| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༩. སཀྐངྒཔཉྷོ
9. Sakkaṅgapañho
༩. ‘‘བྷནྟེ ནཱགསེན, ‘སཀྐསྶ ཏཱིཎི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཏཱིཎི ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, སཀྐོ ཨེཀནྟསུཁསམཔྤིཏོ, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨེཀནྟཔཝིཝེཀསུཁཱབྷིརཏེན བྷཝིཏབྦཾ། ཨིདཾ, མཧཱརཱཛ, སཀྐསྶ པཋམཾ ཨངྒཾ གཧེཏབྦཾ།
9. ‘‘Bhante nāgasena, ‘sakkassa tīṇi aṅgāni gahetabbānī’ti yaṃ vadesi, katamāni tāni tīṇi aṅgāni gahetabbānī’’ti? ‘‘Yathā, mahārāja, sakko ekantasukhasamappito, evameva kho, mahārāja, yoginā yogāvacarena ekantapavivekasukhābhiratena bhavitabbaṃ. Idaṃ, mahārāja, sakkassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཀྐོ དེཝེ དིསྭཱ པགྒཎྷཱཏི, ཧཱསམབྷིཛནེཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཀུསལེསུ དྷམྨེསུ ཨལཱིནམཏནྡིཏཾ སནྟཾ མཱནསཾ པགྒཧེཏབྦཾ, ཧཱསམབྷིཛནེཏབྦཾ, ཨུཊྛཧིཏབྦཾ གྷཊིཏབྦཾ ཝཱཡམིཏབྦཾ ། ཨིདཾ, མཧཱརཱཛ, སཀྐསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, sakko deve disvā paggaṇhāti, hāsamabhijaneti, evameva kho, mahārāja, yoginā yogāvacarena kusalesu dhammesu alīnamatanditaṃ santaṃ mānasaṃ paggahetabbaṃ, hāsamabhijanetabbaṃ, uṭṭhahitabbaṃ ghaṭitabbaṃ vāyamitabbaṃ . Idaṃ, mahārāja, sakkassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, སཀྐསྶ ཨནབྷིརཏི ནུཔྤཛྫཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན སུཉྙཱགཱརེ ཨནབྷིརཏི ན ཨུཔྤཱདེཏབྦཱ། ཨིདཾ, མཧཱརཱཛ, སཀྐསྶ ཏཏིཡཾ ཨངྒཾ གཧེཏབྦཾ། བྷཱསིཏམྤེཏཾ, མཧཱརཱཛ, ཐེརེན སུབྷཱུཏིནཱ –
‘‘Puna caparaṃ, mahārāja, sakkassa anabhirati nuppajjati, evameva kho, mahārāja, yoginā yogāvacarena suññāgāre anabhirati na uppādetabbā. Idaṃ, mahārāja, sakkassa tatiyaṃ aṅgaṃ gahetabbaṃ. Bhāsitampetaṃ, mahārāja, therena subhūtinā –
‘‘‘སཱསནེ ཏེ མཧཱཝཱིར, ཡཏོ པབྦཛིཏོ ཨཧཾ།
‘‘‘Sāsane te mahāvīra, yato pabbajito ahaṃ;
ནཱབྷིཛཱནཱམི ཨུཔྤནྣཾ, མཱནསཾ ཀཱམསཾཧིཏ’’’ནྟི༎
Nābhijānāmi uppannaṃ, mānasaṃ kāmasaṃhita’’’nti.
སཀྐངྒཔཉྷོ ནཝམོ།
Sakkaṅgapañho navamo.
