Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ (ཊཱིཀཱ) • Dīghanikāya (ṭīkā)

    ༨. སཀྐཔཉྷསུཏྟཝཎྞནཱ

    8. Sakkapañhasuttavaṇṇanā

    ནིདཱནཝཎྞནཱ

    Nidānavaṇṇanā

    ༣༤༤. ཨམྦསཎྜཱནཾ ཨདཱུརབྷཝཏྟཱ ཨེཀོཔི སོ བྲཱཧྨཎགཱམོ ‘‘ཨམྦསཎྜཱ’’ཏྭེཝ བཧུཝཙནཝསེན ཝུཙྩཏི, ཡཐཱ ‘‘ཝརཎཱ ནགར’’ནྟི། ཝེདི ཨེཝ ཝེདིཀོ, ཝེདིཀོ ཨེཝ ཝེདིཡོ ཀ-ཀཱརསྶ ཡ-ཀཱརཾ ཀཏྭཱ, ཏསྨིཾ ཝེདིཡཀེ། ཏེནཱཧ ‘‘མཎིཝེདིཀཱསདིསེནཱ’’ཏིཨཱདི, ཨིནྡནཱིལཱདིམཎིམཡཝེདིཀཱསདིསེནཱཏི ཨཏྠོ། པུབྦེཔཱིཏི ལེཎཀརཎཏོ པུབྦེ, གུཧཱརཱུཔེན ཋིཏཱ, དྭཱརེ ཨིནྡསཱལརུཀྑཝཏཱི ཙ, ཏསྨཱ ‘‘ཨིནྡསཱལགུཧཱ’’ཏི ཝུཏྟཱ པུརིམཝོཧཱརེན།

    344. Ambasaṇḍānaṃ adūrabhavattā ekopi so brāhmaṇagāmo ‘‘ambasaṇḍā’’tveva bahuvacanavasena vuccati, yathā ‘‘varaṇā nagara’’nti. Vedi eva vediko, vediko eva vediyo ka-kārassa ya-kāraṃ katvā, tasmiṃ vediyake. Tenāha ‘‘maṇivedikāsadisenā’’tiādi, indanīlādimaṇimayavedikāsadisenāti attho. Pubbepīti leṇakaraṇato pubbe, guhārūpena ṭhitā, dvāre indasālarukkhavatī ca, tasmā ‘‘indasālaguhā’’ti vuttā purimavohārena.

    ཨུསྶུཀྐཾ ཝུཙྩཏི ཨབྷིརུཙི, ཏཾ པན བུདྡྷདསྶནཀཱམཏཱཝསེན, ཏཐཱ ཨུསྶཱཧནཝསེན ཙ པཝཏྟིཡཱ ‘‘དྷམྨིཀོ ཨུསྶཱཧོ’’ཏི ཝུཏྟཾ། སཀྐེན སདིསོ…པེ॰… ནཏྠཱིཏི། ཡཐཱཧ ‘‘ཨཔྤམཱདེན མགྷཝཱ, དེཝཱནཾ སེཊྛཏཾ གཏོ’’ཏི (དྷ॰ པ॰ ༣༠)། པརིཏྟཀེནཱཏི ཨཔརཱཔརཾ བཧུཾ པུཉྙཀམྨཾ ཨཀཏྭཱ ཨཔྤམཏྟཀེནེཝ པུཉྙཀམྨེན།

    Ussukkaṃ vuccati abhiruci, taṃ pana buddhadassanakāmatāvasena, tathā ussāhanavasena ca pavattiyā ‘‘dhammiko ussāho’’ti vuttaṃ. Sakkena sadiso…pe… natthīti. Yathāha ‘‘appamādena maghavā, devānaṃ seṭṭhataṃ gato’’ti (dha. pa. 30). Parittakenāti aparāparaṃ bahuṃ puññakammaṃ akatvā appamattakeneva puññakammena.

    སཀྐོཔི ཀཱམཾ མཧཱཔུཉྙཀཏབྷཱིརུཏྟཱནོ ཧོཏི, སཱཏིསཡཱཡ པན དིབྦསམྤཏྟིཡཱ ཝིཡོགཧེཏུཀེན སོཀེན དིགུཎིཏེན མརཎབྷཡེན སཾཏཛྫིཏོ ཛཱཏོ། ཏེནཱཧ ‘‘སཀྐོ པན མརཎབྷཡཱབྷིབྷཱུཏོ ཨཧོསཱི’’ཏི།

    Sakkopi kāmaṃ mahāpuññakatabhīruttāno hoti, sātisayāya pana dibbasampattiyā viyogahetukena sokena diguṇitena maraṇabhayena saṃtajjito jāto. Tenāha ‘‘sakko pana maraṇabhayābhibhūto ahosī’’ti.

    དིབྦཙཀྑུནཱ དེཝཏཱནཾ དསྶནཾ ནཱམ པཊིཝིཛ྄ཛྷནསདིསནྟི ཨཱཧ ‘‘པཊིཝིཛ྄ཛྷཱི’’ཏི། པཱཊིཡེཀྐོ ཝོཧཱརོཏི ཨཱཝེཎིཀོ པིཡསམུདཱཧཱརོ། མརིསནིཡསམྤཏྟིཀཱཏི མཱརིསཱ། ཏེསཉྷི སམྤཏྟིཡོ མཧཱནུབྷཱཝཏཱཡ སཧནྟི ཨུཔཊྛཧནྟི, ཨཉྙེ ཨཡོནིསོམནསིཀཱརཏཱཡ ཙེཝ ཨཔྤཧུཀཱཡ ཙ ན སཧནྟིཡེཝ, སཱ པན ནེསཾ མརིསནིཡསམྤཏྟིཀཏཱ དུཀྑཝིརཧིཏཱཡཱཏི ཝུཏྟཾ ‘‘ནིདྡུཀྑཱཏིཔི ཝུཏྟཾ ཧོཏཱི’’ཏི། ཨེཀཀོ ཝཱཏི དེཝཔརིསཱཡ ཝིནཱ ཨཱགཏཏྟཱ ཝུཏྟཾ, མཱཏལིཨཱདཡོ པན ཏཱདིསཱ སཧཱཡཱ ཏདཱཔི ཨཧེསུཾཡེཝ། ཏཐཱ ཧི ཝཀྑཏི ‘‘ཨཔི ཙཱཡཾ ཨཱཡསྨཏོ ཙཀྐནེམིསདྡེན ཏམྷཱ སམཱདྷིམྷཱ ཝུཊྛིཏོ’’ཏི (དཱི॰ ནི॰ ཨཊྛ॰ ༢.༣༥༢)། ཨོཀཱསཾ ནཱཀཱསི སཀྐསྶ ཉཱཎཔརིཔཱཀཾ ཨཱགམེནྟོ, ཨཉྙེསཉྩ བཧཱུནཾ དེཝཱནཾ དྷམྨཱབྷིསམཡཾ ཨུཔཔརིཀྑམཱནོ། སོཏི སཀྐོ།

    Dibbacakkhunā devatānaṃ dassanaṃ nāma paṭivijjhanasadisanti āha ‘‘paṭivijjhī’’ti. Pāṭiyekko vohāroti āveṇiko piyasamudāhāro. Marisaniyasampattikāti mārisā. Tesañhi sampattiyo mahānubhāvatāya sahanti upaṭṭhahanti, aññe ayonisomanasikāratāya ceva appahukāya ca na sahantiyeva, sā pana nesaṃ marisaniyasampattikatā dukkhavirahitāyāti vuttaṃ ‘‘niddukkhātipi vuttaṃ hotī’’ti. Ekako vāti devaparisāya vinā āgatattā vuttaṃ, mātaliādayo pana tādisā sahāyā tadāpi ahesuṃyeva. Tathā hi vakkhati ‘‘api cāyaṃ āyasmato cakkanemisaddena tamhā samādhimhā vuṭṭhito’’ti (dī. ni. aṭṭha. 2.352). Okāsaṃ nākāsi sakkassa ñāṇaparipākaṃ āgamento, aññesañca bahūnaṃ devānaṃ dhammābhisamayaṃ upaparikkhamāno. Soti sakko.

    ཨེཝནྟི ཝཙནསམྤཊིཙྪནེ ནིཔཱཏོཏི ཨཱཧ ‘‘ཨེཝཾ ཧོཏཱུ’’ཏིཨཱདི། བྷདྡཾཏཝཱཏི པན སཀྐཾ ཨུདྡིསྶ ནེསཾ ཨཱསི ཝཱདོ།

    Evanti vacanasampaṭicchane nipātoti āha ‘‘evaṃ hotū’’tiādi. Bhaddaṃtavāti pana sakkaṃ uddissa nesaṃ āsi vādo.

    ༣༤༥. ཝལླབྷོ…པེ॰… དྷམྨཾ སུཎཱཏཱིཏི ཨཡམཏྠོ གོཝིནྡསུཏྟཱདཱིཧི (དཱི॰ ནི॰ ༢.༢༩༤) དཱིཔེཏབྦོ། ཨིམིནཱ ཀཏོཀཱསེཏི ཨིམིནཱ པཉྩསིཁེན ཀཏོཀཱསེ བྷགཝཏི།

    345.Vallabho…pe… dhammaṃ suṇātīti ayamattho govindasuttādīhi (dī. ni. 2.294) dīpetabbo. Iminā katokāseti iminā pañcasikhena katokāse bhagavati.

    ཨནུཙརིཡནྟི ཨནུཙརཎབྷཱཝཾ, ཏཾ པནསྶ ཨནུཙརཎཾ ནཱམ སདྡྷིཾ གམནམེཝཱཏི ཨཱཧ ‘‘སཧཙརཎཾ ཨེཀཏོ གམན’’ནྟི།

    Anucariyanti anucaraṇabhāvaṃ, taṃ panassa anucaraṇaṃ nāma saddhiṃ gamanamevāti āha ‘‘sahacaraṇaṃ ekato gamana’’nti.

    སོཝཎྞམཡནྟི སུཝཎྞམཡཾ། པོཀྑརནྟི ཝཱིཎཱཡ དོཎིམཱཧ། དཎྜོཏི ཝཱིཎདཎྜོ། ཝེཋཀཱཏི ཏནྟཱིནཾ བནྡྷནཱཡ ཙེཝ ཨུཔྤཱིལ༹ནཱཡ ཙ དྷམེཏབྦཱ ཝེཋཀཱ། པཏྟཀནྟི པོཀྑརཾ། སམཔཉྙཱསམུཙྪནཱ མུཙྪེཏྭཱཏི ཡཐཱ སམཔཉྙཱསམུཙྪནཱ ཀམཏོ ཏཏྠ སཾམུཙྪནཾ ཀཱཏུཾ སཀྐཱ, ཨེཝཾ ཏཾ སཛྫེཏྭཱཏི ཨཏྠོ། ‘‘སམཔཉྙཱསམུཙྪནཱ སཾམུཙྪེཏྭཱ’’ཏི ཙ ཨིདཾ དེཝལོཀེ ནིཡཏཾ ཝཱིཎཱཝཱདནཝིདྷིཾ སནྡྷཱཡ ཝུཏྟཾ། མནུསྶལོཀེ པན ཨེཀཝཱིསཏི མུཙྪནཱ། ཏེནེཝཱཧ ཝཱིཎོཔམསུཏྟཝཎྞནཱཡཾ –

    Sovaṇṇamayanti suvaṇṇamayaṃ. Pokkharanti vīṇāya doṇimāha. Daṇḍoti vīṇadaṇḍo. Veṭhakāti tantīnaṃ bandhanāya ceva uppīḷanāya ca dhametabbā veṭhakā. Pattakanti pokkharaṃ. Samapaññāsamucchanā mucchetvāti yathā samapaññāsamucchanā kamato tattha saṃmucchanaṃ kātuṃ sakkā, evaṃ taṃ sajjetvāti attho. ‘‘Samapaññāsamucchanā saṃmucchetvā’’ti ca idaṃ devaloke niyataṃ vīṇāvādanavidhiṃ sandhāya vuttaṃ. Manussaloke pana ekavīsati mucchanā. Tenevāha vīṇopamasuttavaṇṇanāyaṃ –

    ‘‘སཏྟ སརཱ ཏཡོ གཱམཱ, མུཙྪནཱ ཨེཀཝཱིསཏི།

    ‘‘Satta sarā tayo gāmā, mucchanā ekavīsati;

    ཏཱནཱ ཙེཀཱུནཔཉྙཱས, ཨིཙྩེཏེ སརམཎྜལཱ’’ཏི༎ (ཨ॰ ནི॰ ཨཊྛ॰ ༣.༥༥; སཱརཏྠ॰ ཊཱི॰ ༣.༢༤༣)།

    Tānā cekūnapaññāsa, iccete saramaṇḍalā’’ti. (a. ni. aṭṭha. 3.55; sārattha. ṭī. 3.243);

    ཏཏྠ ཚཛྫོ, ཨུསབྷོ, གནྡྷཱརོ, མཛ྄ཛྷིམོ, པཉྩམོ, དྷེཝཏོ, ནིསཱདོཏི ཨེཏེ སཏྟ སརཱ། ཚཛྫགཱམོ, མཛ྄ཛྷིམགཱམོ, སཱདྷཱརཎགཱམོཏི ཏཡོ གཱམཱ, སརསམཱུཧཱཏི ཨཏྠོ། མནུསྶལོཀེ ཝཱདནཝིདྷིནཱ ཨེཀེཀསྶེཝ ཙ སརསྶ ཝསེན ཏཡོ ཏཡོ མུཙྪནཱ ཀཏྭཱ ཨེཀཝཱིསཏི མུཙྪནཱ། ཨེཀེཀསྶེཝ ཙ སརསྶ སཏྟ སཏྟ ཏཱནབྷེདཱ, ཡཏོ སརསྶ མནྡཏརཝཝཏྠཱནཾ ཧོཏི, ཏེ ཨེཀཱུནཔཉྙཱས ཏཱནཝིསེསཱཏི, ཏིསྶོ དུཝེ ཙཏསྶོ, ཙཏསྶོ ཏིསྶོ དུཝེ ཙཏསྶོཏི དྭཱཝཱིསཏི སུཏིབྷེདཱ ཨིཙྪིཏཱ, ཨཡཾ པན ཨེཀེཀསྶ སརསྶ ཝསེན སཏྟ སཏྟ མུཙྪནཱ, ཨནྟརསརསྶ ཙ ཨེཀཱཏི སམཔཉྙཱསཱཡ མུཙྪནཱནཾ ཡོགྱབྷཱཝེན ཝཱིཎཾ ཝཛྫེསི། ཏེན ཝུཏྟཾ ‘‘སམཔཉྙཱས མུཙྪནཱ སཾམུཙྪེཏྭཱ’’ཏི། སེསདེཝེ ཛཱནཱཔེནྟོ སཀྐསྶ གམནཀཱལནྟི ཡོཛནཱ།

    Tattha chajjo, usabho, gandhāro, majjhimo, pañcamo, dhevato, nisādoti ete satta sarā. Chajjagāmo, majjhimagāmo, sādhāraṇagāmoti tayo gāmā, sarasamūhāti attho. Manussaloke vādanavidhinā ekekasseva ca sarassa vasena tayo tayo mucchanā katvā ekavīsati mucchanā. Ekekasseva ca sarassa satta satta tānabhedā, yato sarassa mandataravavatthānaṃ hoti, te ekūnapaññāsa tānavisesāti, tisso duve catasso, catasso tisso duve catassoti dvāvīsati sutibhedā icchitā, ayaṃ pana ekekassa sarassa vasena satta satta mucchanā, antarasarassa ca ekāti samapaññāsāya mucchanānaṃ yogyabhāvena vīṇaṃ vajjesi. Tena vuttaṃ ‘‘samapaññāsa mucchanā saṃmucchetvā’’ti. Sesadeve jānāpento sakkassa gamanakālanti yojanā.

    ༣༤༦. ཨཏིརིཝཱཏི ར-ཀཱརོ པདསནྡྷིཀརོ, ཨཏཱིཝ ཨཏིཝིཡཱཏི ཝུཏྟཾ ཧོཏི། པཀཏི …པེ॰… ཨགམཱསི མརཎབྷཡསཾཏཛྫིཏཏྟཱ ཏརམཱནརཱུཔོ། ཏེནེཝཱཧ ‘‘ནནུ ཙཱ’’ཏིཨཱདི།

    346.Atirivāti ra-kāro padasandhikaro, atīva ativiyāti vuttaṃ hoti. Pakati…pe… agamāsi maraṇabhayasaṃtajjitattā taramānarūpo. Tenevāha ‘‘nanu cā’’tiādi.

    ༣༤༧. བུདྡྷཱ ནཱམ མཧཱཀཱརུཎིཀཱ, སདེཝཀསྶ ལོཀསྶ ཧིཏསུཁཏྠཱཡ ཨེཝ ཨུཔྤནྣཱ, ཏེ ཀཐཾ ཨཏྠིཀེཧི དུརུཔསངྐམཱཏི ཨཱཧ ‘‘ཨཧཾ སརཱགོ’’ཏིཨཱདི། ཏདནྟརཾ པཊིསལླཱིནཱཏི ཡེན ཨནྟརེན ཡེན ཁཎེན ཨུཔསངྐམེཡྻ, ཏདནྟརཾ པཊིསལླཱིནཱ ཛྷཱནཾ སམཱཔནྣཱ། ཏདནྟར-སདྡོ ཝཱ ‘‘ཨེཏརཧཱི’’ཏི ཨིམིནཱ སམཱནཏྠོཏི ཨཱཧ ‘‘སམྤཏི པཊིསལླཱིནཱ ཝཱ’’ཏི།

    347. Buddhā nāma mahākāruṇikā, sadevakassa lokassa hitasukhatthāya eva uppannā, te kathaṃ atthikehi durupasaṅkamāti āha ‘‘ahaṃ sarāgo’’tiādi. Tadantaraṃ paṭisallīnāti yena antarena yena khaṇena upasaṅkameyya, tadantaraṃ paṭisallīnā jhānaṃ samāpannā. Tadantara-saddo vā ‘‘etarahī’’ti iminā samānatthoti āha ‘‘sampati paṭisallīnā vā’’ti.

    པཉྩསིཁགཱིཏགཱཐཱཝཎྞནཱ

    Pañcasikhagītagāthāvaṇṇanā

    ༣༤༨. སཱཝེསཱིཏི ཡཐཱདྷིཔྤེཏམུཙྪནཾ པཊྛཔེཏྭཱ ཝཱིཎཾ ཝཱདེནྟོ ཏཾཏཾཋཱནུཔྤཏྟིཡཱ པཱཀཊཱིབྷཱུཏམནྡཏཱཝཝཏྠཾ དསྶེནྟོ སུམདྷུརཀོམལམདྷུཔཱནམཏྟམདྷུཀཱརཝིརུཏཱཔཧཱསིནིལཀྑཎོ པསནྣབྷཱནཱི སམརཝཾ ཏནྟིསྶརཾ སཱཝེསི།

    348.Sāvesīti yathādhippetamucchanaṃ paṭṭhapetvā vīṇaṃ vādento taṃtaṃṭhānuppattiyā pākaṭībhūtamandatāvavatthaṃ dassento sumadhurakomalamadhupānamattamadhukāravirutāpahāsinilakkhaṇo pasannabhānī samaravaṃ tantissaraṃ sāvesi.

    ‘‘སཀྱཔུཏྟོཝ ཛྷཱནེན, ཨེཀོདི ནིཔཀོ སཏོ།

    ‘‘Sakyaputtova jhānena, ekodi nipako sato;

    ཨམཏཾ མུནི ཛིགཱིསཱནོ…༎

    Amataṃ muni jigīsāno….

    ཡཐཱཔི མུནི ནནྡེཡྻ, པཏྭཱ སམྦོདྷིཾ ཨུཏྟམ’’ནྟི༎ (དཱི॰ ནི॰ ༢.༣༤༨)།

    Yathāpi muni nandeyya, patvā sambodhiṃ uttama’’nti. (dī. ni. 2.348);

    ཙ ཨེཝཾ བུདྡྷཱུཔསཉྷིཏཱ། བུདྡྷཱུཔསཉྷིཏཱ པན བུདྡྷཱནཾ དྷམྨསརཱིརཾ ཨཱརབྦྷ ནིསྶཡཾ ཀཏྭཱ པཝཏྟིཏཱཏི ཨཱཧ ‘‘དྷམྨོ ཨརཧཏཱཾ ཨིཝཱ’’ཏི། དྷམྨཱུཔསཉྷིཏཱ, ཨརཧཏྟཱུཔསཉྷིཏཱ ཙ ཝེདིཏབྦཱ།

    Ca evaṃ buddhūpasañhitā. Buddhūpasañhitā pana buddhānaṃ dhammasarīraṃ ārabbha nissayaṃ katvā pavattitāti āha ‘‘dhammo arahatāṃ ivā’’ti. Dhammūpasañhitā, arahattūpasañhitā ca veditabbā.

    སཱུརིཡསམཱནསརཱིརཱཏི སཱུརིཡསམཱནཔྤབྷཱསརཱིརཱ། ཏེནཱཧ ‘‘ཏསྶཱ ཀིརཱ’’ཏིཨཱདི། ཡསྨཱ ཏིམྦརུནོ གནྡྷབྦདེཝརཱཛསྶ སཱུརིཡཝཙྪ སཱ ཨངྐེ ཛཱཏཱ, ཏསྨཱ ཨཱཧ ‘‘ཡཾ ཏིམྦརུཾ དེཝརཱཛཱནཾ ནིསྶཱཡ ཏྭཾ ཛཱཏཱ’’ཏི། ཀལྱཱཎངྒཏཱཡ ‘‘ཀལྱཱཎཱི’’ཏི ཝུཏྟཱཏི ཨཱཧ ‘‘སབྦངྒསོབྷནཱ’’ཏི།

    Sūriyasamānasarīrāti sūriyasamānappabhāsarīrā. Tenāha ‘‘tassā kirā’’tiādi. Yasmā timbaruno gandhabbadevarājassa sūriyavaccha sā aṅke jātā, tasmā āha ‘‘yaṃ timbaruṃ devarājānaṃnissāya tvaṃ jātā’’ti. Kalyāṇaṅgatāya ‘‘kalyāṇī’’ti vuttāti āha ‘‘sabbaṅgasobhanā’’ti.

    རཱགཱཝེསཝསེན པུབྦེ ཝུཏྟཱ གཱཐཱ ཨིདཱནིཔི ཏམེཝ ཨཱརབྦྷ པུརཏོ ཋིཏཾ ཝིཡ ཨཱལཔནྟོ ཝདཏི།

    Rāgāvesavasena pubbe vuttā gāthā idānipi tameva ārabbha purato ṭhitaṃ viya ālapanto vadati.

    ཐནུདརནྟི པཡོདྷརཉྩ ཨུདརཉྩ ཨདྷིཔྤེཏནྟི ཨཱཧ ‘‘ཐནཝེམཛ྄ཛྷཾ ཨུདརཉྩཱ’’ཏི།

    Thanudaranti payodharañca udarañca adhippetanti āha ‘‘thanavemajjhaṃ udarañcā’’ti.

    ཀིཉྩི ཀཱརཎནྟི ཀིཉྩི པཱིལ༹ཾ།

    Kiñci kāraṇanti kiñci pīḷaṃ.

    པཀཏིཾ ཛཧིཏྭཱ ཋིཏཾ ཨབྷིརཏྟབྷཱཝེན།

    Pakatiṃ jahitvā ṭhitaṃ abhirattabhāvena.

    ཝཱམཱུརཱུཏི རུཙིརཨཱུརཱུ། ཏེནཱཧ ‘‘ཝཱམཱཀཱརེནཱ’’ཏིཨཱདི། ཝཱམཝིཀསིཏརུཙིརསུནྡརཱབྷིརཱུཔཙཱརུསདྡཱ ཧི ཨེཀཏྠཱ དཊྛབྦཱ། ན ཏིཁིཎནྟི ན ཏིཀྑཾ ན ལཱུཁཾ ན ཀཀྑལ༹ཾ། མནྡནྟི མུདུ སིནིདྡྷཾ།

    Vāmūrūti ruciraūrū. Tenāha ‘‘vāmākārenā’’tiādi. Vāmavikasitarucirasundarābhirūpacārusaddā hi ekatthā daṭṭhabbā. Na tikhiṇanti na tikkhaṃ na lūkhaṃ na kakkhaḷaṃ. Mandanti mudu siniddhaṃ.

    ཨནེཀབྷཱཝོཏི ཨནེཀསབྷཱཝོ, སོ པན བཧུཝིདྷོ ནཱམ ཧོཏཱིཏི ཨཱཧ ‘‘ཨནེཀཝིདྷོ ཛཱཏོ’’ཏི། ཨནེཀབྷཱགོཏི ཨནེཀཀོཊྛཱསོ།

    Anekabhāvoti anekasabhāvo, so pana bahuvidho nāma hotīti āha ‘‘anekavidho jāto’’ti. Anekabhāgoti anekakoṭṭhāso.

    ཏཡཱ སདྡྷིཾ ཝིཔཙྩཏནྟི ཏཡཱ སཧིཏཾཡེཝ མེ ཏཾ ཀམྨཾ ཝིཔཙྩཏུ, ཏཡཱ སཧེཝ ཏསྶ ཀམྨསྶ ཕལཾ ཨནུབྷཝེཡྻནྟི ཨདྷིཔྤཱཡོ། ཏཡཱ སདྡྷིམེཝཱཏི ཡཐཱ ཙཀྐཝཏྟིསཾཝཏྟནིཡཀམྨཾ ཏསྶ ནིསྶནྡཕལབྷཱུཏེན ཨིཏྠིརཏནེན སདྡྷིཾཡེཝ ཝིཔཱཀཾ དེཏི, ཨེཝཾ ཏཾ མེ ཀམྨཾ ཏཡཱ སདྡྷིཾཡེཝ མཡ྄ཧཾ ཝིཔཱཀཾ དེཏུ།

    Tayā saddhiṃ vipaccatanti tayā sahitaṃyeva me taṃ kammaṃ vipaccatu, tayā saheva tassa kammassa phalaṃ anubhaveyyanti adhippāyo. Tayā saddhimevāti yathā cakkavattisaṃvattaniyakammaṃ tassa nissandaphalabhūtena itthiratanena saddhiṃyeva vipākaṃ deti, evaṃ taṃ me kammaṃ tayā saddhiṃyeva mayhaṃ vipākaṃ detu.

    ཨེཀོདཱིཏི ཨེཀོདིབྷཱཝཾ གཏོ, སམཱཧིཏོཏི ཨཏྠོ། ཛིགཱིསཱནོཏི ཛིགཱིསམཱནོ ཧོཏི། ཏཐཱབྷཱུཏོཝ ཛིགཱིསཏི ནཱམཱཏི ཏཐཱ པཋམཝིཀཔྤོ ཝུཏྟོ། དུཏིཡཝིཀཔྤེ པན ‘‘ཝིཙརཏཱི’’ཏི ཀིརིཡཱཔདཾ ཨཱཧརིཏྭཱ ཨཏྠོ ཝུཏྟོ།

    Ekodīti ekodibhāvaṃ gato, samāhitoti attho. Jigīsānoti jigīsamāno hoti. Tathābhūtova jigīsati nāmāti tathā paṭhamavikappo vutto. Dutiyavikappe pana ‘‘vicaratī’’ti kiriyāpadaṃ āharitvā attho vutto.

    ནནྡེཡྻནྟི སམཱགམཾ པཏྠེནྟོ ཝདཏི ཨཏིསསྶིརིཀརཱུཔསོབྷཱཡ།

    Nandeyyanti samāgamaṃ patthento vadati atisassirikarūpasobhāya.

    ༣༤༩. སཾསནྡཏཱིཏི སམེཏི, ཡཱཡ མུཙྪནཱཡ, ཡེན ཙ ཨཱཀཱརེན ཏནྟིསྶརོ པཝཏྟོ, ཏཾ མུཙྪནཾ ཨནཏིཝཏྟེནྟོ, ཏེནེཝ ཙ ཨཱཀཱརེན གཱིཏསྶརོཔི པཝཏྟོཏི ཨཏྠོ། ཡེན ཨཛ྄ཛྷཱསཡེན བྷགཝཱ པཉྩསིཁསྶ གནྡྷབྦེ ཝཎྞཾ ཀཐེསི, ཡདཏྠཉྩ ཀཐེསི, ཏཾ སབྦཾ ཝིབྷཱཝེཏུཾ ‘‘ཀསྨཱ’’ཏིཨཱདིམཱཧ། ནཏྠི བོདྷིམཱུལེ ཨེཝ སམུཙྪིནྣཏྟཱ། ཨུཔེཀྑཀོ བྷགཝཱ ཨནུཔལིཏྟབྷཱཝཏོ། སུཝིམུཏྟཙིཏྟོ བྷགཝཱ ཚནྡརཱགཏོ, སབྦསྨཱ ཙ ཀིལེསཱ། ཡདི ཨེཝཾ ཀསྨཱ པཉྩསིཁསྶ གནྡྷབྦེ ཝཎྞཾ ཀཐེསཱིཏི ཨཱཧ ‘‘སཙེ པནཱ’’ཏིཨཱདི།

    349.Saṃsandatīti sameti, yāya mucchanāya, yena ca ākārena tantissaro pavatto, taṃ mucchanaṃ anativattento, teneva ca ākārena gītassaropi pavattoti attho. Yena ajjhāsayena bhagavā pañcasikhassa gandhabbe vaṇṇaṃ kathesi, yadatthañca kathesi, taṃ sabbaṃ vibhāvetuṃ ‘‘kasmā’’tiādimāha. Natthi bodhimūle eva samucchinnattā. Upekkhako bhagavā anupalittabhāvato. Suvimuttacitto bhagavā chandarāgato, sabbasmā ca kilesā. Yadi evaṃ kasmā pañcasikhassa gandhabbe vaṇṇaṃ kathesīti āha ‘‘sace panā’’tiādi.

    གནྠིཏཱཏི སནྡཧིཏཱ, ཏཱ པན ནིརནྟརཾ ཀཐིཡམཱནཱ རཱསིཀཏཱ ཝིཡ ཧོནྟཱིཏི ཨཱཧ ‘‘པིཎྜིཏཱ’’ཏི། ཝོཧཱརཝཙནནྟི བྷགཝཏོ, བྷིཀྑཱུནཉྩ པུརཏོ ཝཏྟབྦཾ ཨུཔཙཱརཝཙནཾ།

    Ganthitāti sandahitā, tā pana nirantaraṃ kathiyamānā rāsikatā viya hontīti āha ‘‘piṇḍitā’’ti. Vohāravacananti bhagavato, bhikkhūnañca purato vattabbaṃ upacāravacanaṃ.

    ཨུཔནཙྩནྟིཡཱཏི ཨུཔགནྟྭཱ ནཙྩནྟིཡཱ།

    Upanaccantiyāti upagantvā naccantiyā.

    སཀྐཱུཔསངྐམནཝཎྞནཱ

    Sakkūpasaṅkamanavaṇṇanā

    ༣༥༠. ‘‘ཀདཱ སཾཡཱུལ༹ྷཱ’’ཏིཨཱདཱིནི ཝདནྟོ པཊིསམྨོདཏི། ཝིཔྤཀཱརམྤི དསྶེཡྻཱཏི ཨཌྜྷཀཏཱབྷིནཡཝསེན ནཙྩམྤི དསྶེཡྻ།

    350. ‘‘Kadā saṃyūḷhā’’tiādīni vadanto paṭisammodati. Vippakārampi dasseyyāti aḍḍhakatābhinayavasena naccampi dasseyya.

    ༣༥༡. ‘‘ཨབྷིཝདིཏོ སཀྐོ དེཝཱནམིནྡོ’’ཏིཨཱདཱིནཾ ‘‘ཏེན ཁོ པན སམཡེནཱ’’ཏིཨཱདཱིནཾ (པཱརཱ॰ ༡༦, ༢༤) ཝིཡ སངྒཱིཏིཀཱརཝཙནབྷཱཝེ སཾསཡོ ནཏྠི, ‘‘ཨེཝཉྩ པན ཏཐཱགཏཱ’’ཏི ཨིདྷ པན སིཡཱ སཾསཡོཏི ‘‘དྷམྨསངྒཱཧཀཏྠེརེཧི ཋཔིཏཝཙན’’ནྟི ཝཏྭཱ ཨིཏརསྶཱཔི ཏཐཱབྷཱཝཾ དསྶེཏུཾ ‘‘སབྦམེཏ’’ནྟིཨཱདི ཝུཏྟཾ། ཝུཌྜྷིཝཙནེན ཝུཏྟོཏི ‘‘སུཁཱི ཧོཏུ པཉྩསིཁ སཀྐོ དེཝཱནཾ ཨིནྡོ’’ཏི ཨཱསཱིསཝཱདཾ ཝུཏྟོ། ‘‘བྷགཝཏོ པཱདེ སིརསཱ ཝནྡཏཱི’’ཏི ཝདནྟོ ཨབྷིཝཱདེཏི ནཱམ ‘‘སུཁཱི ཧོཏཱུ’’ཏི ཨཱསཱིསཝཱདསྶ ཝདཱཔནཏོ། ཏཐཱ པན ཨཱསཱིསཝཱདཾ ཝདནྟོ ཨབྷིཝདཏི ནཱམ སབྦཀཱལཾ ཏཐེཝ ཏིཊྛནཏོ།

    351. ‘‘Abhivadito sakko devānamindo’’tiādīnaṃ ‘‘tena kho pana samayenā’’tiādīnaṃ (pārā. 16, 24) viya saṅgītikāravacanabhāve saṃsayo natthi, ‘‘evañca pana tathāgatā’’ti idha pana siyā saṃsayoti ‘‘dhammasaṅgāhakattherehi ṭhapitavacana’’nti vatvā itarassāpi tathābhāvaṃ dassetuṃ ‘‘sabbameta’’ntiādi vuttaṃ. Vuḍḍhivacanena vuttoti ‘‘sukhī hotu pañcasikha sakko devānaṃ indo’’ti āsīsavādaṃ vutto. ‘‘Bhagavato pāde sirasā vandatī’’ti vadanto abhivādeti nāma ‘‘sukhī hotū’’ti āsīsavādassa vadāpanato. Tathā pana āsīsavādaṃ vadanto abhivadati nāma sabbakālaṃ tatheva tiṭṭhanato.

    ཨུརུཾ ཝེཔུལླཾ དསྶཏི དཀྑཏཱིཏི ཨུརུནྡཱ ཝིབྷཏྟིཨལོཔེན། ཝིཝཊཱ ཨངྒཎཊྛཱནཾ། ཡོ པཀཏིཡཱ གུཧཱཡཾ ཨནྡྷཀཱརོ, སོ ཨནྟརཧིཏོཏི ཡོ ཏསྶཾ གུཧཱཡཾ སཏྠུ སམནྟཏོ ཨསཱིཏིཧཏྠཏོ ཨཡཾ པཱཀཏིཀོ ཨནྡྷཀཱརོ, སོ དེཝཱནཾ ཝཏྠཱབྷརཎསརཱིརོབྷཱསེཧི ཨནྟརཧིཏོ, ཨཱལོཀོ སམྤཛྫི། ཨསཱིཏིཧཏྠེ པན བུདྡྷཱལོཀེནེཝ ཨནྡྷཀཱརོ ཨནྟརཧིཏོ, ན ཙ སམཏྠོ དེཝཱནཾ ཨོབྷཱསོ བུདྡྷཱནཾ ཨབྷིབྷཝིཏུཾ།

    Uruṃ vepullaṃ dassati dakkhatīti urundā vibhattialopena. Vivaṭā aṅgaṇaṭṭhānaṃ. Yo pakatiyā guhāyaṃ andhakāro, so antarahitoti yo tassaṃ guhāyaṃ satthu samantato asītihatthato ayaṃ pākatiko andhakāro, so devānaṃ vatthābharaṇasarīrobhāsehi antarahito, āloko sampajji. Asītihatthe pana buddhālokeneva andhakāro antarahito, na ca samattho devānaṃ obhāso buddhānaṃ abhibhavituṃ.

    ༣༥༢. ཙིརཔྤཊིཀཱཧནྟི ཙིརཔྤབྷུཏིཀོ ཨཧཾ། ཨཌྜཀརཎཾ ནཱམ ནཏྠི ཨཝིཝཱདཱདྷིཀརཎཊྛཱནེ ནིབྦཏྟཏྟཱ། ཀཱིལཱ༹དཱིནིཔཱིཏི ཨཱདི-སདྡེན དྷམྨསྶཝནཱདིཾ སངྒཎྷཱཏི།

    352.Cirappaṭikāhanti cirappabhutiko ahaṃ. Aḍḍakaraṇaṃ nāma natthi avivādādhikaraṇaṭṭhāne nibbattattā. Kīḷādīnipīti ādi-saddena dhammassavanādiṃ saṅgaṇhāti.

    སལལ༹མཡགནྡྷཀུཊིཡནྟི སལལ༹རུཀྑེཧི རཉྙཱ པསེནདིནཱ ཀཱརིཏགནྡྷཀུཊིཡཾ། ཏེནསྶཱཏི ཏེན ཕལདྭཡཱདྷིགམེན པཧཱིནཨོལཱ༹རིཀཀཱམརཱགཏཱཡ ཨསྶཱ བྷཱུཛཏིཡཱ དེཝལོཀེ ཨབྷིརཏིཡེཝ ནཏྠི། ཙཀྐནེམིསདྡེན ཏམྷཱ སམཱདྷིམྷཱ ཝུཊྛིཏོཏི ཨེཏྠ ཨདྷིཔྤཱཡཾ ཨཛཱནནྟཱ ‘‘ཨཱརམྨཎསྶ ཨདྷིམཏྟཏཱཡ སམཱཔཏྟིཏོ ཝུཊྛཱནཾ ཛཱཏ’’ནྟི མཉྙེཡྻུནྟི ཏཾ པཊིཀྑིཔནྟོ ‘‘སམཱཔནྣོ སདྡཾ སུཎཱཏཱིཏི ནོ ཝཏ རེ ཝཏྟབྦེ’’ཏི ཨཱཧ། སཏི ཙ ཨཱརམྨཎསངྒྷཊྚནཱཡཾ གཧཎེནཔི བྷཝིཏབྦནྟི ཨདྷིཔྤཱཡེན ‘‘སུཎཱཏཱི’’ཏི ཝུཏྟཾ, ཨིཏརོ ‘‘པཋམཾ ཛྷཱནཾ སམཱཔནྣསྶ སདྡོ ཀཎྚཀོ’’ཏི ཝཙནམཏྟཾ ནིསྶཱཡ སབྦསྶཱཔི ཛྷཱནསྶ སདྡོ ཀཎྚཀོཏི ཨདྷིཔྤཱཡེན པཊིཀྑེཔཾ ཨསཧནྟོ ‘‘ནནུ བྷགཝཱ…པེ॰… བྷཎཏཱི’’ཏི ཨིམམེཝ སུཏྟཔདཾ ཨུདྡྷརི། ཏཏྠ ཡཐཱ དོསདསྶནཔཊིཔཀྑབྷཱཝནཱཝསེན པཊིགྷསཉྙཱནཾ སུཔྤཧཱིནཏྟཱ མཧཏཱཔི སདྡེན ཨརཱུཔསམཱཔཏྟིཏོ ན ཝུཊྛཱནཾ, ཨེཝཾ ‘‘ཨུཔྤཱདོ བྷཡཾ, ཨནུཔྤཱདོ ཁེམ’’ནྟིཨཱདིནཱ སམྨདེཝ དོསདསྶནཔཊིཔཀྑབྷཱཝནཱཝསེན སབྦཱསམྤི ལོཀིཡསཉྙཱནཾ ཨགྒམགྒེན སམཏིཀྐནྟཏྟཱ ཨཱརམྨཎཱདྷིགམཏཱཡ ན ཀདཱཙི ཕལསམཱཔཏྟིཏོ ཝུཊྛཱནཾ ཧོཏཱིཏི། ཏཐཱ པན ན སུཔྤཧཱིནཏྟཱ པཊིགྷསཉྙཱནཾ སབྦརཱུཔསམཱཔཏྟིཏོ ཝུཊྛཱནཾ ཧོཏི, པཋམཛ྄ཛྷཱནཾ པན ཨཔྤཀམྤི སདྡཾ ན སཧཏཱིཏི ཏཾསམཱཔནྣསྶ ‘‘སདྡོ ཀཎྚཀོ’’ཏི ཝུཏྟཾ། ཡདི པན པཊིགྷསཉྙཱནཾ ཝིཀྑམྦྷིཏཏྟཱ མཧཏཱཔི སདྡེན ཨརཱུཔསམཱཔཏྟིཏོ ན ཝུཊྛཱནཾ ཧོཏི, པགེཝ མགྒཕལསམཱཔཏྟིཏོ། ཏེནཱཧ ‘‘ཙཀྐནེམིསདྡེནཱ’’ཏིཨཱདི། ཙཀྐནེམིསདྡེནཱཏི ཙ ནཡིདཾ ཀརཎཝཙནཾ ཧེཏུམྷི, ཀརཎེ ཝཱ ཨཐ ཁོ སཧཡོགེ། ཨིམམེཝ ཧི ཨཏྠཾ དསྶེཏུཾ ‘‘བྷགཝཱ པནཱ’’ཏིཨཱདི ཝུཏྟཾ།

    Salaḷamayagandhakuṭiyanti salaḷarukkhehi raññā pasenadinā kāritagandhakuṭiyaṃ. Tenassāti tena phaladvayādhigamena pahīnaoḷārikakāmarāgatāya assā bhūjatiyā devaloke abhiratiyeva natthi. Cakkanemisaddena tamhā samādhimhā vuṭṭhitoti ettha adhippāyaṃ ajānantā ‘‘ārammaṇassa adhimattatāya samāpattito vuṭṭhānaṃ jāta’’nti maññeyyunti taṃ paṭikkhipanto ‘‘samāpanno saddaṃ suṇātīti no vata re vattabbe’’ti āha. Sati ca ārammaṇasaṅghaṭṭanāyaṃ gahaṇenapi bhavitabbanti adhippāyena ‘‘suṇātī’’ti vuttaṃ, itaro ‘‘paṭhamaṃ jhānaṃ samāpannassa saddo kaṇṭako’’ti vacanamattaṃ nissāya sabbassāpi jhānassa saddo kaṇṭakoti adhippāyena paṭikkhepaṃ asahanto ‘‘nanu bhagavā…pe…bhaṇatī’’ti imameva suttapadaṃ uddhari. Tattha yathā dosadassanapaṭipakkhabhāvanāvasena paṭighasaññānaṃ suppahīnattā mahatāpi saddena arūpasamāpattito na vuṭṭhānaṃ, evaṃ ‘‘uppādo bhayaṃ, anuppādo khema’’ntiādinā sammadeva dosadassanapaṭipakkhabhāvanāvasena sabbāsampi lokiyasaññānaṃ aggamaggena samatikkantattā ārammaṇādhigamatāya na kadāci phalasamāpattito vuṭṭhānaṃ hotīti. Tathā pana na suppahīnattā paṭighasaññānaṃ sabbarūpasamāpattito vuṭṭhānaṃ hoti, paṭhamajjhānaṃ pana appakampi saddaṃ na sahatīti taṃsamāpannassa ‘‘saddo kaṇṭako’’ti vuttaṃ. Yadi pana paṭighasaññānaṃ vikkhambhitattā mahatāpi saddena arūpasamāpattito na vuṭṭhānaṃ hoti, pageva maggaphalasamāpattito. Tenāha ‘‘cakkanemisaddenā’’tiādi. Cakkanemisaddenāti ca nayidaṃ karaṇavacanaṃ hetumhi, karaṇe vā atha kho sahayoge. Imameva hi atthaṃ dassetuṃ ‘‘bhagavā panā’’tiādi vuttaṃ.

    གོཔཀཝཏྠུཝཎྞནཱ

    Gopakavatthuvaṇṇanā

    ༣༥༣. པརིཔཱུརཀཱརིནཱིཏི པརིཔུཎྞཱནི, པརིསུདྡྷཱནི ཙ ཀཏྭཱ རཀྑིཏཝཏཱི། ‘‘ཨིཏྠིཏྟ’’ནྟིཨཱདི ཏཏྠ ཝིརཛྫནཱཀཱརདསྶནཾ། དྷིཏྠིབྷཱཝཾཨིཏྠིབྷཱཝསྶ དྷིཀྐཱརོ ཧེཏཱུཏི ཨཏྠོ། ཨལནྟི པཊིཀྑེཔཝཙནཾ, པཡོཛནཾ ནཏྠཱིཏི ཨཏྠོ། ཝིརཱཛེཏཱིཏི ཛིགུཙྪཏི། ཨེཏཱ སམྤཏྟིཡོཏི ཙཀྐཝཏྟིསིརིཨཱདིཀཱ ཨེཏཱ ཡཐཱཝུཏྟསམྤཏྟིཡོ། ཏསྨཱ པུབྦཔརིཙཡེན ཨུཔཊྛིཏནིཀནྟིཝསེན། ཨུཔཊྛཱནསཱལནྟི སུདྷམྨདེཝསབྷཾ།

    353.Paripūrakārinīti paripuṇṇāni, parisuddhāni ca katvā rakkhitavatī. ‘‘Itthitta’’ntiādi tattha virajjanākāradassanaṃ. Dhitthibhāvaṃitthibhāvassa dhikkāro hetūti attho. Alanti paṭikkhepavacanaṃ, payojanaṃ natthīti attho. Virājetīti jigucchati. Etā sampattiyoti cakkavattisiriādikā etā yathāvuttasampattiyo. Tasmā pubbaparicayena upaṭṭhitanikantivasena. Upaṭṭhānasālanti sudhammadevasabhaṃ.

    སོཏི གོཔཀདེཝཔུཏྟོ། ཝཊྚེཏྭཱ ཝཊྚེཏྭཱཏི ཏོམརཱདིཾ ཝཏྟེནྟེན ཝིཡ ཙོདནཝཙནཾ པརིཝཊྚེཏྭཱ པརིཝཊྚེཏྭཱ། གཱལ༹ྷཾ ཝིཛ྄ཛྷིཏབྦཱཏི གཱལ༹ྷཏརཾ གྷཊྚེཏབྦཱ།

    Soti gopakadevaputto. Vaṭṭetvā vaṭṭetvāti tomarādiṃ vattentena viya codanavacanaṃ parivaṭṭetvā parivaṭṭetvā. Gāḷhaṃ vijjhitabbāti gāḷhataraṃ ghaṭṭetabbā.

    ཀུཏོ མུཁཱཏི ཀུཏོ པཝཏྟཉཱཎམུཁཱ། ཏེནཱཧ ‘‘ཨཉྙཝིཧིཏཀཱ’’ཏི། ཀཏཔུཉྙེཏི སམྨཱ ཀཏཔུཉྙེ དྷམྨེ།

    Kuto mukhāti kuto pavattañāṇamukhā. Tenāha ‘‘aññavihitakā’’ti. Katapuññeti sammā katapuññe dhamme.

    དཱཡོཏི ལཱབྷོ། སོ ཧི དཱིཡཏི ཏེཧི དཱཏབྦཏྟཱ དཱཡོ, ཡེསཾ དཱིཡཏི, ཏེཧི ལདྡྷཏྟཱ ལཱབྷོཏི ཙ ཝུཙྩཏི། སངྑཱརེ…པེ॰… པཏིཊྛཧིཾསུ ཀཏཱདྷིཀཱརཏྟཱ། ཏཏྠ ཏཱཝཏིཾསབྷཝནེ ཋིཏཱནཾཡེཝ ནིབྦཏྟོ ཡཐཱ སཀྐསྶ ཨིནྡསཱལགུཧཱཡཾ ཋིཏསྶེཝ སཀྐཏྟབྷཱཝོ།

    Dāyoti lābho. So hi dīyati tehi dātabbattā dāyo, yesaṃ dīyati, tehi laddhattā lābhoti ca vuccati. Saṅkhāre…pe… patiṭṭhahiṃsu katādhikārattā. Tattha tāvatiṃsabhavane ṭhitānaṃyeva nibbatto yathā sakkassa indasālaguhāyaṃ ṭhitasseva sakkattabhāvo.

    ནིཀནྟིཾ ཏསྨིཾ གནྡྷབྦཀཱཡེ ཨཱལཡཾ སམུཙྪིནྡིཏུཾ ན སཀྐོནྟོ།

    Nikantiṃ tasmiṃ gandhabbakāye ālayaṃ samucchindituṃ na sakkonto.

    ༣༥༤. ཨཏྟནཱཝ ཝེདིཏབྦོཏི ཨཏྟནཱཝ ཨདྷིགནྟྭཱ ཝེདིཏབྦོ, ན པརཔྤཙྩཡིཀེན། ཏུམྷེཧི ཝུཙྩམཱནཱནཱིཏི ཀེཝལཾ ཏུམྷེཧི ཝུཙྩམཱནཱནི།

    354.Attanāva veditabboti attanāva adhigantvā veditabbo, na parappaccayikena. Tumhehi vuccamānānīti kevalaṃ tumhehi vuccamānāni.

    ཝིཡཱཡཱམཱཏི ཝིསྶཊྛཾ ཝཱིརིཡཾ སནྟཱནེ པཝཏྟེམ། པཀཏིཡཱཏི རཱུཔཱཝཙརབྷཱཝེན, ‘‘ཨནུསྶར’’ནྟི ཝཱ པཱཋོ།

    Viyāyāmāti vissaṭṭhaṃ vīriyaṃ santāne pavattema. Pakatiyāti rūpāvacarabhāvena, ‘‘anussara’’nti vā pāṭho.

    ཀཱམརཱགོ ཨེཝ ‘‘ཚནྡོ རཱགོ ཚནྡརཱགོ’’ཏིཨཱདི པཝཏྟིབྷེདེན སཾཡོཛནཊྛེན ‘‘ཀཱམརཱགསཾཡོཛནཱནཱི’’ཏི, ཡོགགནྠཱདིཔཝཏྟིཨཱཀཱརབྷེདེན ‘‘ཀཱམབནྡྷནཱནཱི’’ཏི ཙ ཝུཏྟོ། པཱཔིམཡོགཱནཱིཏི ཨེཏྠ པན སེསཡོགགནྠཱནམྤི ཝསེན ཨཏྠོ ཝེདིཏབྦོ།

    Kāmarāgo eva ‘‘chando rāgo chandarāgo’’tiādi pavattibhedena saṃyojanaṭṭhena ‘‘kāmarāgasaṃyojanānī’’ti, yogaganthādipavattiākārabhedena ‘‘kāmabandhanānī’’ti ca vutto. Pāpimayogānīti ettha pana sesayogaganthānampi vasena attho veditabbo.

    དུཝིདྷཱནནྟི ཝཏྠུཀཱམཀིལེསཀཱམཝསེན དུཝིདྷཱནཾ།

    Duvidhānanti vatthukāmakilesakāmavasena duvidhānaṃ.

    ‘‘ཨེཏྠ ཀིཾ, ཏཏྠ ཀི’’ནྟི ཙ པདདྭཡེ ཀིནྟི ནིཔཱཏམཏྟཾ། ཙཱཏུདྡིསབྷཱཝེཏི ཏེསཾ བུདྡྷཱདཱིནཾ ཏིཎྞཾ རཏནཱནཾ ཙཏུདྡིསཡོགྱབྷཱཝེ ཨཔྤཊིཧཊབྷཱཝེ། བུདྡྷརཏནཉྷི མཧཱཀཱརུཎིཀཏཱཡ, ཨནཱཝརཎཉཱཎཏཱཡ, པརམསནྟུཊྛཏཱཡ ཙ ཙཱཏུདྡིསཾ, དྷམྨརཏནཾ སྭཱཀྑཱཏཏཱཡ, སངྒྷརཏནཾ སུཔྤཊིཔནྣཏཱཡ། ཏེནཱཧ ‘‘སབྦདིསཱསུ ཨསཛྫམཱནོ’’ཏི།

    ‘‘Ettha kiṃ, tattha ki’’nti ca padadvaye kinti nipātamattaṃ. Cātuddisabhāveti tesaṃ buddhādīnaṃ tiṇṇaṃ ratanānaṃ catuddisayogyabhāve appaṭihaṭabhāve. Buddharatanañhi mahākāruṇikatāya, anāvaraṇañāṇatāya, paramasantuṭṭhatāya ca cātuddisaṃ, dhammaratanaṃ svākkhātatāya, saṅgharatanaṃ suppaṭipannatāya. Tenāha ‘‘sabbadisāsu asajjamāno’’ti.

    མཛ྄ཛྷིམསྶ པཋམཛ྄ཛྷཱནསྶ ཨདྷིགཏཏྟཱ ཏཱཝདེཝ ཀཱཡཾ བྲཧྨཔུརོཧིཏཾ ཨདྷིགནྟྭཱ ཏཱཝདེཝ པུརིམཾ ཛྷཱནསཏིཾ པཊིལབྷིཏྭཱ ཏཾ ཛྷཱནཾ པཱདཀཾ ཀཏྭཱ ཝིཔསྶནཾ ཝཌྜྷེཏྭཱ ཨོརམྦྷཱགིཡསཾཡོཛནསམུཙྪིནྡནེན མགྒཕལཝིསེསཾ ཨནཱགཱམིཕལསངྑཱཏཾ ཝིསེསཾ ཨཛ྄ཛྷགཾསུ ཨདྷིགཙྪིཾསུ། ཀེཙི པན ‘‘ཀཱམཱཝཙརཏྟབྷཱཝེན མགྒཕལཱནི ཨདྷིགཙྪིཾསཱུཏི ཨདྷིཔྤཱཡེན པཉྩམསྶ ཛྷཱནསྶ ཨནདྷིགཏཏྟཱ སུདྡྷཱཝཱསེསུ ན ཨུཔྤཛྫིཾསུ, པཋམཛ྄ཛྷཱནལཱབྷིཏཱཡ པན བྲཧྨཔུརོཧིཏེསུ ནིབྦཏྟིཾསཱུ’’ཏི ཝདནྟི།

    Majjhimassa paṭhamajjhānassa adhigatattā tāvadeva kāyaṃ brahmapurohitaṃ adhigantvā tāvadeva purimaṃ jhānasatiṃ paṭilabhitvā taṃ jhānaṃ pādakaṃ katvā vipassanaṃ vaḍḍhetvā orambhāgiyasaṃyojanasamucchindanena maggaphalavisesaṃ anāgāmiphalasaṅkhātaṃ visesaṃ ajjhagaṃsu adhigacchiṃsu. Keci pana ‘‘kāmāvacarattabhāvena maggaphalāni adhigacchiṃsūti adhippāyena pañcamassa jhānassa anadhigatattā suddhāvāsesu na uppajjiṃsu, paṭhamajjhānalābhitāya pana brahmapurohitesu nibbattiṃsū’’ti vadanti.

    མགྷམཱཎཝཝཏྠུཝཎྞནཱ

    Maghamāṇavavatthuvaṇṇanā

    ༣༥༥. ཝིསུདྡྷོཏི ཝིསུདྡྷཨཛ྄ཛྷཱསཡོ, ཨུཔནིསྶཡསམྤནྣོཏི ཨདྷིཔྤཱཡོ། གཱམཀམྨཀརཎཊྛཱནནྟི གཱམིཀཱནཾ ཨུཔཊྛཱནཊྛཱནཾ ཝདཏི། ཏཱཝཏཀེནེཝཱཏི ཨཏྟནཱ སོདྷིཏཊྛཱནེཝ ཨཉྙསྶ ཨཱགནྟྭཱ ཨཝཊྛཱནེནེཝ། སཏིཾ པཊིལབྷིཏྭཱཏི ‘‘ཨཧོ མཡཱ ཀཏཀམྨཾ སཕལཾ ཛཱཏ’’ནྟི ཡོནིསོ ཙིཏྟཾ ཨུཔྤཱདེཏྭཱ།

    355.Visuddhoti visuddhaajjhāsayo, upanissayasampannoti adhippāyo. Gāmakammakaraṇaṭṭhānanti gāmikānaṃ upaṭṭhānaṭṭhānaṃ vadati. Tāvatakenevāti attanā sodhitaṭṭhāneva aññassa āgantvā avaṭṭhāneneva. Satiṃ paṭilabhitvāti ‘‘aho mayā katakammaṃ saphalaṃ jāta’’nti yoniso cittaṃ uppādetvā.

    པཱསཱཎེཏི མགྒམཛ྄ཛྷེ ཨུཙྩཏརབྷཱཝེན ཋིཏཔཱསཱཎེ། ཨུཙྩཱལེཏྭཱཏི ཨུདྡྷརིཏྭཱ། ཨེཏསྶ སགྒསྶ གམནམགྒནྟི ཨེཏསྶ ཙནྡཱདཱིནཾ ཨུཔྤཏྟིཊྛཱནབྷཱུཏསྶ སགྒསྶ གམནམགྒཾ པུཉྙཀམྨཾ།

    Pāsāṇeti maggamajjhe uccatarabhāvena ṭhitapāsāṇe. Uccāletvāti uddharitvā. Etassa saggassa gamanamagganti etassa candādīnaṃ uppattiṭṭhānabhūtassa saggassa gamanamaggaṃ puññakammaṃ.

    སུགཏིཝསེན ལདྡྷབྦཾ, ཀཧཱཔཎཉྩཱཏི ཀཧཱཔཎཾ, དཎྜཝསེན ལདྡྷབྦཾ བལི དཎྜབལི། གཧཔཏིཀཱ ཀིཾ ཀརིསྶནྟཱིཏི གཧཔཏིཀཱ ནཱམ ཨཊཝིཀཱ ཝིཡ ཝིསམནིསྶིཏཱ, ཏེ ན ཀཉྩི ཨནཏྠཾ ཀརིསྶནྟི, ཨེཝཾ ཏཡཱ ཛཱནམཱནེན ཀསྨཱ མཡ྄ཧཾ ན ཀཐིཏནྟི ཡདིཔི པུབྦེ ན ཀཐིཏཾ, ཨེཏརཧི པན བྷཡེན ཀཐིཏཾ, མཱ མཡ྄ཧཾ དོསཾ ཀརེཡྻཱཐ, ཨཱརོཙིཏཀཱལཏོ པཊྛཱཡ ན མཡ྄ཧཾ དོསོཏི ཝདཏི།

    Sugativasena laddhabbaṃ, kahāpaṇañcāti kahāpaṇaṃ, daṇḍavasena laddhabbaṃ bali daṇḍabali. Gahapatikākiṃ karissantīti gahapatikā nāma aṭavikā viya visamanissitā, te na kañci anatthaṃ karissanti, evaṃ tayā jānamānena kasmā mayhaṃ na kathitanti yadipi pubbe na kathitaṃ, etarahi pana bhayena kathitaṃ, mā mayhaṃ dosaṃ kareyyātha, ārocitakālato paṭṭhāya na mayhaṃ dosoti vadati.

    ནིབདྡྷནྟི ཨེཀནྟིཀཾ།

    Nibaddhanti ekantikaṃ.

    པིསུཎེསཱིཏི པིསུཎཀམྨམཀཱསི, ཏུམྷཱཀཾ ཨནྟརེ མཡ྄ཧཾ པེསུཉྙཾ ཨུཔསཾཧརཏཱིཏི ཨཏྠོ། པུན ཨཧརཎཱིཡཾ བྲཧྨདེཡྻཾ ཀཏྭཱ། མཡ྄ཧམྤཱིཏི མཡ྄ཧམྤི ཨཏྠཱཡ མཾ ཨུདྡིསྶ པུཉྙཀམྨཾ ཀརོཐ། ནཱིལུཔྤལཾ ནཱམ ཝིཀསམཱནཾ ཨུདཀཏོ ཨུགྒནྟྭཱཝ ཝིཀསཏི, ཨེཝཾ ཨཧུཏྭཱ ཨནྟོཨུདཀེ པུཔྥིཏཾ ནཱིལུཔྤལཾ ཝིཡ། ཨམྷཱཀཾ པནིདཾ པུཉྙཀམྨཾ བྷཝནྟརཱུཔཔཏྟིཡཱ ཝིནཱ ཨིམསྨིཾཡེཝ ཨཏྟབྷཱཝེ ཝིཔཱཀཾ དེཏཱིཏི ཡོཛནཱ། ཙིནྟཱམཏྟཀམྤཱིཏི དོམནསྶཝསེན ཙིནྟཱམཏྟཀམྤི།

    Pisuṇesīti pisuṇakammamakāsi, tumhākaṃ antare mayhaṃ pesuññaṃ upasaṃharatīti attho. Puna aharaṇīyaṃ brahmadeyyaṃ katvā. Mayhampīti mayhampi atthāya maṃ uddissa puññakammaṃ karotha. Nīluppalaṃ nāma vikasamānaṃ udakato uggantvāva vikasati, evaṃ ahutvā antoudake pupphitaṃ nīluppalaṃ viya. Amhākaṃ panidaṃ puññakammaṃ bhavantarūpapattiyā vinā imasmiṃyeva attabhāve vipākaṃ detīti yojanā. Cintāmattakampīti domanassavasena cintāmattakampi.

    པགེཝཱཏི ཀཱལསྶེཝ, ཨཏིཝིཡ པཱཏོཏི ཨཏྠོ། ཀཎྞིཀཱུཔགནྟི ཀཎྞིཀཡོགྱཾ། ཏཙྪེཏྭཱ མཊྛཾ ཀཏྭཱ ཀཎྞིཀཱཡ ཀཏྟབྦཾ སབྦཾ ནིཊྛཔེཏྭཱ། ཏཐཱ ཧི སཱ ཝཏྠེན ཝེཋེཏྭཱ ཋཔིཏཱ།

    Pagevāti kālasseva, ativiya pātoti attho. Kaṇṇikūpaganti kaṇṇikayogyaṃ. Tacchetvā maṭṭhaṃ katvā kaṇṇikāya kattabbaṃ sabbaṃ niṭṭhapetvā. Tathā hi sā vatthena veṭhetvā ṭhapitā.

    ཙཡབནྡྷནཾ སཱལཱཡ ཨདྷིཊྛཱནསཛྫནཾ། ཀཎྞིཀམཉྩབནྡྷནཾ ཀཎྞིཀཱརོཧནཀཱལེ ཨཱརུཧིཏྭཱ ཨཝཊྛཱནཨཊྚཀརཎཾ།

    Cayabandhanaṃ sālāya adhiṭṭhānasajjanaṃ. Kaṇṇikamañcabandhanaṃ kaṇṇikārohanakāle āruhitvā avaṭṭhānaaṭṭakaraṇaṃ.

    ཡསྶ ཨཏྠཏེ ཕལཀེ ཡསྶ ཕལཀེ ཨཏྠཏེཏི ཡོཛནཱ།

    Yassa atthate phalake yassa phalake atthateti yojanā.

    ཨཝིདཱུརེཏི སཱལཱཡ, ཀོཝིལཱ༹རརུཀྑསྶ ཙ ཨཝིདཱུརེ། སབྦཛེཊྛིཀཱཏི སབྦཱསཾ ཏསྶ བྷརིཡཱནཾ ཛེཊྛིཀཱ སུཛཱཏཱ།

    Avidūreti sālāya, koviḷārarukkhassa ca avidūre. Sabbajeṭṭhikāti sabbāsaṃ tassa bhariyānaṃ jeṭṭhikā sujātā.

    ཏསྶེཝཱཏི སཀྐསྶེཝ། སནྟིཀེཏི སམཱིཔེ སནྟིཀཱཝཙརཱ ཧུཏྭཱ ནིབྦཏྟཱ། དྷཛེན སདྡྷིཾ སཧསྶཡོཛནིཀོ པཱསཱདོ།

    Tassevāti sakkasseva. Santiketi samīpe santikāvacarā hutvā nibbattā. Dhajena saddhiṃ sahassayojaniko pāsādo.

    ཀཀྐཊཀཝིཛ྄ཛྷནསཱུལསདིསནྟི ཀཀྐཊཀེ གཎྷིཏུཾ ཏསྶ བིལཔརིཡནྟསྶ ཝིཛ྄ཛྷནསཱུཙིསདིསཾ།

    Kakkaṭakavijjhanasūlasadisanti kakkaṭake gaṇhituṃ tassa bilapariyantassa vijjhanasūcisadisaṃ.

    མཙྪརཱུཔེནཱཏི མཏམཙྪརཱུཔེན། ཨོསརཏཱིཏི པིལཝནྟོ གཙྪཏི། ཏསྶཱཔི བཀསཀུཎིཀཱཡ པཉྩ ཝསྶསཏཱནི ཨཱཡུ ཨཧོསི དེཝནེརཡིཀཱནཾ ཝིཡ མནུསྶཔེཏཏིརཙྪཱནཱནཾ ཨཱཡུནོ ཨཔརིཙྪིནྣཏྟཱ།

    Maccharūpenāti matamaccharūpena. Osaratīti pilavanto gacchati. Tassāpi bakasakuṇikāya pañca vassasatāni āyu ahosi devanerayikānaṃ viya manussapetatiracchānānaṃ āyuno aparicchinnattā.

    ཨུཀྐུཊྛིམཀཱསཱིཏི ཨུཙྩཱསདྡམཀཱསི།

    Ukkuṭṭhimakāsīti uccāsaddamakāsi.

    པུབྦསནྣིཝཱསེནཱཏི པུརིམཛཱཏཱིསུ ཙིརསནྣིཝཱསེན། ཨེཝཉྷི ཨེཀཙྩཱནཾ དིཊྛམཏྟེནཔི སིནེཧོ ཨུཔྤཛྫཏི། ཏེནཱཧ བྷགཝཱ –

    Pubbasannivāsenāti purimajātīsu cirasannivāsena. Evañhi ekaccānaṃ diṭṭhamattenapi sineho uppajjati. Tenāha bhagavā –

    ‘‘པུབྦེཝ སནྣིཝཱསེན, པཙྩུཔྤནྣཧིཏེན ཝཱ།

    ‘‘Pubbeva sannivāsena, paccuppannahitena vā;

    ཨེཝཾ ཏཾ ཛཱཡཏེ པེམཾ, ཨུཔྤལཾཝ ཡཐོདཀེ’’ཏི༎ (ཛཱ॰ ༡.༢.༡༧༤)།

    Evaṃ taṃ jāyate pemaṃ, uppalaṃva yathodake’’ti. (jā. 1.2.174);

    ཨཝསེསེསཱུཏི ཨསུརེ, སཀྐཾ ཋཔེཏྭཱ དྭཱིསུ དེཝལོཀེསུ དེཝེཝ སནྡྷཱཡ ཝདཏི།

    Avasesesūti asure, sakkaṃ ṭhapetvā dvīsu devalokesu deveva sandhāya vadati.

    ཨཏྠནིསྶིཏནྟི ཨཏྟནོ, པརེསཉྩ ཨཏྠམེཝ ཧིཏམེཝ ནིསྶིཏཾ, ཏཾ པན ཧིཏཾ སུཁསྶ ནིདཱནནྟི ཨཱཧ ‘‘ཀཱརཎནིསྶིཏ’’ནྟི།

    Atthanissitanti attano, paresañca atthameva hitameva nissitaṃ, taṃ pana hitaṃ sukhassa nidānanti āha ‘‘kāraṇanissita’’nti.

    པཉྷཝེཡྻཱཀརཎཝཎྞནཱ

    Pañhaveyyākaraṇavaṇṇanā

    ༣༥༧. ཀིཾསཾཡོཛནཱཏི ཀཱིདིསསཾཡོཛནཱ། སཏྟེ ཨནཏྠེ སཾཡོཛེནྟི བནྡྷནྟཱིཏི སཾཡོཛནཱནཱིཏི ཨཱཧ ‘‘ཀིཾབནྡྷནཱ, ཀེན བནྡྷནེན བདྡྷཱ’’ཏི། པུཐུཀཱཡཱཏི བཧཱུ སཏྟཀཱཡཱཏི ཨཱཧ ‘‘བཧཱུ ཛནཱ’’ཏི། ཝེརཾ ཝུཙྩཏི དོསོཏི ཨཱཧ ‘‘ཨཝེརཱཏི ཨཔྤཊིགྷཱ’’ཏི། ཨཱཝུདྷེན སརཱིརེ དཎྜོ ཨཱཝུདྷདཎྜོ, དྷནསྶ དཱཔནཏྠེན དཎྜོ དྷནདཎྜོ, ཏདུབྷཡཱཀརཎེན ཏཏོ ཝིནིམུཏྟོ ཨདཎྜོ, སམྤཏྟིཧརཎཏོ, སཧ ཨནཏྠུཔྤཏྟིཏོ ཙ སཔཏྟོ, པཊིསཏྟཱུཏི ཨཱཧ ‘‘ཨསཔཏྟཱཏི ཨཔཙྩཏྠིཀཱ’’ཏི། བྱཱཔཛ྄ཛྷཾ ཝུཙྩཏི ཙིཏྟདུཀྑཾ, ཏབྦིརཧིཏཱ ཨབྱཱཔཛ྄ཛྷཱཏི ཨཱཧ ‘‘ཝིགཏདོམནསྶཱ’’ཏི། པུབྦེ ‘‘ཨཝེརཱ’’ཏི པདེན སམྦདྡྷཱགྷཱཏཀཱབྷཱཝོ ཝུཏྟོ། ཏེནཱཧ ‘‘ཨཔྤཊིགྷཱ’’ཏི། ‘‘ཨཝེརིནོ’’ཏི པན ཨིམིནཱཔི ཀོཔམཏྟསྶཔི ཨནུཔྤཱདནཾ། ཏེནཱཧ ‘‘ཀཏྠཙི ཀོཔཾ ན ཨུཔྤཱདེཏྭཱ’’ཏི། ‘‘ཝིཧརེམཱུ’’ཏི ཙ པདཾ པུརིམཔདེཧིཔི ཡོཛེཏབྦཾ ‘‘ཨཝེརཱ ཝིཧརེམཱུ’’ཏིཨཱདིནཱ། ཨཡཉྩ ཨཝེརཱདིབྷཱཝོ སཾཝིབྷཱགེན པཱཀཊོ ཧོཏཱིཏི དསྶེཏུཾ ‘‘ཨཙྪརཱཡཱ’’ཏི ཨཱདིཾ ཝཏྭཱ ‘‘ཨིཏི ཙེ ནེསཾ ཧོཏཱི’’ཏི ཝུཏྟཾ། ཙིཏྟུཔྤཏྟི དལ༹ྷཏརཱཔི ཧུཏྭཱ པཝཏྟཏཱིཏི དསྶེཏུཾ ‘‘དཱནཾ དཏྭཱ, པཱུཛཾ ཀཏྭཱ ཙ པཏྠཡནྟཱི’’ཏི ཝུཏྟཾ། ཨིཏི ཙེཏི ཙེ-སདྡོ ཨནྭཡསཾསགྒེན པརིཀཔྤེཏཱིཏི ཨཱཧ ‘‘ཨེཝཉྩ ནེས’’ནྟི།

    357.Kiṃsaṃyojanāti kīdisasaṃyojanā. Satte anatthe saṃyojenti bandhantīti saṃyojanānīti āha ‘‘kiṃbandhanā, kena bandhanena baddhā’’ti. Puthukāyāti bahū sattakāyāti āha ‘‘bahū janā’’ti. Veraṃ vuccati dosoti āha ‘‘averāti appaṭighā’’ti. Āvudhena sarīre daṇḍo āvudhadaṇḍo, dhanassa dāpanatthena daṇḍo dhanadaṇḍo, tadubhayākaraṇena tato vinimutto adaṇḍo, sampattiharaṇato, saha anatthuppattito ca sapatto, paṭisattūti āha ‘‘asapattāti apaccatthikā’’ti. Byāpajjhaṃ vuccati cittadukkhaṃ, tabbirahitā abyāpajjhāti āha ‘‘vigatadomanassā’’ti. Pubbe ‘‘averā’’ti padena sambaddhāghātakābhāvo vutto. Tenāha ‘‘appaṭighā’’ti. ‘‘Averino’’ti pana imināpi kopamattassapi anuppādanaṃ. Tenāha ‘‘katthaci kopaṃ na uppādetvā’’ti. ‘‘Viharemū’’ti ca padaṃ purimapadehipi yojetabbaṃ ‘‘averā viharemū’’tiādinā. Ayañca averādibhāvo saṃvibhāgena pākaṭo hotīti dassetuṃ ‘‘accharāyā’’ti ādiṃ vatvā ‘‘iti ce nesaṃ hotī’’ti vuttaṃ. Cittuppatti daḷhatarāpi hutvā pavattatīti dassetuṃ ‘‘dānaṃ datvā, pūjaṃ katvā ca patthayantī’’ti vuttaṃ. Iti ceti ce-saddo anvayasaṃsaggena parikappetīti āha ‘‘evañca nesa’’nti.

    ཡཱཡ ཀཱཡཙི པརེསཾ སམྤཏྟིཡཱ ཁཱིཡནཾ ཨུསཱུཡནཾ ཨསཧནཾ ལཀྑཎཾ ཨེཏིསྶཱཏི པརསམྤཏྟིཁཱིཡནལཀྑཎཱ, ཡདགྒེན ཨཏྟསམྤཏྟིཡཱ པརེཧི སཱདྷཱརཎབྷཱཝཾ ཨསཧནལཀྑཎཾ, ཏདགྒེནསྶ ‘‘ནིགཱུཧནལཀྑཎ’’ནྟིཔི ཝཏྟབྦཾ། ཏཐཱ ཧིསྶ པོརཱཎཱ ‘‘མཱ ཨིདཾ ཨཙྪརིཡཾ ཨཉྙེསཾ ཧོཏུ, མཡ྄ཧམེཝ ཧོཏཱུཏི མཙྪརིཡ’’ནྟི ནིབྦཙནཾ ཝདནྟི། ཨབྷིདྷམྨེ ‘‘ཡཱ པརལཱབྷསཀྐཱརགརུཀཱརམཱནནཝནྡནཔཱུཛནཱསུ ཨིསྶཱ ཨིསྶཱཡནཱ’’ཏིཨཱདིནཱ (དྷ॰ ས॰ ༡༡༢༦) ནིཀྑེཔཀཎྜེ, ‘‘ཡཱ ཨེཏེསུ པརེསཾ ལཱབྷཱདཱིསུ ཀིཾ ཨིམིནཱ ཨིམེས’’ནྟིཨཱདིནཱ ཏཾསཾཝཎྞནཱཡཉྩ ཝུཏྟཱནེཝ, ཏསྨཱ ཏཏྠ ཝུཏྟནཡེནེཝ ཝེདིཏབྦཱནཱིཏི ཨདྷིཔྤཱཡོ།

    Yāya kāyaci paresaṃ sampattiyā khīyanaṃ usūyanaṃ asahanaṃ lakkhaṇaṃ etissāti parasampattikhīyanalakkhaṇā, yadaggena attasampattiyā parehi sādhāraṇabhāvaṃ asahanalakkhaṇaṃ, tadaggenassa ‘‘nigūhanalakkhaṇa’’ntipi vattabbaṃ. Tathā hissa porāṇā ‘‘mā idaṃ acchariyaṃ aññesaṃ hotu, mayhameva hotūti macchariya’’nti nibbacanaṃ vadanti. Abhidhamme ‘‘yā paralābhasakkāragarukāramānanavandanapūjanāsu issā issāyanā’’tiādinā (dha. sa. 1126) nikkhepakaṇḍe, ‘‘yā etesu paresaṃ lābhādīsu kiṃ iminā imesa’’ntiādinā taṃsaṃvaṇṇanāyañca vuttāneva, tasmā tattha vuttanayeneva veditabbānīti adhippāyo.

    ཡསྨཱ པན ཨིསྶཱམཙྪརིཡཱནི བཧྭཱདཱིནཝཱནི, ཏེསཾ ཝིབྷཱཝནཱ ལོཀསྶ བཧུཀཱརཱ , ཏསྨཱ ཨབྷིདྷམྨཊྛཀཐཱཡཾ (དྷ॰ ས॰ ཨཊྛ॰ ༡༡༢༥) ཝིབྷཱཝིཏཱནམྤི ཏེསཾ དིཊྛདྷམྨིཀེཔི སམྤརཱཡིཀེ པིཨཱདཱིནཝེ དསྶེནྟོ ‘‘ཨཱཝཱསམཙྪརིཡེན པནཱ’’ཏིཨཱདིམཱཧ། ཨེཏྠཱཏི ཨེཏེསུ ཨིསྶཱམཙྪརིཡེསུ, ཨེཏེསུ ཝཱ ཨཱཝཱསམཙྪརིཡཱདཱིསུ པཉྩསུ མཙྪརིཡེསུ། སངྐཱརཾ སཱིསེན ཨུཀྑིཔིཏྭཱཝ ཝིཙརཏི ཏཏྠ ལགྒཙིཏྟཏཱཡ, ནིཧཱིནཛ྄ཛྷཱསཡཏཱཡ ཙ། མམཱཏི མཡཱ, ཨཡམེཝ ཝཱ པཱཋོ། ལོཧིཏམྤི མུཁཏོ ཨུགྒཙྪཏི ཙིཏྟཝིགྷཱཏེན སཾཏཏྟཧདཡཏཱཡ། ཀུཙྪིཝིརེཙནམྤི ཧོཏི ཨཏིཛལགྒིནོ། ཨཉྙོ ཝིབྷཝཔཊིཝེདྷདྷམྨོ ཨརིཡཱནཾཡེཝ ཧོཏི, ཏེ ཙ ཏཾ ན མཙྪརཱཡནྟི མཙྪརིཡསྶ སབྦསོ པཧཱིནཏྟཱ། པཊིཝེདྷདྷམྨེ མཙྪརིཡསྶ ཨསམྦྷཝོ ཨེཝཱཏི ཨཱཧ ‘‘པརིཡཏྟིདྷམྨམཙྪརིཡེན ཙཱ’’ཏི། ཝཎྞམཙྪརིཡེན དུབྦཎྞོ, དྷམྨམཙྪརིཡེན ཨེལ༹མཱུགོ དུཔྤཉྙོ ཧོཏི།

    Yasmā pana issāmacchariyāni bahvādīnavāni, tesaṃ vibhāvanā lokassa bahukārā , tasmā abhidhammaṭṭhakathāyaṃ (dha. sa. aṭṭha. 1125) vibhāvitānampi tesaṃ diṭṭhadhammikepi samparāyike piādīnave dassento ‘‘āvāsamacchariyena panā’’tiādimāha. Etthāti etesu issāmacchariyesu, etesu vā āvāsamacchariyādīsu pañcasu macchariyesu. Saṅkāraṃ sīsena ukkhipitvāva vicarati tattha laggacittatāya, nihīnajjhāsayatāya ca. Mamāti mayā, ayameva vā pāṭho. Lohitampi mukhato uggacchati cittavighātena saṃtattahadayatāya. Kucchivirecanampi hoti atijalaggino. Añño vibhavapaṭivedhadhammo ariyānaṃyeva hoti, te ca taṃ na maccharāyanti macchariyassa sabbaso pahīnattā. Paṭivedhadhamme macchariyassa asambhavo evāti āha ‘‘pariyattidhammamacchariyena cā’’ti. Vaṇṇamacchariyena dubbaṇṇo, dhammamacchariyena eḷamūgo duppañño hoti.

    ‘‘ཨཔིཙཱ’’ཏིཨཱདི པཉྩནྣཾ མཙྪརིཡཱནཾ ཝསེན ཀམྨསརིཀྑཀཝིཔཱཀདསྶནཾ། ཨཱཝཱསམཙྪརིཡེན ལོཧགེཧེ པཙྩཏི པརེསཾ ཨཱཝཱསཔཙྩཡཧིཏསུཁནིསེདྷནཏོ། ཀུལམཙྪརིཡེན ཨཔྤལཱབྷོ ཧོཏི པརེཧི ཀུལེསུ ལདྡྷབྦལཱབྷནིསེདྷནཏོ, ཨཔྤལཱབྷོཏི ཙ ཨལཱབྷོཏི ཨཏྠོ། ལཱབྷམཙྪརིཡེན གཱུཐནིརཡེ ནིབྦཏྟཏི ལཱབྷཧེཏུ པརེཧི ལདྡྷབྦསྶ ཨསྶཱདནིསེདྷནཏོ། སབྦཐཱཔི ནིརསྶཱདོ ཧི གཱུཐནིརཡོ། ཝཎྞོ ནཱམ ན ཧོཏཱིཏི སརཱིརཝཎྞོ, གུཎཝཎྞོཏི དུཝིདྷོཔི ཝཎྞོ ནཱམམཏྟེནཔི ན ཧོཏི, ཏཏྠ ཏཏྠ ནིབྦཏྟམཱནོ ཝིརཱུཔོ ཨེཝ ཧོཏི། སམྤཏྟིནིགཱུཧནསབྷཱཝེན མཙྪརིཡེན ཝིརཱུཔིཏེ སནྟཱནེ ཡེབྷུཡྻེན གུཎཱ པཏིཊྛམེཝ ན ལབྷནྟི, ཡེ ཙ པཏིཊྛཧེཡྻུཾ, ཏེསམྤི ཝསེནསྶ ཝཎྞོ ན བྷཝེཡྻ། ཏེ ཧི ཏསྶ ལོཀེ རཏྟིཾ ཁིཏྟཱ སརཱ ཝིཡ ན པཉྙཱཡནྟི། དྷམྨམཙྪརིཡེན ཀུཀྐུལ༹ནིརཡེ། སོཏཱཔཏྟིམགྒེན པཧཱིཡཏི ཨཔཱཡགམནཱིཡབྷཱཝཏོ། ཝེརཱདཱིཧི ན པརིམུཙྩནྟིཡེཝ ཏཔྤརིམུཙྩནཱཡ ཨིཙྪཱཡ ཨཔྤཏྟབྦཏྟཱ ཛཱཏིཨཱདིདྷམྨཱནཾ སཏྟཱནཾ ཛཱཏིཨཱདཱིཧི ཝིཡ།

    ‘‘Apicā’’tiādi pañcannaṃ macchariyānaṃ vasena kammasarikkhakavipākadassanaṃ. Āvāsamacchariyena lohagehe paccati paresaṃ āvāsapaccayahitasukhanisedhanato. Kulamacchariyena appalābho hoti parehi kulesu laddhabbalābhanisedhanato, appalābhoti ca alābhoti attho. Lābhamacchariyena gūthaniraye nibbattati lābhahetu parehi laddhabbassa assādanisedhanato. Sabbathāpi nirassādo hi gūthanirayo. Vaṇṇo nāma na hotīti sarīravaṇṇo, guṇavaṇṇoti duvidhopi vaṇṇo nāmamattenapi na hoti, tattha tattha nibbattamāno virūpo eva hoti. Sampattinigūhanasabhāvena macchariyena virūpite santāne yebhuyyena guṇā patiṭṭhameva na labhanti, ye ca patiṭṭhaheyyuṃ, tesampi vasenassa vaṇṇo na bhaveyya. Te hi tassa loke rattiṃ khittā sarā viya na paññāyanti. Dhammamacchariyenakukkuḷaniraye.Sotāpattimaggenapahīyati apāyagamanīyabhāvato. Verādīhi na parimuccantiyeva tapparimuccanāya icchāya appattabbattā jātiādidhammānaṃ sattānaṃ jātiādīhi viya.

    ཏིཎྞཱ མེཏྠ ཀངྑཱཏི མ-ཀཱརོ པདསནྡྷིཀརོ། ཨེཏསྨིཾ པཉྷེཏི ཨེཏསྨིཾ ‘‘ཀིཾསཾཡོཛནཱ ནུ ཁོ’’ཏི ཨེཝཾ ཉཱཏུཾ ཨིཙྪིཏེ ཨཏྠེ། ཏུམྷཱཀཾ ཝཙནཾ སུཏྭཱཏི ‘‘ཨིསྶཱམཙྪརིཡསཾཡོཛནཱ’’ཏི ཨེཝཾ པཝཏྟཾ ཏུམྷཱཀཾ ཝིསྶཛྫནཝཙནཾ སུཏྭཱ། ཀངྑཱ ཏིཎྞཱཏི ཡཐཱཔུཙྪིཏེ ཨཏྠེ སཾསཡོ ཏརིཏོ ཝིགཏོ དེསནཱནུསྶརཎམཏྟེན, ན སམུཙྪེདཝསེནཱཏི ཨཱཧ ‘‘ན མགྒཝསེནཱ’’ཏིཨཱདི། ཨཡམྤི ཀཐཾཀཐཱ ཝིགཏཱཏི ཀངྑཱཡ ཝིགཏཏྟཱ ཨེཝ ཏསྶཱ པཝཏྟིཨཱཀཱརཝིསེསབྷཱུཏཱ ‘‘ཨིདཾ ཀཐ ཨིདཾ ཀཐ’’ནྟི ཨཡམྤི ཀཐཾཀཐཱ ཝིགཏཱ ཨཔགཏཱ།

    Tiṇṇā mettha kaṅkhāti ma-kāro padasandhikaro. Etasmiṃ pañheti etasmiṃ ‘‘kiṃsaṃyojanā nu kho’’ti evaṃ ñātuṃ icchite atthe. Tumhākaṃ vacanaṃ sutvāti ‘‘issāmacchariyasaṃyojanā’’ti evaṃ pavattaṃ tumhākaṃ vissajjanavacanaṃ sutvā. Kaṅkhā tiṇṇāti yathāpucchite atthe saṃsayo tarito vigato desanānussaraṇamattena, na samucchedavasenāti āha ‘‘na maggavasenā’’tiādi. Ayampi kathaṃkathā vigatāti kaṅkhāya vigatattā eva tassā pavattiākāravisesabhūtā ‘‘idaṃ katha idaṃ katha’’nti ayampi kathaṃkathā vigatā apagatā.

    ༣༥༨. ནིདཱནཱདཱིནི མཧཱནིདཱནསུཏྟཝཎྞནཱཡཾ (དཱི॰ ནི॰ ཨཊྛ॰ ༢.༩༥) ཝུཏྟཏྠཱནེཝ། པིཡཱནཾ ཨཏྟནོ པརིགྒཧབྷཱུཏཱནཾ སཏྟསངྑཱརཱནཾ པརེཧི སཱདྷཱརཎབྷཱཝཱསཧནཝསེན, ནིགཱུཧནཝསེན ཙ པཝཏྟནཏོ པིཡསཏྟསངྑཱརནིདཱནཾ མཙྪརིཡཾ, ཨཔྤིཡཱནཾ པརིགྒཧབྷཱུཏཱནཾ སཏྟཱནཾ, སངྑཱརཱནཉྩ ཨསཧནཝསེན པཝཏྟིཡཱ ཨཔྤིཡསཏྟསངྑཱརནིདཱནཱ ཨིསྶཱ། ཡཉྷི ཀིཉྩི ཨཔྤིཡསམྦནྡྷཾ བྷདྡཀམྤི ཏཾ ཀོདྷནསྶ ཨཔྤིཡམེཝཱཏི། ཨུབྷཡནྟི མཙྪརིཡཾ, ཨིསྶཱ ཙཱཏི ཨུབྷཡཾ། ཨུབྷཡནིདཱནནྟི པིཡནིདཱནཉྩེཝ ཨཔྤིཡནིདཱནཉྩ། པིཡཱཏི ཨིཊྛཱ། ཀེལཱ༹ཡིཏཱཏི དྷནཱཡིཏཱ། མམཱཡིཏཱཏི མམཏྟཾ ཀཏྭཱ པརིགྒཧིཏཱ། ཨིསྶཾ ཀརོཏཱིཏི ‘‘ཀིཾ ཨིམསྶ ཨིམིནཱ’’ཏི ཏསྶ པིཡསཏྟལཱབྷཱསཧནཝསེན ཨུསྶཱུཡཏི, ཏམེཝ པིཡསཏྟཾ ཡཱཙིཏོ། ཨཧོ ཝཏསྶཱཏི སཱདྷུ ཝཏ ཨསྶ། ‘‘ཨིམསྶ པུགྒལསྶ ཨེཝརཱུཔཾ པིཡཝཏྠུ ན བྷཝེཡྻཱ’’ཏི ཨིསྶཾ ཀརོཏི ཨུསཱུཡཾ ཨུཔྤཱདེཏི། མམཱཡནྟཱཏི ཀེལཱ༹ཡནྟཱ། ཨཔྤིཡེཏི ཨཔྤིཡེ སཏྟེ ཏེསཾ སཏཱཔཏོ། ཨསྶཱཏི པུགྒལསྶ, ཡེན ཏེ ལདྡྷཱ། ཏེཏི སཏྟསངྑཱརཱ, སཙེཔི ཨམནཱཔཱ ཧོནྟི ཨཔྤིཡེཧི སམུདཱགཏཏྟཱ། ཝིཔརཱིཏཝུཏྟིཏཱཡཱཏི ཨཡཱཐཱཝགཱཧིཏཱཡ། ཀོ ཨཉྙོ ཨེཝརཱུཔསྶ ལཱབྷཱིཏི ཏེན ཨཏྟཱནཾ སམྦྷཱཝེནྟོ ཨིསྶཾ ཝཱ ཀརོཏི། ཨཉྙསྶ ཏཱདིསཾ ཨུཔྤཛྫམཱནམྤི ‘‘ཨཧོ ཝཏསྶ ཨེཝརཱུཔཾ ན བྷཝེཡྻཱ’’ཏི ཨིསྶཾ ཝཱ ཀརོཏི, ཨཡཉྩ ནཡོ ཧེཊྛཱ ཝུཏྟནཡཏྟཱ ན གཧིཏོ།

    358.Nidānādīni mahānidānasuttavaṇṇanāyaṃ (dī. ni. aṭṭha. 2.95) vuttatthāneva. Piyānaṃ attano pariggahabhūtānaṃ sattasaṅkhārānaṃ parehi sādhāraṇabhāvāsahanavasena, nigūhanavasena ca pavattanato piyasattasaṅkhāranidānaṃ macchariyaṃ, appiyānaṃ pariggahabhūtānaṃ sattānaṃ, saṅkhārānañca asahanavasena pavattiyā appiyasattasaṅkhāranidānā issā. Yañhi kiñci appiyasambandhaṃ bhaddakampi taṃ kodhanassa appiyamevāti. Ubhayanti macchariyaṃ, issā cāti ubhayaṃ. Ubhayanidānanti piyanidānañceva appiyanidānañca. Piyāti iṭṭhā. Keḷāyitāti dhanāyitā. Mamāyitāti mamattaṃ katvā pariggahitā. Issaṃ karotīti ‘‘kiṃ imassa iminā’’ti tassa piyasattalābhāsahanavasena ussūyati, tameva piyasattaṃ yācito. Aho vatassāti sādhu vata assa. ‘‘Imassa puggalassa evarūpaṃ piyavatthu na bhaveyyā’’ti issaṃ karoti usūyaṃ uppādeti. Mamāyantāti keḷāyantā. Appiyeti appiye satte tesaṃ satāpato. Assāti puggalassa, yena te laddhā. Teti sattasaṅkhārā, sacepi amanāpā honti appiyehi samudāgatattā. Viparītavuttitāyāti ayāthāvagāhitāya. Ko añño evarūpassa lābhīti tena attānaṃ sambhāvento issaṃ vā karoti. Aññassa tādisaṃ uppajjamānampi ‘‘aho vatassa evarūpaṃ na bhaveyyā’’ti issaṃ vā karoti, ayañca nayo heṭṭhā vuttanayattā na gahito.

    ཝཏྠུཀཱམཱནཾ པརིཡེསནཝསེན པཝཏྟོ ཚནྡོ པརིཡེསནཚནྡོ། པཊིལཱབྷཔཙྩཡོ ཚནྡོ པཊིལཱབྷཚནྡོ། པརིབྷུཉྫནཝསེན པཝཏྟོ ཚནྡོ པརིབྷོགཚནྡོ། པཊིལདྡྷཱནཾ སནྣིདྷཱཔནཝསེན, སངྒོཔནཝསེན ཙ པཝཏྟོ ཚནྡོ སནྣིདྷིཚནྡོ། དིཊྛདྷམྨིཀམེཝ པཡོཛནཾ ཙིནྟེཏྭཱ ཝིསྶཛྫནཝསེན པཝཏྟོ ཚནྡོ ཝིསྶཛྫནཚནྡོ། ཏེནཱཧ ‘‘ཀཏམོ’’ཏིཨཱདི།

    Vatthukāmānaṃ pariyesanavasena pavatto chando pariyesanachando. Paṭilābhapaccayo chando paṭilābhachando. Paribhuñjanavasena pavatto chando paribhogachando. Paṭiladdhānaṃ sannidhāpanavasena, saṅgopanavasena ca pavatto chando sannidhichando. Diṭṭhadhammikameva payojanaṃ cintetvā vissajjanavasena pavatto chando vissajjanachando. Tenāha ‘‘katamo’’tiādi.

    ཨཡཾ པཉྩཝིདྷོཔི ཨཏྠཏོ ཏཎྷཱཡནམེཝཱཏི ཨཱཧ ‘‘ཏཎྷཱམཏྟམེཝཱ’’ཏི།

    Ayaṃ pañcavidhopi atthato taṇhāyanamevāti āha ‘‘taṇhāmattamevā’’ti.

    ཨེཝཾ ཝུཏྟོ ‘‘ལཱབྷཾ པཊིཙྩ ཝིནིཙྪཡོ’’ཏི ཨེཝཾ མཧཱནིདཱནསུཏྟེ (དཱི॰ ནི॰ ༢.༡༠༣) ཝུཏྟོ ཝིནིཙྪཡཝིཏཀྐོ ཝིཏཀྐོ ནཱམ, ན ཡོ ཀོཙི ཝིཏཀྐོ། ཨིདཱནི ཡཐཱཝུཏྟཾ ཝིནིཙྪཡཝིཏཀྐཾ ཨཏྠུདྡྷཱརནཡེན ནཱིཧརིཏྭཱ དསྶེཏུཾ ‘‘ཝིནིཙྪཡོ’’ཏིཨཱདི ཝུཏྟཾ། ཨཊྛསཏནྟི ཨཊྛཱདྷིཀཾ སཏཾ, ཏཉྩ ཁོ ཏཎྷཱཝིཙརིཏཱནཾ སཏཾ, ན ཡསྶ ཀསྶཙཱིཏི དསྶེཏུཾ ‘‘ཏཎྷཱཝིཙརིཏ’’ནྟི ཝུཏྟཾ། ཏཎྷཱཝིནིཙྪཡོ ནཱམ ཏཎྷཱཡ ཝསེན ཝཀྑམཱནནཡེན ཨཱརམྨཎསྶ ཝིནིཙྪིནནཏོ། དིཊྛིདསྶནཝསེན ‘‘ཨིདམེཝ སཙྩཾ, མོགྷཾ ཨཉྙ’’ནྟི ཝིནིཙྪིནནཏོ དིཊྛིཝིནིཙྪཡོ ནཱམ། ཨིཊྛཾ པཎཱིཏཾ, ཨནིཊྛཾ ཨཔྤཎཱིཏཾ, པིཡཱཡིཏབྦཾ པིཡཾ, ཨཔྤིཡཱཡིཏབྦཾ ཨཔྤིཡཾ, ཏེསཾ ཝཝཏྠཱནཾ ཏཎྷཱཝསེན ན ཧོཏི། ཏཎྷཱཝསེན ཧི ཨེཀཙྩོ ཀིཉྩི ཝཏྠུཾ པཎཱིཏཾ མཉྙཏི, ཨེཀཙྩོ ཧཱིནཾ, ཨེཀཙྩོ པིཡཱཡཏི, ཨེཀཙྩོ ནཔྤིཡཱཡཏི། ཏེནཱཧ ‘‘ཏདེཝ ཧཱི’’ཏིཨཱདི ། ‘‘དསྶཱམཱི’’ཏི ཨིདཾ ཝིསྶཛྫནཚནྡེ ཝུཏྟནཡེན ཙེཝ ཝཊྚཱུཔནིསྶཡདཱནཝསེན ཙ ཝེདིཏབྦཾ། ཏམྤི ཧི ཏཎྷཱཚནྡཧེཏུཀནྟི།

    Evaṃ vutto ‘‘lābhaṃ paṭicca vinicchayo’’ti evaṃ mahānidānasutte (dī. ni. 2.103) vutto vinicchayavitakko vitakko nāma, na yo koci vitakko. Idāni yathāvuttaṃ vinicchayavitakkaṃ atthuddhāranayena nīharitvā dassetuṃ ‘‘vinicchayo’’tiādi vuttaṃ. Aṭṭhasatanti aṭṭhādhikaṃ sataṃ, tañca kho taṇhāvicaritānaṃ sataṃ, na yassa kassacīti dassetuṃ ‘‘taṇhāvicarita’’nti vuttaṃ. Taṇhāvinicchayo nāma taṇhāya vasena vakkhamānanayena ārammaṇassa vinicchinanato. Diṭṭhidassanavasena ‘‘idameva saccaṃ, moghaṃ añña’’nti vinicchinanato diṭṭhivinicchayo nāma. Iṭṭhaṃ paṇītaṃ, aniṭṭhaṃ appaṇītaṃ, piyāyitabbaṃ piyaṃ, appiyāyitabbaṃ appiyaṃ, tesaṃ vavatthānaṃ taṇhāvasena na hoti. Taṇhāvasena hi ekacco kiñci vatthuṃ paṇītaṃ maññati, ekacco hīnaṃ, ekacco piyāyati, ekacco nappiyāyati. Tenāha ‘‘tadeva hī’’tiādi . ‘‘Dassāmī’’ti idaṃ vissajjanachande vuttanayena ceva vaṭṭūpanissayadānavasena ca veditabbaṃ. Tampi hi taṇhāchandahetukanti.

    ཡཏྠ སཡཾ ཨུཔྤཛྫནྟི, ཏཾ སནྟཱནཾ སཾསཱརེ པཔཉྩེནྟི ཝིཏྠཱརཡནྟཱིཏི པཔཉྩཱ། ཡསྶ ཙ ཨུཔྤནྣཱ, ཏཾ ‘‘རཏྟོ’’ཏི ཝཱ ‘‘སཏྟོ’’ཏི ཝཱ ‘‘མིཙྪཱབྷིནིཝིཊྛོ’’ཏི ཝཱ པཔཉྩེནྟི བྱཉྫེནྟཱིཏི པཔཉྩཱ། ཡསྨཱ ཏཎྷཱདིཊྛིཡོ ཨདྷིམཏྟཱ ཧུཏྭཱ པཝཏྟམཱནཱ ཏཾསམངྒཱིཔུགྒལཾ པམཏྟཱཀཱརཾ པཱཔེནྟི, མཱནོ པན ཛཱཏིམདཱདི ཝསེན མཏྟཱཀཱརམྤི, ཏསྨཱ ‘‘མཏྟཔམཏྟཱཀཱརཔཱཔནཊྛེནཱ’’ཏི ཝུཏྟཾ། སངྑཱ ཝུཙྩཏི ཀོཊྛཱསོ བྷཱགསོ སངྑཱཡཏི ཨུཔཊྛཱཏཱིཏི། ཡསྨཱ པཔཉྩསཉྙཱ ཏཾཏཾདྭཱརཝསེན, ཨཱརམྨཎཝསེན ཙ བྷཱགསོ ཝིཏཀྐསྶ པཙྩཡཱ ཧོནྟི, ན ཀེཝལཱ, ཏསྨཱ པཔཉྩསཉྙཱསངྑཱནིདཱནོ ཝིཏཀྐོ ཝུཏྟོ, པཔཉྩསཉྙཱནཾ ཝཱ ཨནེཀབྷེདབྷིནྣཏྟཱ ཏཾསམུདཱཡོ ‘‘པཔཉྩསཉྙཱསངྑཱ’’ཏི ཝུཏྟོ། པཔཉྩསཉྙཱསངྑཱགྒཧཎེན ཙ ཨནཝསེསོ དུཀྑསམུདཡོ ཝུཏྟོ ཏཾཏཾ ནིམིཏྟཏྟཱ ཝཊྚདུཀྑསྶཱཏི།

    Yattha sayaṃ uppajjanti, taṃ santānaṃ saṃsāre papañcenti vitthārayantīti papañcā. Yassa ca uppannā, taṃ ‘‘ratto’’ti vā ‘‘satto’’ti vā ‘‘micchābhiniviṭṭho’’ti vā papañcenti byañjentīti papañcā. Yasmā taṇhādiṭṭhiyo adhimattā hutvā pavattamānā taṃsamaṅgīpuggalaṃ pamattākāraṃ pāpenti, māno pana jātimadādi vasena mattākārampi, tasmā ‘‘mattapamattākārapāpanaṭṭhenā’’ti vuttaṃ. Saṅkhā vuccati koṭṭhāso bhāgaso saṅkhāyati upaṭṭhātīti. Yasmā papañcasaññā taṃtaṃdvāravasena, ārammaṇavasena ca bhāgaso vitakkassa paccayā honti, na kevalā, tasmā papañcasaññāsaṅkhānidāno vitakko vutto, papañcasaññānaṃ vā anekabhedabhinnattā taṃsamudāyo ‘‘papañcasaññāsaṅkhā’’ti vutto. Papañcasaññāsaṅkhāggahaṇena ca anavaseso dukkhasamudayo vutto taṃtaṃ nimittattā vaṭṭadukkhassāti.

    ཡོ ནིརོདྷོ ཝཱུཔསམོཏི ནིརོདྷསཙྩམཱཧ། ཏསྶ སཱརུཔྤནྟི ཏསྶ པཔཉྩསཉྙཱསངྑཱཡ ནིརོདྷསྶ ཝཱུཔསམསྶ ཨདྷིགམུཔཱཡཏཱཡ སཱརུཔྤཾ ཨནུཙྪཝིཀཾ, ཨེཏེན ཝིཔསྶནཾ ཝདཏི། ཏཏྠ ཡཐཱཝུཏྟནིརོདྷེ ཨཱརམྨཎཀརཎཝསེན གཙྪཏི པཝཏྟཏཱིཏི ཏཏྠགཱམིནཱི, ཨེཏེན མགྒཾ། ཏེནཱཧ ‘‘སཧ ཝིཔསྶནཱཡ མགྒཾ པུཙྪཏཱི’’ཏི།

    Yo nirodho vūpasamoti nirodhasaccamāha. Tassa sāruppanti tassa papañcasaññāsaṅkhāya nirodhassa vūpasamassa adhigamupāyatāya sāruppaṃ anucchavikaṃ, etena vipassanaṃ vadati. Tattha yathāvuttanirodhe ārammaṇakaraṇavasena gacchati pavattatīti tatthagāminī, etena maggaṃ. Tenāha ‘‘saha vipassanāya maggaṃ pucchatī’’ti.

    ཝེདནཱཀམྨཊྛཱནཝཎྞནཱ

    Vedanākammaṭṭhānavaṇṇanā

    ༣༥༩. པུཙྪིཏམེཝ ཀཐིཏཾ། ཡསྨཱ སཀྐེན དེཝཱནཾ ཨིནྡེན པཔཉྩསཉྙཱསངྑཱནིརོདྷགཱམིནིཔཊིཔདཱ པུཙྪིཏཱཝ, བྷགཝཱ ཙ ཏདདྷིགམུཔཱཡཾ ཨརཱུཔཀམྨཊྛཱནཾ ཏསྶ ཨཛ྄ཛྷཱསཡཝསེན ཝེདནཱམུཁེན ཀཐེནྟོ ཏིསྶོ ཝེདནཱ ཨཱརབྷི, ཨིཏི པུཙྪིཏམེཝ ཀཐེནྟེན པུཙྪཱནུསནྡྷིཝསེན སཱནུསནྡྷིམེཝ ཙ ཀཐིཏཾ། ན ཧི བུདྡྷཱནཾ ཨནནུསནྡྷིཀཱ ཀཐཱ ནཱམ ཨཏྠི། ཨིདཱནིསྶ ཝེདནཱམུཁེན ཨརཱུཔཀམྨཊྛཱནསྶེཝ ཀཐནེ ཀཱརཎཾ དསྶེཏུཾ ‘‘དེཝཏཱནཉྷཱི’’ཏིཨཱདི ཝུཏྟཾ། ཀརཛཀཱཡསྶ སུཁུམཏཱཝཙནེནེཝ ཨཙྩནྟམུདུསུཁུམཱལབྷཱཝཱཔི ཝུཏྟཱ ཨེཝཱཏི དཊྛབྦཾ། ཀམྨཛནྟི ཀམྨཛཏེཛཾ། ཏསྶ བལཝབྷཱཝོ ཨུལཱ༹རཔུཉྙཀམྨནིབྦཏྟཏྟཱ, ཨཏིཝིཡ གརུམདྷུརསིནིདྡྷསུདྡྷཱཧཱརཛཱིརཎཏོ ཙ། ཨེཀཱཧཱརམྤཱིཏི ཨེཀཱཧཱརཝཱརམྤི། ‘‘ཝིལཱིཡནྟཱི’’ཏི ཨེཏེན ཀརཛཀཱཡསྶ མནྡཏཱཡ ཀམྨཛཏེཛསྶ བལཝབྷཱཝེན ཨཱཧཱརཝེལཱཏིཀྐམེན ནེསཾ བལཝཏཱི དུཀྑཝེདནཱ ཨུཔྤཛྫམཱནཱ སུཔཱཀཊཱ ཧོཏཱིཏི དསྶེཏི། ནིདསྶནམཏྟཉྩེཏཾ , སུཁཝེདནཱཔི པན ནེསཾ ཨུལཱ༹རཔཎཱིཏེསུ ཨཱརམྨཎེསུ ཨུཔརཱུཔརི ཨནིགྒཧཎཝསེན པཝཏྟམཱནཱ སུཔཱཀཊཱ ཧུཏྭཱ ཨུཔཊྛཱཏིཡེཝ། ཨུཔེཀྑཱཔི ཏེསཾ ཀདཱཙི ཨུཔྤཛྫམཱནཱ སནྟཔཎཱིཏརཱུཔཱ ཨེཝ ཨིཊྛམཛ྄ཛྷཏྟེ ཨེཝ ཨཱརམྨཎེ པཝཏྟནཏོ། ཏེནེཝཱཧ ‘‘ཏསྨཱ’’ཏིཨཱདི།

    359.Pucchitameva kathitaṃ. Yasmā sakkena devānaṃ indena papañcasaññāsaṅkhānirodhagāminipaṭipadā pucchitāva, bhagavā ca tadadhigamupāyaṃ arūpakammaṭṭhānaṃ tassa ajjhāsayavasena vedanāmukhena kathento tisso vedanā ārabhi, iti pucchitameva kathentena pucchānusandhivasena sānusandhimeva ca kathitaṃ. Na hi buddhānaṃ ananusandhikā kathā nāma atthi. Idānissa vedanāmukhena arūpakammaṭṭhānasseva kathane kāraṇaṃ dassetuṃ ‘‘devatānañhī’’tiādi vuttaṃ. Karajakāyassa sukhumatāvacaneneva accantamudusukhumālabhāvāpi vuttā evāti daṭṭhabbaṃ. Kammajanti kammajatejaṃ. Tassa balavabhāvo uḷārapuññakammanibbattattā, ativiya garumadhurasiniddhasuddhāhārajīraṇato ca. Ekāhārampīti ekāhāravārampi. ‘‘Vilīyantī’’ti etena karajakāyassa mandatāya kammajatejassa balavabhāvena āhāravelātikkamena nesaṃ balavatī dukkhavedanā uppajjamānā supākaṭā hotīti dasseti. Nidassanamattañcetaṃ , sukhavedanāpi pana nesaṃ uḷārapaṇītesu ārammaṇesu uparūpari aniggahaṇavasena pavattamānā supākaṭā hutvā upaṭṭhātiyeva. Upekkhāpi tesaṃ kadāci uppajjamānā santapaṇītarūpā eva iṭṭhamajjhatte eva ārammaṇe pavattanato. Tenevāha ‘‘tasmā’’tiādi.

    རཱུཔཀམྨཊྛཱནནྟི རཱུཔཔརིགྒཧཾ, རཱུཔམུཁེན ཝིཔསྶནཱབྷིནིཝེསནྟི ཨཏྠོ། ཨརཱུཔཀམྨཊྛཱནནྟི ཨེཏྠཱཔི ཨེསེཝ ནཡོ། ཏཏྠ རཱུཔཀམྨཊྛཱནེན སམཐཱབྷིནིཝེསོཔི སངྒཡ྄ཧཏི, ཝིཔསྶནཱབྷིནིཝེསོ པན ཨིདྷཱདྷིཔྤེཏོཏི དསྶེནྟོ ‘‘རཱུཔཔརིགྒཧོ ཨརཱུཔཔརིགྒཧོཏིཔི ཨེཏདེཝ ཝུཙྩཏཱི’’ཏི ཨཱཧ། ཙཏུདྷཱཏུཝཝཏྠཱནནྟི ཨེཏྠ ཡེབྷུཡྻེན ཙཏུདྷཱཏུཝཝཏྠཱནཾ ཝིཏྠཱརེནྟོ རཱུཔཀམྨཊྛཱནཾ ཀཐེཏཱིཏི ཨདྷིཔྤཱཡོ། རཱུཔཀམྨཊྛཱནཾ དསྶེཏྭཱཝ ཀཐེཏི ‘‘ཨེཝཾ རཱུཔཀམྨཊྛཱནཾ ཝུཙྩམཱནཾ སུཊྛུ ཝིབྷཱུཏཾ པཱཀཊཾ ཧུཏྭཱ ཨུཔཊྛཱཏཱི’’ཏི། ‘‘ཨེཏེན ཨིདྷཱཔི རཱུཔཀམྨཊྛཱནཾ ཨེཀདེསེན ཝིབྷཱཝིཏམེཝཱ’’ཏི ཝདནྟི།

    Rūpakammaṭṭhānanti rūpapariggahaṃ, rūpamukhena vipassanābhinivesanti attho. Arūpakammaṭṭhānanti etthāpi eseva nayo. Tattha rūpakammaṭṭhānena samathābhinivesopi saṅgayhati, vipassanābhiniveso pana idhādhippetoti dassento ‘‘rūpapariggaho arūpapariggahotipi etadeva vuccatī’’ti āha. Catudhātuvavatthānanti ettha yebhuyyena catudhātuvavatthānaṃ vitthārento rūpakammaṭṭhānaṃ kathetīti adhippāyo. Rūpakammaṭṭhānaṃ dassetvāva katheti ‘‘evaṃ rūpakammaṭṭhānaṃ vuccamānaṃ suṭṭhu vibhūtaṃ pākaṭaṃ hutvā upaṭṭhātī’’ti. ‘‘Etena idhāpi rūpakammaṭṭhānaṃ ekadesena vibhāvitamevā’’ti vadanti.

    ཀཱམཉྩེཏྠ ཝེདནཱཝསེན ཨརཱུཔཀམྨཊྛཱནཾ ཨཱགཏཾ, ཏདཉྙདྷམྨཝསེནཔི ཨརཱུཔཀམྨཊྛཱནཾ ལབྦྷཏཱིཏི ཏཾ ཝིབྷཱགེན དསྶེཏུཾ ‘‘ཏིཝིདྷོ ཧཱི’’ཏིཨཱདི ཝུཏྟཾ། ཏཏྠ ཨབྷིནིཝེསོཏི ཨནུཔྤཝེསོ, ཨཱརམྦྷོཏི ཨཏྠོ། ཨཱརམྦྷེ ཨེཝ ཧི ཨཡཾ ཝིབྷཱགོ, སམྨསནཾ པན ཨནཝསེསཏོཝ དྷམྨེ པརིགྒཧེཏྭཱ པཝཏྟཏཱིཏི། ‘‘པརིགྒཧིཏེ རཱུཔཀམྨཊྛཱནེ’’ཏི ཨིདཾ རཱུཔམུཁེན ཝིཔསྶནཱབྷིནིཝེསཾ སནྡྷཱཡ ཝུཏྟཾ, ཨརཱུཔམུཁེན པན ཝིཔསྶནཱབྷིནིཝེསོ ཡེབྷུཡྻེན སམཐཡཱནིཀསྶ ཨིཙྪིཏབྦོ, སོ ཙ པཋམཾ ཛྷཱནངྒཱནི པརིགྒཧེཏྭཱ ཏཏོ པརཾ སེསདྷམྨེ པརིགྒཎྷཱཏི། པཋམཱབྷིནིཔཱཏོཏི སབྦེ ཙེཏསིཀཱ ཙིཏྟཱཡཏྟཱ ཙིཏྟཀིརིཡཱབྷཱཝེན ཝུཙྩནྟཱིཏི ཕསྶོ ཙིཏྟསྶ པཋམཱབྷིནིཔཱཏོ ཝུཏྟོ། ཏཾ ཨཱརམྨཎནྟི ཡཐཱཔརིགྒཧིཏཾ རཱུཔཀམྨཊྛཱནསཉྙིཏཾ ཨཱརམྨཎཾ། ཨུཔྤནྣཕསྶོ པུགྒལོ, ཙིཏྟཙེཏསིཀརཱསི ཝཱ ཨཱརམྨཎེན ཕུཊྛོ ཕསྶསཧཛཱཏཱཡ ཝེདནཱཡ ཏཾསམཀཱལམེཝ ཝེདེཏི, ཕསྶོ པན ཨོབྷཱསསྶ ཝིཡ པདཱིཔོ ཝེདནཱདཱིནཾ པཙྩཡཝིསེསོ ཧོཏཱིཏི པུརིམཀཱལོ ཝིཡ ཝུཙྩཏི, ཡཱ ཏསྶ ཨཱརམྨཎཱབྷིནིརོཔནལཀྑཎཏཱ ཝུཙྩཏི། ཕུསནྟོཏི ཨཱརམྨཎསྶ ཕུསནཱཀཱརེན། ཨཡཉྷི ཨརཱུཔདྷམྨཏྟཱ ཨེཀདེསེན ཨནལླཱིཡམཱནོཔི རཱུཔཾ ཝིཡ ཙཀྑུཾ, སདྡོ ཝིཡ ཙ སོཏཾ, ཙིཏྟཾ, ཨཱརམྨཎཉྩ ཕུསནྟོ ཝིཡ, སངྒྷཊྚེནྟོ ཝིཡ ཙ པཝཏྟཏཱིཏི། ཏཐཱ ཧེས ‘‘སངྒྷཊྚནརསོ’’ཏི ཝུཙྩཏི།

    Kāmañcettha vedanāvasena arūpakammaṭṭhānaṃ āgataṃ, tadaññadhammavasenapi arūpakammaṭṭhānaṃ labbhatīti taṃ vibhāgena dassetuṃ ‘‘tividho hī’’tiādi vuttaṃ. Tattha abhinivesoti anuppaveso, ārambhoti attho. Ārambhe eva hi ayaṃ vibhāgo, sammasanaṃ pana anavasesatova dhamme pariggahetvā pavattatīti. ‘‘Pariggahite rūpakammaṭṭhāne’’ti idaṃ rūpamukhena vipassanābhinivesaṃ sandhāya vuttaṃ, arūpamukhena pana vipassanābhiniveso yebhuyyena samathayānikassa icchitabbo, so ca paṭhamaṃ jhānaṅgāni pariggahetvā tato paraṃ sesadhamme pariggaṇhāti. Paṭhamābhinipātoti sabbe cetasikā cittāyattā cittakiriyābhāvena vuccantīti phasso cittassa paṭhamābhinipāto vutto. Taṃ ārammaṇanti yathāpariggahitaṃ rūpakammaṭṭhānasaññitaṃ ārammaṇaṃ. Uppannaphasso puggalo, cittacetasikarāsi vā ārammaṇena phuṭṭho phassasahajātāya vedanāya taṃsamakālameva vedeti, phasso pana obhāsassa viya padīpo vedanādīnaṃ paccayaviseso hotīti purimakālo viya vuccati, yā tassa ārammaṇābhiniropanalakkhaṇatā vuccati. Phusantoti ārammaṇassa phusanākārena. Ayañhi arūpadhammattā ekadesena anallīyamānopi rūpaṃ viya cakkhuṃ, saddo viya ca sotaṃ, cittaṃ, ārammaṇañca phusanto viya, saṅghaṭṭento viya ca pavattatīti. Tathā hesa ‘‘saṅghaṭṭanaraso’’ti vuccati.

    ཨཱརམྨཎཾ ཨནུབྷཝནྟཱིཏི ཨིསྶརཝཏཱཡ ཝིསཝིཏཱཡ སཱམིབྷཱཝེན ཨཱརམྨཎརསཾ སཾཝེདེནྟཱི། ཕསྶཱདཱིནཉྷི སམྤཡུཏྟདྷམྨཱནཾ ཨཱརམྨཎེ ཨེཀདེསེནེཝ པཝཏྟི ཕུསནཱདིམཏྟབྷཱཝཏོ, ཝེདནཱཡ པན ཨིཊྛཱཀཱརསམྦྷོགཱདིཝསེན པཝཏྟནཏོ ཨཱརམྨཎེ ནིཔྤདེསཏོ པཝཏྟི། ཕུསནཱདིབྷཱཝེན ཧི ཨཱརམྨཎགྒཧཎཾ ཨེཀདེསཱནུབྷཝནཾ, ཝེདཡིཏབྷཱཝེན གཧཎཾ ཡཐཱཀཱམཾ སབྦཱནུབྷཝནཾ, ཨེཝཾསབྷཱཝཱནེཝ ཏཱནི གཧཎཱནཱིཏི ན ཝེདནཱཡ ཝིཡ ཕསྶཱདཱིནམྤི ཡཐཱ སཀཀིཙྩཀརཎེན སཱམིབྷཱཝཱནུབྷཝནཾ ཙོདེཏབྦཾ། ཝིཛཱནནྟནྟི པརིཙྪིནྡནཝསེན ཝིསེསཏོ ཛཱནནྟཾ། ཝིཉྙཱཎཉྷི མིནིཏབྦཝཏྠུཾ ནཱལི༹ཡཱ མིནནྟོ པུརིསོ ཝིཡ ཨཱརམྨཎཾ པརིཙྪིཛྫ ཝིབྷཱཝེནྟཾ པཝཏྟཏི, ན སཉྙཱ ཝིཡ སཉྫཱནནམཏྟཾ ཧུཏྭཱ། ཏཐཱ ཧི ཨནེན ཀདཱཙི ལཀྑཎཏྟཡཝིབྷཱཝནཱཔི ཧོཏི, ཨིམེསཾ པན ཕསྶཱདཱིནཾ ཏསྶ ཏསྶ པཱཀཊབྷཱཝོ པཙྩཡཝིསེསསིདྡྷསྶ པུབྦབྷཱགསྶ ཝསེན ཝེདིཏབྦོ།

    Ārammaṇaṃ anubhavantīti issaravatāya visavitāya sāmibhāvena ārammaṇarasaṃ saṃvedentī. Phassādīnañhi sampayuttadhammānaṃ ārammaṇe ekadeseneva pavatti phusanādimattabhāvato, vedanāya pana iṭṭhākārasambhogādivasena pavattanato ārammaṇe nippadesato pavatti. Phusanādibhāvena hi ārammaṇaggahaṇaṃ ekadesānubhavanaṃ, vedayitabhāvena gahaṇaṃ yathākāmaṃ sabbānubhavanaṃ, evaṃsabhāvāneva tāni gahaṇānīti na vedanāya viya phassādīnampi yathā sakakiccakaraṇena sāmibhāvānubhavanaṃ codetabbaṃ. Vijānantanti paricchindanavasena visesato jānantaṃ. Viññāṇañhi minitabbavatthuṃ nāḷiyā minanto puriso viya ārammaṇaṃ paricchijja vibhāventaṃ pavattati, na saññā viya sañjānanamattaṃ hutvā. Tathā hi anena kadāci lakkhaṇattayavibhāvanāpi hoti, imesaṃ pana phassādīnaṃ tassa tassa pākaṭabhāvo paccayavisesasiddhassa pubbabhāgassa vasena veditabbo.

    ཨེཝཾ ཏསྶ ཏསྶེཝ པཱཀཊབྷཱཝེཔི ‘‘སབྦཾ, བྷིཀྑཝེ, ཨབྷིཉྙེཡྻ’’ནྟི (སཾ॰ ནི॰ ༤.༤༦; པཊི॰ མ॰ ༡.༣), ‘‘སབྦཉྩ ཁོ, བྷིཀྑཝེ, ཨབྷིཛཱན’’ནྟི (སཾ॰ ནི॰ ༤.༢༧) ཙ ཨེཝམཱདི ཝཙནཏོ སབྦེ སམྨསནུཔགཱ དྷམྨཱ པརིགྒཧེཏབྦཱཏི དསྶེནྟོ ‘‘ཏཏྠ ཡསྶཱ’’ཏིཨཱདིམཱཧ། ཏཏྠ ཕསྶཔཉྩམཀེཡེཝཱཏི ཨཝདྷཱརཎཾ ཏདནྟོགདྷཏྟཱ ཏགྒཧཎེནེཝ གཧིཏཏྟཱ ཙཏུནྣཾ ཨརཱུཔཀྑནྡྷཱནཾ། ཕསྶཔཉྩམཀགྒཧཎཉྷི ཏསྶ སབྦསྶ སབྦཙིཏྟུཔྤཱདསཱདྷཱརཎབྷཱཝཏོ ། ཏཏྠ ཙ ཕསྶཙེཏནཱགྒཧཎེན སབྦསངྑཱརཀྑནྡྷདྷམྨསངྒཧོ ཙེཏནཔྤདྷཱནཏྟཱ ཏེསཾ། ཏཐཱ ཧི སུཏྟནྟབྷཱཛནཱིཡེ སངྑཱརཀྑནྡྷཝིབྷངྒེ ‘‘ཙཀྑུསམྥསྶཛཱ ཙེཏནཱ’’ཏིཨཱདིནཱ (ཝིབྷ॰ ༢༡) ཙེཏནཱཝ ཝིབྷཏྟཱ, ཨིཏརེ པན ཁནྡྷཱ སརཱུཔེནེཝ གཧིཏཱ།

    Evaṃ tassa tasseva pākaṭabhāvepi ‘‘sabbaṃ, bhikkhave, abhiññeyya’’nti (saṃ. ni. 4.46; paṭi. ma. 1.3), ‘‘sabbañca kho, bhikkhave, abhijāna’’nti (saṃ. ni. 4.27) ca evamādi vacanato sabbe sammasanupagā dhammā pariggahetabbāti dassento ‘‘tattha yassā’’tiādimāha. Tattha phassapañcamakeyevāti avadhāraṇaṃ tadantogadhattā taggahaṇeneva gahitattā catunnaṃ arūpakkhandhānaṃ. Phassapañcamakaggahaṇañhi tassa sabbassa sabbacittuppādasādhāraṇabhāvato . Tattha ca phassacetanāggahaṇena sabbasaṅkhārakkhandhadhammasaṅgaho cetanappadhānattā tesaṃ. Tathā hi suttantabhājanīye saṅkhārakkhandhavibhaṅge ‘‘cakkhusamphassajā cetanā’’tiādinā (vibha. 21) cetanāva vibhattā, itare pana khandhā sarūpeneva gahitā.

    ཝཏྠུནིསྶིཏཱཏི ཨེཏྠ ཝཏྠུ-སདྡོ ཀརཛཀཱཡཝིསཡོ, ན ཚབྦཏྠུཝིསཡོཏི། ཀཐམིདཾ ཝིཉྙཱཡཏཱིཏི ཨཱཧ ‘‘ཡཾ སནྡྷཱཡ ཝུཏྟ’’ནྟི། ཀཏྠ པན ཝུཏྟཾ? སཱམཉྙཕལསུཏྟེ། སོཏི ཀརཛཀཱཡོ། ‘‘པཉྩཀྑནྡྷཝིནིམུཏྟཾ ནཱམརཱུཔཾ ནཏྠཱི’’ཏི ཨིདཾ ཨདྷིཀཱརཝསེན ཝུཏྟཾ། ཨཉྙཐཱ ཧི ཁནྡྷཝིནིམུཏྟམྤི ནཱམཾ ཨཏྠེཝཱཏི། ཨཝིཛྫཱདིཧེཏུཀཱཏི ཨཝིཛྫཱཏཎྷུཔཱདཱནཱདིཧེཏུཀཱ། ‘‘ཝིཔསྶནཱཔཊིཔཱཊིཡཱ ཨནིཙྩཾ དུཀྑཾ ཨནཏྟཱཏི སམྨསནྟོ ཝིཙརཏཱི’’ཏི ཨིམིནཱ བལཝཝིཔསྶནཾ ཝཏྭཱ པུན ཏསྶ ཨུསྶུཀྐཱཔནཾ, ཝིསེསཱདྷིགམཉྩ དསྶེནྟོ ‘‘སོ’’ཏིཨཱདིམཱཧ།

    Vatthunissitāti ettha vatthu-saddo karajakāyavisayo, na chabbatthuvisayoti. Kathamidaṃ viññāyatīti āha ‘‘yaṃ sandhāya vutta’’nti. Kattha pana vuttaṃ? Sāmaññaphalasutte. Soti karajakāyo. ‘‘Pañcakkhandhavinimuttaṃ nāmarūpaṃ natthī’’ti idaṃ adhikāravasena vuttaṃ. Aññathā hi khandhavinimuttampi nāmaṃ atthevāti. Avijjādihetukāti avijjātaṇhupādānādihetukā. ‘‘Vipassanāpaṭipāṭiyā aniccaṃ dukkhaṃ anattāti sammasanto vicaratī’’ti iminā balavavipassanaṃ vatvā puna tassa ussukkāpanaṃ, visesādhigamañca dassento ‘‘so’’tiādimāha.

    ཨིདྷཱཏི ཨིམསྨིཾ སཀྐཔཉྷསུཏྟེ། ཝེདནཱཝསེན ཙེཏྠ ཨརཱུཔཀམྨཊྛཱནཀཐནེ ཀཱརཎཾ ཧེཊྛཱ ཝུཏྟནཡམེཝ ། ཡཐཱཝུཏྟེསུ ཙ ཏཱིསུ ཀམྨཊྛཱནཱབྷིནིཝེསེསུ ཝེདནཱཝསེན ཀམྨཊྛཱནཱབྷིནིཝེསོ སུཀརོ ཝེདནཱནཾ ཝིབྷཱུཏབྷཱཝཏོཏི དསྶེཏུཾ ‘‘ཕསྶཝསེན ཧཱི’’ཏིཨཱདི ཝུཏྟཾ། ‘‘ན པཱཀཊཾ ཧོཏཱི’’ཏི ཨིདཾ སཀྐཔམུཁཱནཾ ཏེསཾ དེཝཱནཾ ཡཐཱ ཝེདནཱ ཝིབྷཱུཏཱ ཧུཏྭཱ ཨུཔཊྛཱཏི, ན ཨེཝཾ ཨིཏརདྭཡནྟི ཀཏྭཱ ཝུཏྟཾ། ཝེདནཱཡ ཨེཝ ཙ ནེསཾ ཝིབྷཱུཏབྷཱཝོ ཝེདནཱམུཁེནེཝེཏྠ བྷགཝཏཱ དེསནཱཡ ཨཱརདྡྷཏྟཱ། ‘‘ཝེདནཱནཾ ཨུཔྤཏྟིཡཱ པཱཀཊཏཱཡཱ’’ཏི ཨིདཾ སུཁདུཀྑཝེདནཱནཾ ཝསེན ཝུཏྟཾ། ཏཱསཉྷི པཝཏྟི ཨོལཱ༹རིཀཱ, ན ཨིཏརཱཡ། ཏདུབྷཡགྒཧཎམུཁེན ཝཱ གཧེཏབྦཏྟཱ ཨིཏརཱཡཔི པཝཏྟི ཝིཉྙཱུནཾ པཱཀཊཱ ཨེཝཱཏི སུཁདུཀྑཝེདནཱནཉྷཱི’’ཏི ཝིསེསགྒཧཎཾ དཊྛབྦཾ། ‘‘ཡདཱ སུཁཾ ཨུཔྤཛྫཏཱི’’ཏིཨཱདི སུཁཝེདནཱཡ པཱཀཊབྷཱཝཝིབྷཱཝནཾ, ཏཡིདཾ ཨསམཱཧིཏབྷཱུམིཝསེན ཝེདིཏབྦཾ། ཏཏྠ ‘‘སཀལཾ སརཱིརཾ ཁོ བྷནྟེ’’ནྟིཨཱདིནཱ ཀཱམཾ པཝཏྟིཨོལཱ༹རིཀཏཱཡ ཨཝཱུཔསནྟསབྷཱཝམེཏཾ སུཁཾ, སཱཏལཀྑཎཏཱཡ པན སམྤཡུཏྟདྷམྨེ, ནིསྶཡཉྩ ཨནུགྒཎྷནྟམེཝ པཝཏྟཏཱིཏི དསྶེཏི། ‘‘ཡདཱ དུཀྑཾ ཨུཔྤཛྫཏཱི’’ཏིཨཱདཱིསུ ཝུཏྟཝིཔརིཡཱཡེན ཨཏྠོ ཝེདིཏབྦོ།

    Idhāti imasmiṃ sakkapañhasutte. Vedanāvasena cettha arūpakammaṭṭhānakathane kāraṇaṃ heṭṭhā vuttanayameva . Yathāvuttesu ca tīsu kammaṭṭhānābhinivesesu vedanāvasena kammaṭṭhānābhiniveso sukaro vedanānaṃ vibhūtabhāvatoti dassetuṃ ‘‘phassavasena hī’’tiādi vuttaṃ. ‘‘Na pākaṭaṃ hotī’’ti idaṃ sakkapamukhānaṃ tesaṃ devānaṃ yathā vedanā vibhūtā hutvā upaṭṭhāti, na evaṃ itaradvayanti katvā vuttaṃ. Vedanāya eva ca nesaṃ vibhūtabhāvo vedanāmukhenevettha bhagavatā desanāya āraddhattā. ‘‘Vedanānaṃ uppattiyā pākaṭatāyā’’ti idaṃ sukhadukkhavedanānaṃ vasena vuttaṃ. Tāsañhi pavatti oḷārikā, na itarāya. Tadubhayaggahaṇamukhena vā gahetabbattā itarāyapi pavatti viññūnaṃ pākaṭā evāti sukhadukkhavedanānañhī’’ti visesaggahaṇaṃ daṭṭhabbaṃ. ‘‘Yadā sukhaṃ uppajjatī’’tiādi sukhavedanāya pākaṭabhāvavibhāvanaṃ, tayidaṃ asamāhitabhūmivasena veditabbaṃ. Tattha ‘‘sakalaṃ sarīraṃ kho bhante’’ntiādinā kāmaṃ pavattioḷārikatāya avūpasantasabhāvametaṃ sukhaṃ, sātalakkhaṇatāya pana sampayuttadhamme, nissayañca anuggaṇhantameva pavattatīti dasseti. ‘‘Yadā dukkhaṃ uppajjatī’’tiādīsu vuttavipariyāyena attho veditabbo.

    དུདྡཱིཔནཱཏི ཉཱཎེན དཱིཔེཏུཾ ཨསཀྐུཎེཡྻཱ, དུབྦིཉྙེཡྻཱཏི ཨཏྠོ། ཏེནཱཧ ‘‘ཨནྡྷཀཱརཱ ཨབྷིབྷཱུཏཱ’’ཏི། ཨནྡྷཀཱརཱཏི ཨནྡྷཀཱརགཏསདིསཱི, ཛཱནིཏུཀཱམེ ཙ ཨནྡྷཀཱརིནཱི། པུབྦཱཔརཾ སམཾ སུཀརེ སུཔལཀྑིཏམགྒཝསེན པཱསཱཎཏལེ མིགགཏམགྒོ ཝིཡ ཨིཊྛཱནིཊྛཱརམྨཎེསུ སུཁདུཀྑཱནུབྷཝནེཧི མཛ྄ཛྷཏྟཱརམྨཎེསུ ཨནུམིནིཏབྦཏཱཡ ཝུཏྟཾ ‘‘སཱ སུཁདུཀྑཱནཾ…པེ॰… པཱཀཊཱ ཧོཏཱི’’ཏི། ཏེནཱཧ ‘‘ཡཐཱ’’ཏིཨཱདི། ནཡཏོ གཎྷནྟསྶཱཏི ཨེཏྠཱཡཾ ནཡོ – ཡསྨཱ ཨིཊྛཱནིཊྛཝིསཡཱཡ ཨཱརམྨཎཱུཔལདྡྷིཡཱ ཨནུབྷཝནཏོ ནིཊྛཱམཛ྄ཛྷཏྟཝིསཡཱ ཙ ཨུཔལདྡྷི, ཏསྨཱ ན ཏཱཡ ནིརནུབྷཝནཱཡ བྷཝིཏབྦཾ, ཡཾ ཏཏྠཱནུབྷཝནཾ, སཱ ཨདུཀྑམསུཁཱ། ཏཐཱ ཨནུཔལབྦྷམཱནཾ རཱུཔཱདིཨནུབྷུཡྻམཱནཾ དིཊྛཾ ཨུཔལབྦྷཏི, ཡོ པན མཛ྄ཛྷཏྟཱརམྨཎཾ ཏབྦིསཡསྶ ཝིཉྙཱཎཔྤཝཏྟིཡཾ, ཏསྨཱ ཨནནུབྷུཡྻམཱནེན ཏེན ན བྷཝིཏབྦཾ། སཀྐཱ ཧི ཝཏྟུཾ ཨནུབྷཝམཱནཱ མཛ྄ཛྷཏྟཝིསཡུཔལདྡྷི ཨུཔལདྡྷིབྷཱཝཏོ། ཨིཊྛཱནིཊྛཝིསཡུཔལདྡྷིཝིསཡཾ པན ནིརནུབྷཝནཾ ཏཾ ཨནུཔལདྡྷིསབྷཱཝམེཝ དིཊྛཾ, ཏཾ ཡཐཱརཱུཔནྟི། ནིཝཏྟེཏྭཱཏི ནཱིཧརིཏྭཱ, ‘‘སོམནསྶཾཔཱཧ’’ནྟིཨཱདིནཱ སམཱནཛཱཏིཡམྤི བྷིནྡནྟོ ཨཉྙེཧི ཨརཱུཔདྷམྨེཧི ཝིཝེཙེཏྭཱ ཨསཾསཊྛཾ ཀཏྭཱཏི ཨཏྠོ།

    Duddīpanāti ñāṇena dīpetuṃ asakkuṇeyyā, dubbiññeyyāti attho. Tenāha ‘‘andhakārā abhibhūtā’’ti. Andhakārāti andhakāragatasadisī, jānitukāme ca andhakārinī. Pubbāparaṃ samaṃ sukare supalakkhitamaggavasena pāsāṇatale migagatamaggo viya iṭṭhāniṭṭhārammaṇesu sukhadukkhānubhavanehi majjhattārammaṇesu anuminitabbatāya vuttaṃ ‘‘sā sukhadukkhānaṃ…pe… pākaṭā hotī’’ti. Tenāha ‘‘yathā’’tiādi. Nayato gaṇhantassāti etthāyaṃ nayo – yasmā iṭṭhāniṭṭhavisayāya ārammaṇūpaladdhiyā anubhavanato niṭṭhāmajjhattavisayā ca upaladdhi, tasmā na tāya niranubhavanāya bhavitabbaṃ, yaṃ tatthānubhavanaṃ, sā adukkhamasukhā. Tathā anupalabbhamānaṃ rūpādianubhuyyamānaṃ diṭṭhaṃ upalabbhati, yo pana majjhattārammaṇaṃ tabbisayassa viññāṇappavattiyaṃ, tasmā ananubhuyyamānena tena na bhavitabbaṃ. Sakkā hi vattuṃ anubhavamānā majjhattavisayupaladdhi upaladdhibhāvato. Iṭṭhāniṭṭhavisayupaladdhivisayaṃ pana niranubhavanaṃ taṃ anupaladdhisabhāvameva diṭṭhaṃ, taṃ yathārūpanti. Nivattetvāti nīharitvā, ‘‘somanassaṃpāha’’ntiādinā samānajātiyampi bhindanto aññehi arūpadhammehi vivecetvā asaṃsaṭṭhaṃ katvāti attho.

    ཨཡཉྩ རཱུཔཀམྨཊྛཱནཾ ཀཐེཏྭཱ ཨརཱུཔཀམྨཊྛཱནཾ ཝེདནཱཝསེན ནིཝཏྟེཏྭཱ དེསནཱ ཏཐཱཝིནེཏབྦཔུགྒལཱཔེཀྑཱཡ སུཏྟནྟརེསུཔི (དཱི॰ ནི॰ ༢.༣༧༣; མ॰ ནི॰ ༡.༡༠༦, ༣༩༠, ༤༡༣, ༤༥༠, ༤༦༥, ༤༦༧; མ॰ ནི॰ ༢.༣༠༦, ༢༠༩; ༣.༦༧, ༣༤༢; སཾ॰ ནི॰ ༤.༢༤༨) ཨཱགཏཱ ཨེཝཱཏི དསྶེནྟོ ‘‘ན ཀེཝལ’’ནྟིཨཱདིམཱཧ། ཏཏྠ མཧཱསཏིཔཊྛཱནེ (དཱི॰ ནི॰ ༢.༢༧༣) ཏཐཱ དེསནཱཡ ཨཱགཏབྷཱཝོ ཨནནྟརམེཝ ཨཱཝི བྷཝིསྶཏི, མཛ྄ཛྷིམནིཀཱཡེ སཏིཔཊྛཱནདེསནཱཔི (མ॰ ནི॰ ༡.༡༠༦) ཏཱདིསཱི ཨེཝ། ཙཱུལ༹ཏཎྷཱསངྑཡེ ‘‘ཨེཝཾ ཙེཏཾ, དེཝཱནཾ ཨིནྡ, བྷིཀྑུནོ སུཏཾ ཧོཏི ‘སབྦེ དྷམྨཱ ནཱལཾ ཨབྷིནིཝེསཱཡཱ’ཏི, སོ སབྦཾ དྷམྨཾ ཨབྷིཛཱནཱཏི , སབྦཾ དྷམྨཾ ཨབྷིཉྙཱཡ སབྦཾ དྷམྨཾ པརིཛཱནཱཏི, སབྦཾ དྷམྨཾ པརིཉྙཱཡ ཡཾ ཀིཉྩི ཝེདནཾ ཝེདེཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, སོ ཏཱསུ ཝེདནཱསུ ཨནིཙྩཱནུཔསྶཱི ཝིཧརཏི, ཝིརཱགཱནུཔསྶཱི’’ཏིཨཱདིནཱ (མ॰ ནི॰ ༡.༣༩༠) ཨཱགཏཾ། ཏེན ཝུཏྟཾ ‘‘ཨརཱུཔཀམྨཊྛཱནཾ ཝེདནཱཝསེན ནིཝཏྟེཏྭཱ དསྶེསཱི’’ཏི། མཧཱཏཎྷཱསངྑཡེ པན ‘‘སོ ཨེཝཾ ཨནུརོདྷཝིརོདྷཝིཔྤཧཱིནོ ཡཾ ཀིཉྩི ཝེདནཾ ཝེདེཏི སུཁཾ ཝཱ དུཀྑཾ ཝཱ ཨདུཀྑམསུཁཾ ཝཱ, སོ ཏཾ ཝེདནཾ ནཱབྷིནནྡཏི ནཱབྷིཝདཏི ནཱཛ྄ཛྷོསཱཡ ཏིཊྛཏི། ཏསྶ ཏཾ ཝེདནཾ ཨནབྷིནནྡཏོ ཨནབྷིཝདཏོ ཨནཛ྄ཛྷོསཱཡ ཏིཊྛཏོ ཡཱ ཝེདནཱསུ ནནྡཱི སཱ ནིརུཛ྄ཛྷཏཱི’’ཏིཨཱདིནཱ (མ॰ ནི॰ ༡.༤༡༤) ཨཱགཏཾ། ཙཱུལ༹ཝེདལླེ ‘‘ཀཏི པནཱཡྻེཝེདནཱ’’ཏིཨཱདིནཱ (མ॰ ནི॰ ༡.༤༦༥) ཨཱགཏཾ། མཧཱཝེདལླེ ‘‘ཝེདནཱཏི, ཨཱཝུསོ, ཝུཙྩཏི, ཀིཏྟཱཝཏཱ ནུ ཁོ, ཨཱཝུསོ, ‘ཝེདནཱ’ཏི ཝུཙྩཏཱི’’ཏིཨཱདིནཱ (མ॰ ནི॰ ༡.༤༥༠) ཨཱགཏཾ། ཨེཝཾ རཊྛཔཱལསུཏྟཱདཱིསུཔི (མ॰ ནི॰ ༢.༣༠༥) ཝེདནཱཀམྨཊྛཱནསྶ ཨཱགཏཊྛཱནཾ ཨུདྡྷརིཏྭཱ ཝཏྟབྦཾ།

    Ayañca rūpakammaṭṭhānaṃ kathetvā arūpakammaṭṭhānaṃ vedanāvasena nivattetvā desanā tathāvinetabbapuggalāpekkhāya suttantaresupi (dī. ni. 2.373; ma. ni. 1.106, 390, 413, 450, 465, 467; ma. ni. 2.306, 209; 3.67, 342; saṃ. ni. 4.248) āgatā evāti dassento ‘‘na kevala’’ntiādimāha. Tattha mahāsatipaṭṭhāne (dī. ni. 2.273) tathā desanāya āgatabhāvo anantarameva āvi bhavissati, majjhimanikāye satipaṭṭhānadesanāpi (ma. ni. 1.106) tādisī eva. Cūḷataṇhāsaṅkhaye ‘‘evaṃ cetaṃ, devānaṃ inda, bhikkhuno sutaṃ hoti ‘sabbe dhammā nālaṃ abhinivesāyā’ti, so sabbaṃ dhammaṃ abhijānāti , sabbaṃ dhammaṃ abhiññāya sabbaṃ dhammaṃ parijānāti, sabbaṃ dhammaṃ pariññāya yaṃ kiñci vedanaṃ vedeti sukhaṃ vā dukkhaṃ vā adukkhamasukhaṃ vā, so tāsu vedanāsu aniccānupassī viharati, virāgānupassī’’tiādinā (ma. ni. 1.390) āgataṃ. Tena vuttaṃ ‘‘arūpakammaṭṭhānaṃ vedanāvasena nivattetvā dassesī’’ti. Mahātaṇhāsaṅkhaye pana ‘‘so evaṃ anurodhavirodhavippahīno yaṃ kiñci vedanaṃ vedeti sukhaṃ vā dukkhaṃ vā adukkhamasukhaṃ vā, so taṃ vedanaṃ nābhinandati nābhivadati nājjhosāya tiṭṭhati. Tassa taṃ vedanaṃ anabhinandato anabhivadato anajjhosāya tiṭṭhato yā vedanāsu nandī sā nirujjhatī’’tiādinā (ma. ni. 1.414) āgataṃ. Cūḷavedalle ‘‘kati panāyyevedanā’’tiādinā (ma. ni. 1.465) āgataṃ. Mahāvedalle ‘‘vedanāti, āvuso, vuccati, kittāvatā nu kho, āvuso, ‘vedanā’ti vuccatī’’tiādinā (ma. ni. 1.450) āgataṃ. Evaṃ raṭṭhapālasuttādīsupi (ma. ni. 2.305) vedanākammaṭṭhānassa āgataṭṭhānaṃ uddharitvā vattabbaṃ.

    ‘‘པཋམཾ རཱུཔཀམྨཊྛཱནཾ ཀཐེཏྭཱ’’ཏི ཝུཏྟཾ, ཀཐཾ ཏམེཏྠ ཀཐིཏནྟི ཨཱཧ ‘‘རཱུཔཀམྨཊྛཱན’’ནྟིཨཱདི། སངྑིཏྟཾ, ཀཐཾ སངྑིཏྟཾ? ཝེདནཱཡ ཨཱརམྨཎམཏྟཀཾཡེཝ, ཡེབྷུཡྻེན ཝེདནཱ རཱུཔདྷམྨཱརམྨཎཱ པཉྩདྭཱརཝསེན པཝཏྟནཏོ། ཏེན ཙསྶཱ པུརིམསིདྡྷཱ ཨེཝ ཨཱརམྨཎནྟི ཝེདནཾ ཝདནྟེན ཏསྶཱརམྨཎདྷམྨཱ ཨཏྠཏོ པཋམཏརཾ གཧིཏཱ ཨེཝ ནཱམ ཧོནྟཱིཏི ཨིམཱཡ ཨཏྠཱཔཏྟིཡཱ རཱུཔཀམྨཊྛཱནསྶེཝེཏྠ པཋམཾ གཧིཏཏཱ ཛོཏིཏཱ, ན སརཱུཔེནེཝ གཧིཏཏྟཱ། ཏེནཱཧ ‘‘ཏསྨཱ པཱལི༹ཡཾ ནཱརུལ༹ྷཾ བྷཝིསྶཏཱི’’ཏི།

    ‘‘Paṭhamaṃ rūpakammaṭṭhānaṃ kathetvā’’ti vuttaṃ, kathaṃ tamettha kathitanti āha ‘‘rūpakammaṭṭhāna’’ntiādi. Saṅkhittaṃ, kathaṃ saṅkhittaṃ? Vedanāya ārammaṇamattakaṃyeva, yebhuyyena vedanā rūpadhammārammaṇā pañcadvāravasena pavattanato. Tena cassā purimasiddhā eva ārammaṇanti vedanaṃ vadantena tassārammaṇadhammā atthato paṭhamataraṃ gahitā eva nāma hontīti imāya atthāpattiyā rūpakammaṭṭhānassevettha paṭhamaṃ gahitatā jotitā, na sarūpeneva gahitattā. Tenāha ‘‘tasmā pāḷiyaṃ nāruḷhaṃ bhavissatī’’ti.

    ༣༦༠. དྭཱིཧི ཀོཊྛཱསེཧཱིཏི སེཝིཏབྦཱསེཝིཏབྦབྷཱགེཧི། ཨེཝརཱུཔནྟི ཡཾ ཨཀུསལཱནཾ ཨབྷིབུདྡྷིཡཱ, ཀུསལཱནཉྩ པརིཧཱནཱཡ སཾཝཏྟཏི, ཨེཝརཱུཔཾ, ཏཾ པན ཀཱམཱུཔསཉྷིཏཏཱཡ ‘‘གེཧནིསྶིཏ’’ནྟི ཝུཙྩཏཱིཏི ཨཱཧ ‘‘གེཧསིཏསོམནསྶ’’ནྟི། ཨིཊྛཱནནྟི པིཡཱནཾ། ཀནྟཱནནྟི ཀམནཱིཡཱནཾ། མནཱཔཱནནྟི མནཝཌྜྷནཀཱནཾ། ཏཏོ ཨེཝ མནོ རམེནྟཱིཏི མནོརམཱནཾ། ལོཀཱམིསཔཊིསཾཡུཏྟཱནནྟི ཏཎྷཱསནྣིསྶིཏཱནཾ ཀཱམཱུཔསཉྷིཏཱནཾ། པཊིལཱབྷཏོ སམནུཔསྶཏོཏི ‘‘ཨཧོ མཡཱ ཨིམཱནི ལདྡྷཱནཱི’’ཏི ཡཐཱལདྡྷཱནི རཱུཔཱརམྨཎཱདཱིནི ཨསྶཱདཡཏོ། ཨཏཱིཏནྟི ཨཏིཀྐནྟཾ། ནིརུདྡྷནྟི ནིརོདྷཔྤཏྟཾ། ཝིཔརིཎཏནྟི སབྷཱཝཝིགམེན ཝིགཏཾ། སམནུསྶརཏོཏི ཨསྶཱདནཝསེན ཨནུཙིནྟཡཏོ། གེཧསིཏནྟི ཀཱམགུཎནིསྶིཏཾ། ཀཱམགུཎཱ ཧི ཀཱམརཱགསྶ གེཧསདིསཏྟཱ ཨིདྷ ‘‘གེཧ’’ནྟི ཨདྷིཔྤེཏཱ།

    360.Dvīhi koṭṭhāsehīti sevitabbāsevitabbabhāgehi. Evarūpanti yaṃ akusalānaṃ abhibuddhiyā, kusalānañca parihānāya saṃvattati, evarūpaṃ, taṃ pana kāmūpasañhitatāya ‘‘gehanissita’’nti vuccatīti āha ‘‘gehasitasomanassa’’nti. Iṭṭhānanti piyānaṃ. Kantānanti kamanīyānaṃ. Manāpānanti manavaḍḍhanakānaṃ. Tato eva mano ramentīti manoramānaṃ. Lokāmisapaṭisaṃyuttānanti taṇhāsannissitānaṃ kāmūpasañhitānaṃ. Paṭilābhato samanupassatoti ‘‘aho mayā imāni laddhānī’’ti yathāladdhāni rūpārammaṇādīni assādayato. Atītanti atikkantaṃ. Niruddhanti nirodhappattaṃ. Vipariṇatanti sabhāvavigamena vigataṃ. Samanussaratoti assādanavasena anucintayato. Gehasitanti kāmaguṇanissitaṃ. Kāmaguṇā hi kāmarāgassa gehasadisattā idha ‘‘geha’’nti adhippetā.

    ཨེཝརཱུཔནྟི ཡཾ ཨཀུསལཱནཾ པརིཧཱནཱཡ, ཀུསལཱནཉྩ ཨབྷིབུདྡྷིཡཱ སཾཝཏྟཏི, ཨེཝརཱུཔཾ, ཏཾ པན པབྦཛྫཱདིཝསེན པཝཏྟིཡཱ ནེཀྑམྨཱུཔསཉྷིཏནྟི ཨཱཧ ‘‘ནེཀྑམྨསིཏཾ སོམནསྶ’’ནྟི། ཨིདཱནི ཏཾ པཱལི༹ཝསེནེཝ དསྶེཏུཾ ‘‘ཏཏྠ ཀཏམཱནཱི’’ཏིཨཱདི ཝུཏྟཾ། ཏཏྠ ཝིཔསྶནཱལཀྑཎེ ནེཀྑམྨེ དསྶིཏེ ཨིཏརཱནི ཏསྶ ཀཱརཎཏོ, ཕལཏོ, ཨཏྠཏོ ཙ དསྶིཏཱནེཝ ཧོནྟཱིཏི ཝིཔསྶནཱལཀྑཎམེཝ ཏཾ དསྶེནྟོ ‘‘རཱུཔཱནནྟྭེཝཱ’’ཏིཨཱདིམཱཧ། ཝིཔརིཎཱམཝིརཱགནིརོདྷནྟི ཛརཱཡ ཝིཔརིཎཱམེཏབྦཏཉྩེཝ ཛརཱམརཎེཧི པལུཛྫནཾ ནིརུཛ྄ཛྷནཉྩ ཝིདིཏྭཱཏི ཡོཛནཱ། ཨུཔྤཛྫཏི སོམནསྶནྟི ཝིཔསྶནཱཡ ཝཱིཐིཔཊིཔཏྟིཡཱ ཀམེན ཨུཔྤནྣཱནཾ པཱམོཛྫཔཱིཏིཔསྶདྡྷཱིནཾ ཨུཔརི ཨནཔྤཀཾ སོམནསྶཾ ཨུཔྤཛྫཏི། ཡཾ སནྡྷཱཡ ཝུཏྟཾ –

    Evarūpanti yaṃ akusalānaṃ parihānāya, kusalānañca abhibuddhiyā saṃvattati, evarūpaṃ, taṃ pana pabbajjādivasena pavattiyā nekkhammūpasañhitanti āha ‘‘nekkhammasitaṃ somanassa’’nti. Idāni taṃ pāḷivaseneva dassetuṃ ‘‘tattha katamānī’’tiādi vuttaṃ. Tattha vipassanālakkhaṇe nekkhamme dassite itarāni tassa kāraṇato, phalato, atthato ca dassitāneva hontīti vipassanālakkhaṇameva taṃ dassento ‘‘rūpānantvevā’’tiādimāha. Vipariṇāmavirāganirodhanti jarāya vipariṇāmetabbatañceva jarāmaraṇehi palujjanaṃ nirujjhanañca viditvāti yojanā. Uppajjati somanassanti vipassanāya vīthipaṭipattiyā kamena uppannānaṃ pāmojjapītipassaddhīnaṃ upari anappakaṃ somanassaṃ uppajjati. Yaṃ sandhāya vuttaṃ –

    ‘‘སུཉྙཱགཱརཾ པཝིཊྛསྶ, སནྟཙིཏྟསྶ བྷིཀྑུནོ།

    ‘‘Suññāgāraṃ paviṭṭhassa, santacittassa bhikkhuno;

    ཨམཱནུསཱི རཏི ཧོཏི, སམྨཱ དྷམྨཾ ཝིཔསྶཏོ༎

    Amānusī rati hoti, sammā dhammaṃ vipassato.

    ཡཏོ ཡཏོ སམྨསཏི, ཁནྡྷཱནཾ ཨུདཡབྦཡཾ།

    Yato yato sammasati, khandhānaṃ udayabbayaṃ;

    ལབྷཏཱི པཱིཏིཔཱམོཛྫཾ, ཨམཏཾ ཏཾ ཝིཛཱནཏ’’ནྟི༎ (དྷ॰ པ॰ ༣༧༤) ཙ –

    Labhatī pītipāmojjaṃ, amataṃ taṃ vijānata’’nti. (dha. pa. 374) ca –

    ནེཀྑམྨཝསེནཱཏི པབྦཛྫཱདིཝསེན། ‘‘ཝཊྚདུཀྑཏོ ནིཏྠརིསྶཱམཱི’’ཏི པབྦཛིཏུཾ བྷིཀྑཱུནཾ སནྟིཀཾ གཙྪནྟསྶ, པབྦཛནྟསྶ, ཙཏུཔཱརིསུདྡྷིསཱིལཾ ཨནུཏིཊྛནྟསྶ, ཏཾ སོདྷེནྟསྶ, དྷུཏགུཎེ སམཱདཱཡ ཝཏྟནྟསྶ, ཀསིཎཔརིཀམྨཱདཱིནི ཀརོནྟསྶ ཙ ཡཱ པཊིཔཏྟི, སབྦཱ སཱ ཨིདྷ ‘‘ནེཀྑམྨ’’ནྟི ཨདྷིཔྤེཏཱ། ཡེབྷུཡྻེན ཨནུསྶཏིཡཱ ཨུཔཙཱརཛ྄ཛྷཱནཾ ནིཊྛཱཏཱིཏི ཀཏྭཱ ‘‘ཨནུསྶཏིཝསེནཱ’’ཏི ཝཏྭཱ ‘‘པཋམཛ྄ཛྷཱནཱདིཝསེནཱ’’ཏི ཝུཏྟཾ། ཨེཏྠ ཙ ཡཐཱ པབྦཛྫཱ གྷརབནྡྷནཏོ ནིཀྑམནཊྛེན ནེཀྑམྨཾ, ཨེཝཾ ཝིཔསྶནཱདཡོཔི ཏཾཔཊིཔཀྑཏོ། ཏེནཱཧ –

    Nekkhammavasenāti pabbajjādivasena. ‘‘Vaṭṭadukkhato nittharissāmī’’ti pabbajituṃ bhikkhūnaṃ santikaṃ gacchantassa, pabbajantassa, catupārisuddhisīlaṃ anutiṭṭhantassa, taṃ sodhentassa, dhutaguṇe samādāya vattantassa, kasiṇaparikammādīni karontassa ca yā paṭipatti, sabbā sā idha ‘‘nekkhamma’’nti adhippetā. Yebhuyyena anussatiyā upacārajjhānaṃ niṭṭhātīti katvā ‘‘anussativasenā’’ti vatvā ‘‘paṭhamajjhānādivasenā’’ti vuttaṃ. Ettha ca yathā pabbajjā gharabandhanato nikkhamanaṭṭhena nekkhammaṃ, evaṃ vipassanādayopi taṃpaṭipakkhato. Tenāha –

    ‘‘པབྦཛྫཱ པཋམཾ ཛྷཱནཾ, ནིབྦཱནཉྩ ཝིཔསྶནཱ།

    ‘‘Pabbajjā paṭhamaṃ jhānaṃ, nibbānañca vipassanā;

    སབྦེཔི ཀུསལཱ དྷམྨཱ, ནེཀྑམྨནྟི པཝུཙྩརེ’’ཏི༎ (ཨིཏིཝུ॰ ཨཊྛ॰ ༡༠༩)།

    Sabbepi kusalā dhammā, nekkhammanti pavuccare’’ti. (itivu. aṭṭha. 109);

    ཡཾ ཙེཏི ཨེཏྠ ཙེཏི ནིཔཱཏམཏྟཾ སོམནསྶསྶ ཨདྷིཔྤེཏཏྟཱ། ཙཏུཀྐནཡཝསེནེཝ ཙ སུཏྟནྟེསུ ཛྷཱནཀཐཱཏི ཝུཏྟཾ ‘‘དུཏིཡཏཏིཡཛ྄ཛྷཱནཝསེནཱ’’ཏི། དྭཱིསཱུཏི ‘‘སཝིཏཀྐཾ སཝིཙཱརཾ ཨཝིཏཀྐཾ ཨཝིཙཱར’’ནྟི ཝུཏྟེསུ དྭཱིསུ སོམནསྶེསུ།

    Yaṃ ceti ettha ceti nipātamattaṃ somanassassa adhippetattā. Catukkanayavaseneva ca suttantesu jhānakathāti vuttaṃ ‘‘dutiyatatiyajjhānavasenā’’ti. Dvīsūti ‘‘savitakkaṃ savicāraṃ avitakkaṃ avicāra’’nti vuttesu dvīsu somanassesu.

    སཝིཏཀྐསཝིཙཱརེ སོམནསྶེཏི པརིཏྟབྷཱུམིཀེ, པཋམཛ྄ཛྷཱནེ ཝཱ སོམནསྶེ། ཨབྷིནིཝིཊྛསོམནསྶེསཱུཏི ཝིཔསྶནཾ པཊྛཔིཏསོམནསྶེསུ། པི-སདྡེན སམྨཊྛསོམནསྶེསུ པཱིཏི ཨིམམཏྠཾ དསྶེཏི། སོམནསྶཝིཔསྶནཱཏོཔཱིཏི སཝིཏཀྐསཝིཙཱརསོམནསྶཔཝཏྟིཝིཔསྶནཱཏོཔི། ཨཝིཏཀྐཨཝིཙཱར ཝིཔསྶནཱ པཎཱིཏཏརཱ སམྨསིཏདྷམྨཝསེནཔི ཝིཔསྶནཱཡ ཝིསེསསིདྡྷིཏོ, ཡཏོ མགྒེཔི ཏཐཱརཱུཔཱ ཝིསེསཱ ཨིཛ྄ཛྷནྟི། ཨཡཾ པནཏྠོ ‘‘ཨརིཡམགྒ བོཛ྄ཛྷངྒཱདིཝིསེསཾ ཝིཔསྶནཱཡ ཨཱརམྨཎབྷཱུཏཱ ཁནྡྷཱ ནིཡམེནྟཱི’’ཏི ཨེཝཾ པཝཏྟེན མོརཝཱཔཱིཝཱསིམཧཱདཏྟཏྠེརཝཱདེན དཱིཔེཏབྦོ།

    Savitakkasavicāre somanasseti parittabhūmike, paṭhamajjhāne vā somanasse. Abhiniviṭṭhasomanassesūti vipassanaṃ paṭṭhapitasomanassesu. Pi-saddena sammaṭṭhasomanassesu pīti imamatthaṃ dasseti. Somanassavipassanātopīti savitakkasavicārasomanassapavattivipassanātopi. Avitakkaavicāra vipassanā paṇītatarā sammasitadhammavasenapi vipassanāya visesasiddhito, yato maggepi tathārūpā visesā ijjhanti. Ayaṃ panattho ‘‘ariyamagga bojjhaṅgādivisesaṃ vipassanāya ārammaṇabhūtā khandhā niyamentī’’ti evaṃ pavattena moravāpīvāsimahādattattheravādena dīpetabbo.

    ༣༦༡. གེཧསིཏདོམནསྶཾ ནཱམ ཀཱམགུཎཱནཾ ཨཔྤཊིལཱབྷནིམིཏྟཾ, ཝིགཏནིམིཏྟཉྩ ཨུཔྤཛྫནཀདོམནསྶཾ། ཨཔྤཊིལཱབྷཏོ སམནུཔསྶཏོཏི ཨཔྤཊིལཱབྷེན ‘‘ཨཧམེཝ ན ལབྷཱམཱི’’ཏི པརིཏསྶནཏོ། སམནུསྶརཏོཏི ‘‘ཨཧུ ཝཏ མེ ཏཾ ཝཏ ནཏྠཱི’’ཏིཨཱདིནཱ ཨནུསྶརཎཝསེན ཙིནྟཡཏོ། ཏེནཱཧ ‘‘ཨེཝཾ ཚསུ དྭཱརེསཱུ’’ཏིཨཱདི།

    361.Gehasitadomanassaṃ nāma kāmaguṇānaṃ appaṭilābhanimittaṃ, vigatanimittañca uppajjanakadomanassaṃ. Appaṭilābhato samanupassatoti appaṭilābhena ‘‘ahameva na labhāmī’’ti paritassanato. Samanussaratoti ‘‘ahu vata me taṃ vata natthī’’tiādinā anussaraṇavasena cintayato. Tenāha ‘‘evaṃ chasu dvāresū’’tiādi.

    ཨནུཏྟརེསུ ཝིམོཀྑེསཱུཏི སུཉྙཏཕལཱདིཨརིཡཕལཝིམོཀྑེསུ། པིཧནྟི ཨཔེཀྑཾ, ཨཱསནྟི ཨཏྠོ། ཀཐཾ པན ལོཀུཏྟརདྷམྨེ ཨཱརབྦྷ ཨཱསཱ ཨུཔྤཛྫཏཱིཏི? ན ཁོ པནེཏཾ ཨེཝཾ དཊྛབྦཾ ‘‘ཡཾ ཨཱརམྨཎཀརཎཝསེན ཏཏྠ པིཧཱ པཝཏྟཏཱི’’ཏི ཨཝིསཡཏྟཱ, པུགྒལསྶ ཙ ཨནདྷིགཏབྷཱཝཏོ། ཨནུསྶཝཱུཔལདྡྷེ པན ཨནུཏྟརཝིམོཀྑེ ཨུདྡིསྶ པིཧཾ ཨུཔཊྛཔེནྟོ ‘‘ཏཏྠ པིཧཾ ཨུཔཊྛཔེཏཱི’’ཏི ཝུཏྟོ། ཏེནཱཧ ‘‘ཀུདཱསྶུ ནཱམཱཧ’’ནྟིཨཱདི། ཚསུ དྭཱརེསུ ཨིཊྛཱརམྨཎེ ཨཱཔཱཐགཏེ ཨནིཙྩཱདིཝསེན ཝིཔསྶནཾ པཊྛཔེཏྭཱཏི ཡོཛནཱ། ‘‘ཨིཊྛཱརམྨཎེ’’ཏི ཙ ཨིམིནཱ ནཡིདཾ དོམནསྶཾ སབྷཱཝཏོ ཨནིཊྛདྷམྨེཡེཝ ཨཱརབྦྷ ཨུཔྤཛྫནཀཾ, ཨཐ ཁོ ཨིཙྪིཏཱལཱབྷཧེཏུཀཾ ཨིཙྪཱབྷིགྷཱཏཝསེན ཡཏྠ ཀཏྠཙི ཨཱརམྨཎེ ཨུཔྤཛྫནཀནྟི དསྶེཏི། ཨེཝཾ ‘‘ཀུདཱསྶུ ནཱམཱཧ’’ནྟི ཝུཏྟཱཀཱརེན པིཧཾ ཨུཔཊྛཔེཏྭཱ ཨེཝཾ ཨིམམྤི པཀྑཾ…པེ॰… ནཱསཀྑིནྟི ཨནུསོཙཏོཏི ཡོཛནཱ། ‘‘ཨིམསྨིཾ པཀྑེ, ཨིམསྨིཾ མཱསེ, ཨིམསྨིཾ སཾཝཙྪརེ པབྦཛིཏུཾ ནཱལདྡྷཾ, ཀསིཎཔརིཀམྨཾ ཀཱཏུཾ ནཱལདྡྷ’’ནྟིཨཱདིཝསེན པཝཏྟིཾ སནྡྷཱཡ ‘‘ནེཀྑམྨཝསེནཱ’’ཏི ཝུཏྟཾ། ‘‘ཝིཔསྶནཱཝསེནཱ’’ཏིཨཱདཱིསུཔི ཨིམིནཱ ནཡེན ཡོཛནཱ ཝེདིཏབྦཱ།

    Anuttaresu vimokkhesūti suññataphalādiariyaphalavimokkhesu. Pihanti apekkhaṃ, āsanti attho. Kathaṃ pana lokuttaradhamme ārabbha āsā uppajjatīti? Na kho panetaṃ evaṃ daṭṭhabbaṃ ‘‘yaṃ ārammaṇakaraṇavasena tattha pihā pavattatī’’ti avisayattā, puggalassa ca anadhigatabhāvato. Anussavūpaladdhe pana anuttaravimokkhe uddissa pihaṃ upaṭṭhapento ‘‘tattha pihaṃ upaṭṭhapetī’’ti vutto. Tenāha ‘‘kudāssu nāmāha’’ntiādi. Chasu dvāresu iṭṭhārammaṇe āpāthagate aniccādivasena vipassanaṃ paṭṭhapetvāti yojanā. ‘‘Iṭṭhārammaṇe’’ti ca iminā nayidaṃ domanassaṃ sabhāvato aniṭṭhadhammeyeva ārabbha uppajjanakaṃ, atha kho icchitālābhahetukaṃ icchābhighātavasena yattha katthaci ārammaṇe uppajjanakanti dasseti. Evaṃ ‘‘kudāssu nāmāha’’nti vuttākārena pihaṃ upaṭṭhapetvā evaṃ imampi pakkhaṃ…pe… nāsakkhinti anusocatoti yojanā. ‘‘Imasmiṃ pakkhe, imasmiṃ māse, imasmiṃ saṃvacchare pabbajituṃ nāladdhaṃ, kasiṇaparikammaṃ kātuṃ nāladdha’’ntiādivasena pavattiṃ sandhāya ‘‘nekkhammavasenā’’ti vuttaṃ. ‘‘Vipassanāvasenā’’tiādīsupi iminā nayena yojanā veditabbā.

    ཡཏོ ཨེཝ-ཀཱརོ, ཏཏོ ཨཉྙཏྠ ནིཡམོཏི ཀཏྭཱ ‘‘ཏསྨིམྤི…པེ॰… གེཧསིཏདོམནསྶམེཝཱ’’ཏི ཝུཏྟཾ། ན ཧེཏྠ གེཧསིཏདོམནསྶཏཱ སཝིཏཀྐསཝིཙཱརེ ནིཡཏཱ, ཨཐ ཁོ གེཧསིཏདོམནསྶེ སཝིཏཀྐསཝིཙཱརཏཱ ནིཡཏཱ པཊིཡོགིནིཝཏྟནཏྠཏྟཱ ཨེཝ-ཀཱརསྶ། ‘‘གེཧསིཏདོམནསྶཾ སཝིཏཀྐསཝིཙཱརམེཝ, ན ཨཝིཏཀྐཨཝིཙཱར’’ནྟི། ནེཀྑམྨསིཏདོམནསྶཾ པན སིཡཱ སཝིཏཀྐསཝིཙཱརཾ, སིཡཱ ཨཝིཏཀྐཨཝིཙཱརཾ། སཝིཏཀྐསཝིཙཱརསྶེཝ ཀཱརཎབྷཱུཏཾ དོམནསྶཾ སཝིཏཀྐསཝིཙཱརདོམནསྶཾ། ཀིཾ ཏཾ? གེཧསིཏདོམནསྶཾ , ཡཾ པན ནེཀྑམྨཱདིཝསེན ཨུཔྤནྣཾ, ཏཾ ཨཝིཏཀྐཨཝིཙཱརསྶ ཀཱརཎབྷཱུཏཾ ཨཝིཏཀྐཨཝིཙཱརདོམནསྶནྟི། ཨཡཉྩ ནཡོ པརིཡཱཡཝསེན ཝུཏྟོཏི ཨཱཧ ‘‘ནིཔྤརིཡཱཡེན པནཱ’’ཏིཨཱདི། ཡདི ཨེཝཾ ཀསྨཱ ‘‘ཡཾ ཙེ ཨཝིཏཀྐཾ ཨཝིཙཱར’’ནྟི པཱལི༹ཡཾ ཝུཏྟནྟི ཨཱཧ ‘‘ཨེཏསྶ པནཱ’’ཏིཨཱདི། མཉྙནཝསེནཱཏི པརིཀཔྤནཝསེན། ཝུཏྟཾ པཱལི༹ཡཾ།

    Yato eva-kāro, tato aññattha niyamoti katvā ‘‘tasmimpi…pe… gehasitadomanassamevā’’ti vuttaṃ. Na hettha gehasitadomanassatā savitakkasavicāre niyatā, atha kho gehasitadomanasse savitakkasavicāratā niyatā paṭiyoginivattanatthattā eva-kārassa. ‘‘Gehasitadomanassaṃ savitakkasavicārameva, na avitakkaavicāra’’nti. Nekkhammasitadomanassaṃ pana siyā savitakkasavicāraṃ, siyā avitakkaavicāraṃ. Savitakkasavicārasseva kāraṇabhūtaṃ domanassaṃ savitakkasavicāradomanassaṃ. Kiṃ taṃ? Gehasitadomanassaṃ , yaṃ pana nekkhammādivasena uppannaṃ, taṃ avitakkaavicārassa kāraṇabhūtaṃ avitakkaavicāradomanassanti. Ayañca nayo pariyāyavasena vuttoti āha ‘‘nippariyāyena panā’’tiādi. Yadi evaṃ kasmā ‘‘yaṃ ce avitakkaṃ avicāra’’nti pāḷiyaṃ vuttanti āha ‘‘etassa panā’’tiādi. Maññanavasenāti parikappanavasena. Vuttaṃ pāḷiyaṃ.

    ཏཏྲཱཏི ཏསྨིཾ མཉྙནེ། ཨཡཾ ཨིདཱནི ཝུཙྩམཱནོ ནཡོ། དོམནསྶཔཙྩཡབྷཱུཏེཏི དོམནསྶསྶ པཙྩཡབྷཱུཏེ། ཨུཔཙཱརཛ྄ཛྷཱནཉྷི པཋམཛ྄ཛྷཱནཱདཱིནི ཝཱ པཱདཀཱནི ཀཏྭཱ མགྒཕལཱནི ནིབྦཏྟེཏུཀཱམསྶ ཏེསཾ ཨལཱབྷེ དོམནསྶསྶ ཨུཔྤཛྫནེ ཏཱནི ཏསྶ པཙྩཡཱ ནཱམ ཧོནྟི ཨིཏི ཏེ དྷམྨཱ ཕལཱུཔཙཱརེན ‘‘དོམནསྶ’’ནྟི ཝུཏྟཱ། ཡོ པན ཏཐཱ ཨུཔྤནྣདོམནསྶོ དྷུརནིཀྑེཔཾ ཨཀཏྭཱ ཨནུཀྐམེན ཝིཔསྶནཾ ཨུསྶུཀྐཱཔེཏྭཱ མགྒཕལདྷམྨེ ནིབྦཏྟེཏི, ཏེ ཀཱརཎཱུཔཙཱརེན ‘‘དོམནསྶ’’ནྟི ཝུཏྟཱཏི ཨིམམཏྠཾ དསྶེནྟོ ‘‘ཨིདྷ བྷིཀྑཱུ’’ཏིཨཱདིམཱཧ། ནནུ ཨེཏསྶ ཏདཱ དོམནསྶམེཝ ཨུཔྤནྣཾ, ན དོམནསྶཧེཏུཀཱ ཝིཔསྶནཱམགྒཕལདྷམྨཱ ཨུཔྤནྣཱ, ཏཏྠ ཀཐཾ དོམནསྶསམཉྙཾ ཨཱརོཔེཏྭཱ ཝོཧརཏཱིཏི ཨཱཧ ‘‘ཨཉྙེསཾ པཊིཔཏྟིདསྶནཝསེན དོམནསྶནྟི གཧེཏྭཱ’’ཏིཨཱདི། སཝིཏཀྐསཝིཙཱརདོམནསྶེཏི སཝིཏཀྐསཝིཙཱརནིམིཏྟེ དོམནསྶེ། ཏཱིཧི མཱསེཧི ནིབྦཏྟེཏབྦཱ ཏེམཱསིཀཱ, ཏཾ ཏེམཱསིཀཾ། ཨིམཱ ཙ ཏེམཱསིཀཱདཡོ པཊིཔདཱ ཏཐཱཔཝཏྟཨུཀྐཊྛམཛ྄ཛྷིམམུདིནྡྲིཡཝསེན ཝེདིཏབྦཱ, ཨདྷིཀམཛ྄ཛྷིམམུདུསྶཱཧཝསེན ཝཱ། ཛགྒཏཱིཏི ཛཱགརིཀཾ ཨནུཡུཉྫཏི།

    Tatrāti tasmiṃ maññane. Ayaṃ idāni vuccamāno nayo. Domanassapaccayabhūteti domanassassa paccayabhūte. Upacārajjhānañhi paṭhamajjhānādīni vā pādakāni katvā maggaphalāni nibbattetukāmassa tesaṃ alābhe domanassassa uppajjane tāni tassa paccayā nāma honti iti te dhammā phalūpacārena ‘‘domanassa’’nti vuttā. Yo pana tathā uppannadomanasso dhuranikkhepaṃ akatvā anukkamena vipassanaṃ ussukkāpetvā maggaphaladhamme nibbatteti, te kāraṇūpacārena ‘‘domanassa’’nti vuttāti imamatthaṃ dassento ‘‘idha bhikkhū’’tiādimāha. Nanu etassa tadā domanassameva uppannaṃ, na domanassahetukā vipassanāmaggaphaladhammā uppannā, tattha kathaṃ domanassasamaññaṃ āropetvā voharatīti āha ‘‘aññesaṃ paṭipattidassanavasena domanassanti gahetvā’’tiādi. Savitakkasavicāradomanasseti savitakkasavicāranimitte domanasse. Tīhi māsehi nibbattetabbā temāsikā, taṃ temāsikaṃ. Imā ca temāsikādayo paṭipadā tathāpavattaukkaṭṭhamajjhimamudindriyavasena veditabbā, adhikamajjhimamudussāhavasena vā. Jaggatīti jāgarikaṃ anuyuñjati.

    མཧཱསིཝཏྠེརཝཏྠུཝཎྞནཱ

    Mahāsivattheravatthuvaṇṇanā

    སཧསྶདྭིསཧསྶསངྑྱཏྟཱ མཧཱགཎེ།

    Sahassadvisahassasaṅkhyattā mahāgaṇe.

    ཨཊྛཀཐཱཐེརཱཏི ཨཊྛཀཐཱཡ ཨཏྠཔཊིཔུཙྪནཀཐེརཱ། ཨནྟརཱམགྒེཏི བྷིཀྑཾ གཧེཏྭཱ གཱམཏོ ཝིཧཱརཾ པཊིགམནམགྒེ ། ཏཡོ…པེ॰… གཱཧཱཔེཏྭཱཏི ཏཱིཎི ཙཏྟཱརི ཨུཎྷཱཔནཱནི།

    Aṭṭhakathātherāti aṭṭhakathāya atthapaṭipucchanakatherā. Antarāmaggeti bhikkhaṃ gahetvā gāmato vihāraṃ paṭigamanamagge . Tayo…pe… gāhāpetvāti tīṇi cattāri uṇhāpanāni.

    ཀེནཙི པཔཉྩེནཱཏི ཀེནཙི སརཱིརཀིཙྩབྷཱུཏེན པཔཉྩེན། སཉྙཾ ཨཀཱསི རཏྟིཡཾ པཙྪཏོ གཙྪནྟཾ ཨསལླཀྑེནྟོ།

    Kenacipapañcenāti kenaci sarīrakiccabhūtena papañcena. Saññaṃ akāsi rattiyaṃ pacchato gacchantaṃ asallakkhento.

    ཀསྨཱ པན ཐེརོ ཨནྟེཝཱསིཀཱནཾ ཨནཱརོཙེཏྭཱཝ གཏོཏི ཨཱཧ ‘‘ཐེརོ ཀིརཱ’’ཏིཨཱདི། ཨརཧཏྟཾ ནཱམ ཀིནྟི ཏདདྷིགམསྶ ཨདུཀྐརབྷཱཝཾ སནྡྷཱཡ ཝདཏི། ཙཏཱུཧི ཨིརིཡཱཔཐེཧཱིཏི ཙཏཱུཧིཔི ཨིརིཡཱཔཐེཧི པཝཏྟམཱནསྶ, ཏསྨཱ ཡཱཝ ཨརཧཏྟཱདྷིགམཱ སཡནཾ པཊིཀྑིཔཱམཱིཏི ཨདྷིཔྤཱཡོ།

    Kasmā pana thero antevāsikānaṃ anārocetvāva gatoti āha ‘‘thero kirā’’tiādi. Arahattaṃ nāma kinti tadadhigamassa adukkarabhāvaṃ sandhāya vadati. Catūhi iriyāpathehīti catūhipi iriyāpathehi pavattamānassa, tasmā yāva arahattādhigamā sayanaṃ paṭikkhipāmīti adhippāyo.

    ‘‘ཨནུཙྪཝིཀཾ ནུ ཁོ ཏེ ཨེཏ’’ནྟི སཾཝེགཛཱཏོ ཝཱིརིཡཾ སམུཏྟེཛེནྟོ ཨརཧཏྟཾ ཨགྒཧེསི ཨེཏྟཀཾ ཀཱལཾ ཝིཔསྶནཱཡ སུཙིཎྞབྷཱཝཏོ ཉཱཎསྶ པརིཔཱཀཾ གཏཏྟཱ།

    ‘‘Anucchavikaṃ nu kho te eta’’nti saṃvegajāto vīriyaṃ samuttejento arahattaṃ aggahesi ettakaṃ kālaṃ vipassanāya suciṇṇabhāvato ñāṇassa paripākaṃ gatattā.

    པརིམཛྫཱིཏི པརིམསི། ཀེཙི པན ‘‘པརིམཛྫཱིཏི པརིཝཏྟེཏྭཱ ཐེརེན དྷོཝིཡམཱནཾ པརིགྒཧེཏྭཱ དྷོཝཱི’’ཏི ཨཏྠཾ ཝདནྟི།

    Parimajjīti parimasi. Keci pana ‘‘parimajjīti parivattetvā therena dhoviyamānaṃ pariggahetvā dhovī’’ti atthaṃ vadanti.

    ཝིཔསྶནཱཡ ཨཱརམྨཎཾ ནཱམ ཨུཔཙཱརཛ྄ཛྷཱནཔཋམཛ྄ཛྷཱནཱདི།

    Vipassanāya ārammaṇaṃ nāma upacārajjhānapaṭhamajjhānādi.

    ‘‘སཝིཏཀྐསཝིཙཱརདོམནསྶེ’’ཏིཨཱདཱིསུ ཝཏྟབྦཾ སོམནསྶེསུ ཝུཏྟནཡཱནུསཱརེན ཝེདིཏབྦཾ།

    ‘‘Savitakkasavicāradomanasse’’tiādīsu vattabbaṃ somanassesu vuttanayānusārena veditabbaṃ.

    ༣༦༢. ཨེཝརཱུཔཱཏི ཡཱ ཨཀུསལཱནཾ ཨབྷིབུདྡྷིཡཱ, ཀུསལཱནཾ པརིཧཱནཱཡ ཙ སཾཝཏྟཏི, ཨེཝརཱུཔཱ, སཱ པན ཀཱམཱུཔསཉྷིཏཏཱཡ ‘‘གེཧསིཏཱ’’ཏི ཝུཙྩཏཱིཏི ཨཱཧ ‘‘གེཧསིཏཨུཔེཀྑཱ’’ཏི། ‘‘བཱལསྶཱ’’ཏིཨཱདཱིསུ བཱལཀརདྷམྨཡོགཏོ བཱལསྶ ཨཏྟཧིཏཔརཧིཏབྱཱམཱུལ༹ྷཏཱཡ མཱུལ༹ྷསྶ པུཐཱུནཾ ཀིལེསཱདཱིནཾ ཛནནཱདཱིཧི ཀཱརཎེཧི པུཐུཛྫནསྶ ཀིལེསོདྷཱིནཾ མགྒོདྷཱིཧི ཨཛིཏཏྟཱ ཨནོདྷིཛིནསྶ, ཨོདྷིཛིནོ ཝཱཡཔེཀྑཱ, ཨོདྷིསོ ཙ ཀིལེསཱནཾ ཛིཏཏྟཱ, ཏེནསྶ སེཀྑབྷཱཝཾ པཊིཀྑིཔཏི། སཏྟམབྷཝཱདིཏོ ཨུདྡྷཾ པཝཏྟནཝིཔཱཀསྶ ཨཛིཏཏྟཱ ཨཝིཔཱཀཛིནསྶ, ཝིཔཱཀཛིནཱ ཝཱ ཨརཧནྟོ ཨཔྤཊིསནྡྷིཀཏྟཱ, ཏེནསྶ ཨསེཀྑཏྟཾ པཊིཀྑིཔཏི། ཨནེཀཱདཱིནཝེ སབྦེསམྤི པཱཔདྷམྨཱནཾ མཱུལབྷཱུཏེ སམྨོཧེ ཨཱདཱིནཝཱནཾ ཨདསྶནསཱིལཏཱཡ ཨནཱདཱིནཝདསྶཱཝིནོ། ཨཱགམཱདྷིགམཱབྷཱཝཱ ཨསྶུཏཝཏོ། ཨེདིསོ ཨེཀཾསེན ཨནྡྷཔུཐུཛྫནོ ནཱམ ཧོཏཱིཏི ཏསྶ ཨནྡྷཔུཐུཛྫནབྷཱཝཾ དསྶེཏུཾ པུནཔི ‘‘པུཐུཛྫནསྶཱ’’ཏི ཝུཏྟཾ། ཨེཝརཱུཔཱཏི ཝུཏྟཔྤཀཱརཱ སམྨོཧཔུབྦིཀཱ། རཱུཔཾ སཱ ནཱཏིཝཏྟཏཱིཏི རཱུཔཱནཾ སམཏིཀྐམནཱཡ ཀཱརཎཾ ན ཧོཏི, རཱུཔཱརམྨཎེ ཀིལེསེ ནཱཏིཀྐམཏཱིཏི ཨདྷིཔྤཱཡོ། ཨཉྙཱཎཱཝིབྷཱུཏཏཱཡ ཨཱརམྨཎེ ཨཛ྄ཛྷུཔེཀྑནཝསེན པཝཏྟམཱནཱ ལོབྷསམྤཡུཏྟཨུཔེཀྑཱ ཨིདྷཱདྷིཔྤེཏཱཏི ཏསྶ ལོབྷསྶ ཨནུཙྪཝིཀམེཝ ཨཱརམྨཎཾ དསྶེནྟོ ‘‘ཨིཊྛཱརམྨཎེ’’ཏི ཨཱཧ། ཨནཏིཝཏྟམཱནཱ ཨནཱདཱིནཝདསྶིཏཱཡ། ཏཏོ ཨེཝ ཨསྶཱདཱནུཔསྶནཏོ ཏཏྠེཝ ལགྒཱ། ཨབྷིསངྒསྶ ལོབྷསྶ ཝསེན, དུམྨོཙནཱིཡཏཱཡ ཙ ཏེན ལགྒིཏཱ ཝིཡ ཧུཏྭཱ ཨུཔྤནྣཱ།

    362.Evarūpāti yā akusalānaṃ abhibuddhiyā, kusalānaṃ parihānāya ca saṃvattati, evarūpā, sā pana kāmūpasañhitatāya ‘‘gehasitā’’ti vuccatīti āha ‘‘gehasitaupekkhā’’ti. ‘‘Bālassā’’tiādīsu bālakaradhammayogato bālassa attahitaparahitabyāmūḷhatāya mūḷhassa puthūnaṃ kilesādīnaṃ jananādīhi kāraṇehi puthujjanassa kilesodhīnaṃ maggodhīhi ajitattā anodhijinassa, odhijino vāyapekkhā, odhiso ca kilesānaṃ jitattā, tenassa sekkhabhāvaṃ paṭikkhipati. Sattamabhavādito uddhaṃ pavattanavipākassa ajitattā avipākajinassa, vipākajinā vā arahanto appaṭisandhikattā, tenassa asekkhattaṃ paṭikkhipati. Anekādīnave sabbesampi pāpadhammānaṃ mūlabhūte sammohe ādīnavānaṃ adassanasīlatāya anādīnavadassāvino. Āgamādhigamābhāvā assutavato. Ediso ekaṃsena andhaputhujjano nāma hotīti tassa andhaputhujjanabhāvaṃ dassetuṃ punapi ‘‘puthujjanassā’’ti vuttaṃ. Evarūpāti vuttappakārā sammohapubbikā. Rūpaṃ sā nātivattatīti rūpānaṃ samatikkamanāya kāraṇaṃ na hoti, rūpārammaṇe kilese nātikkamatīti adhippāyo. Aññāṇāvibhūtatāya ārammaṇe ajjhupekkhanavasena pavattamānā lobhasampayuttaupekkhā idhādhippetāti tassa lobhassa anucchavikameva ārammaṇaṃ dassento ‘‘iṭṭhārammaṇe’’ti āha. Anativattamānā anādīnavadassitāya. Tato eva assādānupassanato tattheva laggā. Abhisaṅgassa lobhassa vasena, dummocanīyatāya ca tena laggitā viya hutvā uppannā.

    ཨེཝརཱུཔཱཏི ཡཱ ཨཀུསལཱནཾ པཧཱནཱཡ, ཀུསལཱནཉྩ ཨབྷིབུདྡྷིཡཱ སཾཝཏྟཏི, ཨེཝརཱུཔཱ, སཱ པན པབྦཛྫཱདིཝསེན པཝཏྟིཡཱ ནེཀྑམྨཱུཔསཉྷིཏཱཏི ཨཱཧ ‘‘ནེཀྑམྨསིཏཱ’’ཏི། ཨིདཱནི ཏཾ པཱལི༹ཝསེན དསྶེཏུཾ ‘‘ཏཏྠ ཀཏམཱ’’ཏིཨཱདི ཝུཏྟཾ, ཏསྶཏྠོ ཧེཊྛཱ ཝུཏྟནཡཱནུསཱརེན ཝེདིཏབྦོ། རཱུཔཾ སཱ ཨཏིཝཏྟཏཱིཏི རཱུཔསྨིཾ སམྨདེཝ ཨཱདཱིནཝདསྶནཏོ། རཱུཔནིཡཱཏཱཏི ཀིལེསེཧི ཨནབྷིབྷཝནཱིཡཏོ། ཨིཊྛེཏི སབྷཱཝཏོ, སངྐཔྤཏོ ཙ ཨིཊྛེ ཨཱརམྨཎེ། ཨརཛྫནྟསྶཱཏི ན རཛྫནྟསྶ རཱགཾ ཨནུཔྤཱདེནྟསྶ། ཨནིཊྛེ ཨདུསྶནྟསྶཱཏི ཨེཏྠ ཝུཏྟནཡེན ཨཏྠོ ཝེདིཏབྦོ། སམཾ སམྨཱ ཡོནིསོ ན པེཀྑནཾ ཨསམཔེཀྑནཾ, ཏཾ པན ཨིཊྛཱནིཊྛམཛ྄ཛྷཏྟེ ཝིཡ ཨིཊྛཱནིཊྛེསུཔི བཱལསྶ ཧོཏཱིཏི ‘‘ཨིཊྛཱནིཊྛམཛ྄ཛྷཏྟེ’’ཏི ཨཝཏྭཱ ‘‘ཨསམཔེཀྑནེན ཨསམྨུཡ྄ཧནྟསྶཱ’’ཏི ཝུཏྟཾ, ཏིཝིདྷེཔི ཨཱརམྨཎེ ཨསམཔེཀྑནཝསེན མུཡ྄ཧནྟསྶཱཏི ཨཏྠོ། ཝིཔསྶནཱཉཱཎསམྤཡུཏྟཱ ཨུཔེཀྑཱ། ནེཀྑམྨསིཏཱ ཨུཔེཀྑཱ ཝེདནཱསབྷཱགཱཏི ཨུདཱསིནཱཀཱརེན པཝཏྟིཡཱ, ཨུཔེཀྑཱ ཝེདནཱཡ ཙ སབྷཱགཱ། ཨེཏྠ ཨུཔེཀྑཱ ཝཱཏི ཨེཏྠ ཨེཏསྨིཾ ཨུཔེཀྑཱནིདྡེསེ ‘‘ཨུཔེཀྑཱ’’ཏི གཧིཏཱ ཨེཝ། ཏསྨཱཏི ཏཏྲམཛ྄ཛྷཏྟུཔེཀྑཱཡཔི ཨིདྷ ཨུཔེཀྑཱགྒཧཎེན གཧིཏཏྟཱ། ཏཉྷི སནྡྷཱཡ ‘‘པཋམདུཏིཡཏཏིཡཙཏུཏྠཛ྄ཛྷཱནཝསེན ཨུཔྤཛྫནཀཨུཔེཀྑཱ’’ཏི ཝུཏྟཾ།

    Evarūpāti yā akusalānaṃ pahānāya, kusalānañca abhibuddhiyā saṃvattati, evarūpā, sā pana pabbajjādivasena pavattiyā nekkhammūpasañhitāti āha ‘‘nekkhammasitā’’ti. Idāni taṃ pāḷivasena dassetuṃ ‘‘tattha katamā’’tiādi vuttaṃ, tassattho heṭṭhā vuttanayānusārena veditabbo. Rūpaṃ sā ativattatīti rūpasmiṃ sammadeva ādīnavadassanato. Rūpaniyātāti kilesehi anabhibhavanīyato. Iṭṭheti sabhāvato, saṅkappato ca iṭṭhe ārammaṇe. Arajjantassāti na rajjantassa rāgaṃ anuppādentassa. Aniṭṭhe adussantassāti ettha vuttanayena attho veditabbo. Samaṃ sammā yoniso na pekkhanaṃ asamapekkhanaṃ, taṃ pana iṭṭhāniṭṭhamajjhatte viya iṭṭhāniṭṭhesupi bālassa hotīti ‘‘iṭṭhāniṭṭhamajjhatte’’ti avatvā ‘‘asamapekkhanena asammuyhantassā’’ti vuttaṃ, tividhepi ārammaṇe asamapekkhanavasena muyhantassāti attho. Vipassanāñāṇasampayuttā upekkhā. Nekkhammasitā upekkhā vedanāsabhāgāti udāsinākārena pavattiyā, upekkhā vedanāya ca sabhāgā. Ettha upekkhā vāti ettha etasmiṃ upekkhāniddese ‘‘upekkhā’’ti gahitā eva. Tasmāti tatramajjhattupekkhāyapi idha upekkhāggahaṇena gahitattā. Tañhi sandhāya ‘‘paṭhamadutiyatatiyacatutthajjhānavasena uppajjanakaupekkhā’’ti vuttaṃ.

    ཏཱཡཔི ནེཀྑམྨསིཏཨུཔེཀྑཱཡཱཏི ནིདྡྷཱརཎེ བྷུམྨཾ། ‘‘ཡཾ ནེཀྑམྨཝསེནཱ’’ཏིཨཱདི ཧེཊྛཱ ཝུཏྟནཡཏྟཱ ཨུཏྟཱ ནཏྠམེཝ།

    Tāyapi nekkhammasitaupekkhāyāti niddhāraṇe bhummaṃ. ‘‘Yaṃ nekkhammavasenā’’tiādi heṭṭhā vuttanayattā uttā natthameva.

    ༣༦༣. ཡདི སཀྐསྶ ཏདཱ སོཏཱཔཏྟིཕལཔཏྟིཡཱཝ ཨུཔནིསྶཡོ, ཨཐ ཀསྨཱ བྷགཝཱ ཡཱཝ ཨརཧཏྟཾ དེསནཾ ཝཌྜྷེསཱིཏི ཨཱཧ ‘‘བུདྡྷཱནཉྷཱི’’ཏིཨཱདི། ཏརུཎསཀྐོཏི ཨབྷིནཝོ ཨདྷུནཱ པཱཏུབྷཱུཏོ སཀྐོ། སམྤཏི པཱཏུབྷཱཝཉྷི སནྡྷཱཡ ‘‘ཏརུཎསཀྐོ’’ཏི ཝུཏྟཾ, ན ཏསྶ ཀུམཱརཏཱ, ཝུདྡྷཏཱ ཝཱ ཨཏྠི། གཏཱགཏཊྛཱནནྟི གམནཱགམནཀཱརཎཾ། ན པཉྙཱཡཏི ན ཨུཔལབྦྷཏི། གབྦྷསེཡྻཀཱནཉྷི ཙཝནྟཱནཾ ཀམྨཛརཱུཔཾ ཝིགཙྪཏི ཨནུདེཝ ཙིཏྟཛཾ, ཨཱཧཱརཛཉྩ པཙྩཡཱབྷཱཝཏོ, ཨུཏུཛཾ པན སུཙིརམྤི ཀཱལཾ པཝེཎིཾ གྷཊྚེནྟཾ བྷསྶནྟཾ ཝཱ སོསནྟཾ ཝཱ ཀིལེསནྟཾ ཝཱ ཝིཊྛཏཾ ཝཱ ཧོཏི, ན ཨེཝཾ དེཝཱནཾ། ཏེསཉྷི ཨོཔཔཱཏིཀཏྟཱ ཀམྨཛརཱུཔེ ཨནྟརདྷཱཡནྟེ སེསཏིསནྟཏིརཱུཔམྤི ཏེན སདྡྷིཾ ཨནྟརདྷཱཡཏི། ཏེནཱཧ ‘‘དཱིཔསིཁཱགམནཾ ཝིཡ ཧོཏཱི’’ཏི། སེསདེཝཏཱ ན ཛཱནིཾསུ པུནཔི སཀྐཏྟབྷཱཝེན ཏསྨིཾཡེཝ ཋཱནེ ནིབྦཏྟཏྟཱ། ཏཱིསུ ཋཱནེསཱུཏི སོམནསྶདོམནསྶཨུཔེཀྑཱཝིསྶཛྫནཱཝསཱནཊྛཱནེསུ། ནིབྦཏྟིཏཕལམེཝཱཏི སཔྤིམྷཱ སཔྤིམཎྜོ ཝིཡ ཨཱགམནཱིཡཔཊིཔདཱཡ ནིབྦཏྟིཏཕལབྷཱུཏཾ ལོཀུཏྟརམགྒཕལམེཝ ཀཐིཏཾ། སཀུཎིཀཱཡ ཝིཡ ཀིཉྩི གཡ྄ཧཱུཔགཾ ཨུཔྤཏིཏྭཱ ཨུཌྜེཏྭཱ ཨུལླངྒྷིཏྭཱ། ཨསྶཱཏི མགྒཕལསཉྙིཏསྶ ཨརིཡསྶ དྷམྨསྶ།

    363. Yadi sakkassa tadā sotāpattiphalapattiyāva upanissayo, atha kasmā bhagavā yāva arahattaṃ desanaṃ vaḍḍhesīti āha ‘‘buddhānañhī’’tiādi. Taruṇasakkoti abhinavo adhunā pātubhūto sakko. Sampati pātubhāvañhi sandhāya ‘‘taruṇasakko’’ti vuttaṃ, na tassa kumāratā, vuddhatā vā atthi. Gatāgataṭṭhānanti gamanāgamanakāraṇaṃ. Na paññāyati na upalabbhati. Gabbhaseyyakānañhi cavantānaṃ kammajarūpaṃ vigacchati anudeva cittajaṃ, āhārajañca paccayābhāvato, utujaṃ pana sucirampi kālaṃ paveṇiṃ ghaṭṭentaṃ bhassantaṃ vā sosantaṃ vā kilesantaṃ vā viṭṭhataṃ vā hoti, na evaṃ devānaṃ. Tesañhi opapātikattā kammajarūpe antaradhāyante sesatisantatirūpampi tena saddhiṃ antaradhāyati. Tenāha ‘‘dīpasikhāgamanaṃ viya hotī’’ti. Sesadevatā na jāniṃsu punapi sakkattabhāvena tasmiṃyeva ṭhāne nibbattattā. Tīsu ṭhānesūti somanassadomanassaupekkhāvissajjanāvasānaṭṭhānesu. Nibbattitaphalamevāti sappimhā sappimaṇḍo viya āgamanīyapaṭipadāya nibbattitaphalabhūtaṃ lokuttaramaggaphalameva kathitaṃ. Sakuṇikāya viya kiñci gayhūpagaṃ uppatitvā uḍḍetvā ullaṅghitvā. Assāti maggaphalasaññitassa ariyassa dhammassa.

    པཱཏིམོཀྑསཾཝརཝཎྞནཱ

    Pātimokkhasaṃvaravaṇṇanā

    ༣༦༤. པཱཏིམོཀྑསཾཝརཱཡཱཏི པཱཏིམོཀྑབྷཱུཏསཱིལསཾཝརཱཡཱཏི ཨཡམེཏྠ ཨཏྠོཏི ཨཱཧ ‘‘ཨུཏྟམཛེཊྛཀསཱིལསཾཝརཱཡཱ’’ཏི། ‘‘པཱཏིམོཀྑསཱིལཉྷི སབྦསཱིལཏོ ཛེཊྛཀསཱིལ’’ནྟི དཱིགྷཝཱཔཱིཝིཧཱརཝཱསི སུམཏྠེརོ ཝདཏི, ཨནྟེཝཱསིཀོ པནསྶ ཏེཔིཊཀཙཱུལ༹ནཱགཏྠེརོ ‘‘པཱཏིམོཀྑསཾཝརོ ཨེཝ སཱིལཾ, ཨིཏརཱནི པན ‘སཱིལནྟི ཝུཏྟཊྛཱནཾ ནཱམ ཨཏྠཱི’ཏི ཨནནུཛཱནནྟོ ཨིནྡྲིཡསཾཝརོ ནཱམ ཚདྭཱརརཀྑཱམཏྟཀཾ, ཨཱཛཱིཝཔཱརིསུདྡྷི དྷམྨེན སམེན པཙྩཡུཔྤཱདནམཏྟཀཾ, པཙྩཡསནྣིསྶིཏཾ པཊིལདྡྷཔཙྩཡེ ‘ཨིད མཏྠ’ནྟི པཙྩཝེཀྑིཏྭཱ པརིབྷུཉྫནམཏྟཀཾ, ནིཔྤརིཡཱཡེན པཱཏིམོཀྑསཾཝརོཝ སཱིལཾ། ཏཐཱ ཧི ཡསྶ སོ བྷིནྣོ, སོ ཨིཏརཱནི རཀྑིཏུཾ ཨབྷབྦཏྟཱ ཨསཱིལོ ཧོཏི། ཡསྶ པན སབྦསོ ཨརོགོ སེསཱནཾ རཀྑིཏུཾ བྷབྦཏྟཱ སམྤནྣསཱིལོ’’ཏི ཝདཏི, ཏསྨཱ ཨིཏརེསཾ ཏསྶ པརིཝཱརབྷཱཝཏོ, སབྦསོ ཨེཀདེསེན ཙ ཏདནྟོགདྷབྷཱཝཏོ ཏདེཝ པདྷཱནསཱིལཾ ནཱམཱཏི ཨཱཧ ‘‘ཨུཏྟམཛེཊྛཀསཱིལསཾཝརཱཡཱ’’ཏི། ཏཏྠ ཡཐཱ ཧེཊྛཱ པཔཉྩསཉྙཱསངྑཱནིརོདྷསཱརུཔྤགཱམིནིཾ པཊིཔདཾ པུཙྪིཏེན བྷགཝཏཱ པཔཉྩསཉྙཱནཾ, པཊིཔདཱཡ ཙ མཱུལབྷཱུཏཾ ཝེདནཾ ཝིབྷཛིཏྭཱ པཊིཔདཱ དེསིཏཱ སཀྐསྶ ཨཛ྄ཛྷཱསཡཝསེན སཾཀིལེསདྷམྨཔྤཧཱནམུཁེན ཝོདཱནདྷམྨཔཱརིཔཱུརཱིཏི, ཨེཝཾ ཏསྶཱ ཨེཝ པཊིཔདཱཡ མཱུལབྷཱུཏམྤི སཱིལསཾཝརཾ པུཙྪིཏེན བྷགཝཏཱ ཡཏོ སོ ཝིསུཛ྄ཛྷཏི, ཡཐཱ ཙ ཝིསུཛ྄ཛྷཏི, ཏདུབྷཡཾ སཀྐསྶ ཨཛ྄ཛྷཱསཡཝསེན ཝིབྷཛིཏྭཱ དསྶེཏུཾ ‘‘ཀཱཡསམཱཙཱརམྤཱི’’ཏིཨཱདི ཝུཏྟཾ སཾཀིལེསདྷམྨཔྤཧཱནམུཁེན ཝོདཱནདྷམྨཔཱརིཔཱུརཱིཏི ཀཏྭཱ། སཱིལཀཐཱཡཾ ཨསེཝིཏབྦཀཱཡསམཱཙཱརཱདིཀཐནེ ཀཱརཎཾ ཝུཏྟམེཝ, ཏསྨཱ ཀམྨཔཐཝསེནཱཏི ཀུསལཱཀུསལཀམྨཔཐཝསེན།

    364.Pātimokkhasaṃvarāyāti pātimokkhabhūtasīlasaṃvarāyāti ayamettha atthoti āha ‘‘uttamajeṭṭhakasīlasaṃvarāyā’’ti. ‘‘Pātimokkhasīlañhi sabbasīlato jeṭṭhakasīla’’nti dīghavāpīvihāravāsi sumatthero vadati, antevāsiko panassa tepiṭakacūḷanāgatthero ‘‘pātimokkhasaṃvaro eva sīlaṃ, itarāni pana ‘sīlanti vuttaṭṭhānaṃ nāma atthī’ti ananujānanto indriyasaṃvaro nāma chadvārarakkhāmattakaṃ, ājīvapārisuddhi dhammena samena paccayuppādanamattakaṃ, paccayasannissitaṃ paṭiladdhapaccaye ‘ida mattha’nti paccavekkhitvā paribhuñjanamattakaṃ, nippariyāyena pātimokkhasaṃvarova sīlaṃ. Tathā hi yassa so bhinno, so itarāni rakkhituṃ abhabbattā asīlo hoti. Yassa pana sabbaso arogo sesānaṃ rakkhituṃ bhabbattā sampannasīlo’’ti vadati, tasmā itaresaṃ tassa parivārabhāvato, sabbaso ekadesena ca tadantogadhabhāvato tadeva padhānasīlaṃ nāmāti āha ‘‘uttamajeṭṭhakasīlasaṃvarāyā’’ti. Tattha yathā heṭṭhā papañcasaññāsaṅkhānirodhasāruppagāminiṃ paṭipadaṃ pucchitena bhagavatā papañcasaññānaṃ, paṭipadāya ca mūlabhūtaṃ vedanaṃ vibhajitvā paṭipadā desitā sakkassa ajjhāsayavasena saṃkilesadhammappahānamukhena vodānadhammapāripūrīti, evaṃ tassā eva paṭipadāya mūlabhūtampi sīlasaṃvaraṃ pucchitena bhagavatā yato so visujjhati, yathā ca visujjhati, tadubhayaṃ sakkassa ajjhāsayavasena vibhajitvā dassetuṃ ‘‘kāyasamācārampī’’tiādi vuttaṃ saṃkilesadhammappahānamukhena vodānadhammapāripūrīti katvā. Sīlakathāyaṃ asevitabbakāyasamācārādikathane kāraṇaṃ vuttameva, tasmā kammapathavasenāti kusalākusalakammapathavasena.

    ཀམྨཔཐཝསེནཱཏི ཙ ཀམྨཔཐཝིཙཱརཝསེན ། ཀམྨཔཐབྷཱཝཾ ཨཔཏྟཱནམྤི ཧི ཀཱཡདུཙྩརིཏཱདཱིནཾ ཨསེཝིཏབྦཀཱདཱིནཾ ཨསེཝིཏབྦཀཱཡསམཱཙཱརཱདིབྷཱཝོ ཨིདྷ ཝུཙྩཏཱིཏི། པཎྞཏྟིཝསེནཱཏི སིཀྑཱཔདཔཎྞཏྟིཝསེན། ཡཏོ ཡཏོ ཧི ཡཱ ཡཱ ཝེརམཎཱི, ཏདུབྷཡེཔི ཝིབྷཱཝེནྟོ པཎྞཏྟིཝསེན ཀཐེཏི ནཱམ། ཏེནཱཧ ‘‘ཀཱཡདྭཱརེ’’ཏིཨཱདི། སིཀྑཱཔདཾ ཝཱིཏིཀྐམཏི ཨེཏེནཱཏི སིཀྑཱཔདཝཱིཏིཀྐམོ, སིཀྑཱཔདསྶ ཝཱིཏིཀྐམནཱཀཱརེན པཝཏྟོ ཨཀུསལདྷམྨོ ཡཾ, ཏསྶ ཨསེཝིཏབྦཀཱཡསམཱཙཱརཱདིཏཱ། ཝཱིཏིཀྐམཔཊིཔཀྑོ ཨཝཱིཏིཀྐམོ, ན ཝཱིཏིཀྐམཏི ཨེཏེནཱཏི ཨཝཱིཏིཀྐམོ, སཱིལཾ།

    Kammapathavasenāti ca kammapathavicāravasena . Kammapathabhāvaṃ apattānampi hi kāyaduccaritādīnaṃ asevitabbakādīnaṃ asevitabbakāyasamācārādibhāvo idha vuccatīti. Paṇṇattivasenāti sikkhāpadapaṇṇattivasena. Yato yato hi yā yā veramaṇī, tadubhayepi vibhāvento paṇṇattivasena katheti nāma. Tenāha ‘‘kāyadvāre’’tiādi. Sikkhāpadaṃ vītikkamati etenāti sikkhāpadavītikkamo, sikkhāpadassa vītikkamanākārena pavatto akusaladhammo yaṃ, tassa asevitabbakāyasamācārāditā. Vītikkamapaṭipakkho avītikkamo, na vītikkamati etenāti avītikkamo, sīlaṃ.

    མིཙྪཱ སམྨཱ ཙ པརིཡེསཏི ཨེཏཱཡཱཏི པརིཡེསནཱ, ཨཱཛཱིཝོ, ཨཏྠཏོ པཙྩཡགཝེསནབྱཱཔཱརོ ཀཱཡཝཙཱིདྭཱརིཀོ། ཡདི ཨེཝཾ ཀསྨཱ ཝིསུཾ གཧཎནྟི ཨཱཧ ‘‘ཡསྨཱ’’ཏིཨཱདི ། ཨརིཡཱ ནིདྡོསཱ པརིཡེསནཱ གཝེསནཱཏི ཨརིཡཔརིཡེསནཱ, ཨརིཡེཧི སཱདྷཱུཧི པརིཡེསིཏབྦཱཏིཔི ཨརིཡཔརིཡེསནཱཏི། ཝུཏྟཝིཔརིཡཱཡཏོ ཨནརིཡཔརིཡེསནཱ ཝེདིཏབྦཱ།

    Micchā sammā ca pariyesati etāyāti pariyesanā, ājīvo, atthato paccayagavesanabyāpāro kāyavacīdvāriko. Yadi evaṃ kasmā visuṃ gahaṇanti āha ‘‘yasmā’’tiādi . Ariyā niddosā pariyesanā gavesanāti ariyapariyesanā, ariyehi sādhūhi pariyesitabbātipi ariyapariyesanāti. Vuttavipariyāyato anariyapariyesanā veditabbā.

    ཛཱཏིདྷམྨོཏི ཛཱཡནསབྷཱཝོ ཛཱཡནཔཀཏིཀོ། ཛརཱདྷམྨོཏི ཛཱིརཎསབྷཱཝོ། བྱཱདྷིདྷམྨོཏི བྱཱདྷིསབྷཱཝོ། མརཎདྷམྨོཏི མཱིཡནསབྷཱཝོ། སོཀདྷམྨོཏི སོཙནཀསབྷཱཝོ། སཾཀིལེསདྷམྨོཏི སཾཀིལིསྶནསབྷཱཝོ།

    Jātidhammoti jāyanasabhāvo jāyanapakatiko. Jarādhammoti jīraṇasabhāvo. Byādhidhammoti byādhisabhāvo. Maraṇadhammoti mīyanasabhāvo. Sokadhammoti socanakasabhāvo. Saṃkilesadhammoti saṃkilissanasabhāvo.

    པུཏྟབྷརིཡནྟི པུཏྟཱ ཙ བྷརིཡཱ ཙ། ཨེས ནཡོ སབྦཏྠ། དྭནྡེཀཏྟཝསེན ཏེསཾ ནིདྡེསོ། ཛཱཏརཱུཔརཛཏནྟི ཨེཏྠ པན ཡཏོ ཝིཀཱརཾ ཨནཱཔཛྫིཏྭཱ སབྦཾ ཛཱཏརཱུཔམེཝ ཧོཏཱིཏི ཛཱཏརཱུཔཾ ནཱམ སུཝཎྞཾ། དྷཝལསབྷཱཝཏཱཡ རཛཏཱིཏི རཛཏཾ, རཱུཔིཡཾ། ཨིདྷ པན སུཝཎྞཾ ཋཔེཏྭཱ ཡཾ ཀིཉྩི ཨུཔབྷོགཔརིབྷོགཱརཧཾ ‘‘རཛཏ’’ནྟྭེཝ གཧིཏཾ ཝོཧཱརཱུཔགམཱསཀཱདི། ཛཱཏིདྷམྨཱ ཧེཏེ, བྷིཀྑཝེ, ཨུཔདྷཡོཏི ཨེཏེ ཀཱམགུཎཱུཔདྷཡོ ནཱམ ཧོནྟི, ཏེ སབྦེཔི ཛཱཏིདྷམྨཱཏི དསྶེཏི།

    Puttabhariyanti puttā ca bhariyā ca. Esa nayo sabbattha. Dvandekattavasena tesaṃ niddeso. Jātarūparajatanti ettha pana yato vikāraṃ anāpajjitvā sabbaṃ jātarūpameva hotīti jātarūpaṃ nāma suvaṇṇaṃ. Dhavalasabhāvatāya rajatīti rajataṃ, rūpiyaṃ. Idha pana suvaṇṇaṃ ṭhapetvā yaṃ kiñci upabhogaparibhogārahaṃ ‘‘rajata’’ntveva gahitaṃ vohārūpagamāsakādi. Jātidhammā hete, bhikkhave, upadhayoti ete kāmaguṇūpadhayo nāma honti, te sabbepi jātidhammāti dasseti.

    བྱཱདྷིདྷམྨཝཱརཱདཱིསུ ཛཱཏརཱུཔརཛཏཾ ན གཧིཏཾ། ན ཧེཏསྶ སཱིསརོགཱདཡོ བྱཱདྷཡོ ནཱམ སནྟི, ན སཏྟཱནཾ ཝིཡ ཙུཏིསངྑཱཏཾ མརཎཾ, ན སོཀེ ཨུཔྤཛྫཏི, ཙུཏིསངྑཱཏཾ མརཎནྟི ཙ ཨེཀབྷཝཔརིཡཱཔནྣཁནྡྷནིརོདྷོ, སོ ཏསྶ ནཏྠི, ཁཎིཀནིརོདྷོ པན ཁཎེ ཁཎེ ལབྦྷཏེཝ། རཱགཱདཱིཧི པན སཾཀིལེསེཧི སཾཀིལིསྶཏཱིཏི སཾཀིལེསདྷམྨཝཱརེ གཧིཏཾ ཛཱཏརཱུཔཾ, ཏཐཱ ཨུཏུསམུཊྛཱནཏྟཱ ཛཱཏིདྷམྨཝཱརེ, མལཾ གཧེཏྭཱ ཛཱིརཎཏོ ཛརཱདྷམྨཝཱརེ ཙ། ཨརིཡེཧི ན ཨརཎཱིཡཱ, པརིཡེསནཱཏིཔི ཨནརིཡཔརིཡེསནཱ།

    Byādhidhammavārādīsu jātarūparajataṃ na gahitaṃ. Na hetassa sīsarogādayo byādhayo nāma santi, na sattānaṃ viya cutisaṅkhātaṃ maraṇaṃ, na soke uppajjati, cutisaṅkhātaṃ maraṇanti ca ekabhavapariyāpannakhandhanirodho, so tassa natthi, khaṇikanirodho pana khaṇe khaṇe labbhateva. Rāgādīhi pana saṃkilesehi saṃkilissatīti saṃkilesadhammavāre gahitaṃ jātarūpaṃ, tathā utusamuṭṭhānattā jātidhammavāre, malaṃ gahetvā jīraṇato jarādhammavāre ca. Ariyehi na araṇīyā, pariyesanātipi anariyapariyesanā.

    ཨིདཱནི ཨནེསནཱཝསེནཱཔི ཏཾ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། ཨིམིནཱ ནཡེན སུཀྐཔཀྑེཔི ཨཏྠོ ཝེདིཏབྦོ།

    Idāni anesanāvasenāpi taṃ dassetuṃ ‘‘apicā’’tiādi vuttaṃ. Iminā nayena sukkapakkhepi attho veditabbo.

    སམྦྷཱརཔརིཡེསནཾ པཧརཎཝིསཱདིགཝེསནཾ, པཡོགཝསེན པཡོགཀརཎཾ ཏཛྫཱཝཱཡཱམཛནནཾ ཏཱདིསཾ ཨུཔཀྐམནིབྦཏྟནཾ, པཱཎཱཏིཔཱཏཱདིཨཏྠཾ གམནཾ, པཙྩེཀཾ ཀཱལ-སདྡོ ཡོཛེཏབྦོ ‘‘སམྦྷཱརཔརིཡེསནཀཱལཏོ པཊྛཱཡ, པཡོགཀརཎཀཱལཏོ པཊྛཱཡ, གམནཀཱལཏོ པཊྛཱཡཱ’’ཏི། ཨིཏརོཏི ‘‘སེཝིཏབྦོ’’ཏི ཝུཏྟཀཱཡསམཱཙཱརཱདིཀོ། ཙིཏྟམྤི ཨུཔྤཱདེཏབྦཾ། ཏཐཱ ཨུཔྤཱདིཏཙིཏྟོ ཧི སཏི པཙྩཡསམཝཱཡེ ཏཱདིསཾ པཡོགཾ པརཀྐམཾ ཀརོནྟོ པཊིཔཏྟིཡཱ མཏྠཀཾ གཎྷཱཏི། ཏེནཱཧ ‘‘ཙིཏྟུཔྤཱདམྤི ཁོ ཨཧཾ, བྷིཀྑཝེ, ཀུསལེསུ དྷམྨེསུ བཧུཔཀཱརཾ ཝདཱམཱི’’ཏི (མ॰ ནི॰ ༡.༨༤)།

    Sambhārapariyesanaṃ paharaṇavisādigavesanaṃ, payogavasena payogakaraṇaṃ tajjāvāyāmajananaṃ tādisaṃ upakkamanibbattanaṃ, pāṇātipātādiatthaṃ gamanaṃ, paccekaṃ kāla-saddo yojetabbo ‘‘sambhārapariyesanakālato paṭṭhāya, payogakaraṇakālato paṭṭhāya, gamanakālato paṭṭhāyā’’ti. Itaroti ‘‘sevitabbo’’ti vuttakāyasamācārādiko. Cittampi uppādetabbaṃ. Tathā uppāditacitto hi sati paccayasamavāye tādisaṃ payogaṃ parakkamaṃ karonto paṭipattiyā matthakaṃ gaṇhāti. Tenāha ‘‘cittuppādampi kho ahaṃ, bhikkhave, kusalesu dhammesu bahupakāraṃ vadāmī’’ti (ma. ni. 1.84).

    ཨིདཱནི ཏཾ མཏྠཀཔྤཏྟཾ ཨསེཝིཏབྦཾ, སེཝིཏབྦཉྩ དསྶེཏུཾ ‘‘ཨཔིཙཱ’’ཏིཨཱདི ཝུཏྟཾ། སངྒྷབྷེདཱདཱིནནྟི ཨཱདི-སདྡེན ལོཧིཏུཔྤཱདནཱདིཾ སངྒཎྷཱཏི། བུདྡྷརཏནསངྒྷརཏནུཔཊྛཱནེཧེཝ དྷམྨརཏནུཔཊྛཱནསིདྡྷཱིཏི ཨཱཧ ‘‘དིཝསསྶ དྭཏྟིཀྑཏྟུཾ ཏིཎྞཾ རཏནཱནཾ ཨུཔཊྛཱནགམནཱདིཝསེནཱ’’ཏི ། དྷནུགྒཧཔེསནཾ དྷནུགྒཧཔུརིསཱནཾ ཨུཡྻོཛནཾ། ཨཱདི-སདྡེན པཉྩཝརཡཱཙནཱདིཾ སངྒཎྷཱཏི། ‘‘ཨཛཱཏསཏྟུཾ པསཱདེཏྭཱ ལཱབྷུཔྤཱདཝསེན པརིཧཱིནལཱབྷསཀྐཱརསྶ ཀུལེསུ ཝིཉྙཱཔན’’ནྟི ཨེཝམཱདིཾ ཨནརིཡཔརིཡེསནཾ པརིཡེསནྟཱནཾ།

    Idāni taṃ matthakappattaṃ asevitabbaṃ, sevitabbañca dassetuṃ ‘‘apicā’’tiādi vuttaṃ. Saṅghabhedādīnanti ādi-saddena lohituppādanādiṃ saṅgaṇhāti. Buddharatanasaṅgharatanupaṭṭhāneheva dhammaratanupaṭṭhānasiddhīti āha ‘‘divasassa dvattikkhattuṃ tiṇṇaṃ ratanānaṃ upaṭṭhānagamanādivasenā’’ti . Dhanuggahapesanaṃ dhanuggahapurisānaṃ uyyojanaṃ. Ādi-saddena pañcavarayācanādiṃ saṅgaṇhāti. ‘‘Ajātasattuṃ pasādetvā lābhuppādavasena parihīnalābhasakkārassa kulesu viññāpana’’nti evamādiṃ anariyapariyesanaṃ pariyesantānaṃ.

    པཱརིཔཱུརིཡཱཏི པཱརིཔཱུརིཨཏྠཾ། ཨགྒམགྒཕལཝསེནེཝ ཧི སེཝིཏབྦཱནཾ པཱརིཔཱུརཱིཏི ཏདཏྠཾ སབྦཱ པུབྦབྷཱགཔཊིཔདཱ, པཱཏིམོཀྑསཾཝརོཔི ཨགྒམགྒེནེཝ པརིཔུཎྞོ ཧོཏཱིཏི ཏདཏྠཾ པུབྦབྷཱགཔཊིཔདཾ ཝཏྭཱ ནིགམེནྟོ ‘‘པཱཏིམོཀྑོ…པེ॰… ཧོཏཱི’’ཏི ཨཱཧ།

    Pāripūriyāti pāripūriatthaṃ. Aggamaggaphalavaseneva hi sevitabbānaṃ pāripūrīti tadatthaṃ sabbā pubbabhāgapaṭipadā, pātimokkhasaṃvaropi aggamaggeneva paripuṇṇo hotīti tadatthaṃ pubbabhāgapaṭipadaṃ vatvā nigamento ‘‘pātimokkho…pe… hotī’’ti āha.

    ཨིནྡྲིཡསཾཝརཝཎྞནཱ

    Indriyasaṃvaravaṇṇanā

    ༣༦༥. ཨིནྡྲིཡཱནཾ པིདྷཱནཱཡཱཏི ཨིནྡྲིཡཱནཾ པིདཧནཏྠཱཡ། ཨིནྡྲིཡཱནི ཙ ཙཀྑཱདཱིནི དྭཱརཱནི, ཏེསཾ པིདྷཱནཾ སཾཝརཎཾ ཨཀུསལུཔྤཏྟིཏོ གོཔནཱཏི ཨཱཧ ‘‘གུཏྟདྭཱརཏཱཡཱ’’ཏི། ཨསེཝིཏབྦརཱུཔཱདིཝསེན ཨིནྡྲིཡེསུ ཨགུཏྟདྭཱརཏཱ ཨསཾཝརོ, སཾཀིལེསདྷམྨཝིཔྤཧཱནཝསེན ཝོདཱནདྷམྨཔཱརིསུདྡྷཱིཏི། ཀཱམཾ པཱལི༹ཡཾ ཨསེཝིཏབྦམྤི རཱུཔཱདི དསྶིཏཾ, སཀྐེན པན ཨིནྡྲིཡསཾཝརཱཡ པཊིཔཏྟི པུཙྪིཏཱཏི ཏམེཝ ནིཝཏྟེཏྭཱ དསྶེཏུཾ ཨཊྛཀཐཱཡཾཝུཏྟཾ ‘‘ཙཀྑུཝིཉྙེཡྻཾ རཱུཔམྤཱིཏིཨཱདི སེཝིཏབྦརཱུཔཱདིཝསེན ཨིནྡྲིཡསཾཝརདསྶནཏྠཾ ཝུཏྟ’’ནྟི། ‘‘ཏུཎྷཱི ཨཧོསཱི’’ཏི ཝཏྭཱ ཏུཎྷཱིབྷཱཝསྶ ཀཱརཎཾ བྱཏིརེཀམུཁེན ཝིབྷཱཝེཏུཾ ‘‘ཀཐེཏུཀཱམོཔཱི’’ཏིཨཱདི ཝུཏྟཾ། ཨཡནྟི སཀྐོ དེཝཱནཾ ཨིནྡོ།

    365.Indriyānaṃ pidhānāyāti indriyānaṃ pidahanatthāya. Indriyāni ca cakkhādīni dvārāni, tesaṃ pidhānaṃ saṃvaraṇaṃ akusaluppattito gopanāti āha ‘‘guttadvāratāyā’’ti. Asevitabbarūpādivasena indriyesu aguttadvāratā asaṃvaro, saṃkilesadhammavippahānavasena vodānadhammapārisuddhīti. Kāmaṃ pāḷiyaṃ asevitabbampi rūpādi dassitaṃ, sakkena pana indriyasaṃvarāya paṭipatti pucchitāti tameva nivattetvā dassetuṃ aṭṭhakathāyaṃvuttaṃ ‘‘cakkhuviññeyyaṃ rūpampītiādi sevitabbarūpādivasena indriyasaṃvaradassanatthaṃ vutta’’nti. ‘‘Tuṇhī ahosī’’ti vatvā tuṇhībhāvassa kāraṇaṃ byatirekamukhena vibhāvetuṃ ‘‘kathetukāmopī’’tiādi vuttaṃ. Ayanti sakko devānaṃ indo.

    རཱུཔནྟི རཱུཔཱཡཏནཾ, ཏསྶ ཨསེཝནཾ ནཱམ ཨདསྶནཾ ཨེཝཱཏི ཨཱཧ ‘‘ན སེཝིཏབྦཾ ན དཊྛབྦ’’ནྟི། ཡཾ པན སཏྟསནྟཱནགཏཾ རཱུཔཾ པསྶཏོ པཊིཀཱུལམནསིཀཱརཝསེན, ཨསུབྷསཉྙཱ ཝཱ སཎྛཱཏི དསྶནཱནུཏྟརིཡཝསེན། ཨཐ ཝཱ ཀམྨཕལསདྡཧནཝསེན པསཱདོ ཝཱ ཨུཔྤཛྫཏི། ཧུཏྭཱ ཨབྷཱཝཱཀཱརསལླཀྑཎེན ཨནིཙྩསཉྙཱཔཊིལཱབྷོ ཝཱ ཧོཏི།

    Rūpanti rūpāyatanaṃ, tassa asevanaṃ nāma adassanaṃ evāti āha ‘‘na sevitabbaṃ na daṭṭhabba’’nti. Yaṃ pana sattasantānagataṃ rūpaṃ passato paṭikūlamanasikāravasena, asubhasaññā vā saṇṭhāti dassanānuttariyavasena. Atha vā kammaphalasaddahanavasena pasādo vā uppajjati. Hutvā abhāvākārasallakkhaṇena aniccasaññāpaṭilābho vā hoti.

    པརིཡཱཡཀྑརཎཏོ ཨཀྑརཾ, ཝཎྞོ, སོ ཨེཝ ནིརནྟརུཔྤཏྟིཡཱ སམུདྡིཏོ པདཝཱཀྱསཉྙིཏོ, ཨདྷིཔྤེཏམཏྠཾ བྱཉྫེཏཱིཏི བྱཉྫནཾ, ཏཡིདཾ ཀཱབྱནཱཊཀཱདིགཏཝེཝཙནཝསེན, ཨུཙྩཱརཎཝསེན ཙ ཝིཙིཏྟསནྣིཝེསཏཱཡ ཏཐཱཔཝཏྟཝིཀཔྤནཝསེན ཙིཏྟཝིཙིཏྟབྷཱཝེན ཨུཔཏིཊྛནཀཾ སནྡྷཱཡཱཧ ‘‘ཡཾ ཙིཏྟཀྑརཾ ཙིཏྟབྱཉྫནམྤི སདྡཾ སུཎཏོ རཱགཱདཡོ ཨུཔྤཛྫནྟཱི’’ཏི། ཨཏྠནིསྶིཏནྟི སམྤརཱཡིཀཏྠནིསྶིཏཾ། དྷམྨནིསྶིཏནྟི ཝིཝཊྚདྷམྨནིསྶིཏཾ, ལོཀུཏྟརརཏནཏྟཡདྷམྨནིསྶིཏཾ ཝཱ། པསཱདོཏི རཏནཏྟཡསདྡྷཱ, ཀམྨཕལསདྡྷཱཔི། ནིབྦིདཱ ཝཱཏི ཨནིཙྩསཉྙཱདིཝསེན ཝཊྚཏོ ཨུཀྐཎྛཱ ཝཱ།

    Pariyāyakkharaṇato akkharaṃ, vaṇṇo, so eva nirantaruppattiyā samuddito padavākyasaññito, adhippetamatthaṃ byañjetīti byañjanaṃ, tayidaṃ kābyanāṭakādigatavevacanavasena, uccāraṇavasena ca vicittasannivesatāya tathāpavattavikappanavasena cittavicittabhāvena upatiṭṭhanakaṃ sandhāyāha ‘‘yaṃ cittakkharaṃ cittabyañjanampi saddaṃ suṇato rāgādayo uppajjantī’’ti. Atthanissitanti samparāyikatthanissitaṃ. Dhammanissitanti vivaṭṭadhammanissitaṃ, lokuttararatanattayadhammanissitaṃ vā. Pasādoti ratanattayasaddhā, kammaphalasaddhāpi. Nibbidā vāti aniccasaññādivasena vaṭṭato ukkaṇṭhā vā.

    གནྡྷརསཱཝིཔརོདྷཱདིཝསེན སེཝིཡམཱནཾ ཨཡོནིསོ པཊིཔནྣཏྟཱ ཨསེཝིཏབྦཾ ནཱམ། ཡོནིསོ པཙྩཝེཀྑིཏྭཱ སེཝིཡམཱནཾ སམྤཛཉྙཝསེན གཧཎཏོ སེཝིཏབྦཾ ནཱམ། ཏེན ཝུཏྟཾ ‘‘ཡཾ གནྡྷཾ གྷཱཡཏོ’’ཏིཨཱདི།

    Gandharasāviparodhādivasena seviyamānaṃ ayoniso paṭipannattā asevitabbaṃ nāma. Yoniso paccavekkhitvā seviyamānaṃ sampajaññavasena gahaṇato sevitabbaṃ nāma. Tena vuttaṃ ‘‘yaṃ gandhaṃ ghāyato’’tiādi.

    ཡཾ པན ཕུསཏོཏི ཡཾ པན སེཝིཏབྦཾ ཕོཊྛབྦཾ ཨནིཔྥནྣསྶེཝ ཕུསཏོ། ཨཱསཝཀྑཡོ ཙེཝ ཧོཏི ཛཱགརིཡཱནུཡོགསྶ མཏྠཀཔྤཏྟིཏོ། ཝཱིརིཡཉྩ སུཔགྒཧིཏཾ ཧོཏི ཙཏུཏྠསྶ ཨརིཡཝཾསསྶ ཨུཀྐཾསནཏོ། པཙྪིམཱ ཙ…པེ॰… ཨནུགྒཧིཏཱ ཧོཏི སམྨཱཔཊིཔཏྟིཡཾ ནིཡོཛནཏོ།

    Yaṃpana phusatoti yaṃ pana sevitabbaṃ phoṭṭhabbaṃ anipphannasseva phusato. Āsavakkhayo ceva hoti jāgariyānuyogassa matthakappattito. Vīriyañca supaggahitaṃ hoti catutthassa ariyavaṃsassa ukkaṃsanato. Pacchimā ca…pe… anuggahitā hoti sammāpaṭipattiyaṃ niyojanato.

    ཡེ མནོཝིཉྙེཡྻེ དྷམྨེ ཨིཊྛཱདིབྷེདེ སམནྣཱཧརནྟསྶ ཨཱཝཛྫནྟསྶ ཨཱཔཱཐཾ ཨཱགཙྪནྟི། ‘‘མནོཝིཉྙེཡྻཱ དྷམྨཱ’’ཏི ཝིབྷཏྟི ཝིཔརིཎཱམེཏབྦཱ, མེཏྟཱདིཝསེན སམནྣཱཧརནྟསྶ ཡེ མནོཝིཉྙེཡྻཱ དྷམྨཱ ཨཱཔཱཐཾ ཨཱགཙྪནྟི, ཨེཝརཱུཔཱ སེཝིཏབྦཱཏི ཡོཛནཱ། ཨཱདི-སདྡེན ཀརུཎཱདཱིནཉྩེཝ ཨནིཙྩཱདཱིནཉྩ སངྒཧོ དཊྛབྦོ། ཏིཎྞཾ ཐེརཱནཾ དྷམྨཱཏི ཨིདཱནི ཝུཙྩམཱནཔཊིཔཏྟཱིནཾ ཏིཎྞཾ ཐེརཱནཾ མནོཝིཉྙེཡྻཱ དྷམྨཱ། བཧི དྷཱཝིཏུཾ ན ཨདཱསིནྟི ཨནྟོཔརིཝེཎཾ ཨཱགཏམེཝ རཱུཔཱདིཾ ཨཱརབྦྷ ཨིམསྨིཾ ཏེམཱསེ ཀམྨཊྛཱནཝིནིམུཏྟཾ ཙིཏྟཾ ཀདཱཙི ཨུཔྤནྣཔུབྦཾ, ཨནྟོཔརིཝེཎེ ཙ ཝིསབྷཱགརཱུཔཱདཱིནཾ ཨསམྦྷཝོ ཨེཝ, ཏསྨཱ ཝིསཊཝིཏཀྐཝསེན ཙིཏྟཾ བཧི དྷཱཝིཏུཾ ན ཨདཱསིནྟི དསྶེཏི། ནིཝཱསགེཧཏོ ནིཝཱསནགབྦྷཏོ། ནིཡཀཛ྄ཛྷཏྟཁནྡྷཔཉྩཀཏོ ཝིཔསྶནཱགོཙརཏོ། ཐེརོ ཀིར སབྦམྤི ཨཏྟནཱ ཀཱཏབྦཀིརིཡཾ ཀམྨཊྛཱནསཱིསེནེཝ པཊིཔཛྫཏི།

    Ye manoviññeyye dhamme iṭṭhādibhede samannāharantassa āvajjantassa āpāthaṃ āgacchanti. ‘‘Manoviññeyyā dhammā’’ti vibhatti vipariṇāmetabbā, mettādivasena samannāharantassa ye manoviññeyyā dhammā āpāthaṃ āgacchanti, evarūpā sevitabbāti yojanā. Ādi-saddena karuṇādīnañceva aniccādīnañca saṅgaho daṭṭhabbo. Tiṇṇaṃ therānaṃ dhammāti idāni vuccamānapaṭipattīnaṃ tiṇṇaṃ therānaṃ manoviññeyyā dhammā. Bahi dhāvituṃ na adāsinti antopariveṇaṃ āgatameva rūpādiṃ ārabbha imasmiṃ temāse kammaṭṭhānavinimuttaṃ cittaṃ kadāci uppannapubbaṃ, antopariveṇe ca visabhāgarūpādīnaṃ asambhavo eva, tasmā visaṭavitakkavasena cittaṃ bahi dhāvituṃ na adāsinti dasseti. Nivāsagehato nivāsanagabbhato. Niyakajjhattakhandhapañcakato vipassanāgocarato. Thero kira sabbampi attanā kātabbakiriyaṃ kammaṭṭhānasīseneva paṭipajjati.

    ༣༦༦. ཨསམྨོཧསམྤཛཉྙཝསེན ཨདྭེཛ྄ཛྷཱབྷཱཝཏོ ཨེཀོ ཨནྟོ ཨེཏསྶཱཏི ཨེཀནྟོ, ཨེཀནྟོ ཝཱདོ ཨེཏེསནྟི ཨེཀནྟཝཱདཱ། ཏེནཱཧ ‘‘ཨེཀཾཡེཝ ཝདནྟཱི’’ཏི, ཨབྷིནྣཝཱདཱཏི ཨཏྠོ། ཨེཀཱཙཱརཱཏི སམཱནཱཙཱརཱ། ཨེཀལདྡྷིཀཱཏི སམཱནལདྡྷིཀཱ། ཨེཀཔརིཡོསཱནཱཏི སམཱནནིཊྛཱནཱ།

    366. Asammohasampajaññavasena advejjhābhāvato eko anto etassāti ekanto, ekanto vādo etesanti ekantavādā. Tenāha ‘‘ekaṃyeva vadantī’’ti, abhinnavādāti attho. Ekācārāti samānācārā. Ekaladdhikāti samānaladdhikā. Ekapariyosānāti samānaniṭṭhānā.

    ཨིཏི སཀྐོ པུབྦེ ཨཏྟནཱ སུཏཾ པུཐུསམཎབྲཱཧྨཎཱནཾ ནཱནཱཝཱདཱ ཙཱརལདྡྷིནིཊྛཱནཾ ཨིདཱནི སཙྩཔཊིཝེདྷེན ཨསཱརཏོ ཉཏྭཱ ཋིཏོ, ཏསྶ ཀཱརཎཾ ཉཱཏུཀཱམོ ཏམེཝ ཏཱཝ བྱཏིརེཀམུཁེན པུཙྪཏི ‘‘སབྦེཝ དྷམྨཱ ནུ ཁོ’’ཏིཨཱདིནཱ།

    Iti sakko pubbe attanā sutaṃ puthusamaṇabrāhmaṇānaṃ nānāvādā cāraladdhiniṭṭhānaṃ idāni saccapaṭivedhena asārato ñatvā ṭhito, tassa kāraṇaṃ ñātukāmo tameva tāva byatirekamukhena pucchati ‘‘sabbeva dhammā nu kho’’tiādinā.

    དྷཱཏཱུཏི ཨཛ྄ཛྷཱསཡདྷཱཏུ ཨུཏྟརཔདལོཔེན ཝུཏྟཱ, ཨཛ྄ཛྷཱསཡདྷཱཏཱུཏི ཙ ཨཏྠཏོ ཨཛ྄ཛྷཱསཡོ ཨེཝཱཏི ཨཱཧ ‘‘ཨནེཀཛ྄ཛྷཱསཡོ ནཱནཛ྄ཛྷཱསཡོ’’ཏི། ‘‘ཨེཀསྨིཾ གནྟུཀཱམེ ཨེཀོ ཋཱཏུཀཱམོ ཧོཏཱི’’ཏི ཨིདཾ ནིདསྶནཝསེན ཝུཏྟཾ ཨིརིཡཱཔཐེཔི ནཱམ སཏྟཱ ཨེཀཛ྄ཛྷཱསཡཱ དུལླབྷཱ, པགེཝ ལདྡྷཱིསཱུཏི དསྶནཏྠཾ། ཡཾ ཡདེཝ ཨཛ྄ཛྷཱསཡནྟི ཡཾ ཡམེཝ སསྶཏཱདིཨཛ྄ཛྷཱསཡཾ། ཨབྷིནིཝིསནྟཱིཏི ཏཾ ཏཾ ལདྡྷིཾ དིཊྛཱབྷིནིཝེསཝསེན ཨབྷིམུཁཱ ཧུཏྭཱ དུཔྤཊིནིསྶགྒིབྷཱཝེན ནིཝིསནྟི, ཨཱདཱནགྒཱཧཾ གཎྷནྟི། ཐཱམེན ཙ པརཱམཱསེན ཙཱཏི དིཊྛིཐཱམེན ཙ དིཊྛིཔརཱམཱསེན ཙ། སུཊྛུ གཎྷིཏྭཱཏི ཨཏིཝིཡ དལ༹ྷགྒཱཧཾ གཎྷིཏྭཱ། ཝོཧརནྟཱིཏི ཡཐཱབྷིནིཝིཊྛཾ དིཊྛིཝཱདཾ པཉྙཱཔེནྟི པརེ ཧི གཱཧེནྟི པཏིཊྛཔེནྟི། ཏེནཱཧ ‘‘ཀཐེནྟི དཱིཔེནྟི ཀིཏྟེནྟཱི’’ཏི, ཨུགྒྷོསེནྟཱིཏི ཨཏྠོ།

    Dhātūti ajjhāsayadhātu uttarapadalopena vuttā, ajjhāsayadhātūti ca atthato ajjhāsayo evāti āha ‘‘anekajjhāsayo nānajjhāsayo’’ti. ‘‘Ekasmiṃ gantukāme eko ṭhātukāmo hotī’’ti idaṃ nidassanavasena vuttaṃ iriyāpathepi nāma sattā ekajjhāsayā dullabhā, pageva laddhīsūti dassanatthaṃ. Yaṃ yadeva ajjhāsayanti yaṃ yameva sassatādiajjhāsayaṃ. Abhinivisantīti taṃ taṃ laddhiṃ diṭṭhābhinivesavasena abhimukhā hutvā duppaṭinissaggibhāvena nivisanti, ādānaggāhaṃ gaṇhanti. Thāmena ca parāmāsena cāti diṭṭhithāmena ca diṭṭhiparāmāsena ca. Suṭṭhu gaṇhitvāti ativiya daḷhaggāhaṃ gaṇhitvā. Voharantīti yathābhiniviṭṭhaṃ diṭṭhivādaṃ paññāpenti pare hi gāhenti patiṭṭhapenti. Tenāha ‘‘kathenti dīpenti kittentī’’ti, ugghosentīti attho.

    ཨནྟཾ ཨཏཱིཏཱ ཨཙྩནྟཱ, ཨཙྩནྟཱ ནིཊྛཱ ཨེཏེསནྟི ཨཙྩནྟནིཊྛཱ། སབྦེསནྟི སབྦེསཾ སམཎབྲཱཧྨཎཱནཾ། ཡོགཀྑེམོཏིཔི ནིབྦཱནཾ ཙཏཱུཧིཔི ཡོགེཧི ཨནུཔྤདུཊྛཏྟཱ། ‘‘ཨཙྩནྟཡོགཀྑེམཱ’’ཏི ཝཏྟབྦེ ཨི-ཀཱརེན ནིདྡེསེན ‘‘ཨཙྩནྟཡོགཀྑེམཱི’’ཏི ཝུཏྟཾ, ཨཙྩནྟཡོགཀྑེམོ ཝཱ ཨེཏེསཾ ཨཏྠཱིཏི ཨཙྩནྟཡོགཀྑེམཱིཏི། ཙརནྟི ཨུཔགཙྪནྟི, ཨདྷིགཙྪནྟཱིཏི ཨཏྠོ། པརིཡསྶཏི པརིཀྑིསྶཏི ཝཊྚདུཀྑནྟཾ ཨཱགམྨཱཏི པརིཡོསཱནནྟིཔི ནིབྦཱནསྶ ནཱམཾ།

    Antaṃ atītā accantā, accantā niṭṭhā etesanti accantaniṭṭhā. Sabbesanti sabbesaṃ samaṇabrāhmaṇānaṃ. Yogakkhemotipi nibbānaṃ catūhipi yogehi anuppaduṭṭhattā. ‘‘Accantayogakkhemā’’ti vattabbe i-kārena niddesena ‘‘accantayogakkhemī’’ti vuttaṃ, accantayogakkhemo vā etesaṃ atthīti accantayogakkhemīti. Caranti upagacchanti, adhigacchantīti attho. Pariyassati parikkhissati vaṭṭadukkhantaṃ āgammāti pariyosānantipi nibbānassa nāmaṃ.

    སངྑིཎཱཏཱིཏི སམུཙྪིནྡནེན ཁེཔེཏི། ཝིནཱསེཏཱིཏི ཏཏོ ཨེཝ སབྦསོ ཨདསྶནཾ པཱཔེཏི། ཝིམུཏྟཱཏི ཝཊྚདུཀྑཏོ ཨཙྩནྟནིགྒམེན ཝིསེསེན མུཏྟཱ།

    Saṅkhiṇātīti samucchindanena khepeti. Vināsetīti tato eva sabbaso adassanaṃ pāpeti. Vimuttāti vaṭṭadukkhato accantaniggamena visesena muttā.

    ‘‘ཨིསྶཱམཙྪརིཡཾ ཨེཀོ པཉྷོ’’ཏི ཀསྨཱ ཝུཏྟཾ, ནནུ ཨིསྶཱམཙྪརིཡཾ ཝིསྶཛྫནནྟི? སཙྩམེཏཾ, ཡོ པན ཉཱཏུཾ ཨིཙྪིཏོ ཨཏྠོ, སོ པཉྷོ། སོ ཨེཝ ཙ ཝིསྶཛྫཱིཡཏཱིཏི ནཱཡཾ དོསོ, ཨཉྙཐཱ ཨམྦཾ པུཊྛསྶ ལབུཛཾ བྱཱཀརཎཾ ཝིཡ སིཡཱ, ཨེཝཾ པཉྷསཱིསེན པཉྷབྱཱཀརཎཾ ཝདཏི། ཏཐཱ ཧི ‘‘པིཡཱཔྤིཡ’’ནྟིཨཱདིནཱ ཝིསྶཛྫནཔདཱནེཝ གཧིཏཱནི, ‘‘པིཡཱཔྤིཡཾ ཨེཀོ’’ཏིཨཱདཱིསུཔི ཨེསེཝ ནཡོ། པཔཉྩསཉྙཱཏི སཉྙཱསཱིསེན པཔཉྩཱ ཨེཝ ཝུཏྟཱཏི ཨཱཧ ‘‘པཔཉྩོ ཨེཀོ’’ཏི། ཨེཏྠ ཙ ཡཐཱ པཱཏིམོཀྑསཾཝརཔུཙྪཱ ཀཱཡསམཱཙཱརཱདིཝིབྷཱགེན ཝིསྶཛྫིཏཏྟཱ ཏཡོ པཉྷཱ ཛཱཏཱ, ཨེཝཾ ཨིནྡྲིཡསཾཝརཔུཙྪཱ རཱུཔཱདིཝིབྷཱགེན ཝིསྶཛྫིཏཏྟཱ ཚ པཉྷཱ སིཡུཾ། ཏཐཱ སཏི ཨེཀཱུནཝཱིསཏི པུཙྪཱ སིཡུཾ, ཨཐ ཨིནྡྲིཡསཾཝརཏཱསཱམཉྙེན ཨེཀོཝ པཉྷོ ཀཏོ, ཨེཝཾ སཏི པཱཏིམོཀྑསཾཝརཔུཙྪཱབྷཱཝསཱམཉྙེན ཏེཔི ཏཡོ ཨེཀོཝ པཉྷོཏི སབྦེཝ དྭཱདསེཝ པཉྷཱ བྷཝེཡྻུནྟི? ནཡིདམེཝཾ། ཡསྨཱ ཀཱཡསམཱཙཱརཱདཱིསུ ཝིབྷཛྫ ཝུཙྩམཱནེསུ མཧཱཝིསཡཏཱཡ ཨཔརིམཱཎོ ཝིབྷཱགོ སམྦྷཝཏི ཝིསྶཛྫེཏུཾ། སཀལམྤི ཝིནཡཔིཊཀཾ ཏསྶ ནིདྡེསོ། རཱུཔཱདཱིསུ པན ཝིབྷཛྫ ཝུཙྩམཱནེསུ ཨཔྤཝིསཡཏཱཡ ན ཏཱདིསོ ཝིབྷཱགོ སམྦྷཝཏི ཝིསྶཛྫེཏུཾ། ཨིཏི མཧཱཝིསཡཏཱཡ པཱཏིམོཀྑསཾཝརཔུཙྪཱ ཏཡོ པཉྷཱ ཀཏཱ, ཨིནྡྲིཡསཾཝརཔུཙྪཱ པན ཨཔྤཝིསཡཏཱཡ ཨེཀོཝ པཉྷོ ཀཏོ། ཏེན ཝུཏྟཾ ‘‘ཙུདྡས མཧཱཔཉྷཱ’’ཏི།

    ‘‘Issāmacchariyaṃ eko pañho’’ti kasmā vuttaṃ, nanu issāmacchariyaṃ vissajjananti? Saccametaṃ, yo pana ñātuṃ icchito attho, so pañho. So eva ca vissajjīyatīti nāyaṃ doso, aññathā ambaṃ puṭṭhassa labujaṃ byākaraṇaṃ viya siyā, evaṃ pañhasīsena pañhabyākaraṇaṃ vadati. Tathā hi ‘‘piyāppiya’’ntiādinā vissajjanapadāneva gahitāni, ‘‘piyāppiyaṃ eko’’tiādīsupi eseva nayo. Papañcasaññāti saññāsīsena papañcā eva vuttāti āha ‘‘papañco eko’’ti. Ettha ca yathā pātimokkhasaṃvarapucchā kāyasamācārādivibhāgena vissajjitattā tayo pañhā jātā, evaṃ indriyasaṃvarapucchā rūpādivibhāgena vissajjitattā cha pañhā siyuṃ. Tathā sati ekūnavīsati pucchā siyuṃ, atha indriyasaṃvaratāsāmaññena ekova pañho kato, evaṃ sati pātimokkhasaṃvarapucchābhāvasāmaññena tepi tayo ekova pañhoti sabbeva dvādaseva pañhā bhaveyyunti? Nayidamevaṃ. Yasmā kāyasamācārādīsu vibhajja vuccamānesu mahāvisayatāya aparimāṇo vibhāgo sambhavati vissajjetuṃ. Sakalampi vinayapiṭakaṃ tassa niddeso. Rūpādīsu pana vibhajja vuccamānesu appavisayatāya na tādiso vibhāgo sambhavati vissajjetuṃ. Iti mahāvisayatāya pātimokkhasaṃvarapucchā tayo pañhā katā, indriyasaṃvarapucchā pana appavisayatāya ekova pañho kato. Tena vuttaṃ ‘‘cuddasa mahāpañhā’’ti.

    ༣༦༧. ཙལནཊྛེནཱཏི ཀམྤནཊྛེན། ཏཎྷཱ ཧི ཀཱམརཱགརཱུཔརཱགཨརཱུཔརཱགཱདིཝསེན པཝཏྟིཡཱ ཨནཝཊྛིཏཏཱཡ སཡམྤི ཙལཏི, ཡཏྠ ཨུཔྤནྣཱ, ཏམྤི སནྟཱནཾ བྷཝཱདཱིསུ པརིཀཌྜྷནེན ཙཱལེཏི, ཏསྨཱ ཙལནཊྛེན ཏཎྷཱ ཨེཛཱ ནཱམ། པཱིལ༹ནཊྛེནཱཏི ཝིབཱདྷནཊྛེན ཏསྶ ཏསྶ དུཀྑསྶ ཧེཏུབྷཱཝེན། པདུསྶནཊྛེནཱཏི ཨདྷམྨརཱགཱདིབྷཱཝེན, སམྨུཁཔརཾམུཁེན, ཀིལེསཱསུཙིཔགྒྷརཎེན ཙ པཀཱརཏོ དུསྶནཊྛེན གཎྜོ། ཨནུཔྤཝིཊྛཊྛེནཱཏི ཨཱསཡསྶ དུནྣཱིཧརཎཱིཡབྷཱཝེན ཨནུཔྤཝིསནཊྛེན། ཀཌྜྷཏི ཨཏྟནོ ཙ རུཙིཡཱ ཨུཔནེཏི། ཨུཙྩཱཝཙནྟི པཎཱིཏབྷཱཝཾ, ནིཧཱིནབྷཱཝཉྩ། ཡེསུ སམཎབྲཱཧྨཎེསུ། ‘‘ཡེསཱཧ’’ནྟིཔི པཱལི༹, ཏསྶཱ ཀེཙི ‘‘ཡེསཾ ཨཧ’’ནྟི ཨཏྠཾ ཝདནྟི། ཨེཝནྟི སུཏཱནུརཱུཔཾ, ཨུགྒཧཱནུརཱུཔཉྩ། ‘‘ཨཧཾ ཁོ པན བྷནྟེ ཨཉྙེསཾ སམཎབྲཱཧྨཎཱནཾ དྷམྨཱཙརིཡོ ཧོནྟོཔི བྷགཝཏོ སཱཝཀོ…པེ॰… སམྦོདྷིཔརཱཡཎོ’’ཏི ཨེཝཾ ཨཏྟནོ སོཏཱཔནྣབྷཱཝཾ ཛཱནཱཔེཏི།

    367.Calanaṭṭhenāti kampanaṭṭhena. Taṇhā hi kāmarāgarūparāgaarūparāgādivasena pavattiyā anavaṭṭhitatāya sayampi calati, yattha uppannā, tampi santānaṃ bhavādīsu parikaḍḍhanena cāleti, tasmā calanaṭṭhena taṇhā ejā nāma. Pīḷanaṭṭhenāti vibādhanaṭṭhena tassa tassa dukkhassa hetubhāvena. Padussanaṭṭhenāti adhammarāgādibhāvena, sammukhaparaṃmukhena, kilesāsucipaggharaṇena ca pakārato dussanaṭṭhena gaṇḍo. Anuppaviṭṭhaṭṭhenāti āsayassa dunnīharaṇīyabhāvena anuppavisanaṭṭhena. Kaḍḍhati attano ca ruciyā upaneti. Uccāvacanti paṇītabhāvaṃ, nihīnabhāvañca. Yesu samaṇabrāhmaṇesu. ‘‘Yesāha’’ntipi pāḷi, tassā keci ‘‘yesaṃ aha’’nti atthaṃ vadanti. Evanti sutānurūpaṃ, uggahānurūpañca. ‘‘Ahaṃ kho pana bhante aññesaṃ samaṇabrāhmaṇānaṃ dhammācariyo hontopi bhagavato sāvako…pe… sambodhiparāyaṇo’’ti evaṃ attano sotāpannabhāvaṃ jānāpeti.

    སོམནསྶཔཊིལཱབྷཀཐཱཝཎྞནཱ

    Somanassapaṭilābhakathāvaṇṇanā

    ༣༦༨. སམཱཔནྣོཏི སམོགཱལ༹ྷོ པཝཏྟསམྤཧཱརོ ཝིཡཱཏིབྱཱུལ༹ྷོ། ཛིནིཾསཱུཏི ཡཐཱ ཨསུརཱ པུན སཱིསཾ ཨུཀྑིཔིཏུཾ ནཱསཀྑིཾསུ, ཨེཝཾ དེཝཱ ཝིཛིནིཾསུཡེཝཱཏི དསྶེནྟོ ཨཱཧ ‘‘དེཝཱ པུན ཨཔཙྩཱགམནཱཡ ཨསུརེ ཛིནིཾསཱུ’’ཏི། ཏཱདིསོ ཧིསྶ ཛཡོ སཱཏིསཡཾ ཝེདཔཊིལཱབྷཱཡ ཨཧོསི། དུཝིདྷམྤི ཨོཛནྟི དིབྦཾ, ཨསུརཾ ཙཱཏི དྭིཔྤཀཱརམྤི ཨོཛཾ། དེཝཱཡེཝ པརིབྷུཉྫིསྶནྟི ཨསུརཱནཾ པཝེསཱབྷཱཝཏོ། དཎྜསྶ ཨཝཙརཎཾ ཨཱཝརཎཾ དཎྜཱཝཙརོ, སཧ དཎྜཱཝཙརེནཱཏི སདཎྜཱཝཙརོ, དཎྜེན པཧརིཏྭཱ ཝཱ ཨཱཝརིཏྭཱ ཝཱ སཱདྷེཏབྦནྟི ཨཏྠོ།

    368.Samāpannoti samogāḷho pavattasampahāro viyātibyūḷho. Jiniṃsūti yathā asurā puna sīsaṃ ukkhipituṃ nāsakkhiṃsu, evaṃ devā vijiniṃsuyevāti dassento āha ‘‘devā puna apaccāgamanāya asure jiniṃsū’’ti. Tādiso hissa jayo sātisayaṃ vedapaṭilābhāya ahosi. Duvidhampiojanti dibbaṃ, asuraṃ cāti dvippakārampi ojaṃ. Devāyeva paribhuñjissanti asurānaṃ pavesābhāvato. Daṇḍassa avacaraṇaṃ āvaraṇaṃ daṇḍāvacaro, saha daṇḍāvacarenāti sadaṇḍāvacaro, daṇḍena paharitvā vā āvaritvā vā sādhetabbanti attho.

    ༣༦༩. ཨིམསྨིཾཡེཝ ཨོཀཱསེཏི ཨིམིསྶམེཝ ཨིནྡསཱལགུཧཱཡཾ། དེཝབྷཱུཏསྶ མེཏི པུབྦེཔི དེཝབྷཱུཏསྶ སཀྐསྶེཝ མེ བྷཱུཏསྶ། སཏོཏི ཨིདཱནིཔི སཀྐསྶེཝ སཏོ པུནརཱཡུ ཙ མེ ལདྡྷོ།

    369.Imasmiṃyevaokāseti imissameva indasālaguhāyaṃ. Devabhūtassa meti pubbepi devabhūtassa sakkasseva me bhūtassa. Satoti idānipi sakkasseva sato punarāyu ca me laddho.

    དིཝིཡཱ ཀཱཡཱཏི དིབྦཱ, ཁནྡྷཔཉྩཀསངྑཱཏཱ ཀཱཡཱཏི ཨཱཧ ‘‘དིབྦཱ ཨཏྟབྷཱཝཱ’’ཏི། ‘‘ཨམཱུལ༹ྷོ གབྦྷཾ ཨེསྶཱམཱི’’ཏི ཨིམིནཱ ཨརིཡསཱཝཀཱནཾ ཨནྡྷཔུཐུཛྫནཱནཾ ཝིཡ སམྨོཧམརཎཾ, ཨསམྤཛཱནགབྦྷོཀྐམནཉྩ ནཏྠི, ཨཐ ཁོ ཨསམྨོཧམརཎཉྩེཝ སམྤཛཱནགབྦྷོཀྐམནཉྩ ཧོཏཱིཏི དསྶེཏི། ཨརིཡསཱཝཀཱ ནིཡཏགཏིཀཏྟཱ སུགཏཱིསུ ཨེཝ ཨུཔྤཛྫནྟི, ཏཏྠཱཔི མནུསྶེསུ ཨུཔྤཛྫནྟཱ ཨུལཱ༹རེསུ ཨེཝ ཀུལེསུ པཊིསནྡྷིཾ གཎྷིསྶནྟི, སཀྐསྶཱཔི ཏཱདིསོ ཨཛ྄ཛྷཱསཡོ། ཏེན ཝུཏྟཾ པཱལི༹ཡཾ ‘‘ཡཏྠ མེ རམཏཱི མནོ’’ཏི, ཏཾ སནྡྷཱཡཱཧ ‘‘ཡཏྠ མེ’’ཏིཨཱདི། སཀྐོ པན ཨཏྟནོ དིབྦཱནུབྷཱཝེནཱཔི ཏཱདིསཾ ཛཱནིཏུཾ སཀྐོཏིཡེཝ།

    Diviyā kāyāti dibbā, khandhapañcakasaṅkhātā kāyāti āha ‘‘dibbā attabhāvā’’ti. ‘‘Amūḷho gabbhaṃ essāmī’’ti iminā ariyasāvakānaṃ andhaputhujjanānaṃ viya sammohamaraṇaṃ, asampajānagabbhokkamanañca natthi, atha kho asammohamaraṇañceva sampajānagabbhokkamanañca hotīti dasseti. Ariyasāvakā niyatagatikattā sugatīsu eva uppajjanti, tatthāpi manussesu uppajjantā uḷāresu eva kulesu paṭisandhiṃ gaṇhissanti, sakkassāpi tādiso ajjhāsayo. Tena vuttaṃ pāḷiyaṃ ‘‘yattha me ramatī mano’’ti, taṃ sandhāyāha ‘‘yattha me’’tiādi. Sakko pana attano dibbānubhāvenāpi tādisaṃ jānituṃ sakkotiyeva.

    ཀཱརཎེནཱཏི ཡུཏྟེན ཨརིཡསཱཝཀབྷཱཝསྶ ཨནུཙྪཝིཀེན། ཏེནཱཧ ‘‘སམེནཱ’’ཏི།

    Kāraṇenāti yuttena ariyasāvakabhāvassa anucchavikena. Tenāha ‘‘samenā’’ti.

    སཀདཱགཱམིམགྒཾ སནྡྷཱཡ ཝདཏི ཚཊྛེ ཨཏྠཝསེ ཨནཱགཱམིམགྒསྶ ཝཀྑམཱནཏྟཱ། ཨཱཛཱནིཏུཀཱམོཏི ཨཔྤཏྟཾ ཝིསེསཾ པཊིཝིཛ྄ཛྷིཏུཀཱམོ། མནུསྶལོཀེ ཨནྟོ བྷཝིསྶཏི པུན མཱནུསྶཱུཔཔཏྟིཡཱ ཨབྷཱཝཏོ།

    Sakadāgāmimaggaṃ sandhāya vadati chaṭṭhe atthavase anāgāmimaggassa vakkhamānattā. Ājānitukāmoti appattaṃ visesaṃ paṭivijjhitukāmo. Manussaloke anto bhavissati puna mānussūpapattiyā abhāvato.

    པུནདེཝཱཏི མནུསྶེསུ ཨུཔྤནྣོ ཏཏོ ཙཝིཏྭཱ པུནདེཝ ། ཨིམསྨིཾ ཏཱཝཏིཾསདེཝལོཀསྨིཾ། ཨུཏྟམོ, ཀཱིདིསོཏི ཨཱཧ ‘‘སཀྐོ’’ཏིཨཱདི།

    Punadevāti manussesu uppanno tato cavitvā punadeva . Imasmiṃ tāvatiṃsadevalokasmiṃ. Uttamo, kīdisoti āha ‘‘sakko’’tiādi.

    ཨནྟིམེ བྷཝེཏི མམ སབྦབྷཝེསུ ཨནྟིམེ སབྦཔརིཡོསཱནེ བྷཝེ། ‘‘ཨཱཡུནཱ’’ཏི ཨིམིནཱ ཙ ཏཾསཧབྷཱཝིནོ སབྦེཔི ཝཎྞཱདིཀེ སངྒཎྷཱཏི། ‘‘པཉྙཱཡཱ’’ཏི ཙ ཨིམིནཱ སབྦེཔི སདྡྷཱསཏིཝཱིརིཡཱདིཀེ། ཏསྨིཾ ཨཏྟབྷཱཝེཏི ཏསྨིཾ སབྦནྟིམེ སཀྐཏྟབྷཱཝེ། ཨཀནིཊྛགཱམཱི ཧུཏྭཱཏི ཨནྟརཱཡཔརིནིབྦཱཡིཨཱདིབྷཱཝཾ ཨནུཔགནྟྭཱ ཨེཀཾསཏོ ཨུདྡྷཾསོཏོ ཨཀནིཊྛགཱམཱི ཨེཝ ཧུཏྭཱ། ཏཏོ ཨེཝ ཨནུཀྐམེན ཨཝིཧཱདཱིསུ ནིབྦཏྟནྟོ། ཨེཝམཱཧཱཏི ‘‘སོ ནིཝཱསོ བྷཝིསྶཏཱི’’ཏི ཨེཝམཱཧ། ‘‘ཨཝིཧཱདཱིསུ…པེ॰… ནིབྦཏྟིསྶཏཱི’’ཏི སངྑེཔཏོ ཝུཏྟམཏྠཾ ཝིཝརིཏུཾ ‘‘ཨེས ཀིརཱ’’ཏིཨཱདི ཝུཏྟཾ། ཨཡཉྩ ནཡོ ན ཀེཝལཾ སཀྐསྶེཝ, ཨཐ ཁོ མཧཱསེཊྛིམཧཱཨུཔཱསིཀཱནམྤི ཧོཏིཡེཝཱཏི དསྶེནྟོ ‘‘སཀྐོ དེཝརཱཛཱ’’ཏིཨཱདིམཱཧ།

    Antime bhaveti mama sabbabhavesu antime sabbapariyosāne bhave. ‘‘Āyunā’’ti iminā ca taṃsahabhāvino sabbepi vaṇṇādike saṅgaṇhāti. ‘‘Paññāyā’’ti ca iminā sabbepi saddhāsativīriyādike. Tasmiṃ attabhāveti tasmiṃ sabbantime sakkattabhāve. Akaniṭṭhagāmī hutvāti antarāyaparinibbāyiādibhāvaṃ anupagantvā ekaṃsato uddhaṃsoto akaniṭṭhagāmī eva hutvā. Tato eva anukkamena avihādīsu nibbattanto. Evamāhāti ‘‘so nivāso bhavissatī’’ti evamāha. ‘‘Avihādīsu…pe… nibbattissatī’’ti saṅkhepato vuttamatthaṃ vivarituṃ ‘‘esa kirā’’tiādi vuttaṃ. Ayañca nayo na kevalaṃ sakkasseva, atha kho mahāseṭṭhimahāupāsikānampi hotiyevāti dassento ‘‘sakko devarājā’’tiādimāha.

    ༣༧༠. བྷཝསམྤཏྟིནིབྦཱནསམྤཏྟཱིནཾ ཝསེན ཨཔརིཔུཎྞཛ྄ཛྷཱསཡཏཱཡ ཨནིཊྛིཏམནོརཐོ ཏཾ ཏཾ པཏྟུཀཱམོཡེཝ ཧུཏྭཱ ཋིཏོ། ཡེ ཙ སམཎེཏི ཡེ ཙ པབྦཛིཏེ། པཝིཝིཏྟཝིཧཱརིནོཏི ‘‘ཨནེཀཝིཝེཀཏྟཡཾ པརིབྲཱུཧེཏྭཱ ཝིཧརནྟཱི’’ཏི མཉྙཱམི།

    370. Bhavasampattinibbānasampattīnaṃ vasena aparipuṇṇajjhāsayatāya aniṭṭhitamanoratho taṃ taṃ pattukāmoyeva hutvā ṭhito. Ye ca samaṇeti ye ca pabbajite. Pavivittavihārinoti ‘‘anekavivekattayaṃ paribrūhetvā viharantī’’ti maññāmi.

    སམྤཱདནཱཏི མགྒསྶ ཨུཔསམྤཱདནཾ ཏསྶ སམྤཱཔནཾ སམྨདེཝ པཱཔནཾ། ཝིརཱདྷནཱཏི ཨནཱརཱདྷནཱ ཨནུཔཱཡཔཊིཔཏྟི། ན སམྦྷོནྟཱིཏི ཨནབྷིསམྦྷུཎནྟི། ཡཐཱཔུཙྪིཏེ ཨཏྠེ ཨནབྷིསམྦྷུཎནཾ ནཱམ སམྨཱ ཀཐེཏུཾ ཨསམཏྠཏཱ ཨེཝཱཏི ཨཱཧ ‘‘སམྤཱདེཏྭཱ ཀཐེཏུཾ ན སཀྐོནྟཱི’’ཏི།

    Sampādanāti maggassa upasampādanaṃ tassa sampāpanaṃ sammadeva pāpanaṃ. Virādhanāti anārādhanā anupāyapaṭipatti. Na sambhontīti anabhisambhuṇanti. Yathāpucchite atthe anabhisambhuṇanaṃ nāma sammā kathetuṃ asamatthatā evāti āha ‘‘sampādetvā kathetuṃ na sakkontī’’ti.

    ཏསྨཱཏི ཡསྨཱ ཨཱདིཙྩེན སམཱནགོཏྟཏཱཡ། ཏེནེཝཱཧ ‘‘ཨཱདིཙྩ ནཱམ གོཏྟེནཱ’’ཏི, ཏསྨཱ ། ཨཱདིཙྩོ བནྡྷུ ཨེཏསྶཱཏི ཨཱདིཙྩབནྡྷུ, ཨཐ ཝཱ ཨཱདིཙྩསྶ བནྡྷཱུཏི ཨཱདིཙྩབནྡྷུ, བྷགཝཱ, ཏཾ ཨཱདིཙྩབནྡྷུནཾ། ཨཱདིཙྩོ ཧི སོཏཱཔནྣཏཱཡ བྷགཝཏོ ཨོརསཔུཏྟོ། ཏེནེཝཱཧ –

    Tasmāti yasmā ādiccena samānagottatāya. Tenevāha ‘‘ādicca nāma gottenā’’ti, tasmā . Ādicco bandhu etassāti ādiccabandhu, atha vā ādiccassa bandhūti ādiccabandhu, bhagavā, taṃ ādiccabandhunaṃ. Ādicco hi sotāpannatāya bhagavato orasaputto. Tenevāha –

    ‘‘ཡོ ཨནྡྷཀཱརེ ཏམསི པབྷངྐརོ,

    ‘‘Yo andhakāre tamasi pabhaṅkaro,

    ཝེརོཙནོ མཎྜལཱི ཨུགྒཏེཛོ།

    Verocano maṇḍalī uggatejo;

    མཱ རཱཧུ གིལཱི ཙརཾ ཨནྟལིཀྑེ,

    Mā rāhu gilī caraṃ antalikkhe,

    པཛཾ མམཾ རཱཧུ པམུཉྩ སཱུརིཡ’’ནྟི༎ (སཾ॰ ནི॰ ༡.༩༡)།

    Pajaṃ mamaṃ rāhu pamuñca sūriya’’nti. (saṃ. ni. 1.91);

    སཱམནྟི སཱམཾཔཡོགཾ, སཏྠུ པན སཱཝཀསྶ སཱམཾཔཡོགོ ནཱམ སནིཔཱཏོ ཨེཝཱཏི ཨཱཧ ‘‘ནམཀྐཱརཾ ཀརོམཱ’’ཏི།

    Sāmanti sāmaṃpayogaṃ, satthu pana sāvakassa sāmaṃpayogo nāma sanipāto evāti āha ‘‘namakkāraṃ karomā’’ti.

    ༣༧༡. པརཱམསིཏྭཱཏི ‘‘ཨིམཱཡ ནཱམ པཐཝིཡཾ ནིསིནྣེན མཡཱ ཨཡཾ ཨཙྪརིཡདྷམྨོ ཨདྷིགཏོ’’ཏི སོམནསྶཛཱཏོ, ‘‘ཨིམཱཡ ནཱམ པཐཝིཡཾ ཨེཝཾ ཨཙྪརིཡབྦྷུཏཾ བུདྡྷརཏནཾ ཨུཔྤནྣ’’ནྟི ཨཙྪརིཡབྦྷུཏཙིཏྟཛཱཏོ ཙ པཐཝིཾ པརཱམསིཏྭཱ། པཏྠིཏཔཉྷཱཏི དཱིགྷརཏྟཱནུསཡིཏསཾསཡསམུགྒྷཱཏཏྠཾ ‘‘ཀདཱ ནུ ཁོ བྷགཝནྟཾ པུཙྪིཏུཾ ལབྷཱམཱི’’ཏི ཨེཝཾ ཨབྷིཔཏྠིཏཔཉྷཱ། ཡཾ པནེཏྠ ཨཏྠཏོ ན ཝིབྷཏྟཾ, ཏཾ སུཝིཉྙེཡྻམེཝཱཏི།

    371.Parāmasitvāti ‘‘imāya nāma pathaviyaṃ nisinnena mayā ayaṃ acchariyadhammo adhigato’’ti somanassajāto, ‘‘imāya nāma pathaviyaṃ evaṃ acchariyabbhutaṃ buddharatanaṃ uppanna’’nti acchariyabbhutacittajāto ca pathaviṃ parāmasitvā. Patthitapañhāti dīgharattānusayitasaṃsayasamugghātatthaṃ ‘‘kadā nu kho bhagavantaṃ pucchituṃ labhāmī’’ti evaṃ abhipatthitapañhā. Yaṃ panettha atthato na vibhattaṃ, taṃ suviññeyyamevāti.

    སཀྐཔཉྷསུཏྟཝཎྞནཱཡ ལཱིནཏྠཔྤཀཱསནཱ།

    Sakkapañhasuttavaṇṇanāya līnatthappakāsanā.




    Next: ༩. མཧཱསཏིཔཊྛཱནསུཏྟཝཎྞནཱ • 9. Mahāsatipaṭṭhānasuttavaṇṇanā




    Related texts:



    ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / དཱིགྷནིཀཱཡ • Dīghanikāya / ༨. སཀྐཔཉྷསུཏྟཾ • 8. Sakkapañhasuttaṃ

    ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༨. སཀྐཔཉྷསུཏྟཝཎྞནཱ • 8. Sakkapañhasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact