| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[68] 8. ஸாகேதஜாதகவண்ணனா
[68] 8. Sāketajātakavaṇṇanā
யஸ்மிங் மனோ நிவிஸதீதி இத³ங் ஸத்தா² ஸாகேதங் நிஸ்ஸாய அஞ்ஜனவனே விஹரந்தோ ஏகங் ப்³ராஹ்மணங் ஆரப்³ப⁴ கதே²ஸி. ப⁴க³வதோ கிர பி⁴க்கு²ஸங்க⁴பரிவுதஸ்ஸ ஸாகேதங் பிண்டா³ய பவிஸனகாலே ஏகோ ஸாகேதனக³ரவாஸீ மஹல்லகப்³ராஹ்மணோ நக³ரதோ ப³ஹி க³ச்ச²ந்தோ அந்தரத்³வாரே த³ஸப³லங் தி³ஸ்வா பாதே³ஸு பதித்வா கொ³ப்ப²கேஸு கா³ள்ஹங் க³ஹெத்வா ‘‘தாத, நனு நாம புத்தேஹி ஜிண்ணகாலே மாதாபிதரோ படிஜக்³கி³தப்³பா³, கஸ்மா எத்தகங் காலங் அம்ஹாகங் அத்தானங் ந த³ஸ்ஸேஸி? மயா தாவ தி³ட்டோ²ஸி, மாதரங் பன பஸ்ஸிதுங் ஏஹீ’’தி ஸத்தா²ரங் க³ஹெத்வா அத்தனோ கே³ஹங் அக³மாஸி. ஸத்தா² தத்த² க³ந்த்வா நிஸீதி³ பஞ்ஞத்தே ஆஸனே ஸத்³தி⁴ங் பி⁴க்கு²ஸங்கே⁴ன. ப்³ராஹ்மணீபி ஆக³ந்த்வா ஸத்து² பாதே³ஸு பதித்வா ‘‘தாத, எத்தகங் காலங் கஹங் க³தோஸி, நனு நாம மாதாபிதரோ மஹல்லககாலே உபட்டா²தப்³பா³’’தி பரிதே³வி. புத்ததீ⁴தரோபி ‘‘ஏத², பா⁴தரங் வந்த³தா²’’தி வந்தா³பேஸி. உபோ⁴ துட்ட²மானஸா மஹாதா³னங் அத³ங்ஸு. ஸத்தா² ப⁴த்தகிச்சங் நிட்டா²பெத்வா தேஸங் த்³வின்னம்பி ஜனானங் ஜராஸுத்தங் (ஸு॰ நி॰ 810 ஆத³யோ) கதே²ஸி. ஸுத்தபரியோஸானே உபோ⁴பி அனாகா³மிப²லே பதிட்ட²ஹிங்ஸு. ஸத்தா² உட்டா²யாஸனா அஞ்ஜனவனமேவ அக³மாஸி.
Yasmiṃmano nivisatīti idaṃ satthā sāketaṃ nissāya añjanavane viharanto ekaṃ brāhmaṇaṃ ārabbha kathesi. Bhagavato kira bhikkhusaṅghaparivutassa sāketaṃ piṇḍāya pavisanakāle eko sāketanagaravāsī mahallakabrāhmaṇo nagarato bahi gacchanto antaradvāre dasabalaṃ disvā pādesu patitvā gopphakesu gāḷhaṃ gahetvā ‘‘tāta, nanu nāma puttehi jiṇṇakāle mātāpitaro paṭijaggitabbā, kasmā ettakaṃ kālaṃ amhākaṃ attānaṃ na dassesi? Mayā tāva diṭṭhosi, mātaraṃ pana passituṃ ehī’’ti satthāraṃ gahetvā attano gehaṃ agamāsi. Satthā tattha gantvā nisīdi paññatte āsane saddhiṃ bhikkhusaṅghena. Brāhmaṇīpi āgantvā satthu pādesu patitvā ‘‘tāta, ettakaṃ kālaṃ kahaṃ gatosi, nanu nāma mātāpitaro mahallakakāle upaṭṭhātabbā’’ti paridevi. Puttadhītaropi ‘‘etha, bhātaraṃ vandathā’’ti vandāpesi. Ubho tuṭṭhamānasā mahādānaṃ adaṃsu. Satthā bhattakiccaṃ niṭṭhāpetvā tesaṃ dvinnampi janānaṃ jarāsuttaṃ (su. ni. 810 ādayo) kathesi. Suttapariyosāne ubhopi anāgāmiphale patiṭṭhahiṃsu. Satthā uṭṭhāyāsanā añjanavanameva agamāsi.
பி⁴க்கூ² த⁴ம்மஸபா⁴யங் ஸன்னிஸின்னா கத²ங் ஸமுட்டா²பேஸுங் ‘‘ஆவுஸோ, ப்³ராஹ்மணோ ‘ததா²க³தஸ்ஸ பிதா ஸுத்³தோ⁴த³னோ, மாதா மஹாமாயா’தி ஜானாதி, ஜானந்தோவ ஸத்³தி⁴ங் ப்³ராஹ்மணியா ததா²க³தங் ‘அம்ஹாகங் புத்தோ’தி வத³தி, ஸத்தா²பி அதி⁴வாஸேதி. கிங் நு கோ² காரண’’ந்தி? ஸத்தா² தேஸங் கத²ங் ஸுத்வா ‘‘பி⁴க்க²வே, உபோ⁴பி தே அத்தனோ புத்தமேவ ‘புத்தோ’தி வத³ந்தீ’’தி வத்வா அதீதங் ஆஹரி.
Bhikkhū dhammasabhāyaṃ sannisinnā kathaṃ samuṭṭhāpesuṃ ‘‘āvuso, brāhmaṇo ‘tathāgatassa pitā suddhodano, mātā mahāmāyā’ti jānāti, jānantova saddhiṃ brāhmaṇiyā tathāgataṃ ‘amhākaṃ putto’ti vadati, satthāpi adhivāseti. Kiṃ nu kho kāraṇa’’nti? Satthā tesaṃ kathaṃ sutvā ‘‘bhikkhave, ubhopi te attano puttameva ‘putto’ti vadantī’’ti vatvā atītaṃ āhari.
பி⁴க்க²வே, அயங் ப்³ராஹ்மணோ அதீதே நிரந்தரங் பஞ்ச ஜாதிஸதானி மய்ஹங் பிதா அஹோஸி, பஞ்ச ஜாதிஸதானி சூளபிதா, பஞ்ச ஜாதிஸதானி மஹாபிதா. ஏஸாபி ப்³ராஹ்மணீ நிரந்தரமேவ பஞ்ச ஜாதிஸதானி மாதா அஹோஸி, பஞ்ச ஜாதிஸதானி சூளமாதா, பஞ்ச ஜாதிஸதானி மஹாமாதா. ஏவாஹங் தி³யட்³ட⁴ஜாதிஸஹஸ்ஸங் ப்³ராஹ்மணஸ்ஸ ஹத்தே² ஸங்வட்³டோ⁴, தி³யட்³ட⁴ஜாதிஸஹஸ்ஸங் ப்³ராஹ்மணியா ஹத்தே² ஸங்வட்³டோ⁴தி தீணி ஜாதிஸஹஸ்ஸானி கதெ²த்வா அபி⁴ஸம்பு³த்³தோ⁴ ஹுத்வா இமங் கா³த²மாஹ –
Bhikkhave, ayaṃ brāhmaṇo atīte nirantaraṃ pañca jātisatāni mayhaṃ pitā ahosi, pañca jātisatāni cūḷapitā, pañca jātisatāni mahāpitā. Esāpi brāhmaṇī nirantarameva pañca jātisatāni mātā ahosi, pañca jātisatāni cūḷamātā, pañca jātisatāni mahāmātā. Evāhaṃ diyaḍḍhajātisahassaṃ brāhmaṇassa hatthe saṃvaḍḍho, diyaḍḍhajātisahassaṃ brāhmaṇiyā hatthe saṃvaḍḍhoti tīṇi jātisahassāni kathetvā abhisambuddho hutvā imaṃ gāthamāha –
68.
68.
‘‘யஸ்மிங் மனோ நிவிஸதி, சித்தஞ்சாபி பஸீத³தி;
‘‘Yasmiṃ mano nivisati, cittañcāpi pasīdati;
அதி³ட்ட²புப்³ப³கே போஸே, காமங் தஸ்மிம்பி விஸ்ஸஸே’’தி.
Adiṭṭhapubbake pose, kāmaṃ tasmimpi vissase’’ti.
தத்த² யஸ்மிங் மனோ நிவிஸதீதி யஸ்மிங் புக்³க³லே தி³ட்ட²மத்தேயேவ சித்தங் பதிட்டா²தி. சித்தஞ்சாபி பஸீத³தீதி யஸ்மிங் தி³ட்ட²மத்தே சித்தங் பஸீத³தி, முது³கங் ஹோதி. அதி³ட்ட²புப்³ப³கே போஸேதி பகதியா தஸ்மிங் அத்தபா⁴வே அதி³ட்ட²புப்³பே³பி புக்³க³லே. காமங் தஸ்மிம்பி விஸ்ஸஸேதி அனுபூ⁴தபுப்³ப³ஸினேஹேனேவ தஸ்மிம்பி புக்³க³லே ஏகங்ஸேன விஸ்ஸஸே, விஸ்ஸாஸங் ஆபஜ்ஜதியேவாதி அத்தோ².
Tattha yasmiṃ mano nivisatīti yasmiṃ puggale diṭṭhamatteyeva cittaṃ patiṭṭhāti. Cittañcāpi pasīdatīti yasmiṃ diṭṭhamatte cittaṃ pasīdati, mudukaṃ hoti. Adiṭṭhapubbake poseti pakatiyā tasmiṃ attabhāve adiṭṭhapubbepi puggale. Kāmaṃ tasmimpi vissaseti anubhūtapubbasineheneva tasmimpi puggale ekaṃsena vissase, vissāsaṃ āpajjatiyevāti attho.
ஏவங் ஸத்தா² இமங் த⁴ம்மதே³ஸனங் ஆஹரித்வா அனுஸந்தி⁴ங் க⁴டெத்வா ஜாதகங் ஸமோதா⁴னேஸி – ‘‘ததா³ ப்³ராஹ்மணோ ச ப்³ராஹ்மணீ ச ஏதே ஏவ அஹேஸுங், புத்தோ பன அஹமேவ அஹோஸி’’ந்தி.
Evaṃ satthā imaṃ dhammadesanaṃ āharitvā anusandhiṃ ghaṭetvā jātakaṃ samodhānesi – ‘‘tadā brāhmaṇo ca brāhmaṇī ca ete eva ahesuṃ, putto pana ahameva ahosi’’nti.
ஸாகேதஜாதகவண்ணனா அட்ட²மா.
Sāketajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 68. ஸாகேதஜாதகங் • 68. Sāketajātakaṃ
