| Library / Tipiṭaka / තිපිටක • Tipiṭaka / අපදාන-අට්‌ඨකථා • Apadāna-aṭṭhakathā |
7. සකචින්‌තනියවග්‌ගො
7. Sakacintaniyavaggo
1. සකචින්‌තනියත්‌ථෙරඅපදානවණ්‌ණනා
1. Sakacintaniyattheraapadānavaṇṇanā
පවනං කානනං දිස්‌වාතිආදිකං ආයස්‌මතො සකචින්‌තනියත්‌ථෙරස්‌ස අපදානං. අයම්‌පි පුරිමබුද්‌ධෙසු කතාධිකාරො තත්‌ථ තත්‌ථ භවෙ විවට්‌ටූපනිස්‌සයානි පුඤ්‌ඤානි උපචිනන්‌තො විපස්‌සිස්‌ස භගවතො කාලෙ එකස්‌මිං කුලගෙහෙ නිබ්‌බත්‌තො වුද්‌ධිමන්‌වාය තස්‌ස භගවතො ආයුපරියොසානෙ උප්‌පන්‌නො ධරමානං භගවන්‌තං අපාපුණිත්‌වා පරිනිබ්‌බුතකාලෙ ඉසිපබ්‌බජ්‌ජං පබ්‌බජිත්‌වා හිමවන්‌තෙ වසන්‌තො විවෙකං රමණීයං එකං වනං පත්‌වා තත්‌ථෙවෙකාය කන්‌දරාය පුලිනචෙතියං කත්‌වා භගවති සඤ්‌ඤං කත්‌වා සධාතුකසඤ්‌ඤඤ්‌ච කත්‌වා වනපුප්‌ඵෙහි පූජෙත්‌වා නමස්‌සමානො පරිචරි. සො තෙන පුඤ්‌ඤකම්‌මෙන දෙවමනුස්‌සෙසු සංසරන්‌තො ද්‌වීසු අග්‌ගං අග්‌ගසම්‌පත්‌තිං අග්‌ගඤ්‌ච චක්‌කවත්‌තිසම්‌පත්‌තිං අනුභවිත්‌වා ඉමස්‌මිං බුද්‌ධුප්‌පාදෙ එකස්‌මිං කුලගෙහෙ නිබ්‌බත්‌තො විභවසම්‌පන්‌නො සද්‌ධාසම්‌පන්‌නො සත්‌ථරි පසීදිත්‌වා පබ්‌බජිත්‌වා අරහා ඡළභිඤ්‌ඤො අහොසි.
Pavanaṃkānanaṃ disvātiādikaṃ āyasmato sakacintaniyattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle ekasmiṃ kulagehe nibbatto vuddhimanvāya tassa bhagavato āyupariyosāne uppanno dharamānaṃ bhagavantaṃ apāpuṇitvā parinibbutakāle isipabbajjaṃ pabbajitvā himavante vasanto vivekaṃ ramaṇīyaṃ ekaṃ vanaṃ patvā tatthevekāya kandarāya pulinacetiyaṃ katvā bhagavati saññaṃ katvā sadhātukasaññañca katvā vanapupphehi pūjetvā namassamāno paricari. So tena puññakammena devamanussesu saṃsaranto dvīsu aggaṃ aggasampattiṃ aggañca cakkavattisampattiṃ anubhavitvā imasmiṃ buddhuppāde ekasmiṃ kulagehe nibbatto vibhavasampanno saddhāsampanno satthari pasīditvā pabbajitvā arahā chaḷabhiñño ahosi.
1. සො අත්‌තනො පුබ්‌බකම්‌මං සරිත්‌වා සොමනස්‌සජාතො පුබ්‌බචරිතාපදානං පකාසෙන්‌තො පවනං කානනං දිස්‌වාතිආදිමාහ. තත්‌ථ පවනන්‌ති පකාරෙන වනං පත්‌ථටං විත්‌ථිණ්‌ණං ගහනභූතන්‌ති පවනං. කානනං අවකුච්‌ඡිතං ආනනං අවහනං සතතං සීහබ්‍යග්‌ඝයක්‌ඛරක්‌ඛසමද්‌දහත්‌ථිඅස්‌සසුපණ්‌ණඋරගෙහි විහඞ්‌ගගණසද්‌දකුක්‌කුටකොකිලෙහි වා බහලන්‌ති කානනං, තං කානනසඞ්‌ඛාතං පවනං මනුස්‌සසද්‌දවිරහිතත්‌තා අප්‌පසද්‌දං නිස්‌සද්‌දන්‌ති අත්‌ථො. අනාවිලන්‌ති න ආවිලං උපද්‌දවරහිතන්‌ති අත්‌ථො. ඉසීනං අනුචිණ්‌ණන්‌ති බුද්‌ධපච්‌චෙකබුද්‌ධඅරහන්‌තඛීණාසවසඞ්‌ඛාතානං ඉසීනං අනුචිණ්‌ණං නිසෙවිතන්‌ති අත්‌ථො. ආහුතීනං පටිග්‌ගහන්‌ති ආහුනං වුච්‌චති පූජාසක්‌කාරං පටිග්‌ගහං ගෙහසදිසන්‌ති අත්‌ථො.
1. So attano pubbakammaṃ saritvā somanassajāto pubbacaritāpadānaṃ pakāsento pavanaṃ kānanaṃ disvātiādimāha. Tattha pavananti pakārena vanaṃ patthaṭaṃ vitthiṇṇaṃ gahanabhūtanti pavanaṃ. Kānanaṃ avakucchitaṃ ānanaṃ avahanaṃ satataṃ sīhabyagghayakkharakkhasamaddahatthiassasupaṇṇauragehi vihaṅgagaṇasaddakukkuṭakokilehi vā bahalanti kānanaṃ, taṃ kānanasaṅkhātaṃ pavanaṃ manussasaddavirahitattā appasaddaṃ nissaddanti attho. Anāvilanti na āvilaṃ upaddavarahitanti attho. Isīnaṃ anuciṇṇanti buddhapaccekabuddhaarahantakhīṇāsavasaṅkhātānaṃ isīnaṃ anuciṇṇaṃ nisevitanti attho. Āhutīnaṃpaṭiggahanti āhunaṃ vuccati pūjāsakkāraṃ paṭiggahaṃ gehasadisanti attho.
2. ථූපං කත්‌වාන වෙළුනාති වෙළුපෙසිකාහි චෙතියං කත්‌වාති අත්‌ථො. නානාපුප්‌ඵං සමොකිරින්‌ති චම්‌පකාදීහි අනෙකෙහි පුප්‌ඵෙහි සමොකිරිං පූජෙසින්‌ති අත්‌ථො. සම්‌මුඛා විය සම්‌බුද්‌ධන්‌ති සජීවමානස්‌ස සම්‌බුද්‌ධස්‌ස සම්‌මුඛා ඉව නිම්‌මිතං උප්‌පාදිතං චෙතියං අහං අභි විසෙසෙන වන්‌දිං පණාමමකාසින්‌ති අත්‌ථො. සෙසං සුවිඤ්‌ඤෙය්‍යමෙවාති.
2.Thūpaṃ katvāna veḷunāti veḷupesikāhi cetiyaṃ katvāti attho. Nānāpupphaṃ samokirinti campakādīhi anekehi pupphehi samokiriṃ pūjesinti attho. Sammukhā viya sambuddhanti sajīvamānassa sambuddhassa sammukhā iva nimmitaṃ uppāditaṃ cetiyaṃ ahaṃ abhi visesena vandiṃ paṇāmamakāsinti attho. Sesaṃ suviññeyyamevāti.
සකචින්‌තනියත්‌ථෙරඅපදානවණ්‌ණනා සමත්‌තා.
Sakacintaniyattheraapadānavaṇṇanā samattā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / ඛුද්‌දකනිකාය • Khuddakanikāya / අපදානපාළි • Apadānapāḷi / 1. සකචින්‌තනියත්‌ථෙරඅපදානං • 1. Sakacintaniyattheraapadānaṃ
