| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. သက္ကသုတ္တဝဏ္ဏနာ
6. Sakkasuttavaṇṇanā
၄၆. ဆဋ္ဌေ သောကသဘယေတိ သောကေန သဘယေ။ သောကဘယေတိ ဝာ ပာဌော, အယမေဝတ္ထော။ ဒုတိယပဒေပိ ဧသေဝ နယော။ ယေန ကေနစိ ကမ္မဋ္ဌာနေနာတိ ကသိဝဏိဇ္ဇာဒိကမ္မေသု ယေန ကေနစိ ကမ္မေန။ အနာပဇ္ဇ အကုသလန္တိ ကိဉ္စိ အကုသလံ အနာပဇ္ဇိတ္ဝာ။ နိဗ္ဗိသေယ္ယာတိ ဥပ္ပာဒေယ္ယ အာစိနေယ္ယ။ ဒက္ခောတိ ဆေကော။ ဥဋ္ဌာနသမ္ပန္နောတိ ဥဋ္ဌာနဝီရိယေန သမန္နာဂတော။ အလံ ဝစနာယာတိ ယုတ္တော ဝစနာယ။ ဧကန္တသုခပ္ပဋိသံဝေဒီ ဝိဟရေယ္ယာတိ ဧကန္တမေဝ ကာယိကစေတသိကသုခံ ဉာဏေန ပဋိသံဝေဒေန္တော ဝိဟရေယ္ယ။ အနိစ္စာတိ ဟုတ္ဝာ အဘာဝတော။ တုစ္ဆာတိ သာရရဟိတာ။ မုသာတိ နိစ္စသုဘသုခာ ဝိယ ခာယမာနာပိ တထာ န ဟောန္တီတိ မုသာ။ မောသဓမ္မာတိ နသ္သနသဘာဝာ။ တသ္မာ တေ ပဋိစ္စ ဒုက္ခံ ဥပ္ပဇ္ဇတီတိ သန္ဒသ္သေတိ။ ဣဓ ပန ဝောတိ ဧတ္ထ ဝော တိ နိပာတမတ္တံ။ အပဏ္ဏကံ ဝာ သောတာပန္နောတိ အဝိရာဓိတံ ဧကံသေန သောတာပန္နော ဝာ ဟောတိ။ သောပိ ဈာနံ နိဗ္ဗတ္တေတိ, ဗ္ရဟ္မလောကံ ဝာ ဂန္တ္ဝာ ဆသု ဝာ ကာမသဂ္ဂေသု ဧကန္တသုခပ္ပဋိသံဝေဒီ ဟုတ္ဝာ ဝိဟရေယ္ယ။ ဣမသ္မိံ သုတ္တေ သတ္ထာ အဋ္ဌင္ဂုပောသထသ္သ ဂုဏံ ကထေသိ။
46. Chaṭṭhe sokasabhayeti sokena sabhaye. Sokabhayeti vā pāṭho, ayamevattho. Dutiyapadepi eseva nayo. Yena kenaci kammaṭṭhānenāti kasivaṇijjādikammesu yena kenaci kammena. Anāpajja akusalanti kiñci akusalaṃ anāpajjitvā. Nibbiseyyāti uppādeyya ācineyya. Dakkhoti cheko. Uṭṭhānasampannoti uṭṭhānavīriyena samannāgato. Alaṃ vacanāyāti yutto vacanāya. Ekantasukhappaṭisaṃvedī vihareyyāti ekantameva kāyikacetasikasukhaṃ ñāṇena paṭisaṃvedento vihareyya. Aniccāti hutvā abhāvato. Tucchāti sārarahitā. Musāti niccasubhasukhā viya khāyamānāpi tathā na hontīti musā. Mosadhammāti nassanasabhāvā. Tasmā te paṭicca dukkhaṃ uppajjatīti sandasseti. Idhapana voti ettha vo ti nipātamattaṃ. Apaṇṇakaṃ vā sotāpannoti avirādhitaṃ ekaṃsena sotāpanno vā hoti. Sopi jhānaṃ nibbatteti, brahmalokaṃ vā gantvā chasu vā kāmasaggesu ekantasukhappaṭisaṃvedī hutvā vihareyya. Imasmiṃ sutte satthā aṭṭhaṅguposathassa guṇaṃ kathesi.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. သက္ကသုတ္တံ • 6. Sakkasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၈. ဝိဝာဒသုတ္တာဒိဝဏ္ဏနာ • 1-8. Vivādasuttādivaṇṇanā
