Library / Tipiṭaka / តិបិដក • Tipiṭaka / ឥតិវុត្តកបាឡិ • Itivuttakapāḷi

    ២. សក្ការសុត្តំ

    2. Sakkārasuttaṃ

    ៨១. វុត្តញ្ហេតំ ភគវតា, វុត្តមរហតាតិ មេ សុតំ –

    81. Vuttañhetaṃ bhagavatā, vuttamarahatāti me sutaṃ –

    ‘‘ទិដ្ឋា មយា, ភិក្ខវេ, សត្តា សក្ការេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។

    ‘‘Diṭṭhā mayā, bhikkhave, sattā sakkārena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.

    ‘‘ទិដ្ឋា មយា, ភិក្ខវេ, សត្តា អសក្ការេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។

    ‘‘Diṭṭhā mayā, bhikkhave, sattā asakkārena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.

    ‘‘ទិដ្ឋា មយា, ភិក្ខវេ, សត្តា សក្ការេន ច អសក្ការេន ច តទុភយេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។

    ‘‘Diṭṭhā mayā, bhikkhave, sattā sakkārena ca asakkārena ca tadubhayena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.

    ‘‘តំ ខោ បនាហំ, ភិក្ខវេ, នាញ្ញស្ស សមណស្ស វា ព្រាហ្មណស្ស វា សុត្វា វទាមិ; ( ) 1 អបិ ច, ភិក្ខវេ, យទេវ មេ សាមំ ញាតំ សាមំ ទិដ្ឋំ សាមំ វិទិតំ តមេវាហំ វទាមិ។

    ‘‘Taṃ kho panāhaṃ, bhikkhave, nāññassa samaṇassa vā brāhmaṇassa vā sutvā vadāmi; ( ) 2 api ca, bhikkhave, yadeva me sāmaṃ ñātaṃ sāmaṃ diṭṭhaṃ sāmaṃ viditaṃ tamevāhaṃ vadāmi.

    ‘‘ទិដ្ឋា មយា, ភិក្ខវេ, សត្តា សក្ការេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។

    ‘‘Diṭṭhā mayā, bhikkhave, sattā sakkārena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.

    ‘‘ទិដ្ឋា មយា, ភិក្ខវេ, សត្តា អសក្ការេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។

    ‘‘Diṭṭhā mayā, bhikkhave, sattā asakkārena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.

    ‘‘ទិដ្ឋា មយា, ភិក្ខវេ, សត្តា សក្ការេន ច អសក្ការេន ច តទុភយេន អភិភូតា, បរិយាទិន្នចិត្តា, កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា’’តិ។ ឯតមត្ថំ ភគវា អវោច។ តត្ថេតំ ឥតិ វុច្ចតិ –

    ‘‘Diṭṭhā mayā, bhikkhave, sattā sakkārena ca asakkārena ca tadubhayena abhibhūtā, pariyādinnacittā, kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā’’ti. Etamatthaṃ bhagavā avoca. Tatthetaṃ iti vuccati –

    ‘‘យស្ស សក្ករិយមានស្ស, អសក្ការេន ចូភយំ;

    ‘‘Yassa sakkariyamānassa, asakkārena cūbhayaṃ;

    សមាធិ ន វិកម្បតិ, អប្បមាទវិហារិនោ 3។

    Samādhi na vikampati, appamādavihārino 4.

    ‘‘តំ ឈាយិនំ សាតតិកំ, សុខុមំ ទិដ្ឋិវិបស្សកំ ;

    ‘‘Taṃ jhāyinaṃ sātatikaṃ, sukhumaṃ diṭṭhivipassakaṃ ;

    ឧបាទានក្ខយារាមំ, អាហុ សប្បុរិសោ ឥតី’’តិ។

    Upādānakkhayārāmaṃ, āhu sappuriso itī’’ti.

    អយម្បិ អត្ថោ វុត្តោ ភគវតា, ឥតិ មេ សុតន្តិ។ ទុតិយំ។

    Ayampi attho vutto bhagavatā, iti me sutanti. Dutiyaṃ.




    Next: ៣. ទេវសទ្ទសុត្តំ • 3. Devasaddasuttaṃ




    Footnotes:
    1. (ទិដ្ឋា មយា ភិក្ខវេ សត្តា សក្ការេន អភិភូតា។ …បេ.… អសក្ការេន អភិភូតា …បេ.… សក្ការេន ច អសក្ការេន ច តទុភយេន អភិភូតា បរិយាទិន្នចិត្តា កាយស្ស ភេទា បរំ មរណា អបាយំ ទុគ្គតិំ វិនិបាតំ និរយំ ឧបបន្នា។) (ស្យា.) បុរិមវគ្គេ មិច្ឆាទិដ្ឋិកសម្មាទិដ្ឋិកសុត្តេហិ បន សមេតិ, អន្វយព្យតិរេកវាក្យានំ បន អនន្តរិតត្តា បាសំសតរា។)
    2. (diṭṭhā mayā bhikkhave sattā sakkārena abhibhūtā. …pe… asakkārena abhibhūtā …pe… sakkārena ca asakkārena ca tadubhayena abhibhūtā pariyādinnacittā kāyassa bhedā paraṃ maraṇā apāyaṃ duggatiṃ vinipātaṃ nirayaṃ upapannā.) (syā.) purimavagge micchādiṭṭhikasammādiṭṭhikasuttehi pana sameti, anvayabyatirekavākyānaṃ pana anantaritattā pāsaṃsatarā.)
    3. អប្បមាណវិហារិនោ (សី. អដ្ឋ.)
    4. appamāṇavihārino (sī. aṭṭha.)



    Related texts:



    អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ឥតិវុត្តក-អដ្ឋកថា • Itivuttaka-aṭṭhakathā / ២. សក្ការសុត្តវណ្ណនា • 2. Sakkārasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact