| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
10. ஸஜ்ஜா²யஸுத்தவண்ணனா
10. Sajjhāyasuttavaṇṇanā
230. த³ஸமே யங் ஸுத³ந்தி நிபாதமத்தங். ஸஜ்ஜா²யப³ஹுலோதி நிஸ்ஸரணபரியத்திவஸேன ஸஜ்ஜா²யனதோ ப³ஹுதரங் காலங் ஸஜ்ஜா²யந்தோ. ஸோ கிர ஆசரியஸ்ஸ தி³வாட்டா²னங் ஸம்மஜ்ஜித்வா ஆசரியங் உதி³க்க²ந்தோ திட்ட²தி. அத² நங் ஆக³ச்ச²ந்தங் தி³ஸ்வாவ பச்சுக்³க³ந்த்வா பத்தசீவரங் படிக்³க³ஹெத்வா பஞ்ஞத்தாஸனே நிஸின்னஸ்ஸ தாலவண்டவாதங் த³த்வா பானீயங் ஆபுச்சி²த்வா பாதே³ தோ⁴வித்வா தேலங் மக்கெ²த்வா வந்தி³த்வா டி²தோ உத்³தே³ஸங் க³ஹெத்வா யாவ ஸூரியத்த²ங்க³மா ஸஜ்ஜா²யங் கரோதி. ஸோ ந்ஹானகொட்ட²கே உத³கங் உபட்ட²பெத்வா அங்கா³ரகபல்லே அக்³கி³ங் கரோதி. ஆசரியஸ்ஸ ந்ஹத்வா ஆக³தஸ்ஸ பாதே³ஸு உத³கங் புஞ்சி²த்வா பிட்டி²பரிகம்மங் கத்வா வந்தி³த்வா உத்³தே³ஸங் க³ஹெத்வா பட²மயாமே ஸஜ்ஜா²யங் கத்வா மஜ்ஜி²மயாமே ஸரீரங் ஸமஸ்ஸாஸெத்வா பச்சி²மயாமே உத்³தே³ஸங் க³ஹெத்வா யாவ அருணுக்³க³மனா ஸஜ்ஜா²யங் கத்வா நிருத்³த⁴ஸத்³த³ங் க²யதோ ஸம்மஸதி. ததோ ஸேஸங் உபாதா³யரூபங் பூ⁴தரூபங் நாமரூபந்தி பஞ்சஸு க²ந்தே⁴ஸு விபஸ்ஸனங் வட்³டெ⁴த்வா அரஹத்தங் பாபுணி. அப்பொஸ்ஸுக்கோதி உத்³தே³ஸக்³க³ஹணே ச ஸஜ்ஜா²யகரணீயே ச நிருஸ்ஸுக்கோ. ஸங்கஸாயதீதி யஸ்ஸ தா³னி அத்தா²ய அஹங் ஸஜ்ஜா²யங் கரெய்யங், ஸோ மே அத்தோ² மத்த²கங் பத்தோ. கிங் மே இதா³னி ஸஜ்ஜா²யேனாதி ப²லஸமாபத்திஸுகே²ன காலங் அதிவத்தேதி. அஜ்ஜ²பா⁴ஸீதி, ‘‘கிங் நு கோ² அஸ்ஸ தே²ரஸ்ஸ அபா²ஸுகங் ஜாதங், உதா³ஹுஸ்ஸ ஆசரியஸ்ஸ? கேன நு கோ² காரணேன புப்³பே³ விய மது⁴ரஸ்ஸரேன ந ஸஜ்ஜா²யதீ’’தி? ஆக³ந்த்வா ஸந்திகே டி²தா அபா⁴ஸி.
230. Dasame yaṃ sudanti nipātamattaṃ. Sajjhāyabahuloti nissaraṇapariyattivasena sajjhāyanato bahutaraṃ kālaṃ sajjhāyanto. So kira ācariyassa divāṭṭhānaṃ sammajjitvā ācariyaṃ udikkhanto tiṭṭhati. Atha naṃ āgacchantaṃ disvāva paccuggantvā pattacīvaraṃ paṭiggahetvā paññattāsane nisinnassa tālavaṇṭavātaṃ datvā pānīyaṃ āpucchitvā pāde dhovitvā telaṃ makkhetvā vanditvā ṭhito uddesaṃ gahetvā yāva sūriyatthaṅgamā sajjhāyaṃ karoti. So nhānakoṭṭhake udakaṃ upaṭṭhapetvā aṅgārakapalle aggiṃ karoti. Ācariyassa nhatvā āgatassa pādesu udakaṃ puñchitvā piṭṭhiparikammaṃ katvā vanditvā uddesaṃ gahetvā paṭhamayāme sajjhāyaṃ katvā majjhimayāme sarīraṃ samassāsetvā pacchimayāme uddesaṃ gahetvā yāva aruṇuggamanā sajjhāyaṃ katvā niruddhasaddaṃ khayato sammasati. Tato sesaṃ upādāyarūpaṃ bhūtarūpaṃ nāmarūpanti pañcasu khandhesu vipassanaṃ vaḍḍhetvā arahattaṃ pāpuṇi. Appossukkoti uddesaggahaṇe ca sajjhāyakaraṇīye ca nirussukko. Saṅkasāyatīti yassa dāni atthāya ahaṃ sajjhāyaṃ kareyyaṃ, so me attho matthakaṃ patto. Kiṃ me idāni sajjhāyenāti phalasamāpattisukhena kālaṃ ativatteti. Ajjhabhāsīti, ‘‘kiṃ nu kho assa therassa aphāsukaṃ jātaṃ, udāhussa ācariyassa? Kena nu kho kāraṇena pubbe viya madhurassarena na sajjhāyatī’’ti? Āgantvā santike ṭhitā abhāsi.
த⁴ம்மபதா³னீதி இத⁴ ஸப்³ப³ம்பி பு³த்³த⁴வசனங் அதி⁴ப்பேதங் . நாதீ⁴யஸீதி ந ஸஜ்ஜா²யஸி. நாதி³யஸீதி வா பாடோ², ந க³ண்ஹாஸீதி அத்தோ². பஸங்ஸந்தி த⁴ம்மபா⁴ணகோ பஸங்ஸங் லப⁴தி, ஆபி⁴த⁴ம்மிகோ ஸுத்தந்திகோ வினயத⁴ரோதிஸ்ஸ பஸங்ஸிதா ப⁴வந்தி. விராகே³னாதி அரியமக்³கே³ன. அஞ்ஞாயாதி ஜானித்வா. நிக்கே²பனந்தி தஸ்ஸ தி³ட்ட²ஸுதாதி³னோ விஸ்ஸஜ்ஜனங் ஸந்தோ வத³ந்தீதி தீ³பேதி, ந பு³த்³த⁴வசனஸ்ஸ. எத்தாவதா ‘‘தே²ரோ பு³த்³த⁴வசனங் ந விஸ்ஸஜ்ஜாபேதீ’’தி ந நிச்சகாலங் ஸஜ்ஜா²யந்தேனேவ ப⁴விதப்³ப³ங், ஸஜ்ஜா²யித்வா பன – ‘‘எத்தகஸ்ஸாஹங் அத்த²ஸ்ஸ வா த⁴ம்மஸ்ஸ வா ஆதா⁴ரோ ப⁴விதுங் ஸமத்தோ²’’தி ஞத்வா வட்டது³க்க²ஸ்ஸ அந்தகிரியாய படிபஜ்ஜிதப்³ப³ங். த³ஸமங்.
Dhammapadānīti idha sabbampi buddhavacanaṃ adhippetaṃ . Nādhīyasīti na sajjhāyasi. Nādiyasīti vā pāṭho, na gaṇhāsīti attho. Pasaṃsanti dhammabhāṇako pasaṃsaṃ labhati, ābhidhammiko suttantiko vinayadharotissa pasaṃsitā bhavanti. Virāgenāti ariyamaggena. Aññāyāti jānitvā. Nikkhepananti tassa diṭṭhasutādino vissajjanaṃ santo vadantīti dīpeti, na buddhavacanassa. Ettāvatā ‘‘thero buddhavacanaṃ na vissajjāpetī’’ti na niccakālaṃ sajjhāyanteneva bhavitabbaṃ, sajjhāyitvā pana – ‘‘ettakassāhaṃ atthassa vā dhammassa vā ādhāro bhavituṃ samattho’’ti ñatvā vaṭṭadukkhassa antakiriyāya paṭipajjitabbaṃ. Dasamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 10. ஸஜ்ஜா²யஸுத்தங் • 10. Sajjhāyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 10. ஸஜ்ஜா²யஸுத்தவண்ணனா • 10. Sajjhāyasuttavaṇṇanā
