| Library / Tipiṭaka / തിപിടക • Tipiṭaka / അങ്ഗുത്തരനികായ • Aṅguttaranikāya |
൭. സക്ഖിഭബ്ബസുത്തം
7. Sakkhibhabbasuttaṃ
൭൧. ‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ , ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം നപ്പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം നപ്പജാനാതി, അസക്കച്ചകാരീ ച ഹോതി, അസപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു അഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ.
71. ‘‘Chahi, bhikkhave, dhammehi samannāgato bhikkhu abhabbo tatra tatreva sakkhibhabbataṃ pāpuṇituṃ sati sati āyatane. Katamehi chahi? Idha , bhikkhave, bhikkhu ‘ime hānabhāgiyā dhammā’ti yathābhūtaṃ nappajānāti, ‘ime ṭhitibhāgiyā dhammā’ti yathābhūtaṃ nappajānāti, ‘ime visesabhāgiyā dhammā’ti yathābhūtaṃ nappajānāti, ‘ime nibbedhabhāgiyā dhammā’ti yathābhūtaṃ nappajānāti, asakkaccakārī ca hoti, asappāyakārī ca. Imehi kho, bhikkhave, chahi dhammehi samannāgato bhikkhu abhabbo tatra tatreva sakkhibhabbataṃ pāpuṇituṃ sati sati āyatane.
‘‘ഛഹി, ഭിക്ഖവേ, ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ. കതമേഹി ഛഹി? ഇധ, ഭിക്ഖവേ, ഭിക്ഖു ‘ഇമേ ഹാനഭാഗിയാ ധമ്മാ’തി യഥാഭൂതം പജാനാതി, ‘ഇമേ ഠിതിഭാഗിയാ ധമ്മാ’തി യഥാഭൂതം പജാനാതി, ‘ഇമേ വിസേസഭാഗിയാ ധമ്മാ’തി യഥാഭൂതം പജാനാതി, ‘ഇമേ നിബ്ബേധഭാഗിയാ ധമ്മാ’തി യഥാഭൂതം പജാനാതി, സക്കച്ചകാരീ ച ഹോതി, സപ്പായകാരീ ച. ഇമേഹി ഖോ, ഭിക്ഖവേ, ഛഹി ധമ്മേഹി സമന്നാഗതോ ഭിക്ഖു ഭബ്ബോ തത്ര തത്രേവ സക്ഖിഭബ്ബതം പാപുണിതും സതി സതി ആയതനേ’’തി. സത്തമം.
‘‘Chahi, bhikkhave, dhammehi samannāgato bhikkhu bhabbo tatra tatreva sakkhibhabbataṃ pāpuṇituṃ sati sati āyatane. Katamehi chahi? Idha, bhikkhave, bhikkhu ‘ime hānabhāgiyā dhammā’ti yathābhūtaṃ pajānāti, ‘ime ṭhitibhāgiyā dhammā’ti yathābhūtaṃ pajānāti, ‘ime visesabhāgiyā dhammā’ti yathābhūtaṃ pajānāti, ‘ime nibbedhabhāgiyā dhammā’ti yathābhūtaṃ pajānāti, sakkaccakārī ca hoti, sappāyakārī ca. Imehi kho, bhikkhave, chahi dhammehi samannāgato bhikkhu bhabbo tatra tatreva sakkhibhabbataṃ pāpuṇituṃ sati sati āyatane’’ti. Sattamaṃ.
Related texts:
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / അങ്ഗുത്തരനികായ (അട്ഠകഥാ) • Aṅguttaranikāya (aṭṭhakathā) / ൭. സക്ഖിഭബ്ബസുത്തവണ്ണനാ • 7. Sakkhibhabbasuttavaṇṇanā
ടീകാ • Tīkā / സുത്തപിടക (ടീകാ) • Suttapiṭaka (ṭīkā) / അങ്ഗുത്തരനികായ (ടീകാ) • Aṅguttaranikāya (ṭīkā) / ൭-൧൦. സക്ഖിഭബ്ബസുത്താദിവണ്ണനാ • 7-10. Sakkhibhabbasuttādivaṇṇanā
