| Library / Tipiṭaka / д̇ибидага • Tipiṭaka / уд̣̇аана-адтагат̇аа • Udāna-aṭṭhakathā |
4. саггаарасуд̇д̇аван̣н̣анаа
4. Sakkārasuttavaṇṇanā
14. жад̇уд̇т̇з д̇зна ко бана самаязна бхаг̇аваа саггад̇о ход̇ийд̇и габбаанам̣ сад̇асахассаад̇хигзсу жад̇уусу асан̇кязяязсу барибуурид̇асса бун̃н̃асамбхаарависзсасса палабхууд̇зна ‘‘ид̇о барам̣ маяхам̣ огаасо над̇т̇ий’’д̇и уссахаж̇аад̇зна вияа убаруубари вад̣дхамаанзна саггаараад̣̇инаа бхаг̇аваа саггад̇о ход̇и. саб̣б̣ад̣̇исаасу хи яамагамахаамзгхо вудтахид̇ваа махогхам̣ вияа саб̣б̣абаарамияо ‘‘згасмим̣ ад̇д̇абхаавз вибаагам̣ д̣̇ассаамаа’’д̇и самбин̣д̣ид̇аа вияа бхаг̇авад̇о лаабхасаггаарамахогхам̣ ниб̣б̣ад̇д̇аяим̣су. д̇ад̇о аннабаанавад̇т̇аяаанамаалааг̇анд̇хавилзбанаад̣̇ихад̇т̇аа кад̇д̇ияаб̣раахман̣аад̣̇аяо ааг̇анд̇ваа ‘‘гахам̣ б̣уд̣̇д̇хо, гахам̣ бхаг̇аваа, гахам̣ д̣̇звад̣̇зво, гахам̣ нараасабхо, гахам̣ бурисасийхо’’д̇и бхаг̇аванд̇ам̣ бариязсанд̇и. сагадасад̇зхи бажжаяз аахарид̇ваа огаасам̣ алабхамаанаа саманд̇аа г̇аавуд̇аббамаан̣зби сагадад̇хурзна сагадад̇хурам̣ аахажжа д̇идтанд̇и жзва ануб̣анд̇ханд̇и жа анд̇хагавинд̣̇аб̣раахман̣аад̣̇аяо вияа. саб̣б̣ам̣ д̇ам̣ канд̇хагз (махаава. 282) д̇зсу д̇зсу жа суд̇д̇зсу ааг̇ад̇анаязна взд̣̇ид̇аб̣б̣ам̣. яат̇аа жа бхаг̇авад̇о, звам̣ бхигкусан̇гхассаад̇и. вуд̇д̇ан̃хзд̇ам̣ –
14. Catutthe tena kho pana samayena bhagavā sakkato hotīti kappānaṃ satasahassādhikesu catūsu asaṅkhyeyyesu paripūritassa puññasambhāravisesassa phalabhūtena ‘‘ito paraṃ mayhaṃ okāso natthī’’ti ussahajātena viya uparūpari vaḍḍhamānena sakkārādinā bhagavā sakkato hoti. Sabbadisāsu hi yamakamahāmegho vuṭṭhahitvā mahoghaṃ viya sabbapāramiyo ‘‘ekasmiṃ attabhāve vipākaṃ dassāmā’’ti sampiṇḍitā viya bhagavato lābhasakkāramahoghaṃ nibbattayiṃsu. Tato annapānavatthayānamālāgandhavilepanādihatthā khattiyabrāhmaṇādayo āgantvā ‘‘kahaṃ buddho, kahaṃ bhagavā, kahaṃ devadevo, kahaṃ narāsabho, kahaṃ purisasīho’’ti bhagavantaṃ pariyesanti. Sakaṭasatehi paccaye āharitvā okāsaṃ alabhamānā samantā gāvutappamāṇepi sakaṭadhurena sakaṭadhuraṃ āhacca tiṭṭhanti ceva anubandhanti ca andhakavindabrāhmaṇādayo viya. Sabbaṃ taṃ khandhake (mahāva. 282) tesu tesu ca suttesu āgatanayena veditabbaṃ. Yathā ca bhagavato, evaṃ bhikkhusaṅghassāti. Vuttañhetaṃ –
‘‘яаавад̇аа ко, жунд̣̇а, зд̇арахи сан̇гхаа ваа г̇ан̣аа ваа логз уббаннаа, наахам̣, жунд̣̇а, ан̃н̃ам̣ згасан̇гхамби саманубассаами звам̣ лаабхаг̇г̇аяасаг̇г̇аббад̇д̇ам̣, яат̇аривааяам̣, жунд̣̇а, бхигкусан̇гхо’’д̇и (д̣̇ий. ни. 3.176).
‘‘Yāvatā kho, cunda, etarahi saṅghā vā gaṇā vā loke uppannā, nāhaṃ, cunda, aññaṃ ekasaṅghampi samanupassāmi evaṃ lābhaggayasaggappattaṃ, yatharivāyaṃ, cunda, bhikkhusaṅgho’’ti (dī. ni. 3.176).
свааяам̣ бхаг̇авад̇о жа бхигкусан̇гхасса жа уббанно лаабхасаггааро згад̇о худ̇ваа д̣̇виннам̣ махаанад̣̇ийнам̣ уд̣̇агогхо вияа аббамзяяо ахоси. д̇зна вуд̇д̇ам̣ – ‘‘д̇зна ко бана самаязна бхаг̇аваа саггад̇о ход̇и…бз… баригкаараанам̣, бхигкусан̇гхоби саггад̇о…бз… баригкаараана’’нд̇и.
Svāyaṃ bhagavato ca bhikkhusaṅghassa ca uppanno lābhasakkāro ekato hutvā dvinnaṃ mahānadīnaṃ udakogho viya appameyyo ahosi. Tena vuttaṃ – ‘‘tena kho pana samayena bhagavā sakkato hoti…pe… parikkhārānaṃ, bhikkhusaṅghopi sakkato…pe… parikkhārāna’’nti.
д̇ид̇т̇ияаа бана буб̣б̣з агад̇абун̃н̃ад̇ааяа жа д̣̇уббадибаннад̇ааяа жа асаггад̇аа аг̇аругад̇аа, б̣уд̣̇д̇хуббаад̣̇зна бана висзсад̇о вибаннасобхаа суурияуг̇г̇аманз каж̇ж̇обанагаа вияа ниббабхаа нид̇д̇зж̇аа хад̇алаабхасаггаараа ахзсум̣. д̇з д̇аад̣̇исам̣ бхаг̇авад̇о сан̇гхасса жа лаабхасаггаарам̣ асахамаанаа иссаабагад̇аа ‘‘звам̣ имз парусаахи ваажаахи гхаддзд̇ваава балаабзссаамаа’’д̇и усууяаа висуг̇г̇аарам̣ уг̇г̇иранд̇аа д̇ад̇т̇а д̇ад̇т̇а бхигкуу аггосанд̇аа барибхаасанд̇аа вижарим̣су . д̇зна вуд̇д̇ам̣ – ‘‘ан̃н̃ад̇ид̇т̇ияаа бана бариб̣б̣ааж̇агаа асаггад̇аа хонд̇и…бз… баригкаараанам̣. ат̇а ко д̇з ан̃н̃ад̇ид̇т̇ияаа бариб̣б̣ааж̇агаа бхаг̇авад̇о саггаарам̣ асахамаанаа бхигкусан̇гхасса жа г̇аамз жа аран̃н̃з жа бхигкуу д̣̇исваа асаб̣бхаахи парусаахи ваажаахи аггосанд̇и барибхаасанд̇и росзнд̇и вихзсзнд̇ий’’д̇и.
Titthiyā pana pubbe akatapuññatāya ca duppaṭipannatāya ca asakkatā agarukatā, buddhuppādena pana visesato vipannasobhā sūriyuggamane khajjopanakā viya nippabhā nittejā hatalābhasakkārā ahesuṃ. Te tādisaṃ bhagavato saṅghassa ca lābhasakkāraṃ asahamānā issāpakatā ‘‘evaṃ ime pharusāhi vācāhi ghaṭṭetvāva palāpessāmā’’ti usūyā visuggāraṃ uggirantā tattha tattha bhikkhū akkosantā paribhāsantā vicariṃsu . Tena vuttaṃ – ‘‘aññatitthiyā pana paribbājakā asakkatā honti…pe… parikkhārānaṃ. Atha kho te aññatitthiyā paribbājakā bhagavato sakkāraṃ asahamānā bhikkhusaṅghassa ca gāme ca araññe ca bhikkhū disvā asabbhāhi pharusāhi vācāhi akkosanti paribhāsanti rosenti vihesentī’’ti.
д̇ад̇т̇а асаб̣бхаахийд̇и асабхааяог̇г̇аахи сабхааяам̣ саад̇хуж̇анасамуухз вад̇д̇ум̣ аяуд̇д̇аахи, д̣̇удтуллаахийд̇и ад̇т̇о. парусаахийд̇и гагкал̣аахи маммажчзд̣̇игаахи. аггосанд̇ийд̇и ж̇аад̇иаад̣̇ийхи аггосавад̇т̇уухи кум̣сзнд̇и. барибхаасанд̇ийд̇и бхан̣д̣анавасзна бхаяам̣ уббаад̣̇знд̇аа д̇аж̇ж̇знд̇и. росзнд̇ийд̇и яат̇аа барасса росо ход̇и, звам̣ ануд̣̇д̇хам̣санавасзна росам̣ уббаад̣̇знд̇и. вихзсзнд̇ийд̇и вихзтзнд̇и, вивид̇хзхи аагаарзхи апаасум̣ гаронд̇и.
Tattha asabbhāhīti asabhāyoggāhi sabhāyaṃ sādhujanasamūhe vattuṃ ayuttāhi, duṭṭhullāhīti attho. Pharusāhīti kakkhaḷāhi mammacchedikāhi. Akkosantīti jātiādīhi akkosavatthūhi khuṃsenti. Paribhāsantīti bhaṇḍanavasena bhayaṃ uppādentā tajjenti. Rosentīti yathā parassa roso hoti, evaṃ anuddhaṃsanavasena rosaṃ uppādenti. Vihesentīti viheṭhenti, vividhehi ākārehi aphāsuṃ karonti.
гат̇ам̣ банзд̇з саманд̇абаасаад̣̇игз бхаг̇авад̇и бхигкусан̇гхз жа аггосаад̣̇ийни бавад̇д̇зсунд̇и? бхаг̇авад̇о уббаад̣̇ад̇о бахийналаабхасаггаарад̇ааяа убахад̇ажид̇д̇аа бат̇авим̣ кан̣ид̇ваа багкаланд̇аа вияа аван̣з взл̣урияаман̣имхи ван̣ам̣ уббаад̣̇знд̇аа вияа жа сунд̣̇аригам̣ наама бариб̣б̣ааж̇игам̣ сан̃н̃аабзд̇ваа д̇ааяа сад̇т̇у бхигкуунан̃жа аван̣н̣ам̣ вудтаабзд̇ваа аггосаад̣̇ийни бавад̇д̇зсум̣. д̇ам̣ банзд̇ам̣ сунд̣̇арийвад̇т̇у барад̇о сунд̣̇арийсуд̇д̇з (уд̣̇аа. 38) баал̣ияам̣язва ааг̇амиссад̇и, д̇асмаа яамзд̇т̇а вад̇д̇аб̣б̣ам̣, д̇ам̣ д̇ад̇т̇зва ван̣н̣аяиссаама.
Kathaṃ panete samantapāsādike bhagavati bhikkhusaṅghe ca akkosādīni pavattesunti? Bhagavato uppādato pahīnalābhasakkāratāya upahatacittā pathaviṃ khaṇitvā pakkhalantā viya avaṇe veḷuriyamaṇimhi vaṇaṃ uppādentā viya ca sundarikaṃ nāma paribbājikaṃ saññāpetvā tāya satthu bhikkhūnañca avaṇṇaṃ vuṭṭhāpetvā akkosādīni pavattesuṃ. Taṃ panetaṃ sundarīvatthu parato sundarīsutte (udā. 38) pāḷiyaṃyeva āgamissati, tasmā yamettha vattabbaṃ, taṃ tattheva vaṇṇayissāma.
бхигкуу бхаг̇авад̇о санд̇игам̣ убасан̇гамид̇ваа д̇ам̣ бавад̇д̇имаарожзсум̣. д̇зна вуд̇д̇ам̣ – ‘‘ат̇а ко самб̣ахулаа бхигкуу язна бхаг̇аваа д̇знубасан̇гамим̣су…бз… вихзсзнд̇ий’’д̇и. д̇ам̣ вуд̇д̇ад̇т̇амзва.
Bhikkhū bhagavato santikaṃ upasaṅkamitvā taṃ pavattimārocesuṃ. Tena vuttaṃ – ‘‘atha kho sambahulā bhikkhū yena bhagavā tenupasaṅkamiṃsu…pe… vihesentī’’ti. Taṃ vuttatthameva.
зд̇амад̇т̇ам̣ вид̣̇ид̇ваад̇и зд̇ам̣ иссаабагад̇аанам̣ д̇ид̇т̇ияаанам̣ виббадибад̇д̇им̣ саб̣б̣аагаарад̇о вид̣̇ид̇ваа. имам̣ уд̣̇аананд̇и имам̣ д̇зхи гад̇з виббагаарз басаннажид̇д̇зхи жа барзхи гад̇з убагаарз д̇аад̣̇ибхааваанубхаавад̣̇ийбагам̣ уд̣̇аанам̣ уд̣̇аанзси.
Etamatthaṃviditvāti etaṃ issāpakatānaṃ titthiyānaṃ vippaṭipattiṃ sabbākārato viditvā. Imaṃ udānanti imaṃ tehi kate vippakāre pasannacittehi ca parehi kate upakāre tādibhāvānubhāvadīpakaṃ udānaṃ udānesi.
д̇ад̇т̇а г̇аамз аран̃н̃з сукад̣̇угкапудтод̇и г̇аамз ваа аран̃н̃з ваа яад̇т̇а гад̇т̇ажи сукзна д̣̇угкзна жа пудто сукад̣̇угкаани анубхаванд̇о, д̇зсам̣ ваа бажжаязхи саман̇г̇ийбхууд̇о. нзвад̇д̇ад̇о но барад̇о д̣̇ахзт̇аад̇и ‘‘ахам̣ сукид̇о , ахам̣ д̣̇угкид̇о, мама сукам̣, мама д̣̇угкам̣, барзнид̣̇ам̣ маяхам̣ сукад̣̇угкам̣ уббаад̣̇ид̇а’’нд̇и жа нзва ад̇д̇ад̇о на барад̇о д̇ам̣ сукад̣̇угкам̣ табзт̇а. гасмаа? на хзд̇т̇а канд̇хабан̃жагз аханд̇и ваа маманд̇и ваа барод̇и ваа барассаад̇и ваа бассид̇аб̣б̣аяуд̇д̇агам̣ гин̃жи ад̇т̇и, гзвалам̣ сан̇каараа зва бана яат̇аабажжаяам̣ уббаж̇ж̇ид̇ваа кан̣з кан̣з бхиж̇ж̇анд̇ийд̇и. сукад̣̇угкаг̇г̇ахан̣ан̃жзд̇т̇а д̣̇зсанаасийсам̣, саб̣б̣ассааби логад̇хаммасса васзна ад̇т̇о взд̣̇ид̇аб̣б̣о. ид̇и бхаг̇аваа ‘‘наахам̣ гважани, гассажи гин̃жанад̇асмим̣, на жа мама гважани, гад̇т̇ажи гин̃жанад̇ад̇т̇ий’’д̇и жад̇угодигам̣ сун̃н̃ад̇ам̣ вибхаавзси.
Tattha gāme araññe sukhadukkhaphuṭṭhoti gāme vā araññe vā yattha katthaci sukhena dukkhena ca phuṭṭho sukhadukkhāni anubhavanto, tesaṃ vā paccayehi samaṅgībhūto. Nevattato no parato dahethāti ‘‘ahaṃ sukhito , ahaṃ dukkhito, mama sukhaṃ, mama dukkhaṃ, parenidaṃ mayhaṃ sukhadukkhaṃ uppādita’’nti ca neva attato na parato taṃ sukhadukkhaṃ ṭhapetha. Kasmā? Na hettha khandhapañcake ahanti vā mamanti vā paroti vā parassāti vā passitabbayuttakaṃ kiñci atthi, kevalaṃ saṅkhārā eva pana yathāpaccayaṃ uppajjitvā khaṇe khaṇe bhijjantīti. Sukhadukkhaggahaṇañcettha desanāsīsaṃ, sabbassāpi lokadhammassa vasena attho veditabbo. Iti bhagavā ‘‘nāhaṃ kvacani, kassaci kiñcanatasmiṃ, na ca mama kvacani, katthaci kiñcanatatthī’’ti catukoṭikaṃ suññataṃ vibhāvesi.
ид̣̇аани д̇асса ад̇д̇ад̇о барад̇о жа ад̣̇аханасса гааран̣ам̣ д̣̇ассзд̇и ‘‘пусанд̇и пассаа убад̇хим̣ бадижжаа’’д̇и. зд̇з сукавзд̣̇анийяаа д̣̇угкавзд̣̇анийяаа жа пассаа наама канд̇хабан̃жагасан̇каад̇ам̣ убад̇хим̣ бадижжа д̇асмим̣ сад̇и яат̇аасагам̣ висаяам̣ пусанд̇и, д̇ад̇т̇а бавад̇д̇анд̇иязва. ад̣̇угкамасукаа хи взд̣̇анаа санд̇асабхаавад̇ааяа сукз зва сан̇г̇ахам̣ г̇ажчад̇ийд̇и д̣̇увид̇хасампассавасзнзвааяам̣ ад̇т̇аван̣н̣анаа гад̇аа.
Idāni tassa attato parato ca adahanassa kāraṇaṃ dasseti ‘‘phusanti phassā upadhiṃ paṭiccā’’ti. Ete sukhavedanīyā dukkhavedanīyā ca phassā nāma khandhapañcakasaṅkhātaṃ upadhiṃ paṭicca tasmiṃ sati yathāsakaṃ visayaṃ phusanti, tattha pavattantiyeva. Adukkhamasukhā hi vedanā santasabhāvatāya sukhe eva saṅgahaṃ gacchatīti duvidhasamphassavasenevāyaṃ atthavaṇṇanā katā.
яат̇аа бана д̇з пассаа на пусанд̇и, д̇ам̣ д̣̇ассзд̇ум̣ ‘‘нирубад̇хим̣ гзна пусзяяум̣ пассаа’’д̇и вуд̇д̇ам̣. саб̣б̣асо хи канд̇хуубад̇хияаа асад̇и гзна гааран̣зна д̇з пассаа пусзяяум̣, на д̇ам̣ гааран̣ам̣ ад̇т̇и. яад̣̇и хи д̇умхз аггосаад̣̇ивасзна уббаж̇ж̇анасукад̣̇угкам̣ на ижчат̇а, саб̣б̣асо нирубад̇хибхаавзязва яог̇ам̣ гарзяяаат̇аад̇и анубаад̣̇исзсаниб̣б̣аанад̇хаад̇уяаа г̇аат̇ам̣ нидтабзси. звам̣ иминаа уд̣̇аанзна ваддавиваддам̣ гат̇ид̇ам̣.
Yathā pana te phassā na phusanti, taṃ dassetuṃ ‘‘nirupadhiṃ kena phuseyyuṃ phassā’’ti vuttaṃ. Sabbaso hi khandhūpadhiyā asati kena kāraṇena te phassā phuseyyuṃ, na taṃ kāraṇaṃ atthi. Yadi hi tumhe akkosādivasena uppajjanasukhadukkhaṃ na icchatha, sabbaso nirupadhibhāveyeva yogaṃ kareyyāthāti anupādisesanibbānadhātuyā gāthaṃ niṭṭhapesi. Evaṃ iminā udānena vaṭṭavivaṭṭaṃ kathitaṃ.
жад̇уд̇т̇асуд̇д̇аван̣н̣анаа нидтид̇аа.
Catutthasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / уд̣̇аанабаал̣и • Udānapāḷi / 4. саггаарасуд̇д̇ам̣ • 4. Sakkārasuttaṃ
