| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. ஸக்காயஸுத்தங்
3. Sakkāyasuttaṃ
105. ஸாவத்தி²னிதா³னங். ‘‘ஸக்காயஞ்ச வோ, பி⁴க்க²வே, தே³ஸெஸ்ஸாமி ஸக்காயஸமுத³யஞ்ச ஸக்காயனிரோத⁴ஞ்ச ஸக்காயனிரோத⁴கா³மினிஞ்ச படிபத³ங். தங் ஸுணாத². கதமோ ச, பி⁴க்க²வே, ஸக்காயோ? பஞ்சுபாதா³னக்க²ந்தா⁴திஸ்ஸ வசனீயங் . கதமே பஞ்ச? ஸெய்யதி²த³ங் – ரூபுபாதா³னக்க²ந்தோ⁴, வேத³னுபாதா³னக்க²ந்தோ⁴, ஸஞ்ஞுபாதா³னக்க²ந்தோ⁴, ஸங்கா²ருபாதா³னக்க²ந்தோ⁴, விஞ்ஞாணுபாதா³னக்க²ந்தோ⁴. அயங் வுச்சதி, பி⁴க்க²வே, ஸக்காயோ. கதமோ ச, பி⁴க்க²வே, ஸக்காயஸமுத³யோ? யாயங் தண்ஹா போனோப⁴விகா…பே॰… காமதண்ஹா, ப⁴வதண்ஹா, விப⁴வதண்ஹா – அயங் வுச்சதி, பி⁴க்க²வே, ஸக்காயஸமுத³யோ. கதமோ ச, பி⁴க்க²வே, ஸக்காயனிரோதோ⁴? யோ தஸ்ஸாயேவ தண்ஹாய…பே॰… அயங் வுச்சதி , பி⁴க்க²வே, ஸக்காயனிரோதோ⁴. கதமா ச, பி⁴க்க²வே, ஸக்காயனிரோத⁴கா³மினீ படிபதா³? அயமேவ அரியோ அட்ட²ங்கி³கோ மக்³கோ³. ஸெய்யதி²த³ங் – ஸம்மாதி³ட்டி²…பே॰… ஸம்மாஸமாதி⁴. அயங் வுச்சதி, பி⁴க்க²வே, ஸக்காயனிரோத⁴கா³மினீ படிபதா³’’தி. ததியங்.
105. Sāvatthinidānaṃ. ‘‘Sakkāyañca vo, bhikkhave, desessāmi sakkāyasamudayañca sakkāyanirodhañca sakkāyanirodhagāminiñca paṭipadaṃ. Taṃ suṇātha. Katamo ca, bhikkhave, sakkāyo? Pañcupādānakkhandhātissa vacanīyaṃ . Katame pañca? Seyyathidaṃ – rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho. Ayaṃ vuccati, bhikkhave, sakkāyo. Katamo ca, bhikkhave, sakkāyasamudayo? Yāyaṃ taṇhā ponobhavikā…pe… kāmataṇhā, bhavataṇhā, vibhavataṇhā – ayaṃ vuccati, bhikkhave, sakkāyasamudayo. Katamo ca, bhikkhave, sakkāyanirodho? Yo tassāyeva taṇhāya…pe… ayaṃ vuccati , bhikkhave, sakkāyanirodho. Katamā ca, bhikkhave, sakkāyanirodhagāminī paṭipadā? Ayameva ariyo aṭṭhaṅgiko maggo. Seyyathidaṃ – sammādiṭṭhi…pe… sammāsamādhi. Ayaṃ vuccati, bhikkhave, sakkāyanirodhagāminī paṭipadā’’ti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2-3. து³க்க²ஸுத்தாதி³வண்ணனா • 2-3. Dukkhasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2-3. து³க்க²ஸுத்தாதி³வண்ணனா • 2-3. Dukkhasuttādivaṇṇanā
