๑-๖๐. สกิํสมฺมชฺชกเตฺถรอปทานาทิวณฺณนา

1-60. Sakiṃsammajjakattheraapadānādivaṇṇanā

เตจตฺตาลีสมวเคฺค สพฺพเถราปทานานิ อุตฺตานาเนวฯ เกวลํ เถรานํ นามนานตฺตํ ปุญฺญนานตฺตญฺจ วิเสโสฯ

Tecattālīsamavagge sabbatherāpadānāni uttānāneva. Kevalaṃ therānaṃ nāmanānattaṃ puññanānattañca viseso.

จตุจตฺตาลีสเม วเคฺคปิ สพฺพานิ อปทานานิ ปากฎาเนวฯ เกวลํ ปุญฺญนานตฺตํ ผลนานตฺตญฺจ วิเสโสฯ

Catucattālīsame vaggepi sabbāni apadānāni pākaṭāneva. Kevalaṃ puññanānattaṃ phalanānattañca viseso.

๑. ปญฺจจตฺตาลีสมวเคฺค ปฐมาปทาเน กกุสโนฺธ มหาวีโรติอาทิกํ อายสฺมโต วิภีฎกมิญฺชิยเตฺถรสฺส อปทานํฯ

1. Pañcacattālīsamavagge paṭhamāpadāne kakusandho mahāvīrotiādikaṃ āyasmato vibhīṭakamiñjiyattherassa apadānaṃ.

๒. ตตฺถ พีชมิญฺชมทาสหนฺติ วิภีฎกผลานิ ผาเลตฺวา พีชานิ มิญฺชานิ คเหตฺวา มธุสกฺกราหิ โยเชตฺวา กกุสนฺธสฺส ภควโต อทาสินฺติ อโตฺถฯ ทุติยาปทานาทีนิ สพฺพานิ สุวิเญฺญยฺยาเนว, เถรานํ นามนานตฺตาทีนิปิ ปาฐานุสาเรน เวทิตพฺพานิฯ

2. Tattha bījamiñjamadāsahanti vibhīṭakaphalāni phāletvā bījāni miñjāni gahetvā madhusakkarāhi yojetvā kakusandhassa bhagavato adāsinti attho. Dutiyāpadānādīni sabbāni suviññeyyāneva, therānaṃ nāmanānattādīnipi pāṭhānusārena veditabbāni.

๑. ฉจตฺตาลีสเม วเคฺค ปฐมาปทาเน ชคติํ การยิํ อหนฺติ อุตฺตมโพธิรุกฺขสฺส สมนฺตโต อาฬินฺทํ อหํ การยินฺติ อโตฺถฯ เสสานิ ทุติยาปทานาทีนิ สพฺพานิปิ อุตฺตานาเนวฯ

1. Chacattālīsame vagge paṭhamāpadāne jagatiṃ kārayiṃ ahanti uttamabodhirukkhassa samantato āḷindaṃ ahaṃ kārayinti attho. Sesāni dutiyāpadānādīni sabbānipi uttānāneva.

สตฺตจตฺตาลีสเม วเคฺค ปฐมาปทานาทีนิ ปาฬิอนุสาเรน สุวิเญฺญยฺยาเนวฯ

Sattacattālīsame vagge paṭhamāpadānādīni pāḷianusārena suviññeyyāneva.

อฎฺฐจตฺตาลีสเม วเคฺค ปฐมทุติยาปทานานิ อุตฺตานาเนวฯ

Aṭṭhacattālīsame vagge paṭhamadutiyāpadānāni uttānāneva.

๓๐. ตติยาปทาเน โกสิโย นาม ภควาติ โกสิยโคเตฺต ชาตตฺตา โกสิโย นาม ปเจฺจกพุโทฺธติ อโตฺถฯ จิตฺตกูเฎติ จิตฺตกูฎเกลาสกูฎสานุกูฎาทีสุ อโนตตฺตทหํ ปฎิจฺฉาเทตฺวา ฐิตปพฺพตกูเฎสุ นานารตนโอสธาทีหิ วิจิเตฺต จิตฺตกูฎปพฺพเต โส ปเจฺจกพุโทฺธ วสีติ อโตฺถฯ

30. Tatiyāpadāne kosiyo nāma bhagavāti kosiyagotte jātattā kosiyo nāma paccekabuddhoti attho. Cittakūṭeti cittakūṭakelāsakūṭasānukūṭādīsu anotattadahaṃ paṭicchādetvā ṭhitapabbatakūṭesu nānāratanaosadhādīhi vicitte cittakūṭapabbate so paccekabuddho vasīti attho.

จตุตฺถปญฺจมาปทานานิ อุตฺตานาเนวฯ

Catutthapañcamāpadānāni uttānāneva.

๕๖. ฉฎฺฐาปทาเน กุสฎฺฐกมทาสหนฺติ ปกฺขิกภตฺตอุโปสถิกภตฺตธุรภตฺตสลากภตฺตาทีสุ กุสปณฺณวเสน ทาตพฺพํ อฎฺฐสลากภตฺตํ อหํ อทาสินฺติ อโตฺถฯ

56. Chaṭṭhāpadāne kusaṭṭhakamadāsahanti pakkhikabhattauposathikabhattadhurabhattasalākabhattādīsu kusapaṇṇavasena dātabbaṃ aṭṭhasalākabhattaṃ ahaṃ adāsinti attho.

๖๑. สตฺตมาปทาเน โสภิโต นาม สมฺพุโทฺธติ อาโรหปริณาหทฺวตฺติํสมหาปุริสลกฺขณพฺยามปฺปภาทีหิ โสภมานสรีรตฺตา โสภิโต นาม สมฺมาสมฺพุโทฺธติ อโตฺถฯ

61. Sattamāpadāne sobhito nāma sambuddhoti ārohapariṇāhadvattiṃsamahāpurisalakkhaṇabyāmappabhādīhi sobhamānasarīrattā sobhito nāma sammāsambuddhoti attho.

๖๖. อฎฺฐมาปทาเน ตกฺกรายํ วสี ตทาติ ตํ ทสปุญฺญกิริยวตฺถุํ กโรนฺตา ชนา ปฎิวสนฺติ เอตฺถาติ ตกฺกรา, ราชธานีฯ ติสฺสํ ตกฺกรายํ, ตทา วสีติ อโตฺถฯ

66. Aṭṭhamāpadāne takkarāyaṃ vasī tadāti taṃ dasapuññakiriyavatthuṃ karontā janā paṭivasanti etthāti takkarā, rājadhānī. Tissaṃ takkarāyaṃ, tadā vasīti attho.

๗๒. นวมาปทาเน ปานธิํ สุกตํ คยฺหาติ อุปาหนยุคํ สุนฺทรากาเรน นิปฺผาทิตํ คเหตฺวาติ อโตฺถฯ ทสมาปทานํ สุวิเญฺญยฺยเมวาติฯ

72. Navamāpadāne pānadhiṃ sukataṃ gayhāti upāhanayugaṃ sundarākārena nipphāditaṃ gahetvāti attho. Dasamāpadānaṃ suviññeyyamevāti.

อฎฺฐจตฺตาลีสมวคฺควณฺณนา นิฎฺฐิตาฯ

Aṭṭhacattālīsamavaggavaṇṇanā niṭṭhitā.

Next: ๔๙. ปํสุกูลวโคฺค • 49. Paṃsukūlavaggo

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact