| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
১১. সক্কাযদিট্ঠিপহানসুত্তং
11. Sakkāyadiṭṭhipahānasuttaṃ
১৬৬. অথ খো অঞ্ঞতরো ভিক্খু…পে॰… এতদৰোচ – ‘‘কথং নু খো, ভন্তে, জানতো কথং পস্সতো সক্কাযদিট্ঠি পহীযতী’’তি? ‘‘চক্খুং খো, ভিক্খু, দুক্খতো জানতো পস্সতো সক্কাযদিট্ঠি পহীযতি। রূপে দুক্খতো জানতো পস্সতো সক্কাযদিট্ঠি পহীযতি। চক্খুৰিঞ্ঞাণং দুক্খতো জানতো পস্সতো সক্কাযদিট্ঠি পহীযতি। চক্খুসম্ফস্সং দুক্খতো জানতো পস্সতো সক্কাযদিট্ঠি পহীযতি…পে॰… যম্পিদং মনোসম্ফস্সপচ্চযা উপ্পজ্জতি ৰেদযিতং সুখং ৰা দুক্খং ৰা অদুক্খমসুখং ৰা তম্পি দুক্খতো জানতো পস্সতো সক্কাযদিট্ঠি পহীযতি। এৰং খো, ভিক্খু, জানতো এৰং পস্সতো সক্কাযদিট্ঠি পহীযতী’’তি। একাদসমং।
166. Atha kho aññataro bhikkhu…pe… etadavoca – ‘‘kathaṃ nu kho, bhante, jānato kathaṃ passato sakkāyadiṭṭhi pahīyatī’’ti? ‘‘Cakkhuṃ kho, bhikkhu, dukkhato jānato passato sakkāyadiṭṭhi pahīyati. Rūpe dukkhato jānato passato sakkāyadiṭṭhi pahīyati. Cakkhuviññāṇaṃ dukkhato jānato passato sakkāyadiṭṭhi pahīyati. Cakkhusamphassaṃ dukkhato jānato passato sakkāyadiṭṭhi pahīyati…pe… yampidaṃ manosamphassapaccayā uppajjati vedayitaṃ sukhaṃ vā dukkhaṃ vā adukkhamasukhaṃ vā tampi dukkhato jānato passato sakkāyadiṭṭhi pahīyati. Evaṃ kho, bhikkhu, jānato evaṃ passato sakkāyadiṭṭhi pahīyatī’’ti. Ekādasamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ১০-১২. মিচ্ছাদিট্ঠিপহানসুত্তাদিৰণ্ণনা • 10-12. Micchādiṭṭhipahānasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ১০-১২. মিচ্ছাদিট্ঠিপহানসুত্তাদিৰণ্ণনা • 10-12. Micchādiṭṭhipahānasuttādivaṇṇanā
