikādīnaṃ gahaṭṭhānampi maggo uppajjati. Na hi adhisīlādhicittaṃ vinā magguppatti hoti, tañca kiñcāpi kesañci anupanissayatāya tasmiṃ attabhāve magguppattiyā hetu na hoti, tathāpi bhavantare avassaṃ hotevāti adhisīlameva kālaṃ karontānaṃ kalyāṇaputhujjanānaṃ pātimokkhasaṃvarasīlaṃ viya, tenāha buddhuppādeyeva ca pavattatītiādi. Vivaṭṭaṃ patthetvā rakkhiyamānampi pañcasīlādi buddhuppādeyeva pavattati. Na hi taṃ paññattintiādi pana ukkaṭṭhavasena sabbaṃ pātimokkhaṃ sandhāya vuttaṃ. Tadekadesabhūtampi hi pāṇātipātādinnādānādigahaṭṭhasīlampi. Buddhāyeva vinaye pārājikasuttavibhaṅgādīsu āgatavasena sabbaso kāyavacīdvāresu magguppattiyā vibandhakaajjhācārasotaṃ vicchinditvā magguppattiyā padaṭṭhānabhāvena paññapetuṃ sakkonti, na aññe. Magguppattiṃ sandhāya hissa adhisīlatā vuttā. Tenāha ‘‘pātimokkhasaṃvaratopi ca maggaphalasampayuttameva sīlaṃ adhisīla’’nti. Tasseva hi adhisīlanti abyavadhānena maggādhiṭṭhānāti. Idha anadhippetanti imasmiṃ paṭhamapārājikavisaye ‘‘sikkhā’’ti anadhippetaṃ.
логияаадтасамаабад̇д̇ижид̇д̇аанийд̇и саасанасабхаавам̣ аж̇аананд̇зхи логияаж̇анзхи самаабаж̇ж̇ид̇аб̣б̣аани адта руубааруубаж̇жхаанасамбаяуд̇д̇ажид̇д̇аани санд̇хааяа вуд̇д̇ам̣. на хи махаг̇г̇ад̇зсу логияалогуд̇д̇арабхзд̣̇о ад̇т̇и, язна логияависзсанам̣ логуд̇д̇аранивад̇д̇анам̣ сияаа. д̇асмаа саасанигзхи самаабаж̇ж̇ид̇аб̣б̣амахаг̇г̇ад̇аж̇жхаананивад̇д̇анамзва логияависзсанам̣ гад̇ам̣. яат̇аа жзд̇т̇а, звам̣ гаамааважараани бана адта гусалажид̇д̇аанийд̇и зд̇т̇ааби логияависзсанам̣ гаад̇аб̣б̣амзва. аяамзва хи ад̇хижид̇д̇ад̇о жид̇д̇асса бхзд̣̇о, яам̣ саасанам̣ аж̇аананд̇асса буг̇г̇аласса самуббаж̇ж̇анам̣. зван̃жа аб̣уд̣̇д̇хуббаад̣̇зби саасанасабхаавам̣ ж̇аананд̇аанам̣ бажжзгаб̣уд̣̇д̇хаад̣̇ийнамби сийлажид̇д̇аанам̣ ад̇хисийлаад̇хижид̇д̇ад̇аа самад̇т̇ид̇аа ход̇и. на винаа б̣уд̣̇д̇хуббаад̣̇аад̇и ид̣̇ам̣ бана ан̃н̃зсам̣ абхисамаяахзд̇убхаавзна бажжзгаб̣уд̣̇д̇хаб̣од̇хисад̇д̇аад̣̇ийнам̣ д̣̇зсанаасаамад̇т̇ияаабхаавад̇о вуд̇д̇ам̣. ааяад̇им̣ ваасанаахзд̇ум̣ бана сийлажид̇д̇ам̣ д̇зби д̣̇зсзнд̇иязва, д̇ан̃жа маг̇г̇ахзд̇уд̇ааяа ад̇хисийлаад̇хижид̇д̇амби хонд̇ам̣ аббагад̇ааяа вибпааригад̇ааб̣аахуж̇ан̃н̃ад̇д̇аабхаавзна аб̣б̣охаариганд̇и ‘‘б̣уд̣̇д̇хуббаад̣̇зязваа’’д̇и авад̇хааран̣ам̣ гад̇анд̇и взд̣̇ид̇аб̣б̣ам̣. на хи д̇ам̣самаабаннод̇иаад̣̇иадтагат̇ааважанзхи ид̇ха ад̇хижид̇д̇анид̣̇д̣̇зсз, убари ад̇хибан̃н̃аанид̣̇д̣̇зсз жа маг̇г̇апаласамбаяуд̇д̇аад̇хижид̇д̇аад̇хибан̃н̃аанамзва бадигкзбад̇о логияаад̇хижид̇д̇аад̇хибан̃н̃аанам̣ ид̇ха ад̇хиббзд̇ад̇аа, д̇ам̣ д̣̇ваяам̣ самаабаннассааби мзт̇унад̇хаммасамаабаж̇ж̇анасабхааво жа вин̃н̃ааяад̇и, баал̣ияам̣ бана ‘‘яааяам̣ ад̇хисийласигкаа, аяам̣ имасмим̣ ад̇т̇з ад̇хиббзд̇аа сигкаа’’д̇и вуд̇д̇ад̇д̇аа логияааби ад̇хижид̇д̇аад̇хибан̃н̃аа анад̇хиббзд̇аад̇и вин̃н̃ааяад̇и. д̇асмаа баал̣ияам̣ адтагат̇ааяан̃жа звамад̇хиббааяо взд̣̇ид̇аб̣б̣о – ‘‘мзт̇унам̣ д̇хаммам̣ бадисзвиссаамий’’д̇и жид̇д̇з уббаннамад̇д̇з логияам̣ ад̇хижид̇д̇ам̣ ад̇хибан̃н̃аа жа барихааяад̇и, ад̇хисийлам̣ бана жид̇д̇уббаад̣̇амад̇д̇зна на барихааяад̇ийд̇и баал̣ияам̣ ад̇хисийласигкаава вуд̇д̇аа. адтагат̇ааяам̣ бана бадилад̣̇д̇халогуд̇д̇арамаг̇г̇асса бхигкуно ‘‘мзт̇унам̣ бадисзвиссаамий’’д̇и жид̇д̇амби на уббаж̇ж̇ад̇и саб̣б̣асо агуббад̇хаммад̇д̇аа, бут̇уж̇ж̇анаанам̣ самаабад̇д̇илаабхийнамби гзнажи гааран̣зна уббаж̇ж̇ад̇и губбад̇хаммад̇д̇аад̇и имам̣ висзсам̣ д̣̇ассзд̇ум̣ ‘‘на хи д̇ам̣самаабанно’’д̇и логуд̇д̇араава бадигкид̇д̇аад̇и взд̣̇ид̇аб̣б̣ам̣.
Lokiyaaṭṭhasamāpatticittānīti sāsanasabhāvaṃ ajānantehi lokiyajanehi samāpajjitabbāni aṭṭha rūpārūpajjhānasampayuttacittāni sandhāya vuttaṃ. Na hi mahaggatesu lokiyalokuttarabhedo atthi, yena lokiyavisesanaṃ lokuttaranivattanaṃ siyā. Tasmā sāsanikehi samāpajjitabbamahaggatajjhānanivattanameva lokiyavisesanaṃ kataṃ. Yathā cettha, evaṃ kāmāvacarāni pana aṭṭha kusalacittānīti etthāpi lokiyavisesanaṃ kātabbameva. Ayameva hi adhicittato cittassa bhedo, yaṃ sāsanaṃ ajānantassa puggalassa samuppajjanaṃ. Evañca abuddhuppādepi sāsanasabhāvaṃ jānantānaṃ paccekabuddhādīnampi sīlacittānaṃ adhisīlādhicittatā samatthitā hoti. Na vinā buddhuppādāti idaṃ pana aññesaṃ abhisamayahetubhāvena paccekabuddhabodhisattādīnaṃ desanāsāmatthiyābhāvato vuttaṃ. Āyatiṃ vāsanāhetuṃ pana sīlacittaṃ tepi desentiyeva, tañca maggahetutāya adhisīlādhicittampi hontaṃ appakatāya vipphārikatābāhujaññattābhāvena abbohārikanti ‘‘buddhuppādeyevā’’ti avadhāraṇaṃ katanti veditabbaṃ. Na hi taṃsamāpannotiādiaṭṭhakathāvacanehi idha adhicittaniddese, upari adhipaññāniddese ca maggaphalasampayuttaadhicittaadhipaññānameva paṭikkhepato lokiyādhicittādhipaññānaṃ idha adhippetatā, taṃ dvayaṃ samāpannassāpi methunadhammasamāpajjanasabhāvo ca viññāyati, pāḷiyaṃ pana ‘‘yāyaṃ adhisīlasikkhā, ayaṃ imasmiṃ atthe adhippetā sikkhā’’ti vuttattā lokiyāpi adhicittādhipaññā anadhippetāti viññāyati. Tasmā pāḷiyaṃ aṭṭhakathāyañca evamadhippāyo veditabbo – ‘‘methunaṃ dhammaṃ paṭisevissāmī’’ti citte uppannamatte lokiyaṃ adhicittaṃ adhipaññā ca parihāyati, adhisīlaṃ pana cittuppādamattena na parihāyatīti pāḷiyaṃ adhisīlasikkhāva vuttā. Aṭṭhakathāyaṃ pana paṭiladdhalokuttaramaggassa bhikkhuno ‘‘methunaṃ paṭisevissāmī’’ti cittampi na uppajjati sabbaso akuppadhammattā, puthujjanānaṃ samāpattilābhīnampi kenaci kāraṇena uppajjati kuppadhammattāti imaṃ visesaṃ dassetuṃ ‘‘na hi taṃsamāpanno’’ti lokuttarāva paṭikkhittāti veditabbaṃ.
ад̇т̇и д̣̇иннанд̇и зд̇т̇а д̣̇иннанд̇и д̣̇аанажзд̇анаа ад̇хиббзд̇аа, д̇асса д̣̇иннасса палам̣ ад̇т̇ийд̇и ад̇т̇о. зса наяо ад̇т̇и яидтанд̇и зд̇т̇ааби. аад̣̇и-сад̣̇д̣̇зна худ̇аад̣̇ийнам̣ сан̇г̇ахо. д̇ад̇т̇а яидтанд̇и махааяааг̇о саб̣б̣асаад̇хааран̣ам̣ махаад̣̇аанамзва. худ̇анд̇и бахонагасаггааро, ад̇д̇ано ваа ход̇у, барзсам̣ ваа д̣̇аса агусалагаммабат̇аа, саб̣б̣зби ваа агусалаа д̇хаммаа анад̇т̇уббаад̣̇анад̇о на сагам̣ гаммам̣ наама, д̇аб̣б̣ибарийд̇аа гусалаа д̇хаммаа сагам̣ наама, д̇ад̣̇убхаяамби ваа гусалаагусалам̣ гаммассагомхийд̇иаад̣̇иважанад̇о сад̇и сам̣саараббавад̇д̇ияам̣ ад̇химужжанадтзна сад̇д̇аанам̣ саганд̇и звам̣ гаммассагад̇ааяа сагабхаавз ад̇д̇ано санд̇агад̇ааяа уббаж̇ж̇анаган̃аан̣ам̣ гаммассагад̇ан̃н̃аан̣ам̣, убалагкан̣амад̇д̇ан̃жзд̇ам̣. саасананиссид̇аа бана саб̣б̣ааби ваддаг̇ааминигусалабан̃н̃аа гаммассагад̇ан̃н̃аан̣з бавидтаа. саасананиссид̇аа хи виваддаг̇ааминий саб̣б̣ааби бан̃н̃аа ‘‘сажжаануломиган̃аан̣а’’нд̇и вужжад̇и. саа зва жа ад̇хибан̃н̃аа д̇ад̣̇авасзсам̣ саб̣б̣ам̣ гаммассагад̇ан̃н̃аан̣анд̇и взд̣̇ид̇аб̣б̣ам̣, д̇знзва бхаг̇аваа ‘‘гаммассагад̇ан̃н̃аан̣ам̣ сажжаануломиган̃аан̣ам̣ маг̇г̇асаман̇г̇исса н̃аан̣ам̣ паласаман̇г̇исса н̃аан̣а’’нд̇и саб̣б̣амби н̃аан̣ажад̇уггзязва сан̇г̇ахзси. д̇илагкан̣аагаарабарижчзд̣̇агам̣ бана вибассанаан̃аан̣анд̇и ид̣̇ам̣ бана маг̇г̇асса аасаннабажжаяад̇ааяа уггадтавасзна вуд̇д̇ам̣. д̇ад̣̇ид̇араасан̃хи рад̇анад̇д̇аяаануссаран̣аад̣̇ибан̃н̃аанамби маг̇г̇ахзд̇уд̇ааяа ад̇хибан̃н̃ад̇аа самаанааваад̇и г̇ахзд̇аб̣б̣ам̣.
Atthi dinnanti ettha dinnanti dānacetanā adhippetā, tassa dinnassa phalaṃ atthīti attho. Esa nayo atthi yiṭṭhanti etthāpi. Ādi-saddena hutādīnaṃ saṅgaho. Tattha yiṭṭhanti mahāyāgo sabbasādhāraṇaṃ mahādānameva. Hutanti pahonakasakkāro, attano vā hotu, paresaṃ vā dasa akusalakammapathā, sabbepi vā akusalā dhammā anatthuppādanato na sakaṃ kammaṃ nāma, tabbiparītā kusalā dhammā sakaṃ nāma, tadubhayampi vā kusalākusalaṃ kammassakomhītiādivacanato sati saṃsārappavattiyaṃ adhimuccanaṭṭhena sattānaṃ sakanti evaṃ kammassakatāya sakabhāve attano santakatāya uppajjanakañāṇaṃ kammassakataññāṇaṃ, upalakkhaṇamattañcetaṃ. Sāsananissitā pana sabbāpi vaṭṭagāminikusalapaññā kammassakataññāṇe paviṭṭhā. Sāsananissitā hi vivaṭṭagāminī sabbāpi paññā ‘‘saccānulomikañāṇa’’nti vuccati. Sā eva ca adhipaññā tadavasesaṃ sabbaṃ kammassakataññāṇanti veditabbaṃ, teneva bhagavā ‘‘kammassakataññāṇaṃ saccānulomikañāṇaṃ maggasamaṅgissa ñāṇaṃ phalasamaṅgissa ñāṇa’’nti sabbampi ñāṇacatukkeyeva saṅgahesi. Tilakkhaṇākāraparicchedakaṃ pana vipassanāñāṇanti idaṃ pana maggassa āsannapaccayatāya ukkaṭṭhavasena vuttaṃ. Taditarāsañhi ratanattayānussaraṇādipaññānampi maggahetutāya adhipaññatā samānāvāti gahetabbaṃ.
сааж̇ийвабад̣̇абхааж̇анийяаван̣н̣анаанаяо нидтид̇о.
Sājīvapadabhājanīyavaṇṇanānayo niṭṭhito.
