| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
১০. সজ্ঝাযসুত্তৰণ্ণনা
10. Sajjhāyasuttavaṇṇanā
২৩০. নিস্সরণপরিযত্তিৰসেনাতি অদ্ধা ইমং পরিযত্তিং নিস্সায ৰট্টদুক্খতো নিস্সরিতুং লব্ভাতি এৰং নিস্সরণপরিযত্তিৰসেন। সজ্ঝাযনতোতি ৰিমুত্তাযতনসীসে ঠত্ৰা সজ্ঝাযনতো। ইদানি তস্স নিস্সরণপরিযত্তিৰসেন সজ্ঝাযনকরণং, পটিপত্তিৰসেন ৰত্তপটিৰত্তকরণং, ৰিপস্সনাভাৰনঞ্চ দস্সেতুং ‘‘সো কিরা’’তিআদি ৰুত্তং। অরহত্তং পত্তদিৰসে পটিপত্তিকিত্তনায পুরিমদিৰসেসুপি তথা পটিপজ্জি, ৰিপস্সনং পন উস্সুক্কাপেতুং নাসক্খীতি দস্সেতি। কালং অতিৰত্তেতীতি ইদং ‘‘সঙ্কসাযতী’’তি পদস্স অত্থৰচনং। থেরস্সাতি সজ্ঝাযকত্থেরস্স।
230.Nissaraṇapariyattivasenāti addhā imaṃ pariyattiṃ nissāya vaṭṭadukkhato nissarituṃ labbhāti evaṃ nissaraṇapariyattivasena. Sajjhāyanatoti vimuttāyatanasīse ṭhatvā sajjhāyanato. Idāni tassa nissaraṇapariyattivasena sajjhāyanakaraṇaṃ, paṭipattivasena vattapaṭivattakaraṇaṃ, vipassanābhāvanañca dassetuṃ ‘‘so kirā’’tiādi vuttaṃ. Arahattaṃ pattadivase paṭipattikittanāya purimadivasesupi tathā paṭipajji, vipassanaṃ pana ussukkāpetuṃ nāsakkhīti dasseti. Kālaṃ ativattetīti idaṃ ‘‘saṅkasāyatī’’ti padassa atthavacanaṃ. Therassāti sajjhāyakattherassa.
ধম্মপদানীতি সীলাদিধম্মক্খন্ধদীপকানি পদানি। তেনাহ ‘‘সব্বম্পি বুদ্ধৰচনং অধিপ্পেত’’ন্তি। ন গণ্হাসি উদ্দেসন্তি অধিপ্পাযো। পাল়িযং ‘‘ভিক্খূহি সংৰসন্তো’’তি ইমিনা তেসং ধম্মস্সৰনত্থাযপি ধম্মো পরিযাপুণিতব্বোতি দস্সেতি। ৰিরজ্জতি এতেনাতি ৰিরাগো, অরিযমগ্গো। জানিত্ৰাতি পরিঞ্ঞাভিসমযৰসেন দিট্ঠসুতাদিং যাথাৰতো জানিত্ৰা পটিৰিজ্ঝিত্ৰা। ৰিস্সজ্জনন্তি পহানং। ন বুদ্ধৰচনস্স ৰিস্সজ্জনং। ভণ্ডাগারিকপরিযত্তিযাপি অনুঞ্ঞাতত্তা পগেৰ নিস্সরণত্থায, তত্থ পন মত্তা জানিতব্বাতি দস্সেন্তো ‘‘এত্তাৰতা’’তিআদিমাহ।
Dhammapadānīti sīlādidhammakkhandhadīpakāni padāni. Tenāha ‘‘sabbampi buddhavacanaṃ adhippeta’’nti. Na gaṇhāsi uddesanti adhippāyo. Pāḷiyaṃ ‘‘bhikkhūhi saṃvasanto’’ti iminā tesaṃ dhammassavanatthāyapi dhammo pariyāpuṇitabboti dasseti. Virajjati etenāti virāgo, ariyamaggo. Jānitvāti pariññābhisamayavasena diṭṭhasutādiṃ yāthāvato jānitvā paṭivijjhitvā. Vissajjananti pahānaṃ. Na buddhavacanassa vissajjanaṃ. Bhaṇḍāgārikapariyattiyāpi anuññātattā pageva nissaraṇatthāya, tattha pana mattā jānitabbāti dassento ‘‘ettāvatā’’tiādimāha.
সজ্ঝাযসুত্তৰণ্ণনা নিট্ঠিতা।
Sajjhāyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ১০. সজ্ঝাযসুত্তং • 10. Sajjhāyasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০. সজ্ঝাযসুত্তৰণ্ণনা • 10. Sajjhāyasuttavaṇṇanā
