| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. সক্কপঞ্হসুত্তং
5. Sakkapañhasuttaṃ
১১৮. একং সমযং ভগৰা রাজগহে ৰিহরতি গিজ্ঝকূটে পব্বতে। অথ খো সক্কো দেৰানমিন্দো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং অট্ঠাসি। একমন্তং ঠিতো খো সক্কো দেৰানমিন্দো ভগৰন্তং এতদৰোচ – ‘‘কো নু খো, ভন্তে , হেতু, কো পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি? কো পন, ভন্তে, হেতু, কো পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি?
118. Ekaṃ samayaṃ bhagavā rājagahe viharati gijjhakūṭe pabbate. Atha kho sakko devānamindo yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhito kho sakko devānamindo bhagavantaṃ etadavoca – ‘‘ko nu kho, bhante , hetu, ko paccayo yena midhekacce sattā diṭṭheva dhamme no parinibbāyanti? Ko pana, bhante, hetu, ko paccayo yena midhekacce sattā diṭṭheva dhamme parinibbāyantī’’ti?
‘‘সন্তি খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি। তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং। সউপাদানো, দেৰানমিন্দ, ভিক্খু নো পরিনিব্বাযতি…পে॰…।
‘‘Santi kho, devānaminda, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ. Saupādāno, devānaminda, bhikkhu no parinibbāyati…pe….
‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে॰… সন্তি খো, দেৰানমিন্দ, মনোৰিঞ্ঞেয্যা ধম্মা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু অভিনন্দতি অভিৰদতি অজ্ঝোসায তিট্ঠতি। তস্স তং অভিনন্দতো অভিৰদতো অজ্ঝোসায তিট্ঠতো তন্নিস্সিতং ৰিঞ্ঞাণং হোতি তদুপাদানং। সউপাদানো, দেৰানমিন্দ, ভিক্খু নো পরিনিব্বাযতি। অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে নো পরিনিব্বাযন্তি।
‘‘Santi kho, devānaminda, jivhāviññeyyā rasā…pe… santi kho, devānaminda, manoviññeyyā dhammā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu abhinandati abhivadati ajjhosāya tiṭṭhati. Tassa taṃ abhinandato abhivadato ajjhosāya tiṭṭhato tannissitaṃ viññāṇaṃ hoti tadupādānaṃ. Saupādāno, devānaminda, bhikkhu no parinibbāyati. Ayaṃ kho, devānaminda, hetu, ayaṃ paccayo yena midhekacce sattā diṭṭheva dhamme no parinibbāyanti.
‘‘সন্তি চ খো, দেৰানমিন্দ, চক্খুৰিঞ্ঞেয্যা রূপা, ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি। তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি, ন তদুপাদানং। অনুপাদানো, দেৰানমিন্দ, ভিক্খু পরিনিব্বাযতি…পে॰… ।
‘‘Santi ca kho, devānaminda, cakkhuviññeyyā rūpā, iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti, na tadupādānaṃ. Anupādāno, devānaminda, bhikkhu parinibbāyati…pe… .
‘‘সন্তি খো, দেৰানমিন্দ, জিৰ্হাৰিঞ্ঞেয্যা রসা…পে॰… সন্তি খো, দেৰানমিন্দ, মনোৰিঞ্ঞেয্যা ধম্মা ইট্ঠা কন্তা মনাপা পিযরূপা কামূপসংহিতা রজনীযা। তঞ্চে ভিক্খু নাভিনন্দতি নাভিৰদতি নাজ্ঝোসায তিট্ঠতি। তস্স তং অনভিনন্দতো অনভিৰদতো অনজ্ঝোসায তিট্ঠতো ন তন্নিস্সিতং ৰিঞ্ঞাণং হোতি ন তদুপাদানং। অনুপাদানো, দেৰানমিন্দ, ভিক্খু পরিনিব্বাযতি। অযং খো, দেৰানমিন্দ, হেতু, অযং পচ্চযো যেন মিধেকচ্চে সত্তা দিট্ঠেৰ ধম্মে পরিনিব্বাযন্তী’’তি। পঞ্চমং।
‘‘Santi kho, devānaminda, jivhāviññeyyā rasā…pe… santi kho, devānaminda, manoviññeyyā dhammā iṭṭhā kantā manāpā piyarūpā kāmūpasaṃhitā rajanīyā. Tañce bhikkhu nābhinandati nābhivadati nājjhosāya tiṭṭhati. Tassa taṃ anabhinandato anabhivadato anajjhosāya tiṭṭhato na tannissitaṃ viññāṇaṃ hoti na tadupādānaṃ. Anupādāno, devānaminda, bhikkhu parinibbāyati. Ayaṃ kho, devānaminda, hetu, ayaṃ paccayo yena midhekacce sattā diṭṭheva dhamme parinibbāyantī’’ti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫-৬. সক্কপঞ্হসুত্তাদিৰণ্ণনা • 5-6. Sakkapañhasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫-৬. সক্কপঞ্হসুত্তাদিৰণ্ণনা • 5-6. Sakkapañhasuttādivaṇṇanā
