| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. সাকেতসুত্তং
3. Sāketasuttaṃ
৫১৩. এৰং মে সুতং – একং সমযং ভগৰা সাকেতে ৰিহরতি অঞ্জনৰনে মিগদাযে। তত্র খো ভগৰা ভিক্খূ আমন্তেসি – ‘‘অত্থি নু খো, ভিক্খৰে , পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তী’’তি?
513. Evaṃ me sutaṃ – ekaṃ samayaṃ bhagavā sākete viharati añjanavane migadāye. Tatra kho bhagavā bhikkhū āmantesi – ‘‘atthi nu kho, bhikkhave , pariyāyo yaṃ pariyāyaṃ āgamma yāni pañcindriyāni tāni pañca balāni honti, yāni pañca balāni tāni pañcindriyāni hontī’’ti?
‘‘ভগৰংমূলকা নো, ভন্তে, ধম্মা ভগৰংনেত্তিকা ভগৰংপটিসরণা। সাধু ৰত, ভন্তে, ভগৰন্তংযেৰ পটিভাতু এতস্স ভাসিতস্স অত্থো। ভগৰতো সুত্ৰা ভিক্খূ ধারেস্সন্তী’’তি। ‘‘অত্থি, ভিক্খৰে, পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তি’’।
‘‘Bhagavaṃmūlakā no, bhante, dhammā bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti. ‘‘Atthi, bhikkhave, pariyāyo yaṃ pariyāyaṃ āgamma yāni pañcindriyāni tāni pañca balāni honti, yāni pañca balāni tāni pañcindriyāni honti’’.
‘‘কতমো চ, ভিক্খৰে, পরিযাযো যং পরিযাযং আগম্ম যানি পঞ্চিন্দ্রিযানি তানি পঞ্চ বলানি হোন্তি, যানি পঞ্চ বলানি তানি পঞ্চিন্দ্রিযানি হোন্তি? যং, ভিক্খৰে, সদ্ধিন্দ্রিযং তং সদ্ধাবলং, যং সদ্ধাবলং তং সদ্ধিন্দ্রিযং; যং ৰীরিযিন্দ্রিযং তং ৰীরিযবলং, যং ৰীরিযবলং তং ৰীরিযিন্দ্রিযং; যং সতিন্দ্রিযং তং সতিবলং, যং সতিবলং তং সতিন্দ্রিযং; যং সমাধিন্দ্রিযং তং সমাধিবলং, যং সমাধিবলং তং সমাধিন্দ্রিযং; যং পঞ্ঞিন্দ্রিযং তং পঞ্ঞাবলং, যং পঞ্ঞাবলং তং পঞ্ঞিন্দ্রিযং। সেয্যথাপি, ভিক্খৰে, নদী পাচীননিন্না পাচীনপোণা পাচীনপব্ভারা, তস্স মজ্ঝে দীপো। অত্থি, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি 1। অত্থি পন, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি।
‘‘Katamo ca, bhikkhave, pariyāyo yaṃ pariyāyaṃ āgamma yāni pañcindriyāni tāni pañca balāni honti, yāni pañca balāni tāni pañcindriyāni honti? Yaṃ, bhikkhave, saddhindriyaṃ taṃ saddhābalaṃ, yaṃ saddhābalaṃ taṃ saddhindriyaṃ; yaṃ vīriyindriyaṃ taṃ vīriyabalaṃ, yaṃ vīriyabalaṃ taṃ vīriyindriyaṃ; yaṃ satindriyaṃ taṃ satibalaṃ, yaṃ satibalaṃ taṃ satindriyaṃ; yaṃ samādhindriyaṃ taṃ samādhibalaṃ, yaṃ samādhibalaṃ taṃ samādhindriyaṃ; yaṃ paññindriyaṃ taṃ paññābalaṃ, yaṃ paññābalaṃ taṃ paññindriyaṃ. Seyyathāpi, bhikkhave, nadī pācīnaninnā pācīnapoṇā pācīnapabbhārā, tassa majjhe dīpo. Atthi, bhikkhave, pariyāyo yaṃ pariyāyaṃ āgamma tassā nadiyā eko soto tveva saṅkhyaṃ gacchati 2. Atthi pana, bhikkhave, pariyāyo yaṃ pariyāyaṃ āgamma tassā nadiyā dve sotāni tveva saṅkhyaṃ gacchanti.
‘‘কতমো চ, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি? যঞ্চ, ভিক্খৰে, তস্স দীপস্স পুরিমন্তে 3 উদকং, যঞ্চ পচ্ছিমন্তে উদকং – অযং খো, ভিক্খৰে, পরিযাযো যং পরিযাযং আগম্ম তস্সা নদিযা একো সোতো ত্ৰেৰ সঙ্খ্যং গচ্ছতি।
‘‘Katamo ca, bhikkhave, pariyāyo yaṃ pariyāyaṃ āgamma tassā nadiyā eko soto tveva saṅkhyaṃ gacchati? Yañca, bhikkhave, tassa dīpassa purimante 4 udakaṃ, yañca pacchimante udakaṃ – ayaṃ kho, bhikkhave, pariyāyo yaṃ pariyāyaṃ āgamma tassā nadiyā eko soto tveva saṅkhyaṃ gacchati.
‘‘কতমো চ, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি? যঞ্চ, ভিক্খৰে, তস্স দীপস্স উত্তরন্তে উদকং, যঞ্চ দক্খিণন্তে উদকং – অযং খো, ভিক্খৰে, পরিযাযো যং পরিযাযং আগম্ম তস্সা নদিযা দ্ৰে সোতানি ত্ৰেৰ সঙ্খ্যং গচ্ছন্তি। এৰমেৰ খো, ভিক্খৰে, যং সদ্ধিন্দ্রিযং তং সদ্ধাবলং, যং সদ্ধাবলং তং সদ্ধিন্দ্রিযং; যং ৰীরিযিন্দ্রিযং তং ৰীরিযবলং, যং ৰীরিযবলং তং ৰীরিযিন্দ্রিযং; যং সতিন্দ্রিযং তং সতিবলং , যং সতিবলং তং সতিন্দ্রিযং; যং সমাধিন্দ্রিযং তং সমাধিবলং, যং সমাধিবলং তং সমাধিন্দ্রিযং; যং পঞ্ঞিন্দ্রিযং তং পঞ্ঞাবলং, যং পঞ্ঞাবলং তং পঞ্ঞিন্দ্রিযং। পঞ্চন্নং, ভিক্খৰে, ইন্দ্রিযানং ভাৰিতত্তা বহুলীকতত্তা ভিক্খু আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতী’’তি। ততিযং।
‘‘Katamo ca, bhikkhave, pariyāyo yaṃ pariyāyaṃ āgamma tassā nadiyā dve sotāni tveva saṅkhyaṃ gacchanti? Yañca, bhikkhave, tassa dīpassa uttarante udakaṃ, yañca dakkhiṇante udakaṃ – ayaṃ kho, bhikkhave, pariyāyo yaṃ pariyāyaṃ āgamma tassā nadiyā dve sotāni tveva saṅkhyaṃ gacchanti. Evameva kho, bhikkhave, yaṃ saddhindriyaṃ taṃ saddhābalaṃ, yaṃ saddhābalaṃ taṃ saddhindriyaṃ; yaṃ vīriyindriyaṃ taṃ vīriyabalaṃ, yaṃ vīriyabalaṃ taṃ vīriyindriyaṃ; yaṃ satindriyaṃ taṃ satibalaṃ , yaṃ satibalaṃ taṃ satindriyaṃ; yaṃ samādhindriyaṃ taṃ samādhibalaṃ, yaṃ samādhibalaṃ taṃ samādhindriyaṃ; yaṃ paññindriyaṃ taṃ paññābalaṃ, yaṃ paññābalaṃ taṃ paññindriyaṃ. Pañcannaṃ, bhikkhave, indriyānaṃ bhāvitattā bahulīkatattā bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. সাকেতসুত্তৰণ্ণনা • 3. Sāketasuttavaṇṇanā
