| Library / Tipiṭaka / ติปิฎก • Tipiṭaka / วิมติวิโนทนี-ฎีกา • Vimativinodanī-ṭīkā |
๔. สกฺกจฺจวคฺควณฺณนา
4. Sakkaccavaggavaṇṇanā
๖๐๘. จตุตฺถวคฺคาทีสุ สปทานนฺติ เอตฺถ ทานํ วุจฺจติ อวขณฺฑนํ, อเปตํ ทานโต อปทานํ, สห อปทาเนน สปทานํ, อวขณฺฑนวิรหิตํ อนุปฎิปาฎิยาติ วุตฺตํ โหติฯ เตนาห ‘‘ตตฺถ ตตฺถ โอธิํ อกตฺวา’’ติอาทิฯ
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
๖๑๑. วิญฺญตฺติยนฺติ สูโปทนวิญฺญตฺติสิกฺขาปทํ สนฺธาย วทติฯ ‘‘วตฺตพฺพํ นตฺถี’’ติ อิมินา ปาฬิยาว สพฺพํ วิญฺญายตีติ ทเสฺสติฯ ตตฺถ ปาฬิยํ อสญฺจิจฺจาติอาทีสุ วตฺถุมตฺตํ ญตฺวา ภุญฺชเนน อาปตฺติํ อาปชฺชนฺตเสฺสว ปุน ปณฺณตฺติํ ญตฺวา มุขคตํ ฉเฑฺฑตุกามสฺส ยํ อรุจิยา ปวิฎฺฐํ, ตํ อสญฺจิจฺจ ปวิฎฺฐํ นาม, ตตฺถ อนาปตฺติฯ ตเทว ปุน อญฺญวิหิตตาย วา อวิญฺญตฺตมิทนฺติสญฺญาย วา ภุญฺชเน ‘‘อสติยา’’ติ วุจฺจติฯ
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
๖๑๓. ‘‘อญฺญสฺสตฺถายา’’ติ อิทมสฺส สิกฺขาปทสฺส อตฺตโน อตฺถาย วิญฺญาเปตฺวา สยํ ภุญฺชเน เอว ปญฺญตฺตตฺตา อิมินา สิกฺขาปเทน อนาปตฺติํ สนฺธาย วุตฺตํฯ ปญฺจสหธมฺมิกานํ ปน อตฺถาย อญฺญาตกอปฺปวาริตฎฺฐาเน วิญฺญาเปโนฺต วิญฺญตฺติกฺขเณ อฎฺฐกถาสุ สุตฺตานุโลมโต วุตฺตอกตวิญฺญตฺติทุกฺกฎโต น มุจฺจติฯ สญฺจิจฺจ ภุญฺชนกฺขเณ สยญฺจ อเญฺญ จ มิจฺฉาชีวโต น มุจฺจนฺตีติ คเหตพฺพํฯ
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
๖๑๕. ‘‘กุกฺกุฎณฺฑํ อติขุทฺทก’’นฺติ อิทํ อสารุปฺปวเสน วุตฺตํ, อติมหเนฺต เอว อาปตฺตีติ ทฎฺฐพฺพํฯ ภุญฺชเนฺตน ปน โจราทิภยํ ปฎิจฺจ มหนฺตมฺปิ อปริมณฺฑลมฺปิ กตฺวา สีฆํ ภุญฺชนวเสเนตฺถ อาปทาฯ เอวมเญฺญสุปิ ยถานุรูปํ ทฎฺฐพฺพํฯ
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
สกฺกจฺจวคฺควณฺณนา นิฎฺฐิตาฯ
Sakkaccavaggavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวิภงฺค • Mahāvibhaṅga / ๔. สกฺกจฺจวโคฺค • 4. Sakkaccavaggo
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวิภงฺค-อฎฺฐกถา • Mahāvibhaṅga-aṭṭhakathā / ๔. สกฺกจฺจวคฺควณฺณนา • 4. Sakkaccavaggavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / สารตฺถทีปนี-ฎีกา • Sāratthadīpanī-ṭīkā / ๔. สกฺกจฺจวคฺควณฺณนา • 4. Sakkaccavaggavaṇṇanā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / ปาจิตฺยาทิโยชนาปาฬิ • Pācityādiyojanāpāḷi / ๔. สกฺกจฺจวคฺค-อตฺถโยชนา • 4. Sakkaccavagga-atthayojanā
