| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๖. สกฺกสุตฺตวณฺณนา
6. Sakkasuttavaṇṇanā
๔๖. ฉเฎฺฐ โสกสภเยติ โสเกน สภเยฯ โสกภเยติ วา ปาโฐ, อยเมวโตฺถฯ ทุติยปเทปิ เอเสว นโยฯ เยน เกนจิ กมฺมฎฺฐาเนนาติ กสิวณิชฺชาทิกเมฺมสุ เยน เกนจิ กเมฺมนฯ อนาปชฺช อกุสลนฺติ กิญฺจิ อกุสลํ อนาปชฺชิตฺวาฯ นิพฺพิเสยฺยาติ อุปฺปาเทยฺย อาจิเนยฺยฯ ทโกฺขติ เฉโกฯ อุฎฺฐานสมฺปโนฺนติ อุฎฺฐานวีริเยน สมนฺนาคโตฯ อลํ วจนายาติ ยุโตฺต วจนายฯ เอกนฺตสุขปฺปฎิสํเวที วิหเรยฺยาติ เอกนฺตเมว กายิกเจตสิกสุขํ ญาเณน ปฎิสํเวเทโนฺต วิหเรยฺยฯ อนิจฺจาติ หุตฺวา อภาวโตฯ ตุจฺฉาติ สารรหิตาฯ มุสาติ นิจฺจสุภสุขา วิย ขายมานาปิ ตถา น โหนฺตีติ มุสาฯ โมสธมฺมาติ นสฺสนสภาวาฯ ตสฺมา เต ปฎิจฺจ ทุกฺขํ อุปฺปชฺชตีติ สนฺทเสฺสติฯ อิธ ปน โวติ เอตฺถ โว ติ นิปาตมตฺตํฯ อปณฺณกํ วา โสตาปโนฺนติ อวิราธิตํ เอกํเสน โสตาปโนฺน วา โหติฯ โสปิ ฌานํ นิพฺพเตฺตติ, พฺรหฺมโลกํ วา คนฺตฺวา ฉสุ วา กามสเคฺคสุ เอกนฺตสุขปฺปฎิสํเวที หุตฺวา วิหเรยฺยฯ อิมสฺมิํ สุเตฺต สตฺถา อฎฺฐงฺคุโปสถสฺส คุณํ กเถสิฯ
46. Chaṭṭhe sokasabhayeti sokena sabhaye. Sokabhayeti vā pāṭho, ayamevattho. Dutiyapadepi eseva nayo. Yena kenaci kammaṭṭhānenāti kasivaṇijjādikammesu yena kenaci kammena. Anāpajja akusalanti kiñci akusalaṃ anāpajjitvā. Nibbiseyyāti uppādeyya ācineyya. Dakkhoti cheko. Uṭṭhānasampannoti uṭṭhānavīriyena samannāgato. Alaṃ vacanāyāti yutto vacanāya. Ekantasukhappaṭisaṃvedī vihareyyāti ekantameva kāyikacetasikasukhaṃ ñāṇena paṭisaṃvedento vihareyya. Aniccāti hutvā abhāvato. Tucchāti sārarahitā. Musāti niccasubhasukhā viya khāyamānāpi tathā na hontīti musā. Mosadhammāti nassanasabhāvā. Tasmā te paṭicca dukkhaṃ uppajjatīti sandasseti. Idhapana voti ettha vo ti nipātamattaṃ. Apaṇṇakaṃ vā sotāpannoti avirādhitaṃ ekaṃsena sotāpanno vā hoti. Sopi jhānaṃ nibbatteti, brahmalokaṃ vā gantvā chasu vā kāmasaggesu ekantasukhappaṭisaṃvedī hutvā vihareyya. Imasmiṃ sutte satthā aṭṭhaṅguposathassa guṇaṃ kathesi.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๖. สกฺกสุตฺตํ • 6. Sakkasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๑-๘. วิวาทสุตฺตาทิวณฺณนา • 1-8. Vivādasuttādivaṇṇanā
