१-६०. सकिंसम्मज्‍जकत्थेरअपदानादिवण्णना

1-60. Sakiṃsammajjakattheraapadānādivaṇṇanā

तेचत्तालीसमवग्गे सब्बथेरापदानानि उत्तानानेव। केवलं थेरानं नामनानत्तं पुञ्‍ञनानत्तञ्‍च विसेसो।

Tecattālīsamavagge sabbatherāpadānāni uttānāneva. Kevalaṃ therānaṃ nāmanānattaṃ puññanānattañca viseso.

चतुचत्तालीसमे वग्गेपि सब्बानि अपदानानि पाकटानेव। केवलं पुञ्‍ञनानत्तं फलनानत्तञ्‍च विसेसो।

Catucattālīsame vaggepi sabbāni apadānāni pākaṭāneva. Kevalaṃ puññanānattaṃ phalanānattañca viseso.

१. पञ्‍चचत्तालीसमवग्गे पठमापदाने ककुसन्धो महावीरोतिआदिकं आयस्मतो विभीटकमिञ्‍जियत्थेरस्स अपदानं।

1. Pañcacattālīsamavagge paṭhamāpadāne kakusandho mahāvīrotiādikaṃ āyasmato vibhīṭakamiñjiyattherassa apadānaṃ.

२. तत्थ बीजमिञ्‍जमदासहन्ति विभीटकफलानि फालेत्वा बीजानि मिञ्‍जानि गहेत्वा मधुसक्‍कराहि योजेत्वा ककुसन्धस्स भगवतो अदासिन्ति अत्थो। दुतियापदानादीनि सब्बानि सुविञ्‍ञेय्यानेव, थेरानं नामनानत्तादीनिपि पाठानुसारेन वेदितब्बानि।

2. Tattha bījamiñjamadāsahanti vibhīṭakaphalāni phāletvā bījāni miñjāni gahetvā madhusakkarāhi yojetvā kakusandhassa bhagavato adāsinti attho. Dutiyāpadānādīni sabbāni suviññeyyāneva, therānaṃ nāmanānattādīnipi pāṭhānusārena veditabbāni.

१. छचत्तालीसमे वग्गे पठमापदाने जगतिं कारयिं अहन्ति उत्तमबोधिरुक्खस्स समन्ततो आळिन्दं अहं कारयिन्ति अत्थो। सेसानि दुतियापदानादीनि सब्बानिपि उत्तानानेव।

1. Chacattālīsame vagge paṭhamāpadāne jagatiṃ kārayiṃ ahanti uttamabodhirukkhassa samantato āḷindaṃ ahaṃ kārayinti attho. Sesāni dutiyāpadānādīni sabbānipi uttānāneva.

सत्तचत्तालीसमे वग्गे पठमापदानादीनि पाळिअनुसारेन सुविञ्‍ञेय्यानेव।

Sattacattālīsame vagge paṭhamāpadānādīni pāḷianusārena suviññeyyāneva.

अट्ठचत्तालीसमे वग्गे पठमदुतियापदानानि उत्तानानेव।

Aṭṭhacattālīsame vagge paṭhamadutiyāpadānāni uttānāneva.

३०. ततियापदाने कोसियो नाम भगवाति कोसियगोत्ते जातत्ता कोसियो नाम पच्‍चेकबुद्धोति अत्थो। चित्तकूटेति चित्तकूटकेलासकूटसानुकूटादीसु अनोतत्तदहं पटिच्छादेत्वा ठितपब्बतकूटेसु नानारतनओसधादीहि विचित्ते चित्तकूटपब्बते सो पच्‍चेकबुद्धो वसीति अत्थो।

30. Tatiyāpadāne kosiyo nāma bhagavāti kosiyagotte jātattā kosiyo nāma paccekabuddhoti attho. Cittakūṭeti cittakūṭakelāsakūṭasānukūṭādīsu anotattadahaṃ paṭicchādetvā ṭhitapabbatakūṭesu nānāratanaosadhādīhi vicitte cittakūṭapabbate so paccekabuddho vasīti attho.

चतुत्थपञ्‍चमापदानानि उत्तानानेव।

Catutthapañcamāpadānāni uttānāneva.

५६. छट्ठापदाने कुसट्ठकमदासहन्ति पक्खिकभत्तउपोसथिकभत्तधुरभत्तसलाकभत्तादीसु कुसपण्णवसेन दातब्बं अट्ठसलाकभत्तं अहं अदासिन्ति अत्थो।

56. Chaṭṭhāpadāne kusaṭṭhakamadāsahanti pakkhikabhattauposathikabhattadhurabhattasalākabhattādīsu kusapaṇṇavasena dātabbaṃ aṭṭhasalākabhattaṃ ahaṃ adāsinti attho.

६१. सत्तमापदाने सोभितो नाम सम्बुद्धोति आरोहपरिणाहद्वत्तिंसमहापुरिसलक्खणब्यामप्पभादीहि सोभमानसरीरत्ता सोभितो नाम सम्मासम्बुद्धोति अत्थो।

61. Sattamāpadāne sobhito nāma sambuddhoti ārohapariṇāhadvattiṃsamahāpurisalakkhaṇabyāmappabhādīhi sobhamānasarīrattā sobhito nāma sammāsambuddhoti attho.

६६. अट्ठमापदाने तक्‍करायं वसी तदाति तं दसपुञ्‍ञकिरियवत्थुं करोन्ता जना पटिवसन्ति एत्थाति तक्‍करा, राजधानी। तिस्सं तक्‍करायं, तदा वसीति अत्थो।

66. Aṭṭhamāpadāne takkarāyaṃ vasī tadāti taṃ dasapuññakiriyavatthuṃ karontā janā paṭivasanti etthāti takkarā, rājadhānī. Tissaṃ takkarāyaṃ, tadā vasīti attho.

७२. नवमापदाने पानधिं सुकतं गय्हाति उपाहनयुगं सुन्दराकारेन निप्फादितं गहेत्वाति अत्थो। दसमापदानं सुविञ्‍ञेय्यमेवाति।

72. Navamāpadāne pānadhiṃ sukataṃ gayhāti upāhanayugaṃ sundarākārena nipphāditaṃ gahetvāti attho. Dasamāpadānaṃ suviññeyyamevāti.

अट्ठचत्तालीसमवग्गवण्णना निट्ठिता।

Aṭṭhacattālīsamavaggavaṇṇanā niṭṭhitā.

Next: ४९. पंसुकूलवग्गो • 49. Paṃsukūlavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact