| Library / Tipiṭaka / ཏིཔིཊཀ • Tipiṭaka / ཝཛིརབུདྡྷི-ཊཱིཀཱ • Vajirabuddhi-ṭīkā |
༤. སཀྐཙྩཝགྒཝཎྞནཱ
4. Sakkaccavaggavaṇṇanā
༦༠༩. སཱུཔོདནཝིཉྙཏྟིསིཀྑཱཔདེ ‘‘སཱུཔོ ནཱམ དྭེ སཱུཔཱ’’ཏི ན ཝུཏྟཾ སཱུཔགྒཧཎེན པཎཱིཏབྷོཛནེཧི ཨཝསེསཱནཾ སབྦབྷོཛནཱནཾ སངྒཎྷནཏྠཾ། ཨནཱཔཏྟིཝཱརེ ཙསྶ ‘‘ཉཱཏཀཱནཾ པཝཱརིཏཱནཾ ཨཉྙསྶཏྠཱཡ ཨཏྟནོ དྷནེནཱ’’ཏི ཨིདཾ ཨདྷིཀཾ། ཀཏྠཙི པོཏྠཀེ ‘‘ཨནཱཔཏྟི ཨསཉྩིཙྩ ཨསཏིཡཱ ཨཛཱནནྟསྶ གིལཱནསྶ ཨཱཔདཱསཱུ’’ཏི ཨེཏྟཀམེཝ ཝུཏྟཾ, ཏཾ ན, ‘‘སམསཱུཔཀཾ པིཎྜཔཱཏཾ བྷུཉྫིསྶཱམཱི’’ཏི ཨིམསྶ ཨནཱཔཏྟིཝཱརེ ‘‘ཨཉྙསྶཏྠཱཡཱ’’ཏི ཀཏྠཙི ལིཁིཏཾ, ཏཉྩ པམཱདཝསེན ལིཁིཏཾ། ‘‘མུཁེ པཀྑིཔིཏྭཱ པུན ཝིཔྤཊིསཱརཱི ཧུཏྭཱ ཨོགིལིཏུཀཱམསྶཔི སཧསཱ ཙེ པཝིསཏི, ཨེཏྠ ‘ཨསཉྩིཙྩཱ’ཏི ཝུཙྩཏི། ཝིཉྙཏྟམྤི ཨཝིཉྙཏྟམྤི ཨེཀསྨིཾ ཋཱནེ ཋིཏཾ སཧསཱ ཨནུཔདྷཱརེཏྭཱ གཧེཏྭཱ བྷུཉྫནྟོ ‘ཨསཏིཡཱ’ཏི ཝུཙྩཏཱི’’ཏི ལིཁིཏཾ, ཨནཱཔཏྟིཝཱརེ ཨེཀཙྩེསུ པོཏྠཀེསུ ‘‘རསརསེཏི ལིཁིཏཾ, ཏཾ གཧེཏབྦ’’ནྟི ཝུཏྟཾ།
609.Sūpodanaviññattisikkhāpade ‘‘sūpo nāma dve sūpā’’ti na vuttaṃ sūpaggahaṇena paṇītabhojanehi avasesānaṃ sabbabhojanānaṃ saṅgaṇhanatthaṃ. Anāpattivāre cassa ‘‘ñātakānaṃ pavāritānaṃ aññassatthāya attano dhanenā’’ti idaṃ adhikaṃ. Katthaci potthake ‘‘anāpatti asañcicca asatiyā ajānantassa gilānassa āpadāsū’’ti ettakameva vuttaṃ, taṃ na, ‘‘samasūpakaṃ piṇḍapātaṃ bhuñjissāmī’’ti imassa anāpattivāre ‘‘aññassatthāyā’’ti katthaci likhitaṃ, tañca pamādavasena likhitaṃ. ‘‘Mukhe pakkhipitvā puna vippaṭisārī hutvā ogilitukāmassapi sahasā ce pavisati, ettha ‘asañciccā’ti vuccati. Viññattampi aviññattampi ekasmiṃ ṭhāne ṭhitaṃ sahasā anupadhāretvā gahetvā bhuñjanto ‘asatiyā’ti vuccatī’’ti likhitaṃ, anāpattivāre ekaccesu potthakesu ‘‘rasaraseti likhitaṃ, taṃ gahetabba’’nti vuttaṃ.
སཀྐཙྩཝགྒཝཎྞནཱ ནིཊྛིཏཱ།
Sakkaccavaggavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཝིནཡཔིཊཀ • Vinayapiṭaka / མཧཱཝིབྷངྒ • Mahāvibhaṅga / ༤. སཀྐཙྩཝགྒོ • 4. Sakkaccavaggo
