| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
৪. সক্কচ্চৰগ্গৰণ্ণনা
4. Sakkaccavaggavaṇṇanā
৬০৮. চতুত্থৰগ্গাদীসু সপদানন্তি এত্থ দানং ৰুচ্চতি অৰখণ্ডনং, অপেতং দানতো অপদানং, সহ অপদানেন সপদানং, অৰখণ্ডনৰিরহিতং অনুপটিপাটিযাতি ৰুত্তং হোতি। তেনাহ ‘‘তত্থ তত্থ ওধিং অকত্ৰা’’তিআদি।
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
৬১১. ৰিঞ্ঞত্তিযন্তি সূপোদনৰিঞ্ঞত্তিসিক্খাপদং সন্ধায ৰদতি। ‘‘ৰত্তব্বং নত্থী’’তি ইমিনা পাল়িযাৰ সব্বং ৰিঞ্ঞাযতীতি দস্সেতি। তত্থ পাল়িযং অসঞ্চিচ্চাতিআদীসু ৰত্থুমত্তং ঞত্ৰা ভুঞ্জনেন আপত্তিং আপজ্জন্তস্সেৰ পুন পণ্ণত্তিং ঞত্ৰা মুখগতং ছড্ডেতুকামস্স যং অরুচিযা পৰিট্ঠং, তং অসঞ্চিচ্চ পৰিট্ঠং নাম, তত্থ অনাপত্তি। তদেৰ পুন অঞ্ঞৰিহিততায ৰা অৰিঞ্ঞত্তমিদন্তিসঞ্ঞায ৰা ভুঞ্জনে ‘‘অসতিযা’’তি ৰুচ্চতি।
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
৬১৩. ‘‘অঞ্ঞস্সত্থাযা’’তি ইদমস্স সিক্খাপদস্স অত্তনো অত্থায ৰিঞ্ঞাপেত্ৰা সযং ভুঞ্জনে এৰ পঞ্ঞত্তত্তা ইমিনা সিক্খাপদেন অনাপত্তিং সন্ধায ৰুত্তং। পঞ্চসহধম্মিকানং পন অত্থায অঞ্ঞাতকঅপ্পৰারিতট্ঠানে ৰিঞ্ঞাপেন্তো ৰিঞ্ঞত্তিক্খণে অট্ঠকথাসু সুত্তানুলোমতো ৰুত্তঅকতৰিঞ্ঞত্তিদুক্কটতো ন মুচ্চতি। সঞ্চিচ্চ ভুঞ্জনক্খণে সযঞ্চ অঞ্ঞে চ মিচ্ছাজীৰতো ন মুচ্চন্তীতি গহেতব্বং।
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
৬১৫. ‘‘কুক্কুটণ্ডং অতিখুদ্দক’’ন্তি ইদং অসারুপ্পৰসেন ৰুত্তং, অতিমহন্তে এৰ আপত্তীতি দট্ঠব্বং। ভুঞ্জন্তেন পন চোরাদিভযং পটিচ্চ মহন্তম্পি অপরিমণ্ডলম্পি কত্ৰা সীঘং ভুঞ্জনৰসেনেত্থ আপদা। এৰমঞ্ঞেসুপি যথানুরূপং দট্ঠব্বং।
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
সক্কচ্চৰগ্গৰণ্ণনা নিট্ঠিতা।
Sakkaccavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৪. সক্কচ্চৰগ্গো • 4. Sakkaccavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ৪. সক্কচ্চৰগ্গৰণ্ণনা • 4. Sakkaccavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৪. সক্কচ্চৰগ্গৰণ্ণনা • 4. Sakkaccavaggavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ৪. সক্কচ্চৰগ্গ-অত্থযোজনা • 4. Sakkaccavagga-atthayojanā
