| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੬. ਸਕੁਣਗ੍ਘਿਸੁਤ੍ਤવਣ੍ਣਨਾ
6. Sakuṇagghisuttavaṇṇanā
੩੭੨. ਛਟ੍ਠੇ ਸਕੁਣਗ੍ਘੀਤਿ ਸਕੁਣਂ ਹਨਤੀਤਿ ਸਕੁਣਗ੍ਘਿ, ਸੇਨਸ੍ਸੇਤਂ ਅਧਿવਚਨਂ। ਸਹਸਾ ਅਜ੍ਝਪਤ੍ਤਾਤਿ ਲੋਭਸਾਹਸੇਨ ਪਤ੍ਤਾ। ਅਲਕ੍ਖਿਕਾਤਿ ਨਿਸ੍ਸਿਰਿਕਾ। ਅਪ੍ਪਪੁਞ੍ਞਾਤਿ ਪਰਿਤ੍ਤਪੁਞ੍ਞਾ। ਸਚੇਜ੍ਜ ਮਯਨ੍ਤਿ ਸਚੇ ਅਜ੍ਜ ਮਯਂ। ਨਙ੍ਗਲਕਟ੍ਠਕਰਣਨ੍ਤਿ ਨਙ੍ਗਲੇਨ ਕਸਿਕਰਣਂ, ਅਧੁਨਾ ਕਟ੍ਠਂ ਖੇਤ੍ਤਟ੍ਠਾਨਨ੍ਤਿ ਅਤ੍ਥੋ। ਲੇਡ੍ਡੁਟ੍ਠਾਨਨ੍ਤਿ ਲੇਡ੍ਡੂਨਂ ਠਾਨਂ। ਸਂવਦਮਾਨਾਤਿ ਸਮ੍ਮਾ વਦਮਾਨਾ, ਅਤ੍ਤਨੋ ਬਲਸ੍ਸ ਸੁਟ੍ਠੁ વਣ੍ਣਂ વਦਮਾਨਾਤਿ ਅਤ੍ਥੋ। ਮਹਨ੍ਤਂ ਲੇਡ੍ਡੁਂ ਅਭਿਰੁਹਿਤ੍વਾਤਿ ਉਦ੍ਧਨਸਣ੍ਠਾਨੇਨ ਠਿਤੇਸੁ ਤੀਸੁ ਲੇਡ੍ਡੂਸੁ ‘‘ਇਤੋ ਸੇਨੇ ਆਗਚ੍ਛਨ੍ਤੇ ਇਤੋ ਨਿਕ੍ਖਮਿਸ੍ਸਾਮਿ, ਇਤੋ ਆਗਚ੍ਛਨ੍ਤੇ ਇਤੋ’’ਤਿ ਸਲ੍ਲਕ੍ਖੇਤ੍વਾ ਤੇਸੁ ਏਕਂ ਲੇਡ੍ਡੁਂ ਅਭਿਰੁਹਿਤ੍વਾ ਅਟ੍ਠਾਸਿ ਅવਦਮਾਨੋ। ਸਨ੍ਨਯ੍ਹਾਤਿ ਖੁਰਪ੍ਪਂ ਸਨ੍ਨਯ੍ਹਮਾਨੋ વਿਯ ਸਨ੍ਨਯ੍ਹਿਤ੍વਾ ਸੁਟ੍ਠੁ ਠਪੇਤ੍વਾ। ਬਹੁਆਗਤੋ ਖੋ ਮ੍ਯਾਯਨ੍ਤਿ ‘‘ਮਯ੍ਹਂ ਅਤ੍ਥਾਯ ਅਯਂ ਬਹੁਤਂ ਠਾਨਂ ਆਗਤੋ, ਅਪ੍ਪਂ ਅવਸਿਟ੍ਠਂ, ਇਦਾਨਿ ਮਂ ਗਣ੍ਹਿਸ੍ਸਤੀ’’ਤਿ ਞਤ੍વਾ ਦਾਰੁਗੁਲ਼ੋ વਿਯ વਿਨਿવਤ੍ਤਿਤ੍વਾ ਤਸ੍ਸੇવ ਲੇਡ੍ਡੁਸ੍ਸ ਅਨ੍ਤਰੇ ਪਚ੍ਚੁਪਾਦਿ, ਪਟਿਪਨ੍ਨੋ ਪવਿਟ੍ਠੋਤਿ ਅਤ੍ਥੋ। ਉਰਂ ਪਚ੍ਚਤਾਲ਼ੇਸੀਤਿ ‘‘ਏਕਪ੍ਪਹਾਰੇਨੇવ ਲਾਪਸ੍ਸ ਸੀਸਂ ਛਿਨ੍ਦਿਤ੍વਾ ਗਹੇਸ੍ਸਾਮੀ’’ਤਿ ਪਕ੍ਖਨ੍ਦਤ੍ਤਾ વੇਗਂ ਸਨ੍ਧਾਰੇਤੁਂ ਅਸਕ੍ਕੋਨ੍ਤੋ ਤਸ੍ਮਿਂ ਲੇਡ੍ਡੁਸ੍ਮਿਂ ਉਰਂ ਪਤਾਲ਼ੇਸਿ। ਤਾવਦੇવਸ੍ਸ ਹਦਯਮਂਸਂ ਫਾਲਿਯਿਤ੍ਥ। ਅਥ ਲਾਪੋ ‘‘ਦਿਟ੍ਠਾ વਤ ਸਤ੍ਤੁਨੋ ਪਿਟ੍ਠੀ’’ਤਿ ਹਟ੍ਠਤੁਟ੍ਠੋ ਤਸ੍ਸ ਹਦਯੇ ਅਪਰਾਪਰਂ ਚਙ੍ਕਮਿ।
372. Chaṭṭhe sakuṇagghīti sakuṇaṃ hanatīti sakuṇagghi, senassetaṃ adhivacanaṃ. Sahasā ajjhapattāti lobhasāhasena pattā. Alakkhikāti nissirikā. Appapuññāti parittapuññā. Sacejja mayanti sace ajja mayaṃ. Naṅgalakaṭṭhakaraṇanti naṅgalena kasikaraṇaṃ, adhunā kaṭṭhaṃ khettaṭṭhānanti attho. Leḍḍuṭṭhānanti leḍḍūnaṃ ṭhānaṃ. Saṃvadamānāti sammā vadamānā, attano balassa suṭṭhu vaṇṇaṃ vadamānāti attho. Mahantaṃ leḍḍuṃ abhiruhitvāti uddhanasaṇṭhānena ṭhitesu tīsu leḍḍūsu ‘‘ito sene āgacchante ito nikkhamissāmi, ito āgacchante ito’’ti sallakkhetvā tesu ekaṃ leḍḍuṃ abhiruhitvā aṭṭhāsi avadamāno. Sannayhāti khurappaṃ sannayhamāno viya sannayhitvā suṭṭhu ṭhapetvā. Bahuāgato kho myāyanti ‘‘mayhaṃ atthāya ayaṃ bahutaṃ ṭhānaṃ āgato, appaṃ avasiṭṭhaṃ, idāni maṃ gaṇhissatī’’ti ñatvā dāruguḷo viya vinivattitvā tasseva leḍḍussa antare paccupādi, paṭipanno paviṭṭhoti attho. Uraṃ paccatāḷesīti ‘‘ekappahāreneva lāpassa sīsaṃ chinditvā gahessāmī’’ti pakkhandattā vegaṃ sandhāretuṃ asakkonto tasmiṃ leḍḍusmiṃ uraṃ patāḷesi. Tāvadevassa hadayamaṃsaṃ phāliyittha. Atha lāpo ‘‘diṭṭhā vata sattuno piṭṭhī’’ti haṭṭhatuṭṭho tassa hadaye aparāparaṃ caṅkami.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੬. ਸਕੁਣਗ੍ਘਿਸੁਤ੍ਤਂ • 6. Sakuṇagghisuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੬. ਸਕੁਣਗ੍ਘਿਸੁਤ੍ਤવਣ੍ਣਨਾ • 6. Sakuṇagghisuttavaṇṇanā
