১-৬০. সকিংসম্মজ্জকত্থেরঅপদানাদিৰণ্ণনা

1-60. Sakiṃsammajjakattheraapadānādivaṇṇanā

তেচত্তালীসমৰগ্গে সব্বথেরাপদানানি উত্তানানেৰ। কেৰলং থেরানং নামনানত্তং পুঞ্ঞনানত্তঞ্চ ৰিসেসো।

Tecattālīsamavagge sabbatherāpadānāni uttānāneva. Kevalaṃ therānaṃ nāmanānattaṃ puññanānattañca viseso.

চতুচত্তালীসমে ৰগ্গেপি সব্বানি অপদানানি পাকটানেৰ। কেৰলং পুঞ্ঞনানত্তং ফলনানত্তঞ্চ ৰিসেসো।

Catucattālīsame vaggepi sabbāni apadānāni pākaṭāneva. Kevalaṃ puññanānattaṃ phalanānattañca viseso.

১. পঞ্চচত্তালীসমৰগ্গে পঠমাপদানে ককুসন্ধো মহাৰীরোতিআদিকং আযস্মতো ৰিভীটকমিঞ্জিযত্থেরস্স অপদানং।

1. Pañcacattālīsamavagge paṭhamāpadāne kakusandho mahāvīrotiādikaṃ āyasmato vibhīṭakamiñjiyattherassa apadānaṃ.

২. তত্থ বীজমিঞ্জমদাসহন্তি ৰিভীটকফলানি ফালেত্ৰা বীজানি মিঞ্জানি গহেত্ৰা মধুসক্করাহি যোজেত্ৰা ককুসন্ধস্স ভগৰতো অদাসিন্তি অত্থো। দুতিযাপদানাদীনি সব্বানি সুৰিঞ্ঞেয্যানেৰ, থেরানং নামনানত্তাদীনিপি পাঠানুসারেন ৰেদিতব্বানি।

2. Tattha bījamiñjamadāsahanti vibhīṭakaphalāni phāletvā bījāni miñjāni gahetvā madhusakkarāhi yojetvā kakusandhassa bhagavato adāsinti attho. Dutiyāpadānādīni sabbāni suviññeyyāneva, therānaṃ nāmanānattādīnipi pāṭhānusārena veditabbāni.

১. ছচত্তালীসমে ৰগ্গে পঠমাপদানে জগতিং কারযিং অহন্তি উত্তমবোধিরুক্খস্স সমন্ততো আল়িন্দং অহং কারযিন্তি অত্থো। সেসানি দুতিযাপদানাদীনি সব্বানিপি উত্তানানেৰ।

1. Chacattālīsame vagge paṭhamāpadāne jagatiṃ kārayiṃ ahanti uttamabodhirukkhassa samantato āḷindaṃ ahaṃ kārayinti attho. Sesāni dutiyāpadānādīni sabbānipi uttānāneva.

সত্তচত্তালীসমে ৰগ্গে পঠমাপদানাদীনি পাল়িঅনুসারেন সুৰিঞ্ঞেয্যানেৰ।

Sattacattālīsame vagge paṭhamāpadānādīni pāḷianusārena suviññeyyāneva.

অট্ঠচত্তালীসমে ৰগ্গে পঠমদুতিযাপদানানি উত্তানানেৰ।

Aṭṭhacattālīsame vagge paṭhamadutiyāpadānāni uttānāneva.

৩০. ততিযাপদানে কোসিযো নাম ভগৰাতি কোসিযগোত্তে জাতত্তা কোসিযো নাম পচ্চেকবুদ্ধোতি অত্থো। চিত্তকূটেতি চিত্তকূটকেলাসকূটসানুকূটাদীসু অনোতত্তদহং পটিচ্ছাদেত্ৰা ঠিতপব্বতকূটেসু নানারতনওসধাদীহি ৰিচিত্তে চিত্তকূটপব্বতে সো পচ্চেকবুদ্ধো ৰসীতি অত্থো।

30. Tatiyāpadāne kosiyo nāma bhagavāti kosiyagotte jātattā kosiyo nāma paccekabuddhoti attho. Cittakūṭeti cittakūṭakelāsakūṭasānukūṭādīsu anotattadahaṃ paṭicchādetvā ṭhitapabbatakūṭesu nānāratanaosadhādīhi vicitte cittakūṭapabbate so paccekabuddho vasīti attho.

চতুত্থপঞ্চমাপদানানি উত্তানানেৰ।

Catutthapañcamāpadānāni uttānāneva.

৫৬. ছট্ঠাপদানে কুসট্ঠকমদাসহন্তি পক্খিকভত্তউপোসথিকভত্তধুরভত্তসলাকভত্তাদীসু কুসপণ্ণৰসেন দাতব্বং অট্ঠসলাকভত্তং অহং অদাসিন্তি অত্থো।

56. Chaṭṭhāpadāne kusaṭṭhakamadāsahanti pakkhikabhattauposathikabhattadhurabhattasalākabhattādīsu kusapaṇṇavasena dātabbaṃ aṭṭhasalākabhattaṃ ahaṃ adāsinti attho.

৬১. সত্তমাপদানে সোভিতো নাম সম্বুদ্ধোতি আরোহপরিণাহদ্ৰত্তিংসমহাপুরিসলক্খণব্যামপ্পভাদীহি সোভমানসরীরত্তা সোভিতো নাম সম্মাসম্বুদ্ধোতি অত্থো।

61. Sattamāpadāne sobhito nāma sambuddhoti ārohapariṇāhadvattiṃsamahāpurisalakkhaṇabyāmappabhādīhi sobhamānasarīrattā sobhito nāma sammāsambuddhoti attho.

৬৬. অট্ঠমাপদানে তক্করাযং ৰসী তদাতি তং দসপুঞ্ঞকিরিযৰত্থুং করোন্তা জনা পটিৰসন্তি এত্থাতি তক্করা, রাজধানী। তিস্সং তক্করাযং, তদা ৰসীতি অত্থো।

66. Aṭṭhamāpadāne takkarāyaṃ vasī tadāti taṃ dasapuññakiriyavatthuṃ karontā janā paṭivasanti etthāti takkarā, rājadhānī. Tissaṃ takkarāyaṃ, tadā vasīti attho.

৭২. নৰমাপদানে পানধিং সুকতং গয্হাতি উপাহনযুগং সুন্দরাকারেন নিপ্ফাদিতং গহেত্ৰাতি অত্থো। দসমাপদানং সুৰিঞ্ঞেয্যমেৰাতি।

72. Navamāpadāne pānadhiṃ sukataṃ gayhāti upāhanayugaṃ sundarākārena nipphāditaṃ gahetvāti attho. Dasamāpadānaṃ suviññeyyamevāti.

অট্ঠচত্তালীসমৰগ্গৰণ্ণনা নিট্ঠিতা।

Aṭṭhacattālīsamavaggavaṇṇanā niṭṭhitā.

Next: ৪৯. পংসুকূলৰগ্গো • 49. Paṃsukūlavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact