Library / Tipiṭaka / ติปิฎก • Tipiṭaka / อปทานปาฬิ • Apadānapāḷi

ฯ นโม ตสฺส ภควโต อรหโต สมฺมาสมฺพุทฺธสฺสฯ

Namo tassa bhagavato arahato sammāsambuddhassa

ขุทฺทกนิกาเย

Khuddakanikāye

เถราปทานปาฬิ

Therāpadānapāḷi

(ทุติโย ภาโค)

(Dutiyo bhāgo)

๔๓. สกิํสมฺมชฺชกวโคฺค

43. Sakiṃsammajjakavaggo

๑. สกิํสมฺมชฺชกเตฺถรอปทานํ

1. Sakiṃsammajjakattheraapadānaṃ

๑.

‘‘วิปสฺสิโน ภควโต, ปาฎลิํ โพธิมุตฺตมํ;

‘‘Vipassino bhagavato, pāṭaliṃ bodhimuttamaṃ;

ทิสฺวาว ตํ ปาทปคฺคํ, ตตฺถ จิตฺตํ ปสาทยิํฯ

Disvāva taṃ pādapaggaṃ, tattha cittaṃ pasādayiṃ.

๒.

‘‘สมฺมชฺชนิํ คเหตฺวาน, โพธิํ สมฺมชฺชิ ตาวเท;

‘‘Sammajjaniṃ gahetvāna, bodhiṃ sammajji tāvade;

สมฺมชฺชิตฺวาน ตํ โพธิํ, อวนฺทิํ ปาฎลิํ อหํฯ

Sammajjitvāna taṃ bodhiṃ, avandiṃ pāṭaliṃ ahaṃ.

๓.

‘‘ตตฺถ จิตฺตํ ปสาเทตฺวา, สิเร กตฺวาน อญฺชลิํ;

‘‘Tattha cittaṃ pasādetvā, sire katvāna añjaliṃ;

นมสฺสมาโน ตํ โพธิํ, คญฺฉิํ ปฎิกุฎิํ อหํฯ

Namassamāno taṃ bodhiṃ, gañchiṃ paṭikuṭiṃ ahaṃ.

๔.

‘‘ตาทิมเคฺคน คจฺฉามิ, สรโนฺต โพธิมุตฺตมํ;

‘‘Tādimaggena gacchāmi, saranto bodhimuttamaṃ;

อชคโร มํ ปีเฬสิ, โฆรรูโป มหพฺพโลฯ

Ajagaro maṃ pīḷesi, ghorarūpo mahabbalo.

๕.

‘‘อาสเนฺน เม กตํ กมฺมํ, ผเลน โตสยี มมํ;

‘‘Āsanne me kataṃ kammaṃ, phalena tosayī mamaṃ;

กเฬวรํ เม คิลติ, เทวโลเก รมามหํฯ

Kaḷevaraṃ me gilati, devaloke ramāmahaṃ.

๖.

‘‘อนาวิลํ มม จิตฺตํ, วิสุทฺธํ ปณฺฑรํ สทา;

‘‘Anāvilaṃ mama cittaṃ, visuddhaṃ paṇḍaraṃ sadā;

โสกสลฺลํ น ชานามิ, จิตฺตสนฺตาปนํ มมฯ

Sokasallaṃ na jānāmi, cittasantāpanaṃ mama.

๗.

‘‘กุฎฺฐํ คโณฺฑ กิลาโส จ, อปมาโร วิตจฺฉิกา;

‘‘Kuṭṭhaṃ gaṇḍo kilāso ca, apamāro vitacchikā;

ททฺทุ กณฺฑุ จ เม นตฺถิ, ผลํ สมฺมชฺชนายิทํ ¹ฯ

Daddu kaṇḍu ca me natthi, phalaṃ sammajjanāyidaṃ ².

๘.

‘‘โสโก จ ปริเทโว จ, หทเย เม น วิชฺชติ;

‘‘Soko ca paridevo ca, hadaye me na vijjati;

อภนฺตํ อุชุกํ จิตฺตํ, ผลํ สมฺมชฺชนายิทํฯ

Abhantaṃ ujukaṃ cittaṃ, phalaṃ sammajjanāyidaṃ.

๙.

‘‘สมาธีสุ น มชฺชามิ ³, วิสทํ โหติ มานสํ;

‘‘Samādhīsu na majjāmi ⁴, visadaṃ hoti mānasaṃ;

ยํ ยํ สมาธิมิจฺฉามิ, โส โส สมฺปชฺชเต มมํฯ

Yaṃ yaṃ samādhimicchāmi, so so sampajjate mamaṃ.

๑๐.

10.

‘‘รชนีเย น รชฺชามิ, อโถ ทุสฺสนิเยสุ ⁵ จ;

‘‘Rajanīye na rajjāmi, atho dussaniyesu ⁶ ca;

โมหนีเย น มุยฺหามิ, ผลํ สมฺมชฺชนายิทํฯ

Mohanīye na muyhāmi, phalaṃ sammajjanāyidaṃ.

๑๑.

11.

‘‘เอกนวุติโต ⁷ กเปฺป, ยํ กมฺมมกริํ ตทา;

‘‘Ekanavutito ⁸ kappe, yaṃ kammamakariṃ tadā;

ทุคฺคติํ นาภิชานามิ, ผลํ สมฺมชฺชนายิทํฯ

Duggatiṃ nābhijānāmi, phalaṃ sammajjanāyidaṃ.

๑๒.

12.

‘‘กิเลสา ฌาปิตา มยฺหํ, ภวา สเพฺพ สมูหตา;

‘‘Kilesā jhāpitā mayhaṃ, bhavā sabbe samūhatā;

นาโคว พนฺธนํ เฉตฺวา, วิหรามิ อนาสโวฯ

Nāgova bandhanaṃ chetvā, viharāmi anāsavo.

๑๓.

13.

‘‘สฺวาคตํ วต เม อาสิ, มม พุทฺธสฺส สนฺติเก;

‘‘Svāgataṃ vata me āsi, mama buddhassa santike;

ติโสฺส วิชฺชา อนุปฺปตฺตา, กตํ พุทฺธสฺส สาสนํฯ

Tisso vijjā anuppattā, kataṃ buddhassa sāsanaṃ.

๑๔.

14.

‘‘ปฎิสมฺภิทา จตโสฺส, วิโมกฺขาปิ จ อฎฺฐิเม;

‘‘Paṭisambhidā catasso, vimokkhāpi ca aṭṭhime;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

Chaḷabhiññā sacchikatā, kataṃ buddhassa sāsanaṃ’’.

อิตฺถํ สุทํ อายสฺมา สกิํสมฺมชฺชโก เถโร อิมา คาถาโย

Itthaṃ sudaṃ āyasmā sakiṃsammajjako thero imā gāthāyo

อภาสิตฺถาติฯ

Abhāsitthāti.

สกิํสมฺมชฺชกเตฺถรสฺสาปทานํ ปฐมํฯ

Sakiṃsammajjakattherassāpadānaṃ paṭhamaṃ.

Next: ๒. เอกทุสฺสทายกเตฺถรอปทานํ • 2. Ekadussadāyakattheraapadānaṃ

Footnotes:

1. สมฺมชฺชเน อิทํ (สี.)

2. sammajjane idaṃ (sī.)

3. สมาธีสุ น สชฺชามิ (สี.), สมาธิํ ปุน ปชฺชามิ (สฺยา)

4. samādhīsu na sajjāmi (sī.), samādhiṃ puna pajjāmi (syā)

5. โทสนิเยสุ (สี. สฺยา. ก.)

6. dosaniyesu (sī. syā. ka.)

7. เอกนวุเต อิโต (สี. สฺยา.)

8. ekanavute ito (sī. syā.)

Related texts:

อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact