| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
সলাকভত্তকথা
Salākabhattakathā
সলাকভত্তং পন এৰং ৰেদিতব্বন্তি যোজনা। ‘‘ৰচনতো’’তি পদং ‘‘দাতব্বা’’তি পদে ঞাপকহেতু। সলাকায ৰাতি কুসদণ্ডে ৰা। অসুকস্স নামাতি অসুকস্স নাম উপাসকস্স। উপনিবন্ধিত্ৰাতি লিখিত্ৰা, ছিন্দিত্ৰাতি অত্থো। ‘‘ওপুঞ্জিত্ৰা’’তি পদস্স অত্থং দস্সেন্তো আহ ‘‘পুনপ্পুনং হেট্ঠুপরিযৰসেন আলোল়েত্ৰা’’তি। ভত্তুদ্দেসকেন দাতব্বাতি সম্বন্ধো।
Salākabhattaṃ pana evaṃ veditabbanti yojanā. ‘‘Vacanato’’ti padaṃ ‘‘dātabbā’’ti pade ñāpakahetu. Salākāya vāti kusadaṇḍe vā. Asukassa nāmāti asukassa nāma upāsakassa. Upanibandhitvāti likhitvā, chinditvāti attho. ‘‘Opuñjitvā’’ti padassa atthaṃ dassento āha ‘‘punappunaṃ heṭṭhupariyavasena āloḷetvā’’ti. Bhattuddesakena dātabbāti sambandho.
ন বহুকাতি অপ্পকা। গামৰসেনপীতি যেভুয্যেন সমানলাভগামৰসেনপি। পিসদ্দেন কুলং অপেক্খতি। গাহেন্তেন গাহিতানেৰাতি সম্বন্ধো। সট্ঠিসলাকভত্তানি হোন্তীতি যোজনা। তেসন্তি দ্ৰিন্নং তিণ্ণং সলাকভত্তানং।
Na bahukāti appakā. Gāmavasenapīti yebhuyyena samānalābhagāmavasenapi. Pisaddena kulaṃ apekkhati. Gāhentena gāhitānevāti sambandho. Saṭṭhisalākabhattāni hontīti yojanā. Tesanti dvinnaṃ tiṇṇaṃ salākabhattānaṃ.
তন্তি বহুসলাকভত্তগামং। তং পনাতি একসলাকভত্তং পন। এতেসূতি ভিক্খূসু। নিগ্গহেনাতি দূরত্তা অনিচ্ছন্তস্সপি একস্স নিগ্গহেন। তন্তি সলাকভত্তং। ওরিমগামেতি ওরভাগে ঠিতে গামে। গাহিতসঞ্ঞাযাতি গাহিতা ইতি সঞ্ঞায। পুন ৰিহারং আগন্ত্ৰাতি পুন ৰিহারং অনাগন্ত্ৰা ওরিমগামে সলাকভত্তানি পঠমং গহেত্ৰা পচ্ছা ৰিহারং আগন্ত্ৰা অত্তনো পাপেত্ৰা ভুঞ্জিতুম্পি ৰট্টতি। কস্মা পুন ৰিহারো আগন্তব্বো, ননু অগাহিতোপি অত্তনো পত্তত্তা গহেত্ৰা ভুঞ্জিতুং ৰট্টতীতি আহ ‘‘ন হী’’তিআদি। হি যস্মা বহিসীমায সঙ্ঘলাভো গাহেতুং ন লব্ভতি, তস্মা ৰিহারো আগন্তব্বোতি যোজনা। একবাহৰসেন ৰাতি একায ঘরপাল়িসঙ্খাতায বাহাযৰসেন ৰা। ৰীথিআদীসু চাতি ৰীথিবাহকুলেসু চ, নিদ্ধারণে ভুম্মং। যত্থাতি যস্মিং ঠানে। সলাকাসু অসতি অসন্তাসূতি যোজনা। উদ্দিসিত্ৰাপীতি ‘‘অসুকগামস্স সলাকভত্তানি তুয্হং পাপুণন্তী’’তি গামাদীনি উদ্দিসিত্ৰাপি।
Tanti bahusalākabhattagāmaṃ. Taṃ panāti ekasalākabhattaṃ pana. Etesūti bhikkhūsu. Niggahenāti dūrattā anicchantassapi ekassa niggahena. Tanti salākabhattaṃ. Orimagāmeti orabhāge ṭhite gāme. Gāhitasaññāyāti gāhitā iti saññāya. Puna vihāraṃ āgantvāti puna vihāraṃ anāgantvā orimagāme salākabhattāni paṭhamaṃ gahetvā pacchā vihāraṃ āgantvā attano pāpetvā bhuñjitumpi vaṭṭati. Kasmā puna vihāro āgantabbo, nanu agāhitopi attano pattattā gahetvā bhuñjituṃ vaṭṭatīti āha ‘‘na hī’’tiādi. Hi yasmā bahisīmāya saṅghalābho gāhetuṃ na labbhati, tasmā vihāro āgantabboti yojanā. Ekabāhavasena vāti ekāya gharapāḷisaṅkhātāya bāhāyavasena vā. Vīthiādīsu cāti vīthibāhakulesu ca, niddhāraṇe bhummaṃ. Yatthāti yasmiṃ ṭhāne. Salākāsu asati asantāsūti yojanā. Uddisitvāpīti ‘‘asukagāmassa salākabhattāni tuyhaṃ pāpuṇantī’’ti gāmādīni uddisitvāpi.
তমেৰত্থং ৰিত্থারেন্তো আহ ‘‘তেন হী’’তিআদি। তত্থ তেনাতি সলাকদাযকেন ভিক্খুনা। গাহেতব্বন্তি সম্বন্ধো। ৰারগামেতি অতিদূরত্তা ৰারেন গন্তব্বে গামে। তত্রাতি তং গামং।
Tamevatthaṃ vitthārento āha ‘‘tena hī’’tiādi. Tattha tenāti salākadāyakena bhikkhunā. Gāhetabbanti sambandho. Vāragāmeti atidūrattā vārena gantabbe gāme. Tatrāti taṃ gāmaṃ.
অতিরেকগাৰুতেতি গাৰুততো অতিরেকে ঠানে। তংদিৰসন্তি তস্মিং সলাকভত্তগহণদিৰসে। যো ন গচ্ছতি, তস্স ন দাতব্বাতি যোজনা। হীতি যস্মা। তীণি পন দিৰসানীতি অচ্চন্তসংযোগে চেতং উপযোগৰচনং। তন্তি ওরিমৰারগামসলাকং। দণ্ডকম্মং পন কিন্তি গাল়্হং কাতব্বন্তি আহ ‘‘সট্ঠিতো ৰা পণ্ণাসতো ৰা ন পরিহাপেতব্ব’’ন্তি। ৰিহারৰারোতি ৰিহারস্স রক্খনত্থায ৰারো। ৰিহারৰারিকস্সাতি ৰিহারং ৰারেন, ৰারং গহেত্ৰা ৰা রক্খতীতি ৰিহারৰারিকো, তস্স দাতব্বাতি সম্বন্ধো। ৰিহারগোপকাতি ৰিহারং গোপেন্তীতি ৰিহারগোপকা। অঞ্ঞথত্তন্তি পসাদঞ্ঞথত্তং। অঞ্ঞেসু কুলেসু দাতব্বাতি অঞ্ঞেসং কুলানং যাগুআদযো দাতব্বা।
Atirekagāvuteti gāvutato atireke ṭhāne. Taṃdivasanti tasmiṃ salākabhattagahaṇadivase. Yo na gacchati, tassa na dātabbāti yojanā. Hīti yasmā. Tīṇi pana divasānīti accantasaṃyoge cetaṃ upayogavacanaṃ. Tanti orimavāragāmasalākaṃ. Daṇḍakammaṃ pana kinti gāḷhaṃ kātabbanti āha ‘‘saṭṭhito vā paṇṇāsato vā na parihāpetabba’’nti. Vihāravāroti vihārassa rakkhanatthāya vāro. Vihāravārikassāti vihāraṃ vārena, vāraṃ gahetvā vā rakkhatīti vihāravāriko, tassa dātabbāti sambandho. Vihāragopakāti vihāraṃ gopentīti vihāragopakā. Aññathattanti pasādaññathattaṃ. Aññesu kulesu dātabbāti aññesaṃ kulānaṃ yāguādayo dātabbā.
ৰারং গাহেত্ৰাতি অঞ্ঞেহি ৰারং গাহাপেত্ৰা। নেসন্তি ৰিহারৰারিকানং। সলাকাতি পকতিকত্তারং অপেক্খিত্ৰা ‘‘ভৰন্তী’’তি বহুৰচনৰসেন ৰুত্তং। ফাতিকম্মমেৰাতি ৰিহাররক্খনত্থায সঙ্ঘেন দাতব্বফাতিকম্মমেৰ। অঞ্ঞম্পীতি পিসদ্দেন ন কেৰলং ফাতিকম্মমেৰ, অঞ্ঞম্পীতি দস্সেতি। অতিরেকউত্তরিভঙ্গস্সাতি অতিরেকং উত্তরিভঙ্গমেতস্সাতি অতিরেকউত্তরিভঙ্গং, তস্স।
Vāraṃ gāhetvāti aññehi vāraṃ gāhāpetvā. Nesanti vihāravārikānaṃ. Salākāti pakatikattāraṃ apekkhitvā ‘‘bhavantī’’ti bahuvacanavasena vuttaṃ. Phātikammamevāti vihārarakkhanatthāya saṅghena dātabbaphātikammameva. Aññampīti pisaddena na kevalaṃ phātikammameva, aññampīti dasseti. Atirekauttaribhaṅgassāti atirekaṃ uttaribhaṅgametassāti atirekauttaribhaṅgaṃ, tassa.
সলাকা লদ্ধাতি সলাকা এৰ লদ্ধা। তংদিৰসন্তি তস্মিং সলাকলদ্ধদিৰসে। একস্সেৰাতি একেকস্সেৰ। ৰিজটেত্ৰাতি তানি দ্ৰে তীণি একচারিকভত্তানি ৰিজটং নিগুম্বং কত্ৰা।
Salākā laddhāti salākā eva laddhā. Taṃdivasanti tasmiṃ salākaladdhadivase. Ekassevāti ekekasseva. Vijaṭetvāti tāni dve tīṇi ekacārikabhattāni vijaṭaṃ nigumbaṃ katvā.
একসম্ভোগাতি একতো সম্ভোগা। গাহেন্তেন দাতুন্তি সম্বন্ধো। সম্মুখীভূতস্সাতি উপচারসীমাযং ঠিতস্স যস্স কস্সচি, পাপেত্ৰাতি যোজনা। রসসলাকন্তি উচ্ছুসলাকং। ‘‘রসালসলাক’’ন্তিপি পাঠো, অযমেৰত্থো। খুদ্দকৰিহারে গাহেতব্বৰিধানং দস্সেত্ৰা মহাআৰাসে তং দস্সেন্তো আহ ‘‘মহাআৰাসে’’তিআদি।
Ekasambhogāti ekato sambhogā. Gāhentena dātunti sambandho. Sammukhībhūtassāti upacārasīmāyaṃ ṭhitassa yassa kassaci, pāpetvāti yojanā. Rasasalākanti ucchusalākaṃ. ‘‘Rasālasalāka’’ntipi pāṭho, ayamevattho. Khuddakavihāre gāhetabbavidhānaṃ dassetvā mahāāvāse taṃ dassento āha ‘‘mahāāvāse’’tiādi.
‘‘তক্কসলাকম্পি …পে॰… দাতুং ৰট্টতী’’তি ইদং খুদ্দকৰিহারং সন্ধায ৰুত্তং, তেন ৰুত্তং ‘‘মহাআৰাসে’’তিআদি। ভেসজ্জাদিসলাকাযোতি এত্থ আদিসদ্দেন গন্ধমালাসলাকাযো সঙ্গণ্হাতি। এত্থাতি সলাকাসু। অগ্গভিক্খমত্তন্তি অগ্গতো দাতব্বং ভিক্খামত্তং। তাদিসানি ভত্তানীতি অগ্গভিক্খামত্তসভাৰানি ভত্তানি। নো চেতি তাদিসানি ভত্তানি বহূনি নো চে হোন্তি। লদ্ধা ৰা অলদ্ধা ৰাতি লভিত্ৰা ৰা অলভিত্ৰা ৰা।
‘‘Takkasalākampi …pe… dātuṃ vaṭṭatī’’ti idaṃ khuddakavihāraṃ sandhāya vuttaṃ, tena vuttaṃ ‘‘mahāāvāse’’tiādi. Bhesajjādisalākāyoti ettha ādisaddena gandhamālāsalākāyo saṅgaṇhāti. Etthāti salākāsu. Aggabhikkhamattanti aggato dātabbaṃ bhikkhāmattaṃ. Tādisāni bhattānīti aggabhikkhāmattasabhāvāni bhattāni. No ceti tādisāni bhattāni bahūni no ce honti. Laddhā vā aladdhā vāti labhitvā vā alabhitvā vā.
সলাকাসু গাহিতাসূতি অঞ্ঞাসু সলাকাসু গাহিতাসু। সমীপে ঠিতস্সাতি হত্থং অপসারেত্ৰা সমীপে ঠিতস্স। অস্সাতি ভিক্খুস্স। অযং সলাকাতি ‘‘অযং তস্স সলাকা’’তি ঠপেতুং ৰট্টতি। অধম্মিকাতি কতিকা অধম্মযুত্তা। অনাগতস্স দেথাতি অনাগতস্স ভিক্খুস্স সলাকং দেথ।
Salākāsu gāhitāsūti aññāsu salākāsu gāhitāsu. Samīpe ṭhitassāti hatthaṃ apasāretvā samīpe ṭhitassa. Assāti bhikkhussa. Ayaṃ salākāti ‘‘ayaṃ tassa salākā’’ti ṭhapetuṃ vaṭṭati. Adhammikāti katikā adhammayuttā. Anāgatassa dethāti anāgatassa bhikkhussa salākaṃ detha.
সোতি ভত্তুদ্দেসকো, ৰদেয্যাতি সম্বন্ধো। মযা ময্হং পাপিতন্তি সম্বন্ধো। তত্থাতি গামে। ভুঞ্জেয্যাথ ইতি ৰদেয্য, ৰট্টতীতি যোজনা। তত্থেৰাতি অসনসালাযমেৰ। তত্রাতি তস্মিং গামে। ৰিহারং আনেত্ৰাতি ৰিহারং সলাকভত্তং আনেত্ৰা। সলাকগ্গাহণকালেতি সলাকায ভিক্খূহি গাহাপনকালে।
Soti bhattuddesako, vadeyyāti sambandho. Mayā mayhaṃ pāpitanti sambandho. Tatthāti gāme. Bhuñjeyyātha iti vadeyya, vaṭṭatīti yojanā. Tatthevāti asanasālāyameva. Tatrāti tasmiṃ gāme. Vihāraṃ ānetvāti vihāraṃ salākabhattaṃ ānetvā. Salākaggāhaṇakāleti salākāya bhikkhūhi gāhāpanakāle.
তত্থাতি তস্মিং দিসাভাগে। অঞ্ঞেনাতি অত্তনা অঞ্ঞেন, লদ্ধা হোতীতি সম্বন্ধো। তেন পনাতি গমিকতো ইতরেন। তস্মিন্তি গমিকে। উপচারসীমং অনতিক্কন্তেযেৰাতি যোজনা।
Tatthāti tasmiṃ disābhāge. Aññenāti attanā aññena, laddhā hotīti sambandho. Tena panāti gamikato itarena. Tasminti gamike. Upacārasīmaṃ anatikkanteyevāti yojanā.
তত্থাতি ছড্ডিতৰিহারে। তেসূতি আৰাসিকেসু ভিক্খূসু, গতেসূতি সম্বন্ধো। সোৰাতি আগন্তুকো এৰ। যো পন গচ্ছতীতি সম্বন্ধো। তন্তি সলাকভত্তং, ন পাপুণাতীতি সম্বন্ধো।
Tatthāti chaḍḍitavihāre. Tesūti āvāsikesu bhikkhūsu, gatesūti sambandho. Sovāti āgantuko eva. Yo pana gacchatīti sambandho. Tanti salākabhattaṃ, na pāpuṇātīti sambandho.
পুঞ্ঞেনাতি পুঞ্ঞস্মা। তা চ খো পনাতি সলাকাযো পন। পচ্ছিং পনাতি সলাকপচ্ছিং পন। তত্থাতি পচ্ছিযং। এত্তোৰাতি আকিরণট্ঠানতোৰ। একন্তি একং সলাকং। ৰত্তব্বন্তি সলাকদাযকেন ৰত্তব্বং।
Puññenāti puññasmā. Tā ca kho panāti salākāyo pana. Pacchiṃ panāti salākapacchiṃ pana. Tatthāti pacchiyaṃ. Ettovāti ākiraṇaṭṭhānatova. Ekanti ekaṃ salākaṃ. Vattabbanti salākadāyakena vattabbaṃ.
ভিক্খূ গতাতি সম্বন্ধো। তত্থাতি অঞ্ঞস্মিং ৰিহারে। মহাথেরোপি গচ্ছতীতি সম্বন্ধো। গতৰিহারে অভুঞ্জিত্ৰাৰ গোচরগামং অনুপ্পত্তেহি ভিক্খূহি পত্তা ন দাতব্বাতি যোজনা। ৰিহারট্ঠকং ভত্তন্তি ৰিহারে ঠিতং ভত্তং।
Bhikkhū gatāti sambandho. Tatthāti aññasmiṃ vihāre. Mahātheropi gacchatīti sambandho. Gatavihāre abhuñjitvāva gocaragāmaṃ anuppattehi bhikkhūhi pattā na dātabbāti yojanā. Vihāraṭṭhakaṃ bhattanti vihāre ṭhitaṃ bhattaṃ.
