| Library / Tipiṭaka / তিপিটক • Tipiṭaka / ইতিৰুত্তক-অট্ঠকথা • Itivuttaka-aṭṭhakathā |
২. সক্কারসুত্তৰণ্ণনা
2. Sakkārasuttavaṇṇanā
৮১. দুতিযে সক্কারেনাতি সক্কারেন হেতুভূতেন, অথ ৰা সক্কারেনাতি সক্কারহেতুনা, সক্কারহেতুকেন ৰা। সক্কারঞ্হি নিস্সায ইধেকচ্চে পুগ্গলা পাপিচ্ছা ইচ্ছাপকতা ইচ্ছাচারে ঠত্ৰা ‘‘সক্কারং নিব্বত্তেস্সামা’’তি অনেকৰিহিতং অনেসনং অপ্পতিরূপং আপজ্জিত্ৰা ইতো চুতা অপাযেসু নিব্বত্তন্তি, অপরে যথাসক্কারং লভিত্ৰা তন্নিমিত্তং মানমদমচ্ছরিযাদিৰসেন পমাদং আপজ্জিত্ৰা ইতো চুতা অপাযেসু নিব্বত্তন্তি। যং সন্ধায ৰুত্তং – ‘‘সক্কারেন অভিভূতা পরিযাদিন্নচিত্তা’’তি। তত্থ অভিভূতাতি অজ্ঝোত্থটা। পরিযাদিন্নচিত্তাতি খেপিতচিত্তা, ইচ্ছাচারেন মানমদাদিনা চ খযং পাপিতকুসলচিত্তা। অথ ৰা পরিযাদিন্নচিত্তাতি পরিতো আদিন্নচিত্তা, ৰুত্তপ্পকারেন অকুসলকোট্ঠাসেন যথা কুসলচিত্তস্স উপ্পত্তিৰারো ন হোতি, এৰং সমন্ততো গহিতচিত্তসন্তানাতি অত্থো। অসক্কারেনাতি হীল়েত্ৰা পরিভৰিত্ৰা পরেহি অত্তনি পৰত্তিতেন অসক্কারেন হেতুনা, অসক্কারহেতুকেন ৰা মানাদিনা। সক্কারেন চ অসক্কারেন চাতি কেহিচি পৰত্তিতেন সক্কারেন কেহিচি পৰত্তিতেন অসক্কারেন চ। যে হি কেহিচি পঠমং সক্কতা হুত্ৰা তেহিযেৰ অসারভাৰং ঞত্ৰা পচ্ছা অসক্কতা হোন্তি, তাদিসে সন্ধায ৰুত্তং ‘‘সক্কারেন চ অসক্কারেন চা’’তি।
81. Dutiye sakkārenāti sakkārena hetubhūtena, atha vā sakkārenāti sakkārahetunā, sakkārahetukena vā. Sakkārañhi nissāya idhekacce puggalā pāpicchā icchāpakatā icchācāre ṭhatvā ‘‘sakkāraṃ nibbattessāmā’’ti anekavihitaṃ anesanaṃ appatirūpaṃ āpajjitvā ito cutā apāyesu nibbattanti, apare yathāsakkāraṃ labhitvā tannimittaṃ mānamadamacchariyādivasena pamādaṃ āpajjitvā ito cutā apāyesu nibbattanti. Yaṃ sandhāya vuttaṃ – ‘‘sakkārena abhibhūtā pariyādinnacittā’’ti. Tattha abhibhūtāti ajjhotthaṭā. Pariyādinnacittāti khepitacittā, icchācārena mānamadādinā ca khayaṃ pāpitakusalacittā. Atha vā pariyādinnacittāti parito ādinnacittā, vuttappakārena akusalakoṭṭhāsena yathā kusalacittassa uppattivāro na hoti, evaṃ samantato gahitacittasantānāti attho. Asakkārenāti hīḷetvā paribhavitvā parehi attani pavattitena asakkārena hetunā, asakkārahetukena vā mānādinā. Sakkārena ca asakkārena cāti kehici pavattitena sakkārena kehici pavattitena asakkārena ca. Ye hi kehici paṭhamaṃ sakkatā hutvā tehiyeva asārabhāvaṃ ñatvā pacchā asakkatā honti, tādise sandhāya vuttaṃ ‘‘sakkārena ca asakkārena cā’’ti.
এত্থ সক্কারেন অভিভূতা দেৰদত্তাদযো নিদস্সেতব্বা। ৰুত্তম্পি চেতং –
Ettha sakkārena abhibhūtā devadattādayo nidassetabbā. Vuttampi cetaṃ –
‘‘ফলং ৰে কদলিং হন্তি, ফলং ৰেল়ুং ফলং নল়ং।
‘‘Phalaṃ ve kadaliṃ hanti, phalaṃ veḷuṃ phalaṃ naḷaṃ;
সক্কারো কাপুরিসং হন্তি, গব্ভো অস্সতরিং যথা’’তি॥ (সং॰ নি॰ ১.১৮৩; অ॰ নি॰ ৪.৬৮; চূল়ৰ॰ ৩৩৫)।
Sakkāro kāpurisaṃ hanti, gabbho assatariṃ yathā’’ti. (saṃ. ni. 1.183; a. ni. 4.68; cūḷava. 335);
সাধূনং উপরি কতেন অসক্কারেন অভিভূতা দণ্ডকীরাজকালিঙ্গরাজমজ্ঝরাজাদযো নিদস্সেতব্বা। ৰুত্তম্পি চেতং –
Sādhūnaṃ upari katena asakkārena abhibhūtā daṇḍakīrājakāliṅgarājamajjharājādayo nidassetabbā. Vuttampi cetaṃ –
‘‘কিসঞ্হি ৰচ্ছং অৰকিরিয দণ্ডকী,
‘‘Kisañhi vacchaṃ avakiriya daṇḍakī,
উচ্ছিন্নমূলো সজনো সরট্ঠো।
Ucchinnamūlo sajano saraṭṭho;
কুক্কুল়নামে নিরযম্হি পচ্চতি,
Kukkuḷanāme nirayamhi paccati,
তস্স ফুলিঙ্গানি পতন্তি কাযে॥
Tassa phuliṅgāni patanti kāye.
‘‘যো সঞ্ঞতে পব্বজিতে অৰঞ্চযি,
‘‘Yo saññate pabbajite avañcayi,
ধম্মং ভণন্তে সমণে অদূসকে।
Dhammaṃ bhaṇante samaṇe adūsake;
তং নাল়িকেরং সুনখা পরত্থ,
Taṃ nāḷikeraṃ sunakhā parattha,
সঙ্গম্ম খাদন্তি ৰিফন্দমানং’’॥ (জা॰ ২.১৭.৭০-৭১)।
Saṅgamma khādanti viphandamānaṃ’’. (jā. 2.17.70-71);
‘‘উপহচ্চ মনং মজ্ঝো, মাতঙ্গস্মিং যসস্সিনে।
‘‘Upahacca manaṃ majjho, mātaṅgasmiṃ yasassine;
সপারিসজ্জো উচ্ছিন্নো, মজ্ঝারঞ্ঞং তদা অহূ’’তি॥ (জা॰ ২.১৯.৯৬)।
Sapārisajjo ucchinno, majjhāraññaṃ tadā ahū’’ti. (jā. 2.19.96);
সক্কারেন চ অসক্কারেন চ অভিভূতা অঞ্ঞতিত্থিযা নাটপুত্তাদযো নিদস্সেতব্বা।
Sakkārena ca asakkārena ca abhibhūtā aññatitthiyā nāṭaputtādayo nidassetabbā.
গাথাসু উভযন্তি উভযেন সক্কারেন চ অসক্কারেন চ। সমাধি ন ৰিকম্পতীতি ন চলতি, একগ্গভাৰেন তিট্ঠতি। কস্স পন ন চলতীতি আহ ‘‘অপ্পমাদৰিহারিনো’’তি। যো পমাদকরধম্মানং রাগাদীনং সুট্ঠু পহীনত্তা অপ্পমাদৰিহারী অরহা, তস্স। সো হি লোকধম্মেহি ন ৰিকম্পতি। সুখুমদিট্ঠিৰিপস্সকন্তি ফলসমাপত্তিঅত্থং সুখুমায দিট্ঠিযা পঞ্ঞায অভিণ্হং পৰত্তৰিপস্সনত্তা সুখুমদিট্ঠিৰিপস্সকং। উপাদানক্খযারামন্তি চতুন্নং উপাদানানং খযং পরিযোসানভূতং অরহত্তফলং আরমিতব্বং এতস্সাতি উপাদানক্খযারামং। সেসং ৰুত্তনযমেৰ।
Gāthāsu ubhayanti ubhayena sakkārena ca asakkārena ca. Samādhi na vikampatīti na calati, ekaggabhāvena tiṭṭhati. Kassa pana na calatīti āha ‘‘appamādavihārino’’ti. Yo pamādakaradhammānaṃ rāgādīnaṃ suṭṭhu pahīnattā appamādavihārī arahā, tassa. So hi lokadhammehi na vikampati. Sukhumadiṭṭhivipassakanti phalasamāpattiatthaṃ sukhumāya diṭṭhiyā paññāya abhiṇhaṃ pavattavipassanattā sukhumadiṭṭhivipassakaṃ. Upādānakkhayārāmanti catunnaṃ upādānānaṃ khayaṃ pariyosānabhūtaṃ arahattaphalaṃ āramitabbaṃ etassāti upādānakkhayārāmaṃ. Sesaṃ vuttanayameva.
দুতিযসুত্তৰণ্ণনা নিট্ঠিতা।
Dutiyasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ইতিৰুত্তকপাল়ি • Itivuttakapāḷi / ২. সক্কারসুত্তং • 2. Sakkārasuttaṃ
