| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. သာဇီဝသုတ္တံ
4. Sājīvasuttaṃ
၁၆၄. 1 တတ္ရ ခော အာယသ္မာ သာရိပုတ္တော ဘိက္ခူ အာမန္တေသိ။ပေ.။ ‘‘ပဉ္စဟိ, အာဝုသော, ဓမ္မေဟိ သမန္နာဂတော ဘိက္ခု အလံသာဇီဝော သဗ္ရဟ္မစာရီနံ။ ကတမေဟိ ပဉ္စဟိ? ဣဓာဝုသော, ဘိက္ခု အတ္တနာ စ သီလသမ္ပန္နော ဟောတိ , သီလသမ္ပဒာကထာယ စ အာဂတံ ပဉ္ဟံ ဗ္ယာကတ္တာ ဟောတိ; အတ္တနာ စ သမာဓိသမ္ပန္နော ဟောတိ, သမာဓိသမ္ပဒာကထာယ စ အာဂတံ ပဉ္ဟံ ဗ္ယာကတ္တာ ဟောတိ; အတ္တနာ စ ပညာသမ္ပန္နော ဟောတိ, ပညာသမ္ပဒာကထာယ စ အာဂတံ ပဉ္ဟံ ဗ္ယာကတ္တာ ဟောတိ; အတ္တနာ စ ဝိမုတ္တိသမ္ပန္နော ဟောတိ, ဝိမုတ္တိသမ္ပဒာကထာယ စ အာဂတံ ပဉ္ဟံ ဗ္ယာကတ္တာ ဟောတိ; အတ္တနာ စ ဝိမုတ္တိဉာဏဒသ္သနသမ္ပန္နော ဟောတိ, ဝိမုတ္တိဉာဏဒသ္သနသမ္ပဒာကထာယ စ အာဂတံ ပဉ္ဟံ ဗ္ယာကတ္တာ ဟောတိ။ ဣမေဟိ ခော, အာဝုသော, ပဉ္စဟိ ဓမ္မေဟိ သမန္နာဂတော ဘိက္ခု အလံသာဇီဝော သဗ္ရဟ္မစာရီန’’န္တိ။ စတုတ္ထံ။
164.2 Tatra kho āyasmā sāriputto bhikkhū āmantesi…pe… ‘‘pañcahi, āvuso, dhammehi samannāgato bhikkhu alaṃsājīvo sabrahmacārīnaṃ. Katamehi pañcahi? Idhāvuso, bhikkhu attanā ca sīlasampanno hoti , sīlasampadākathāya ca āgataṃ pañhaṃ byākattā hoti; attanā ca samādhisampanno hoti, samādhisampadākathāya ca āgataṃ pañhaṃ byākattā hoti; attanā ca paññāsampanno hoti, paññāsampadākathāya ca āgataṃ pañhaṃ byākattā hoti; attanā ca vimuttisampanno hoti, vimuttisampadākathāya ca āgataṃ pañhaṃ byākattā hoti; attanā ca vimuttiñāṇadassanasampanno hoti, vimuttiñāṇadassanasampadākathāya ca āgataṃ pañhaṃ byākattā hoti. Imehi kho, āvuso, pañcahi dhammehi samannāgato bhikkhu alaṃsājīvo sabrahmacārīna’’nti. Catutthaṃ.
Footnotes:
Related texts:
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၅. ပဌမအာဃာတပဋိဝိနယသုတ္တာဒိဝဏ္ဏနာ • 1-5. Paṭhamaāghātapaṭivinayasuttādivaṇṇanā
