| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
4. සක්‌කච්‌චවග්‌ගවණ්‌ණනා
4. Sakkaccavaggavaṇṇanā
608. චතුත්‌ථවග්‌ගාදීසු සපදානන්‌ති එත්‌ථ දානං වුච්‌චති අවඛණ්‌ඩනං, අපෙතං දානතො අපදානං, සහ අපදානෙන සපදානං, අවඛණ්‌ඩනවිරහිතං අනුපටිපාටියාති වුත්‌තං හොති. තෙනාහ ‘‘තත්‌ථ තත්‌ථ ඔධිං අකත්‌වා’’තිආදි.
608. Catutthavaggādīsu sapadānanti ettha dānaṃ vuccati avakhaṇḍanaṃ, apetaṃ dānato apadānaṃ, saha apadānena sapadānaṃ, avakhaṇḍanavirahitaṃ anupaṭipāṭiyāti vuttaṃ hoti. Tenāha ‘‘tattha tattha odhiṃ akatvā’’tiādi.
611. විඤ්‌ඤත්‌තියන්‌ති සූපොදනවිඤ්‌ඤත්‌තිසික්‌ඛාපදං සන්‌ධාය වදති. ‘‘වත්‌තබ්‌බං නත්‌ථී’’ති ඉමිනා පාළියාව සබ්‌බං විඤ්‌ඤායතීති දස්‌සෙති. තත්‌ථ පාළියං අසඤ්‌චිච්‌චාතිආදීසු වත්‌ථුමත්‌තං ඤත්‌වා භුඤ්‌ජනෙන ආපත්‌තිං ආපජ්‌ජන්‌තස්‌සෙව පුන පණ්‌ණත්‌තිං ඤත්‌වා මුඛගතං ඡඩ්‌ඩෙතුකාමස්‌ස යං අරුචියා පවිට්‌ඨං, තං අසඤ්‌චිච්‌ච පවිට්‌ඨං නාම, තත්‌ථ අනාපත්‌ති. තදෙව පුන අඤ්‌ඤවිහිතතාය වා අවිඤ්‌ඤත්‌තමිදන්‌තිසඤ්‌ඤාය වා භුඤ්‌ජනෙ ‘‘අසතියා’’ති වුච්‌චති.
611.Viññattiyanti sūpodanaviññattisikkhāpadaṃ sandhāya vadati. ‘‘Vattabbaṃ natthī’’ti iminā pāḷiyāva sabbaṃ viññāyatīti dasseti. Tattha pāḷiyaṃ asañciccātiādīsu vatthumattaṃ ñatvā bhuñjanena āpattiṃ āpajjantasseva puna paṇṇattiṃ ñatvā mukhagataṃ chaḍḍetukāmassa yaṃ aruciyā paviṭṭhaṃ, taṃ asañcicca paviṭṭhaṃ nāma, tattha anāpatti. Tadeva puna aññavihitatāya vā aviññattamidantisaññāya vā bhuñjane ‘‘asatiyā’’ti vuccati.
613. ‘‘අඤ්‌ඤස්‌සත්‌ථායා’’ති ඉදමස්‌ස සික්‌ඛාපදස්‌ස අත්‌තනො අත්‌ථාය විඤ්‌ඤාපෙත්‌වා සයං භුඤ්‌ජනෙ එව පඤ්‌ඤත්‌තත්‌තා ඉමිනා සික්‌ඛාපදෙන අනාපත්‌තිං සන්‌ධාය වුත්‌තං. පඤ්‌චසහධම්‌මිකානං පන අත්‌ථාය අඤ්‌ඤාතකඅප්‌පවාරිතට්‌ඨානෙ විඤ්‌ඤාපෙන්‌තො විඤ්‌ඤත්‌තික්‌ඛණෙ අට්‌ඨකථාසු සුත්‌තානුලොමතො වුත්‌තඅකතවිඤ්‌ඤත්‌තිදුක්‌කටතො න මුච්‌චති. සඤ්‌චිච්‌ච භුඤ්‌ජනක්‌ඛණෙ සයඤ්‌ච අඤ්‌ඤෙ ච මිච්‌ඡාජීවතො න මුච්‌චන්‌තීති ගහෙතබ්‌බං.
613.‘‘Aññassatthāyā’’ti idamassa sikkhāpadassa attano atthāya viññāpetvā sayaṃ bhuñjane eva paññattattā iminā sikkhāpadena anāpattiṃ sandhāya vuttaṃ. Pañcasahadhammikānaṃ pana atthāya aññātakaappavāritaṭṭhāne viññāpento viññattikkhaṇe aṭṭhakathāsu suttānulomato vuttaakataviññattidukkaṭato na muccati. Sañcicca bhuñjanakkhaṇe sayañca aññe ca micchājīvato na muccantīti gahetabbaṃ.
615. ‘‘කුක්‌කුටණ්‌ඩං අතිඛුද්‌දක’’න්‌ති ඉදං අසාරුප්‌පවසෙන වුත්‌තං, අතිමහන්‌තෙ එව ආපත්‌තීති දට්‌ඨබ්‌බං. භුඤ්‌ජන්‌තෙන පන චොරාදිභයං පටිච්‌ච මහන්‌තම්‌පි අපරිමණ්‌ඩලම්‌පි කත්‌වා සීඝං භුඤ්‌ජනවසෙනෙත්‌ථ ආපදා. එවමඤ්‌ඤෙසුපි යථානුරූපං දට්‌ඨබ්‌බං.
615.‘‘Kukkuṭaṇḍaṃ atikhuddaka’’nti idaṃ asāruppavasena vuttaṃ, atimahante eva āpattīti daṭṭhabbaṃ. Bhuñjantena pana corādibhayaṃ paṭicca mahantampi aparimaṇḍalampi katvā sīghaṃ bhuñjanavasenettha āpadā. Evamaññesupi yathānurūpaṃ daṭṭhabbaṃ.
සක්‌කච්‌චවග්‌ගවණ්‌ණනා නිට්‌ඨිතා.
Sakkaccavaggavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 4. සක්‌කච්‌චවග්‌ගො • 4. Sakkaccavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 4. සක්‌කච්‌චවග්‌ගවණ්‌ණනා • 4. Sakkaccavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 4. සක්‌කච්‌චවග්‌ගවණ්‌ණනා • 4. Sakkaccavaggavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 4. සක්‌කච්‌චවග්‌ග-අත්‌ථයොජනා • 4. Sakkaccavagga-atthayojanā
