| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. ஸக்கபஞ்ஹஸுத்தங்
5. Sakkapañhasuttaṃ
118. ஏகங் ஸமயங் ப⁴க³வா ராஜக³ஹே விஹரதி கி³ஜ்ஜ²கூடே பப்³ப³தே. அத² கோ² ஸக்கோ தே³வானமிந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் அட்டா²ஸி. ஏகமந்தங் டி²தோ கோ² ஸக்கோ தே³வானமிந்தோ³ ப⁴க³வந்தங் ஏதத³வோச – ‘‘கோ நு கோ², ப⁴ந்தே , ஹேது, கோ பச்சயோ யேன மிதே⁴கச்சே ஸத்தா தி³ட்டே²வ த⁴ம்மே நோ பரினிப்³பா³யந்தி? கோ பன, ப⁴ந்தே, ஹேது, கோ பச்சயோ யேன மிதே⁴கச்சே ஸத்தா தி³ட்டே²வ த⁴ம்மே பரினிப்³பா³யந்தீ’’தி?
118. Ekaṃ samayaṃ bhagavā rājagahe viharati gijjhakūṭe pabbate. Atha kho sakko devānamindo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo bhagavantaṃ etadavoca – ‘‘ko nu kho, bhante , hetu, ko paccayo yena midhekacce sattā diṭṭheva dhamme no parinibbāyanti? Ko pana, bhante, hetu, ko paccayo yena midhekacce sattā diṭṭheva dhamme parinibbāyantī’’ti?
‘‘ஸந்தி கோ², தே³வானமிந்த³, சக்கு²விஞ்ஞெய்யா ரூபா, இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ தன்னிஸ்ஸிதங் விஞ்ஞாணங் ஹோதி தது³பாதா³னங். ஸஉபாதா³னோ, தே³வானமிந்த³, பி⁴க்கு² நோ பரினிப்³பா³யதி…பே॰….
‘‘Santi kho, devānaminda, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ. Saupādāno, devānaminda, bhikkhu no parinibbāyati…pe….
‘‘ஸந்தி கோ², தே³வானமிந்த³, ஜிவ்ஹாவிஞ்ஞெய்யா ரஸா…பே॰… ஸந்தி கோ², தே³வானமிந்த³, மனோவிஞ்ஞெய்யா த⁴ம்மா, இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி. தஸ்ஸ தங் அபி⁴னந்த³தோ அபி⁴வத³தோ அஜ்ஜோ²ஸாய திட்ட²தோ தன்னிஸ்ஸிதங் விஞ்ஞாணங் ஹோதி தது³பாதா³னங். ஸஉபாதா³னோ, தே³வானமிந்த³, பி⁴க்கு² நோ பரினிப்³பா³யதி. அயங் கோ², தே³வானமிந்த³, ஹேது, அயங் பச்சயோ யேன மிதே⁴கச்சே ஸத்தா தி³ட்டே²வ த⁴ம்மே நோ பரினிப்³பா³யந்தி.
‘‘Santi kho, devānaminda, jivhāviññeyyā rasā…pe… santi kho, devānaminda, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ. Saupādāno, devānaminda, bhikkhu no parinibbāyati. Ayaṃ kho, devānaminda, hetu, ayaṃ paccayo yena midhekacce sattā diṭṭheva dhamme no parinibbāyanti.
‘‘ஸந்தி ச கோ², தே³வானமிந்த³, சக்கு²விஞ்ஞெய்யா ரூபா, இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ ந தன்னிஸ்ஸிதங் விஞ்ஞாணங் ஹோதி, ந தது³பாதா³னங். அனுபாதா³னோ, தே³வானமிந்த³, பி⁴க்கு² பரினிப்³பா³யதி…பே॰… .
‘‘Santi ca kho, devānaminda, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti, na tadupādānaṃ. Anupādāno, devānaminda, bhikkhu parinibbāyati…pe… .
‘‘ஸந்தி கோ², தே³வானமிந்த³, ஜிவ்ஹாவிஞ்ஞெய்யா ரஸா…பே॰… ஸந்தி கோ², தே³வானமிந்த³, மனோவிஞ்ஞெய்யா த⁴ம்மா இட்டா² கந்தா மனாபா பியரூபா காமூபஸங்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. தஸ்ஸ தங் அனபி⁴னந்த³தோ அனபி⁴வத³தோ அனஜ்ஜோ²ஸாய திட்ட²தோ ந தன்னிஸ்ஸிதங் விஞ்ஞாணங் ஹோதி ந தது³பாதா³னங். அனுபாதா³னோ, தே³வானமிந்த³, பி⁴க்கு² பரினிப்³பா³யதி. அயங் கோ², தே³வானமிந்த³, ஹேது, அயங் பச்சயோ யேன மிதே⁴கச்சே ஸத்தா தி³ட்டே²வ த⁴ம்மே பரினிப்³பா³யந்தீ’’தி. பஞ்சமங்.
‘‘Santi kho, devānaminda, jivhāviññeyyā rasā…pe… santi kho, devānaminda, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti na tadupādānaṃ. Anupādāno, devānaminda, bhikkhu parinibbāyati. Ayaṃ kho, devānaminda, hetu, ayaṃ paccayo yena midhekacce sattā diṭṭheva dhamme parinibbāyantī’’ti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5-6. ஸக்கபஞ்ஹஸுத்தாதி³வண்ணனா • 5-6. Sakkapañhasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5-6. ஸக்கபஞ்ஹஸுத்தாதி³வண்ணனா • 5-6. Sakkapañhasuttādivaṇṇanā
