| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[308] 8. ஸகுணஜாதகவண்ணனா
[308] 8. Sakuṇajātakavaṇṇanā
அகரம்ஹஸ தே கிச்சந்தி இத³ங் ஸத்தா² ஜேதவனே விஹரந்தோ தே³வத³த்தஸ்ஸ அகதஞ்ஞுதங் ஆரப்³ப⁴ கதே²ஸி. ‘‘ந, பி⁴க்க²வே, இதா³னேவ, புப்³பே³பி தே³வத³த்தோ அகதஞ்ஞூயேவா’’தி வத்வா அதீதங் ஆஹரி.
Akaramhasa te kiccanti idaṃ satthā jetavane viharanto devadattassa akataññutaṃ ārabbha kathesi. ‘‘Na, bhikkhave, idāneva, pubbepi devadatto akataññūyevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஹிமவந்தபதே³ஸே ருக்க²கொட்டகஸகுணோ ஹுத்வா நிப்³ப³த்தி. அதே²கஸ்ஸ ஸீஹஸ்ஸ மங்ஸங் கா²த³ந்தஸ்ஸ அட்டி² க³லே லக்³கி³, க³லோ உத்³து⁴மாயி, கோ³சரங் க³ண்ஹிதுங் ந ஸக்கோதி, க²ரா வேத³னா பவத்ததி. அத² நங் ஸோ ஸகுணோ கோ³சரப்பஸுதோ தி³ஸ்வா ஸாகா²ய நிலீனோ ‘‘கிங் தே, ஸம்ம, து³க்க²’’ந்தி புச்சி². ஸோ தமத்த²ங் ஆசிக்கி². ‘‘அஹங் தே, ஸம்ம, ஏதங் அட்டி²ங் அபனெய்யங், ப⁴யேன பன தே முக²ங் பவிஸிதுங் ந விஸஹாமி, கா²தெ³ய்யாஸிபி ம’’ந்தி. ‘‘மா பா⁴யி, ஸம்ம, நாஹங் தங் கா²தா³மி, ஜீவிதங் மே தே³ஹீ’’தி. ஸோ ‘‘ஸாதூ⁴’’தி தங் வாமபஸ்ஸேன நிபஜ்ஜாபெத்வா ‘‘கோ ஜானாதி, கிம்பேஸ கரிஸ்ஸதீ’’தி சிந்தெத்வா யதா² முக²ங் பித³ஹிதுங் ந ஸக்கோதி, ததா² தஸ்ஸ அத⁴ரொட்டே² ச உத்தரொட்டே² ச த³ண்ட³கங் ட²பெத்வா முக²ங் பவிஸித்வா அட்டி²கோடிங் துண்டே³ன பஹரி, அட்டி² பதித்வா க³தங். ஸோ அட்டி²ங் பாதெத்வா ஸீஹஸ்ஸ முக²தோ நிக்க²மந்தோ த³ண்ட³கங் துண்டே³ன பஹரித்வா பாதெந்தோவ நிக்க²மித்வா ஸாக²க்³கே³ நிலீயி. ஸீஹோ நிரோகோ³ ஹுத்வா ஏகதி³வஸங் ஏகங் வனமஹிங்ஸங் வதி⁴த்வா கா²த³தி. ஸகுணோ ‘‘வீமங்ஸிஸ்ஸாமி ந’’ந்தி தஸ்ஸ உபரிபா⁴கே³ ஸாகா²ய நிலீயித்வா தேன ஸத்³தி⁴ங் ஸல்லபந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto himavantapadese rukkhakoṭṭakasakuṇo hutvā nibbatti. Athekassa sīhassa maṃsaṃ khādantassa aṭṭhi gale laggi, galo uddhumāyi, gocaraṃ gaṇhituṃ na sakkoti, kharā vedanā pavattati. Atha naṃ so sakuṇo gocarappasuto disvā sākhāya nilīno ‘‘kiṃ te, samma, dukkha’’nti pucchi. So tamatthaṃ ācikkhi. ‘‘Ahaṃ te, samma, etaṃ aṭṭhiṃ apaneyyaṃ, bhayena pana te mukhaṃ pavisituṃ na visahāmi, khādeyyāsipi ma’’nti. ‘‘Mā bhāyi, samma, nāhaṃ taṃ khādāmi, jīvitaṃ me dehī’’ti. So ‘‘sādhū’’ti taṃ vāmapassena nipajjāpetvā ‘‘ko jānāti, kimpesa karissatī’’ti cintetvā yathā mukhaṃ pidahituṃ na sakkoti, tathā tassa adharoṭṭhe ca uttaroṭṭhe ca daṇḍakaṃ ṭhapetvā mukhaṃ pavisitvā aṭṭhikoṭiṃ tuṇḍena pahari, aṭṭhi patitvā gataṃ. So aṭṭhiṃ pātetvā sīhassa mukhato nikkhamanto daṇḍakaṃ tuṇḍena paharitvā pātentova nikkhamitvā sākhagge nilīyi. Sīho nirogo hutvā ekadivasaṃ ekaṃ vanamahiṃsaṃ vadhitvā khādati. Sakuṇo ‘‘vīmaṃsissāmi na’’nti tassa uparibhāge sākhāya nilīyitvā tena saddhiṃ sallapanto paṭhamaṃ gāthamāha –
29.
29.
‘‘அகரம்ஹஸ தே கிச்சங், யங் ப³லங் அஹுவம்ஹஸே;
‘‘Akaramhasa te kiccaṃ, yaṃ balaṃ ahuvamhase;
மிக³ராஜ நமோ த்யத்து², அபி கிஞ்சி லபா⁴மஸே’’தி.
Migarāja namo tyatthu, api kiñci labhāmase’’ti.
தத்த² அகரம்ஹஸ தே கிச்சந்தி போ⁴, ஸீஹ, மயம்பி தவ ஏகங் கிச்சங் அகரிம்ஹ. யங் ப³லங் அஹுவம்ஹஸேதி யங் அம்ஹாகங் ப³லங் அஹோஸி, தேன ப³லேன ததோ கிஞ்சி அஹாபெத்வா அகரிம்ஹயேவ.
Tattha akaramhasa te kiccanti bho, sīha, mayampi tava ekaṃ kiccaṃ akarimha. Yaṃ balaṃ ahuvamhaseti yaṃ amhākaṃ balaṃ ahosi, tena balena tato kiñci ahāpetvā akarimhayeva.
தங் ஸுத்வா ஸீஹோ து³தியங் கா³த²மாஹ –
Taṃ sutvā sīho dutiyaṃ gāthamāha –
30.
30.
‘‘மம லோஹிதப⁴க்க²ஸ்ஸ, நிச்சங் லுத்³தா³னி குப்³ப³தோ;
‘‘Mama lohitabhakkhassa, niccaṃ luddāni kubbato;
த³ந்தந்தரக³தோ ஸந்தோ, தங் ப³ஹுங் யம்பி ஜீவஸீ’’தி.
Dantantaragato santo, taṃ bahuṃ yampi jīvasī’’ti.
தங் ஸுத்வா ஸகுணோ இதரா த்³வே கா³தா² அபா⁴ஸி –
Taṃ sutvā sakuṇo itarā dve gāthā abhāsi –
31.
31.
‘‘அகதஞ்ஞுமகத்தாரங், கதஸ்ஸ அப்படிகாரகங்;
‘‘Akataññumakattāraṃ, katassa appaṭikārakaṃ;
யஸ்மிங் கதஞ்ஞுதா நத்தி², நிரத்தா² தஸ்ஸ ஸேவனா.
Yasmiṃ kataññutā natthi, niratthā tassa sevanā.
32.
32.
‘‘யஸ்ஸ ஸம்முக²சிண்ணேன, மித்தத⁴ம்மோ ந லப்³ப⁴தி;
‘‘Yassa sammukhaciṇṇena, mittadhammo na labbhati;
அனுஸூயமனக்கோஸங், ஸணிகங் தம்ஹா அபக்கமே’’ந்தி.
Anusūyamanakkosaṃ, saṇikaṃ tamhā apakkame’’nti.
தத்த² அகதஞ்ஞுந்தி கதகு³ணங் அஜானந்தங். அகத்தாரந்தி யங்கிஞ்சி அகரொந்தங். ஸம்முக²சிண்ணேனாதி ஸம்முகே² கதேன கு³ணேன. அனுஸூயமனக்கோஸந்தி தங் புக்³க³லங் ந உஸூயந்தோ ந அக்கோஸந்தோ ஸணிகங் தம்ஹா பாபபுக்³க³லா அபக³ச்செ²ய்யாதி. ஏவங் வத்வா ஸோ ஸகுணோ பக்காமி.
Tattha akataññunti kataguṇaṃ ajānantaṃ. Akattāranti yaṃkiñci akarontaṃ. Sammukhaciṇṇenāti sammukhe katena guṇena. Anusūyamanakkosanti taṃ puggalaṃ na usūyanto na akkosanto saṇikaṃ tamhā pāpapuggalā apagaccheyyāti. Evaṃ vatvā so sakuṇo pakkāmi.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ ஸீஹோ தே³வத³த்தோ அஹோஸி, ஸகுணோ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā sīho devadatto ahosi, sakuṇo pana ahameva ahosi’’nti.
ஸகுணஜாதகவண்ணனா அட்ட²மா.
Sakuṇajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 308. ஸகுணஜாதகங் • 308. Sakuṇajātakaṃ
