| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7-10. ஸக்கி²ப⁴ப்³ப³ஸுத்தாதி³வண்ணனா
7-10. Sakkhibhabbasuttādivaṇṇanā
71-74. ஸத்தமே தஸ்மிங் தஸ்மிங் விஸேஸேதி தஸ்மிங் தஸ்மிங் ஸச்சி²காதப்³பே³ விஸேஸே. ஸக்கி²பா⁴வாய பச்சக்க²காரிதாய ப⁴ப்³போ³ ஸக்கி²ப⁴ப்³போ³, தஸ்ஸ பா⁴வோ ஸக்கி²ப⁴ப்³ப³தா. தங் ஸக்கி²ப⁴ப்³ப³தங். ஸதி ஸதிஆயதனேதி ஸதி ஸதிகாரணே. கிஞ்செத்த² காரணங்? அபி⁴ஞ்ஞா வா அபி⁴ஞ்ஞாபாத³கஜ்ஜா²னங் வா, அவஸானே பன ச²ட்டா²பி⁴ஞ்ஞாய அரஹத்தங் வா காரணங், அரஹத்தஸ்ஸ விபஸ்ஸனா வாதி வேதி³தப்³ப³ங். யஞ்ஹி தங் தத்ர தத்ர ஸக்கி²ப⁴ப்³ப³தாஸங்கா²தங் இத்³தி⁴வித⁴பச்சனுப⁴வனாதி³, தஸ்ஸ அபி⁴ஞ்ஞா காரணங். அத² இத்³தி⁴வித⁴பச்சனுப⁴வனாதி³ அபி⁴ஞ்ஞா, ஏவங் ஸதி அபி⁴ஞ்ஞாபாத³கஜ்ஜா²னங் காரணங். அரஹத்தம்பி ‘‘குதா³ஸ்ஸு நாமாஹங் ததா³யதனங் உபஸம்பஜ்ஜ விஹரிஸ்ஸாமீ’’தி அனுத்தரேஸு விமொக்கே²ஸு பிஹங் உபட்ட²பெத்வா ச²ட்டா²பி⁴ஞ்ஞங் நிப்³ப³த்தெந்தஸ்ஸ காரணங். இத³ஞ்ச ஸப்³ப³ஸாதா⁴ரணங் ந ஹோதி, ஸாதா⁴ரணவஸேன பன அரஹத்தஸ்ஸ விபஸ்ஸனா காரணங். அத² வா ஸதி ஆயதனேதி தஸ்ஸ தஸ்ஸ விஸேஸாதி⁴க³மஸ்ஸ உபனிஸ்ஸயஸங்கா²தே காரணே ஸதீதி ஏவமெத்த² அத்தோ² த³ட்ட²ப்³போ³.
71-74. Sattame tasmiṃ tasmiṃ viseseti tasmiṃ tasmiṃ sacchikātabbe visese. Sakkhibhāvāya paccakkhakāritāya bhabbo sakkhibhabbo, tassa bhāvo sakkhibhabbatā. Taṃ sakkhibhabbataṃ. Sati satiāyataneti sati satikāraṇe. Kiñcettha kāraṇaṃ? Abhiññā vā abhiññāpādakajjhānaṃ vā, avasāne pana chaṭṭhābhiññāya arahattaṃ vā kāraṇaṃ, arahattassa vipassanā vāti veditabbaṃ. Yañhi taṃ tatra tatra sakkhibhabbatāsaṅkhātaṃ iddhividhapaccanubhavanādi, tassa abhiññā kāraṇaṃ. Atha iddhividhapaccanubhavanādi abhiññā, evaṃ sati abhiññāpādakajjhānaṃ kāraṇaṃ. Arahattampi ‘‘kudāssu nāmāhaṃ tadāyatanaṃ upasampajja viharissāmī’’ti anuttaresu vimokkhesu pihaṃ upaṭṭhapetvā chaṭṭhābhiññaṃ nibbattentassa kāraṇaṃ. Idañca sabbasādhāraṇaṃ na hoti, sādhāraṇavasena pana arahattassa vipassanā kāraṇaṃ. Atha vā sati āyataneti tassa tassa visesādhigamassa upanissayasaṅkhāte kāraṇe satīti evamettha attho daṭṭhabbo.
ஹானபா⁴கி³யாதீ³ஸு ‘‘பட²மஜ்ஜா²னஸ்ஸ லாபி⁴ங் காமஸஹக³தா ஸஞ்ஞாமனஸிகாரா ஸமுதா³சரந்தி, ஹானபா⁴கி³யோ ஸமாதி⁴. தத³னுத⁴ம்மதா ஸதி ஸந்திட்ட²தி, டி²திபா⁴கி³யோ ஸமாதி⁴. அவிதக்கஸஹக³தா ஸஞ்ஞாமனஸிகாரா ஸமுதா³சரந்தி, விஸேஸபா⁴கி³யோ ஸமாதி⁴. நிப்³பி³தா³ஸஹக³தா ஸஞ்ஞாமனஸிகாரா ஸமுதா³சரந்தி விராகூ³பஸங்ஹிதா, நிப்³பே³த⁴பா⁴கி³யோ ஸமாதீ⁴’’தி (விப⁴॰ 799) இமினா நயேன ஸப்³ப³ஸமாபத்தியோ வித்தா²ரெத்வா ஹானபா⁴கி³யாதி³அத்தோ² வேதி³தப்³போ³. தத்த² பட²மஜ்ஜா²னஸ்ஸ லாபி⁴ந்தி ய்வாயங் அப்பகு³ணஸ்ஸ பட²மஸ்ஸ ஜா²னஸ்ஸ லாபீ⁴, தங். காமஸஹக³தா ஸஞ்ஞாமனஸிகாரா ஸமுதா³சரந்தீதி ததோ வுட்டி²தங் ஆரம்மணவஸேன காமஸஹக³தா ஹுத்வா ஸஞ்ஞாமனஸிகாரா ஸமுதா³சரந்தி துத³ந்தி, தஸ்ஸ காமானதீதஸ்ஸ காமானுபக்க²ந்தா³னங் ஸஞ்ஞாமனஸிகாரானங் வஸேன ஸோ பட²மஜ்ஜா²னஸமாதி⁴ ஹாயதி பரிஹாயதி, தஸ்மா ஹானபா⁴கி³யோ வுத்தோ. தத³னுத⁴ம்மதாதி தத³னுரூபஸபா⁴வோ. ஸதி ஸந்திட்ட²தீதி இத³ங் மிச்சா²ஸதிங் ஸந்தா⁴ய வுத்தங். யஸ்ஸ ஹி பட²மஜ்ஜா²னானுரூபஸபா⁴வா பட²மஜ்ஜா²னங் ஸந்ததோ பணீததோ தி³ஸ்வா அஸ்ஸாத³யமானா அபி⁴னந்த³மானா நிகந்தி ஹோதி, தஸ்ஸ நிகந்திவஸேன ஸோ பட²மஜ்ஜா²னஸமாதி⁴ நேவ ஹாயதி ந வட்³ட⁴தி, டி²திகொட்டா²ஸிகோ ஹோதி. தேன வுத்தங் ‘‘டி²திபா⁴கி³யோ ஸமாதீ⁴’’தி. அவிதக்கஸஹக³தாதி அவிதக்கங் து³தியஜ்ஜா²னங் ஸந்ததோ பணீததோ மனஸிகரோதோ ஆரம்மணவஸேன அவிதக்கஸஹக³தா. ஸஞ்ஞாமனஸிகாரா ஸமுதா³சரந்தீதி பகு³ணபட²மஜ்ஜா²னதோ வுட்டி²தங் து³தியஜ்ஜா²னாதி⁴க³மத்தா²ய சோதெ³ந்தி துத³ந்தி. தஸ்ஸ உபரி து³தியஜ்ஜா²னானுபக்க²ந்தா³னங் ஸஞ்ஞாமனஸிகாரானங் வஸேன ஸோ பட²மஜ்ஜா²னஸமாதி⁴ விஸேஸபூ⁴தஸ்ஸ து³தியஜ்ஜா²னஸ்ஸ உப்பத்திபத³ட்டா²னதாய ‘‘விஸேஸபா⁴கி³யோ’’தி வுத்தோ.
Hānabhāgiyādīsu ‘‘paṭhamajjhānassa lābhiṃ kāmasahagatā saññāmanasikārā samudācaranti, hānabhāgiyo samādhi. Tadanudhammatā sati santiṭṭhati, ṭhitibhāgiyo samādhi. Avitakkasahagatā saññāmanasikārā samudācaranti, visesabhāgiyo samādhi. Nibbidāsahagatā saññāmanasikārā samudācaranti virāgūpasaṃhitā, nibbedhabhāgiyo samādhī’’ti (vibha. 799) iminā nayena sabbasamāpattiyo vitthāretvā hānabhāgiyādiattho veditabbo. Tattha paṭhamajjhānassa lābhinti yvāyaṃ appaguṇassa paṭhamassa jhānassa lābhī, taṃ. Kāmasahagatā saññāmanasikārā samudācarantīti tato vuṭṭhitaṃ ārammaṇavasena kāmasahagatā hutvā saññāmanasikārā samudācaranti tudanti, tassa kāmānatītassa kāmānupakkhandānaṃ saññāmanasikārānaṃ vasena so paṭhamajjhānasamādhi hāyati parihāyati, tasmā hānabhāgiyo vutto. Tadanudhammatāti tadanurūpasabhāvo. Sati santiṭṭhatīti idaṃ micchāsatiṃ sandhāya vuttaṃ. Yassa hi paṭhamajjhānānurūpasabhāvā paṭhamajjhānaṃ santato paṇītato disvā assādayamānā abhinandamānā nikanti hoti, tassa nikantivasena so paṭhamajjhānasamādhi neva hāyati na vaḍḍhati, ṭhitikoṭṭhāsiko hoti. Tena vuttaṃ ‘‘ṭhitibhāgiyo samādhī’’ti. Avitakkasahagatāti avitakkaṃ dutiyajjhānaṃ santato paṇītato manasikaroto ārammaṇavasena avitakkasahagatā. Saññāmanasikārā samudācarantīti paguṇapaṭhamajjhānato vuṭṭhitaṃ dutiyajjhānādhigamatthāya codenti tudanti. Tassa upari dutiyajjhānānupakkhandānaṃ saññāmanasikārānaṃ vasena so paṭhamajjhānasamādhi visesabhūtassa dutiyajjhānassa uppattipadaṭṭhānatāya ‘‘visesabhāgiyo’’ti vutto.
நிப்³பி³தா³ஸஹக³தாதி தமேவ பட²மஜ்ஜா²னலாபி⁴ங் ஜா²னதோ வுட்டி²தங் நிப்³பி³தா³ஸங்கா²தேன விபஸ்ஸனாஞாணேன ஸஹக³தா. விபஸ்ஸனாஞாணஞ்ஹி ஜா²னங்கே³ஸு பபே⁴தே³ன உபட்ட²ஹந்தேஸு நிப்³பி³ந்த³தி உக்கண்ட²தி, தஸ்மா ‘‘நிப்³பி³தா³’’தி வுச்சதி. ஸமுதா³சரந்தீதி நிப்³பா³னஸச்சி²கிரியத்தா²ய சோதெ³ந்தி துத³ந்தி. விராகூ³பஸங்ஹிதாதி விராக³ஸங்கா²தேன நிப்³பா³னேன உபஸங்ஹிதா. விபஸ்ஸனாஞாணஞ்ஹி ஸக்கா இமினா மக்³கே³ன விராக³ங் நிப்³பா³னங் ஸச்சி²காதுந்தி பவத்திதோ ‘‘விராகூ³பஸங்ஹித’’ந்தி வுச்சதி. தங்ஸம்பயுத்தா ஸஞ்ஞாமனஸிகாரா விராகூ³பஸங்ஹிதா ஏவ நாம. தஸ்ஸ தேஸங் ஸஞ்ஞாமனஸிகாரானங் வஸேன பட²மஜ்ஜா²னஸமாதி⁴ அரியமக்³க³ப்படிவேத⁴ஸ்ஸ பத³ட்டா²னதாய ‘‘நிப்³பே³த⁴பா⁴கி³யோ’’தி வுத்தோ. ஹானங் ப⁴ஜந்தீதி ஹானபா⁴கி³யா, ஹானபா⁴கோ³ வா ஏதேஸங் அத்தீ²தி ஹானபா⁴கி³யா, பரிஹானகொட்டா²ஸிகாதி அத்தோ². இமினா நயேன டி²திபா⁴கி³யோ வேதி³தப்³போ³. அட்ட²மாதீ³னி உத்தானத்தா²னேவ.
Nibbidāsahagatāti tameva paṭhamajjhānalābhiṃ jhānato vuṭṭhitaṃ nibbidāsaṅkhātena vipassanāñāṇena sahagatā. Vipassanāñāṇañhi jhānaṅgesu pabhedena upaṭṭhahantesu nibbindati ukkaṇṭhati, tasmā ‘‘nibbidā’’ti vuccati. Samudācarantīti nibbānasacchikiriyatthāya codenti tudanti. Virāgūpasaṃhitāti virāgasaṅkhātena nibbānena upasaṃhitā. Vipassanāñāṇañhi sakkā iminā maggena virāgaṃ nibbānaṃ sacchikātunti pavattito ‘‘virāgūpasaṃhita’’nti vuccati. Taṃsampayuttā saññāmanasikārā virāgūpasaṃhitā eva nāma. Tassa tesaṃ saññāmanasikārānaṃ vasena paṭhamajjhānasamādhi ariyamaggappaṭivedhassa padaṭṭhānatāya ‘‘nibbedhabhāgiyo’’ti vutto. Hānaṃ bhajantīti hānabhāgiyā, hānabhāgo vā etesaṃ atthīti hānabhāgiyā, parihānakoṭṭhāsikāti attho. Iminā nayena ṭhitibhāgiyo veditabbo. Aṭṭhamādīni uttānatthāneva.
ஸக்கி²ப⁴ப்³ப³ஸுத்தாதி³வண்ணனா நிட்டி²தா.
Sakkhibhabbasuttādivaṇṇanā niṭṭhitā.
தே³வதாவக்³க³வண்ணனா நிட்டி²தா.
Devatāvaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
7. ஸக்கி²ப⁴ப்³ப³ஸுத்தங் • 7. Sakkhibhabbasuttaṃ
8. ப³லஸுத்தங் • 8. Balasuttaṃ
9. பட²மதஜ்ஜா²னஸுத்தங் • 9. Paṭhamatajjhānasuttaṃ
10. து³தியதஜ்ஜா²னஸுத்தங் • 10. Dutiyatajjhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
7. ஸக்கி²ப⁴ப்³ப³ஸுத்தவண்ணனா • 7. Sakkhibhabbasuttavaṇṇanā
8. ப³லஸுத்தவண்ணனா • 8. Balasuttavaṇṇanā
9-10. தஜ்ஜா²னஸுத்தத்³வயவண்ணனா • 9-10. Tajjhānasuttadvayavaṇṇanā
