| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
9. සක්‌කඞ්‌ගපඤ්‌හො
9. Sakkaṅgapañho
9. ‘‘භන්‌තෙ නාගසෙන, ‘සක්‌කස්‌ස තීණි අඞ්‌ගානි ගහෙතබ්‌බානී’ති යං වදෙසි, කතමානි තානි තීණි අඞ්‌ගානි ගහෙතබ්‌බානී’’ති? ‘‘යථා, මහාරාජ, සක්‌කො එකන්‌තසුඛසමප්‌පිතො, එවමෙව ඛො, මහාරාජ, යොගිනා යොගාවචරෙන එකන්‌තපවිවෙකසුඛාභිරතෙන භවිතබ්‌බං. ඉදං, මහාරාජ, සක්‌කස්‌ස පඨමං අඞ්‌ගං ගහෙතබ්‌බං.
9. ‘‘Bhante nāgasena, ‘sakkassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, sakko ekantasukhasamappito, evameva kho, mahārāja, yoginā yogāvacarena ekantapavivekasukhābhiratena bhavitabbaṃ. Idaṃ, mahārāja, sakkassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, සක්‌කො දෙවෙ දිස්‌වා පග්‌ගණ්‌හාති, හාසමභිජනෙති, එවමෙව ඛො, මහාරාජ, යොගිනා යොගාවචරෙන කුසලෙසු ධම්‌මෙසු අලීනමතන්‌දිතං සන්‌තං මානසං පග්‌ගහෙතබ්‌බං, හාසමභිජනෙතබ්‌බං, උට්‌ඨහිතබ්‌බං ඝටිතබ්‌බං වායමිතබ්‌බං . ඉදං, මහාරාජ, සක්‌කස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, sakko deve disvā paggaṇhāti, hāsamabhijaneti, evameva kho, mahārāja, yoginā yogāvacarena kusalesu dhammesu alīnamatanditaṃ santaṃ mānasaṃ paggahetabbaṃ, hāsamabhijanetabbaṃ, uṭṭhahitabbaṃ ghaṭitabbaṃ vāyamitabbaṃ . Idaṃ, mahārāja, sakkassa dutiyaṃ aṅgaṃ gahetabbaṃ.
‘‘පුන චපරං, මහාරාජ, සක්‌කස්‌ස අනභිරති නුප්‌පජ්‌ජති, එවමෙව ඛො, මහාරාජ, යොගිනා යොගාවචරෙන සුඤ්‌ඤාගාරෙ අනභිරති න උප්‌පාදෙතබ්‌බා. ඉදං, මහාරාජ, සක්‌කස්‌ස තතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන සුභූතිනා –
‘‘Puna caparaṃ, mahārāja, sakkassa anabhirati nuppajjati, evameva kho, mahārāja, yoginā yogāvacarena suññāgāre anabhirati na uppādetabbā. Idaṃ, mahārāja, sakkassa tatiyaṃ aṅgaṃ gahetabbaṃ. Bhāsitampetaṃ, mahārāja, therena subhūtinā –
‘‘‘සාසනෙ තෙ මහාවීර, යතො පබ්‌බජිතො අහං;
‘‘‘Sāsane te mahāvīra, yato pabbajito ahaṃ;
නාභිජානාමි උප්‌පන්‌නං, මානසං කාමසංහිත’’’න්‌ති.
Nābhijānāmi uppannaṃ, mānasaṃ kāmasaṃhita’’’nti.
සක්‌කඞ්‌ගපඤ්‌හො නවමො.
Sakkaṅgapañho navamo.
