| Library / Tipiṭaka / တိပိဋက • Tipiṭaka / ဝိမတိဝိနောဒနီ-ဋီကာ • Vimativinodanī-ṭīkā |
၄. သက္ကစ္စဝဂ္ဂဝဏ္ဏနာ
4. Sakkaccavaggavaṇṇanā
၆၀၈. စတုတ္ထဝဂ္ဂာဒီသု သပဒာနန္တိ ဧတ္ထ ဒာနံ ဝုစ္စတိ အဝခဏ္ဍနံ, အပေတံ ဒာနတော အပဒာနံ, သဟ အပဒာနေန သပဒာနံ, အဝခဏ္ဍနဝိရဟိတံ အနုပဋိပာဋိယာတိ ဝုတ္တံ ဟောတိ။ တေနာဟ ‘‘တတ္ထ တတ္ထ ဩဓိံ အကတ္ဝာ’’တိအာဒိ။
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
၆၁၁. ဝိညတ္တိယန္တိ သူပောဒနဝိညတ္တိသိက္ခာပဒံ သန္ဓာယ ဝဒတိ။ ‘‘ဝတ္တဗ္ဗံ နတ္ထီ’’တိ ဣမိနာ ပာဠိယာဝ သဗ္ဗံ ဝိညာယတီတိ ဒသ္သေတိ။ တတ္ထ ပာဠိယံ အသဉ္စိစ္စာတိအာဒီသု ဝတ္ထုမတ္တံ ဉတ္ဝာ ဘုဉ္ဇနေန အာပတ္တိံ အာပဇ္ဇန္တသ္သေဝ ပုန ပဏ္ဏတ္တိံ ဉတ္ဝာ မုခဂတံ ဆဍ္ဍေတုကာမသ္သ ယံ အရုစိယာ ပဝိဋ္ဌံ, တံ အသဉ္စိစ္စ ပဝိဋ္ဌံ နာမ, တတ္ထ အနာပတ္တိ။ တဒေဝ ပုန အညဝိဟိတတာယ ဝာ အဝိညတ္တမိဒန္တိသညာယ ဝာ ဘုဉ္ဇနေ ‘‘အသတိယာ’’တိ ဝုစ္စတိ။
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
၆၁၃. ‘‘အညသ္သတ္ထာယာ’’တိ ဣဒမသ္သ သိက္ခာပဒသ္သ အတ္တနော အတ္ထာယ ဝိညာပေတ္ဝာ သယံ ဘုဉ္ဇနေ ဧဝ ပညတ္တတ္တာ ဣမိနာ သိက္ခာပဒေန အနာပတ္တိံ သန္ဓာယ ဝုတ္တံ။ ပဉ္စသဟဓမ္မိကာနံ ပန အတ္ထာယ အညာတကအပ္ပဝာရိတဋ္ဌာနေ ဝိညာပေန္တော ဝိညတ္တိက္ခဏေ အဋ္ဌကထာသု သုတ္တာနုလောမတော ဝုတ္တအကတဝိညတ္တိဒုက္ကဋတော န မုစ္စတိ။ သဉ္စိစ္စ ဘုဉ္ဇနက္ခဏေ သယဉ္စ အညေ စ မိစ္ဆာဇီဝတော န မုစ္စန္တီတိ ဂဟေတဗ္ဗံ။
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
၆၁၅. ‘‘ကုက္ကုဋဏ္ဍံ အတိခုဒ္ဒက’’န္တိ ဣဒံ အသာရုပ္ပဝသေန ဝုတ္တံ, အတိမဟန္တေ ဧဝ အာပတ္တီတိ ဒဋ္ဌဗ္ဗံ။ ဘုဉ္ဇန္တေန ပန စောရာဒိဘယံ ပဋိစ္စ မဟန္တမ္ပိ အပရိမဏ္ဍလမ္ပိ ကတ္ဝာ သီဃံ ဘုဉ္ဇနဝသေနေတ္ထ အာပဒာ။ ဧဝမညေသုပိ ယထာနုရူပံ ဒဋ္ဌဗ္ဗံ။
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
သက္ကစ္စဝဂ္ဂဝဏ္ဏနာ နိဋ္ဌိတာ။
Sakkaccavaggavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / ဝိနယပိဋက • Vinayapiṭaka / မဟာဝိဘင္ဂ • Mahāvibhaṅga / ၄. သက္ကစ္စဝဂ္ဂော • 4. Sakkaccavaggo
အဋ္ဌကထာ • Aṭṭhakathā / ဝိနယပိဋက (အဋ္ဌကထာ) • Vinayapiṭaka (aṭṭhakathā) / မဟာဝိဘင္ဂ-အဋ္ဌကထာ • Mahāvibhaṅga-aṭṭhakathā / ၄. သက္ကစ္စဝဂ္ဂဝဏ္ဏနာ • 4. Sakkaccavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / သာရတ္ထဒီပနီ-ဋီကာ • Sāratthadīpanī-ṭīkā / ၄. သက္ကစ္စဝဂ္ဂဝဏ္ဏနာ • 4. Sakkaccavaggavaṇṇanā
ဋီကာ • Tīkā / ဝိနယပိဋက (ဋီကာ) • Vinayapiṭaka (ṭīkā) / ပာစိတ္ယာဒိယောဇနာပာဠိ • Pācityādiyojanāpāḷi / ၄. သက္ကစ္စဝဂ္ဂ-အတ္ထယောဇနာ • 4. Sakkaccavagga-atthayojanā
