| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. ஸக்கஸுத்தவண்ணனா
6. Sakkasuttavaṇṇanā
46. ச²ட்டே² ஸோகஸப⁴யேதி ஸோகேன ஸப⁴யே. ஸோகப⁴யேதி வா பாடோ², அயமேவத்தோ². து³தியபதே³பி ஏஸேவ நயோ. யேன கேனசி கம்மட்டா²னேனாதி கஸிவணிஜ்ஜாதி³கம்மேஸு யேன கேனசி கம்மேன. அனாபஜ்ஜ அகுஸலந்தி கிஞ்சி அகுஸலங் அனாபஜ்ஜித்வா. நிப்³பி³ஸெய்யாதி உப்பாதெ³ய்ய ஆசினெய்ய. த³க்கோ²தி சே²கோ. உட்டா²னஸம்பன்னோதி உட்டா²னவீரியேன ஸமன்னாக³தோ. அலங் வசனாயாதி யுத்தோ வசனாய. ஏகந்தஸுக²ப்படிஸங்வேதீ³ விஹரெய்யாதி ஏகந்தமேவ காயிகசேதஸிகஸுக²ங் ஞாணேன படிஸங்வேதெ³ந்தோ விஹரெய்ய. அனிச்சாதி ஹுத்வா அபா⁴வதோ. துச்சா²தி ஸாரரஹிதா. முஸாதி நிச்சஸுப⁴ஸுகா² விய கா²யமானாபி ததா² ந ஹொந்தீதி முஸா. மோஸத⁴ம்மாதி நஸ்ஸனஸபா⁴வா. தஸ்மா தே படிச்ச து³க்க²ங் உப்பஜ்ஜதீதி ஸந்த³ஸ்ஸேதி. இத⁴ பன வோதி எத்த² வோ தி நிபாதமத்தங். அபண்ணகங் வா ஸோதாபன்னோதி அவிராதி⁴தங் ஏகங்ஸேன ஸோதாபன்னோ வா ஹோதி. ஸோபி ஜா²னங் நிப்³ப³த்தேதி, ப்³ரஹ்மலோகங் வா க³ந்த்வா ச²ஸு வா காமஸக்³கே³ஸு ஏகந்தஸுக²ப்படிஸங்வேதீ³ ஹுத்வா விஹரெய்ய. இமஸ்மிங் ஸுத்தே ஸத்தா² அட்ட²ங்கு³போஸத²ஸ்ஸ கு³ணங் கதே²ஸி.
46. Chaṭṭhe sokasabhayeti sokena sabhaye. Sokabhayeti vā pāṭho, ayamevattho. Dutiyapadepi eseva nayo. Yena kenaci kammaṭṭhānenāti kasivaṇijjādikammesu yena kenaci kammena. Anāpajja akusalanti kiñci akusalaṃ anāpajjitvā. Nibbiseyyāti uppādeyya ācineyya. Dakkhoti cheko. Uṭṭhānasampannoti uṭṭhānavīriyena samannāgato. Alaṃ vacanāyāti yutto vacanāya. Ekantasukhappaṭisaṃvedī vihareyyāti ekantameva kāyikacetasikasukhaṃ ñāṇena paṭisaṃvedento vihareyya. Aniccāti hutvā abhāvato. Tucchāti sārarahitā. Musāti niccasubhasukhā viya khāyamānāpi tathā na hontīti musā. Mosadhammāti nassanasabhāvā. Tasmā te paṭicca dukkhaṃ uppajjatīti sandasseti. Idhapana voti ettha vo ti nipātamattaṃ. Apaṇṇakaṃ vā sotāpannoti avirādhitaṃ ekaṃsena sotāpanno vā hoti. Sopi jhānaṃ nibbatteti, brahmalokaṃ vā gantvā chasu vā kāmasaggesu ekantasukhappaṭisaṃvedī hutvā vihareyya. Imasmiṃ sutte satthā aṭṭhaṅguposathassa guṇaṃ kathesi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. ஸக்கஸுத்தங் • 6. Sakkasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1-8. விவாத³ஸுத்தாதி³வண்ணனா • 1-8. Vivādasuttādivaṇṇanā
