| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
৪. সক্কচ্চৰগ্গৰণ্ণনা
4. Sakkaccavaggavaṇṇanā
৬০৮. চতুত্থৰগ্গে সপদানন্তি এত্থ দানং ৰুচ্চতি অৰখণ্ডনং, অপেতং দানতো অপদানং, অনৰখণ্ডনন্তি অত্থো। সহ অপদানেন সপদানং, অৰখণ্ডনৰিরহিতং , অনুপটিপাটিযাতি ৰুত্তং হোতি। তেনাহ ‘‘তত্থ তত্থ ওধিং অকত্ৰা অনুপটিপাটিযা’’তি।
608. Catutthavagge sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, anavakhaṇḍananti attho. Saha apadānena sapadānaṃ, avakhaṇḍanavirahitaṃ , anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā anupaṭipāṭiyā’’ti.
৬১১. যস্মিং সমযে ‘‘পাণো ন হন্তব্বো’’তি রাজানো ভেরিং চরাপেন্তি, অযং মাঘাতসমযো নাম। ইধ অনাপত্তিযং গিলানো ন আগতো, তস্মা গিলানস্সপি আপত্তি। সূপোদনৰিঞ্ঞত্তিসিক্খাপদে অসঞ্চিচ্চ অস্সতিযাতি এত্থ ‘‘মুখে পক্খিপিত্ৰা পুন ৰিপ্পটিসারী হুত্ৰা ছড্ডেন্তস্স অরুচিযা পৰিসন্তে ‘অসঞ্চিচ্চা’তি ৰুচ্চতি, ৰিঞ্ঞত্তিম্পি অৰিঞ্ঞত্তিম্পি এতস্মিং ঠানে ঠিতং সহসা গহেত্ৰা ভুঞ্জন্তে ‘অস্সতিযা’তি ৰুচ্চতী’’তি তীসুপি গণ্ঠিপদেসু ৰুত্তং।
611. Yasmiṃ samaye ‘‘pāṇo na hantabbo’’ti rājāno bheriṃ carāpenti, ayaṃ māghātasamayo nāma. Idha anāpattiyaṃ gilāno na āgato, tasmā gilānassapi āpatti. Sūpodanaviññattisikkhāpade asañcicca assatiyāti ettha ‘‘mukhe pakkhipitvā puna vippaṭisārī hutvā chaḍḍentassa aruciyā pavisante ‘asañciccā’ti vuccati, viññattimpi aviññattimpi etasmiṃ ṭhāne ṭhitaṃ sahasā gahetvā bhuñjante ‘assatiyā’ti vuccatī’’ti tīsupi gaṇṭhipadesu vuttaṃ.
৬১৪-৬১৫. উজ্ঝানে সঞ্ঞা উজ্ঝানসঞ্ঞা, সা অস্স অত্থীতি উজ্ঝানসঞ্ঞী। ‘‘মযূরণ্ডং অতিমহন্ত’’ন্তি ৰচনতো মযূরণ্ডপ্পমাণো কবল়ো ন ৰট্টতি। কেচি পন ‘‘মযূরণ্ডতো মহন্তো ন ৰট্টতী’’তি ৰদন্তি, তং ন গহেতব্বং, ‘‘নাতিমহন্ত’’ন্তি চ অতিমহন্তস্সেৰ পটিক্খিত্তত্তা খুদ্দকে আপত্তি ন দিস্সতি। ‘‘মযূরণ্ডং অতিমহন্তং, কুক্কুটণ্ডং অতিখুদ্দকং, তেসং ৰেমজ্ঝপ্পমাণো’’তি ইমিনা পন সারুপ্পৰসেন খুদ্দকম্পি পটিক্খিপিত্ৰা পরিচ্ছেদো ন দস্সিতোতি ৰেদিতব্বং।
614-615. Ujjhāne saññā ujjhānasaññā, sā assa atthīti ujjhānasaññī. ‘‘Mayūraṇḍaṃ atimahanta’’nti vacanato mayūraṇḍappamāṇo kabaḷo na vaṭṭati. Keci pana ‘‘mayūraṇḍato mahanto na vaṭṭatī’’ti vadanti, taṃ na gahetabbaṃ, ‘‘nātimahanta’’nti ca atimahantasseva paṭikkhittattā khuddake āpatti na dissati. ‘‘Mayūraṇḍaṃ atimahantaṃ, kukkuṭaṇḍaṃ atikhuddakaṃ, tesaṃ vemajjhappamāṇo’’ti iminā pana sāruppavasena khuddakampi paṭikkhipitvā paricchedo na dassitoti veditabbaṃ.
সক্কচ্চৰগ্গৰণ্ণনা নিট্ঠিতা।
Sakkaccavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. সক্কচ্চৰগ্গো • 4. Sakkaccavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৪. সক্কচ্চৰগ্গৰণ্ণনা • 4. Sakkaccavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৪. সক্কচ্চৰগ্গৰণ্ণনা • 4. Sakkaccavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. সক্কচ্চৰগ্গ-অত্থযোজনা • 4. Sakkaccavagga-atthayojanā
