| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༦. སཀྐསུཏྟཾ
6. Sakkasuttaṃ
༤༦. ཨེཀཾ སམཡཾ བྷགཝཱ སཀྐེསུ ཝིཧརཏི ཀཔིལཝཏྠུསྨིཾ ནིགྲོདྷཱརཱམེ། ཨཐ ཁོ སམྦཧུལཱ སཀྐཱ ཨུཔཱསཀཱ ཏདཧུཔོསཐེ ཡེན བྷགཝཱ ཏེནུཔསངྐམིཾསུ; ཨུཔསངྐམིཏྭཱ བྷགཝནྟཾ ཨབྷིཝཱདེཏྭཱ ཨེཀམནྟཾ ནིསཱིདིཾསུ། ཨེཀམནྟཾ ནིསིནྣེ ཁོ སཀྐེ ཨུཔཱསཀེ བྷགཝཱ ཨེཏདཝོཙ – ‘‘ཨཔི ནུ ཏུམྷེ, སཀྐཱ, ཨཊྛངྒསམནྣཱགཏཾ ཨུཔོསཐཾ ཨུཔཝསཐཱ’’ཏི? ‘‘ཨཔྤེཀདཱ མཡཾ, བྷནྟེ, ཨཊྛངྒསམནྣཱགཏཾ ཨུཔོསཐཾ ཨུཔཝསཱམ, ཨཔྤེཀདཱ ན ཨུཔཝསཱམཱ’’ཏི། ‘‘ཏེསཾ ཝོ, སཀྐཱ, ཨལཱབྷཱ ཏེསཾ དུལླདྡྷཾ, ཡེ ཏུམྷེ ཨེཝཾ སོཀསབྷཡེ ཛཱིཝིཏེ མརཎསབྷཡེ ཛཱིཝིཏེ ཨཔྤེཀདཱ ཨཊྛངྒསམནྣཱགཏཾ ཨུཔོསཐཾ ཨུཔཝསཐ, ཨཔྤེཀདཱ ན ཨུཔཝསཐ།
46. Ekaṃ samayaṃ bhagavā sakkesu viharati kapilavatthusmiṃ nigrodhārāme. Atha kho sambahulā sakkā upāsakā tadahuposathe yena bhagavā tenupasaṅkamiṃsu; upasaṅkamitvā bhagavantaṃ abhivādetvā ekamantaṃ nisīdiṃsu. Ekamantaṃ nisinne kho sakke upāsake bhagavā etadavoca – ‘‘api nu tumhe, sakkā, aṭṭhaṅgasamannāgataṃ uposathaṃ upavasathā’’ti? ‘‘Appekadā mayaṃ, bhante, aṭṭhaṅgasamannāgataṃ uposathaṃ upavasāma, appekadā na upavasāmā’’ti. ‘‘Tesaṃ vo, sakkā, alābhā tesaṃ dulladdhaṃ, ye tumhe evaṃ sokasabhaye jīvite maraṇasabhaye jīvite appekadā aṭṭhaṅgasamannāgataṃ uposathaṃ upavasatha, appekadā na upavasatha.
‘‘ཏཾ ཀིཾ མཉྙཐ, སཀྐཱ, ཨིདྷ པུརིསོ ཡེན ཀེནཙི ཀམྨཊྛཱནེན ཨནཱཔཛྫ ཨཀུསལཾ དིཝསཾ ཨཌྜྷཀཧཱཔཎཾ ནིབྦིསེཡྻ། དཀྑོ པུརིསོ ཨུཊྛཱནསམྤནྣོཏི ཨལཾ ཝཙནཱཡཱ’’ཏི? ‘‘ཨེཝཾ, བྷནྟེ’’།
‘‘Taṃ kiṃ maññatha, sakkā, idha puriso yena kenaci kammaṭṭhānena anāpajja akusalaṃ divasaṃ aḍḍhakahāpaṇaṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ཏཾ ཀིཾ མཉྙཐ, སཀྐཱ, ཨིདྷ པུརིསོ ཡེན ཀེནཙི ཀམྨཊྛཱནེན ཨནཱཔཛྫ ཨཀུསལཾ དིཝསཾ ཀཧཱཔཎཾ ནིབྦིསེཡྻ། དཀྑོ པུརིསོ ཨུཊྛཱནསམྤནྣོཏི ཨལཾ ཝཙནཱཡཱ’’ཏི? ‘‘ཨེཝཾ, བྷནྟེ’’།
‘‘Taṃ kiṃ maññatha, sakkā, idha puriso yena kenaci kammaṭṭhānena anāpajja akusalaṃ divasaṃ kahāpaṇaṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ཏཾ ཀིཾ, མཉྙཐ, སཀྐཱ, ཨིདྷ པུརིསོ ཡེན ཀེནཙི ཀམྨཊྛཱནེན ཨནཱཔཛྫ ཨཀུསལཾ དིཝསཾ དྭེ ཀཧཱཔཎེ ནིབྦིསེཡྻ … ཏཡོ ཀཧཱཔཎེ ནིབྦིསེཡྻ… ཙཏྟཱརོ ཀཧཱཔཎེ ནིབྦིསེཡྻ… པཉྩ ཀཧཱཔཎེ ནིབྦིསེཡྻ… ཚ ཀཧཱཔཎེ ནིབྦིསེཡྻ… སཏྟ ཀཧཱཔཎེ ནིབྦིསེཡྻ… ཨཊྛ ཀཧཱཔཎེ ནིབྦིསེཡྻ… ནཝ ཀཧཱཔཎེ ནིབྦིསེཡྻ… དས ཀཧཱཔཎེ ནིབྦིསེཡྻ… ཝཱིས ཀཧཱཔཎེ ནིབྦིསེཡྻ… ཏིཾས ཀཧཱཔཎེ ནིབྦིསེཡྻ… ཙཏྟཱརཱིསཾ ཀཧཱཔཎེ ནིབྦིསེཡྻ… པཉྙཱསཾ ཀཧཱཔཎེ ནིབྦིསེཡྻ… ཀཧཱཔཎསཏཾ ནིབྦིསེཡྻ། དཀྑོ པུརིསོ ཨུཊྛཱནསམྤནྣོཏི ཨལཾ ཝཙནཱཡཱ’’ཏི? ‘‘ཨེཝཾ, བྷནྟེ’’།
‘‘Taṃ kiṃ, maññatha, sakkā, idha puriso yena kenaci kammaṭṭhānena anāpajja akusalaṃ divasaṃ dve kahāpaṇe nibbiseyya … tayo kahāpaṇe nibbiseyya… cattāro kahāpaṇe nibbiseyya… pañca kahāpaṇe nibbiseyya… cha kahāpaṇe nibbiseyya… satta kahāpaṇe nibbiseyya… aṭṭha kahāpaṇe nibbiseyya… nava kahāpaṇe nibbiseyya… dasa kahāpaṇe nibbiseyya… vīsa kahāpaṇe nibbiseyya… tiṃsa kahāpaṇe nibbiseyya… cattārīsaṃ kahāpaṇe nibbiseyya… paññāsaṃ kahāpaṇe nibbiseyya… kahāpaṇasataṃ nibbiseyya. Dakkho puriso uṭṭhānasampannoti alaṃ vacanāyā’’ti? ‘‘Evaṃ, bhante’’.
‘‘ཏཾ ཀིཾ མཉྙཐ, སཀྐཱ, ཨཔི ནུ སོ པུརིསོ དིཝསེ དིཝསེ ཀཧཱཔཎསཏཾ ཀཧཱཔཎསཧསྶཾ ནིབྦིསམཱནོ ལདྡྷཾ ལདྡྷཾ ནིཀྑིཔནྟོ ཝསྶསཏཱཡུཀོ ཝསྶསཏཛཱིཝཱི མཧནྟཾ བྷོགཀྑནྡྷཾ ཨདྷིགཙྪེཡྻཱ’’ཏི? ‘‘ཨེཝཾ, བྷནྟེ’’།
‘‘Taṃ kiṃ maññatha, sakkā, api nu so puriso divase divase kahāpaṇasataṃ kahāpaṇasahassaṃ nibbisamāno laddhaṃ laddhaṃ nikkhipanto vassasatāyuko vassasatajīvī mahantaṃ bhogakkhandhaṃ adhigaccheyyā’’ti? ‘‘Evaṃ, bhante’’.
‘‘ཏཾ ཀིཾ མཉྙཐ, སཀྐཱ, ཨཔི ནུ སོ པུརིསོ བྷོགཧེཏུ བྷོགནིདཱནཾ བྷོགཱདྷིཀརཎཾ ཨེཀཾ ཝཱ རཏྟིཾ ཨེཀཾ ཝཱ དིཝསཾ ཨུཔཌྜྷཾ ཝཱ རཏྟིཾ ཨུཔཌྜྷཾ ཝཱ དིཝསཾ ཨེཀནྟསུཁཔྤཊིསཾཝེདཱི ཝིཧརེཡྻཱ’’ཏི? ‘‘ནོ ཧེཏཾ, བྷནྟེ’’། ‘‘ཏཾ ཀིསྶ ཧེཏུ’’? ‘‘ཀཱམཱ ཧི, བྷནྟེ, ཨནིཙྩཱ ཏུཙྪཱ མུསཱ མོསདྷམྨཱ’’ཏི།
‘‘Taṃ kiṃ maññatha, sakkā, api nu so puriso bhogahetu bhoganidānaṃ bhogādhikaraṇaṃ ekaṃ vā rattiṃ ekaṃ vā divasaṃ upaḍḍhaṃ vā rattiṃ upaḍḍhaṃ vā divasaṃ ekantasukhappaṭisaṃvedī vihareyyā’’ti? ‘‘No hetaṃ, bhante’’. ‘‘Taṃ kissa hetu’’? ‘‘Kāmā hi, bhante, aniccā tucchā musā mosadhammā’’ti.
‘‘ཨིདྷ པན ཝོ, སཀྐཱ, མམ སཱཝཀོ དས ཝསྶཱནི ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ། སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏིཊྛནྟུ, སཀྐཱ, དས ཝསྶཱནི།
‘‘Idha pana vo, sakkā, mama sāvako dasa vassāni appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya. So ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa vassāni.
ཨིདྷ མམ སཱཝཀོ ནཝ ཝསྶཱནི… ཨཊྛ ཝསྶཱནི… སཏྟ ཝསྶཱནི… ཚ ཝསྶཱནི… པཉྩ ཝསྶཱནི ཙཏྟཱརི ཝསྶཱནི… ཏཱིཎི ཝསྶཱནི… དྭེ ཝསྶཱནི… ཨེཀཾ ཝསྶཾ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ, སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏིཊྛཏུ, སཀྐཱ, ཨེཀཾ ཝསྶཾ།
Idha mama sāvako nava vassāni… aṭṭha vassāni… satta vassāni… cha vassāni… pañca vassāni cattāri vassāni… tīṇi vassāni… dve vassāni… ekaṃ vassaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhatu, sakkā, ekaṃ vassaṃ.
ཨིདྷ མམ སཱཝཀོ དས མཱསེ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ, སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏིཊྛནྟུ, སཀྐཱ, དས མཱསཱ།
Idha mama sāvako dasa māse appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa māsā.
ཨིདྷ མམ སཱཝཀོ ནཝ མཱསེ… ཨཊྛ མཱསེ… སཏྟ མཱསེ… ཚ མཱསེ… པཉྩ མཱསེ… ཙཏྟཱརོ མཱསེ… ཏཡོ མཱསེ… དྭེ མཱསེ… ཨེཀཾ མཱསཾ… ཨཌྜྷམཱསཾ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ, སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏིཊྛཏུ, སཀྐཱ, ཨཌྜྷམཱསོ།
Idha mama sāvako nava māse… aṭṭha māse… satta māse… cha māse… pañca māse… cattāro māse… tayo māse… dve māse… ekaṃ māsaṃ… aḍḍhamāsaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhatu, sakkā, aḍḍhamāso.
ཨིདྷ མམ སཱཝཀོ དས རཏྟིནྡིཝེ 1 ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ, སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏིཊྛནྟུ, སཀྐཱ, དས རཏྟིནྡིཝཱ།
Idha mama sāvako dasa rattindive 2 appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tiṭṭhantu, sakkā, dasa rattindivā.
ཨིདྷ མམ སཱཝཀོ ནཝ རཏྟིནྡིཝེ… ཨཊྛ རཏྟིནྡིཝེ… སཏྟ རཏྟིནྡིཝེ… ཚ རཏྟིནྡིཝེ… པཉྩ རཏྟིནྡིཝེ… ཙཏྟཱརོ རཏྟིནྡིཝེ… ཏཡོ རཏྟིནྡིཝེ… དྭེ རཏྟིནྡིཝེ… ཨེཀཾ རཏྟིནྡིཝཾ ཨཔྤམཏྟོ ཨཱཏཱཔཱི པཧིཏཏྟོ ཝིཧརནྟོ ཡཐཱ མཡཱནུསིཊྛཾ ཏཐཱ པཊིཔཛྫམཱནོ སཏམྤི ཝསྶཱནི སཏམྤི ཝསྶསཏཱནི སཏམྤི ཝསྶསཧསྶཱནི ཨེཀནྟསུཁཔྤཊིསཾཝེདཱི ཝིཧརེཡྻ, སོ ཙ ཁྭསྶ སཀདཱགཱམཱི ཝཱ ཨནཱགཱམཱི ཝཱ ཨཔཎྞཀཾ ཝཱ སོཏཱཔནྣོ། ཏེསཾ ཝོ, སཀྐཱ, ཨལཱབྷཱ ཏེསཾ དུལླདྡྷཾ, ཡེ ཏུམྷེ ཨེཝཾ སོཀསབྷཡེ ཛཱིཝིཏེ མརཎསབྷཡེ ཛཱིཝིཏེ ཨཔྤེཀདཱ ཨཊྛངྒསམནྣཱགཏཾ ཨུཔོསཐཾ ཨུཔཝསཐ, ཨཔྤེཀདཱ ན ཨུཔཝསཐཱ’’ཏི། ‘‘ཨེཏེ མཡཾ, བྷནྟེ, ཨཛྫཏགྒེ ཨཊྛངྒསམནྣཱགཏཾ ཨུཔོསཐཾ ཨུཔཝསིསྶཱམཱ’’ཏི། ཚཊྛཾ།
Idha mama sāvako nava rattindive… aṭṭha rattindive… satta rattindive… cha rattindive… pañca rattindive… cattāro rattindive… tayo rattindive… dve rattindive… ekaṃ rattindivaṃ appamatto ātāpī pahitatto viharanto yathā mayānusiṭṭhaṃ tathā paṭipajjamāno satampi vassāni satampi vassasatāni satampi vassasahassāni ekantasukhappaṭisaṃvedī vihareyya, so ca khvassa sakadāgāmī vā anāgāmī vā apaṇṇakaṃ vā sotāpanno. Tesaṃ vo, sakkā, alābhā tesaṃ dulladdhaṃ, ye tumhe evaṃ sokasabhaye jīvite maraṇasabhaye jīvite appekadā aṭṭhaṅgasamannāgataṃ uposathaṃ upavasatha, appekadā na upavasathā’’ti. ‘‘Ete mayaṃ, bhante, ajjatagge aṭṭhaṅgasamannāgataṃ uposathaṃ upavasissāmā’’ti. Chaṭṭhaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. སཀྐསུཏྟཝཎྞནཱ • 6. Sakkasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༡-༨. ཝིཝཱདསུཏྟཱདིཝཎྞནཱ • 1-8. Vivādasuttādivaṇṇanā
