| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. ஸகசிந்தனியவக்³கோ³
7. Sakacintaniyavaggo
1. ஸகசிந்தனியத்தே²ரஅபதா³னவண்ணனா
1. Sakacintaniyattheraapadānavaṇṇanā
பவனங் கானநங் தி³ஸ்வாதிஆதி³கங் ஆயஸ்மதோ ஸகசிந்தனியத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய தஸ்ஸ ப⁴க³வதோ ஆயுபரியோஸானே உப்பன்னோ த⁴ரமானங் ப⁴க³வந்தங் அபாபுணித்வா பரினிப்³பு³தகாலே இஸிபப்³ப³ஜ்ஜங் பப்³ப³ஜித்வா ஹிமவந்தே வஸந்தோ விவேகங் ரமணீயங் ஏகங் வனங் பத்வா தத்தே²வேகாய கந்த³ராய புலினசேதியங் கத்வா ப⁴க³வதி ஸஞ்ஞங் கத்வா ஸதா⁴துகஸஞ்ஞஞ்ச கத்வா வனபுப்பே²ஹி பூஜெத்வா நமஸ்ஸமானோ பரிசரி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ த்³வீஸு அக்³க³ங் அக்³க³ஸம்பத்திங் அக்³க³ஞ்ச சக்கவத்திஸம்பத்திங் அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ விப⁴வஸம்பன்னோ ஸத்³தா⁴ஸம்பன்னோ ஸத்த²ரி பஸீதி³த்வா பப்³ப³ஜித்வா அரஹா ச²ளபி⁴ஞ்ஞோ அஹோஸி.
Pavanaṃkānanaṃ disvātiādikaṃ āyasmato sakacintaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vuddhimanvāya tassa bhagavato āyupariyosāne uppanno dharamānaṃ bhagavantaṃ apāpuṇitvā parinibbutakāle isipabbajjaṃ pabbajitvā himavante vasanto vivekaṃ ramaṇīyaṃ ekaṃ vanaṃ patvā tatthevekāya kandarāya pulinacetiyaṃ katvā bhagavati saññaṃ katvā sadhātukasaññañca katvā vanapupphehi pūjetvā namassamāno paricari. So tena puññakammena devamanussesu saṃsaranto dvīsu aggaṃ aggasampattiṃ aggañca cakkavattisampattiṃ anubhavitvā imasmiṃ buddhuppāde ekasmiṃ kulagehe nibbatto vibhavasampanno saddhāsampanno satthari pasīditvā pabbajitvā arahā chaḷabhiñño ahosi.
1. ஸோ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பவனங் கானநங் தி³ஸ்வாதிஆதி³மாஹ. தத்த² பவனந்தி பகாரேன வனங் பத்த²டங் வித்தி²ண்ணங் க³ஹனபூ⁴தந்தி பவனங். கானநங் அவகுச்சி²தங் ஆனநங் அவஹனங் ஸததங் ஸீஹப்³யக்³க⁴யக்க²ரக்க²ஸமத்³த³ஹத்தி²அஸ்ஸஸுபண்ணஉரகே³ஹி விஹங்க³க³ணஸத்³த³குக்குடகோகிலேஹி வா ப³ஹலந்தி கானநங், தங் கானநஸங்கா²தங் பவனங் மனுஸ்ஸஸத்³த³விரஹிதத்தா அப்பஸத்³த³ங் நிஸ்ஸத்³த³ந்தி அத்தோ². அனாவிலந்தி ந ஆவிலங் உபத்³த³வரஹிதந்தி அத்தோ². இஸீனங் அனுசிண்ணந்தி பு³த்³த⁴பச்சேகபு³த்³த⁴அரஹந்தகீ²ணாஸவஸங்கா²தானங் இஸீனங் அனுசிண்ணங் நிஸேவிதந்தி அத்தோ². ஆஹுதீனங் படிக்³க³ஹந்தி ஆஹுனங் வுச்சதி பூஜாஸக்காரங் படிக்³க³ஹங் கே³ஹஸதி³ஸந்தி அத்தோ².
1. So attano pubbakammaṃ saritvā somanassajāto pubbacaritāpadānaṃ pakāsento pavanaṃ kānanaṃ disvātiādimāha. Tattha pavananti pakārena vanaṃ patthaṭaṃ vitthiṇṇaṃ gahanabhūtanti pavanaṃ. Kānanaṃ avakucchitaṃ ānanaṃ avahanaṃ satataṃ sīhabyagghayakkharakkhasamaddahatthiassasupaṇṇauragehi vihaṅgagaṇasaddakukkuṭakokilehi vā bahalanti kānanaṃ, taṃ kānanasaṅkhātaṃ pavanaṃ manussasaddavirahitattā appasaddaṃ nissaddanti attho. Anāvilanti na āvilaṃ upaddavarahitanti attho. Isīnaṃ anuciṇṇanti buddhapaccekabuddhaarahantakhīṇāsavasaṅkhātānaṃ isīnaṃ anuciṇṇaṃ nisevitanti attho. Āhutīnaṃpaṭiggahanti āhunaṃ vuccati pūjāsakkāraṃ paṭiggahaṃ gehasadisanti attho.
2. தூ²பங் கத்வான வேளுனாதி வேளுபேஸிகாஹி சேதியங் கத்வாதி அத்தோ². நானாபுப்ப²ங் ஸமோகிரிந்தி சம்பகாதீ³ஹி அனேகேஹி புப்பே²ஹி ஸமோகிரிங் பூஜேஸிந்தி அத்தோ². ஸம்முகா² விய ஸம்பு³த்³த⁴ந்தி ஸஜீவமானஸ்ஸ ஸம்பு³த்³த⁴ஸ்ஸ ஸம்முகா² இவ நிம்மிதங் உப்பாதி³தங் சேதியங் அஹங் அபி⁴ விஸேஸேன வந்தி³ங் பணாமமகாஸிந்தி அத்தோ². ஸேஸங் ஸுவிஞ்ஞெய்யமேவாதி.
2.Thūpaṃ katvāna veḷunāti veḷupesikāhi cetiyaṃ katvāti attho. Nānāpupphaṃ samokirinti campakādīhi anekehi pupphehi samokiriṃ pūjesinti attho. Sammukhā viya sambuddhanti sajīvamānassa sambuddhassa sammukhā iva nimmitaṃ uppāditaṃ cetiyaṃ ahaṃ abhi visesena vandiṃ paṇāmamakāsinti attho. Sesaṃ suviññeyyamevāti.
ஸகசிந்தனியத்தே²ரஅபதா³னவண்ணனா ஸமத்தா.
Sakacintaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. ஸகசிந்தனியத்தே²ரஅபதா³னங் • 1. Sakacintaniyattheraapadānaṃ
