| Library / Tipiṭaka / д̇ибидага • Tipiṭaka / жуул̣аваг̇г̇а-адтагат̇аа • Cūḷavagga-aṭṭhakathā |
салаагабхад̇д̇агат̇аа
Salākabhattakathā
салаагабхад̇д̇з бана ‘‘ануж̇аанаами, бхигкавз, салаагааяа ваа баддигааяа ваа убаниб̣анд̇хид̇ваа обун̃ж̇ид̇ваа уд̣̇д̣̇исид̇у’’нд̇и важанад̇о ругкасаарамаяааяа салаагааяа ваа взл̣увилийвад̇аалабан̣н̣аад̣̇имаяааяа баддигааяа ваа ‘‘асугасса наама салаагабхад̇д̇а’’нд̇и звам̣ агкараани убаниб̣анд̇хид̇ваа бажчияам̣ ваа жийварабхог̇з ваа гад̇ваа саб̣б̣аа салаагааяо обун̃ж̇ид̇ваа бунаббунам̣ хздтубаривасзнзва аалол̣зд̇ваа бан̃жан̇г̇асаманнааг̇ад̇зна бхад̇д̇уд̣̇д̣̇зсагзна сажз тид̇игаа ад̇т̇и, тид̇игад̇о бадтааяа; но жз ад̇т̇и, т̇зраасанад̇о бадтааяа салаагаа д̣̇аад̇аб̣б̣аа. бажчаа ааг̇ад̇аанамби згааб̣ад̣̇д̇хавасзна д̣̇уурз тид̇аанамби уд̣̇д̣̇зсабхад̇д̇з вуд̇д̇анаязнзва д̣̇аад̇аб̣б̣аа.
Salākabhatte pana ‘‘anujānāmi, bhikkhave, salākāya vā paṭṭikāya vā upanibandhitvā opuñjitvā uddisitu’’nti vacanato rukkhasāramayāya salākāya vā veḷuvilīvatālapaṇṇādimayāya paṭṭikāya vā ‘‘asukassa nāma salākabhatta’’nti evaṃ akkharāni upanibandhitvā pacchiyaṃ vā cīvarabhoge vā katvā sabbā salākāyo opuñjitvā punappunaṃ heṭṭhuparivaseneva āloḷetvā pañcaṅgasamannāgatena bhattuddesakena sace ṭhitikā atthi, ṭhitikato paṭṭhāya; no ce atthi, therāsanato paṭṭhāya salākā dātabbā. Pacchā āgatānampi ekābaddhavasena dūre ṭhitānampi uddesabhatte vuttanayeneva dātabbā.
сажз вихаарасса саманд̇ад̇о б̣ахуу г̇ожараг̇аамаа, бхигкуу бана на б̣ахугаа, г̇аамавасзнаби салаагааяо баабун̣анд̇и, ‘‘д̇умхаагам̣ асугаг̇аамз салаагабхад̇д̇ам̣ баабун̣аад̇ий’’д̇и г̇аамавасзнзва г̇аахзд̇аб̣б̣аа. звам̣ г̇аахзнд̇зна сажзби згзгасмим̣ г̇аамз наанаббагаараани садтисалаагабхад̇д̇аани, саб̣б̣аани г̇аахид̇аанзва хонд̇и, д̇асса бад̇д̇аг̇аамасамийбз ан̃н̃ааниби д̣̇вз д̇ийн̣и салаагабхад̇д̇аани хонд̇и, д̇ааниби д̇ассзва д̣̇аад̇аб̣б̣аани. на хи саггаа д̇зсам̣ гааран̣аа ан̃н̃ам̣ бхигкум̣ бахин̣ид̇унд̇и.
Sace vihārassa samantato bahū gocaragāmā, bhikkhū pana na bahukā, gāmavasenapi salākāyo pāpuṇanti, ‘‘tumhākaṃ asukagāme salākabhattaṃ pāpuṇātī’’ti gāmavaseneva gāhetabbā. Evaṃ gāhentena sacepi ekekasmiṃ gāme nānappakārāni saṭṭhisalākabhattāni, sabbāni gāhitāneva honti, tassa pattagāmasamīpe aññānipi dve tīṇi salākabhattāni honti, tānipi tasseva dātabbāni. Na hi sakkā tesaṃ kāraṇā aññaṃ bhikkhuṃ pahiṇitunti.
сажз згажжзсу г̇аамзсу б̣ахууни салаагабхад̇д̇аани саллагкзд̇ваа сад̇д̇аннамби адтаннамби бхигкуунам̣ д̣̇аад̇аб̣б̣аани. д̣̇ад̣̇анд̇зна бана жад̇уннам̣ бан̃жаннам̣ бхад̇д̇аанам̣ салаагааяо згад̇о б̣анд̇хид̇ваа д̣̇аад̇аб̣б̣аа. сажз д̇ам̣ г̇аамам̣ ад̇иггамид̇ваа ан̃н̃о г̇аамо ход̇и, д̇асмин̃жа згамзва салаагабхад̇д̇ам̣, д̇ам̣ бана баад̇ова д̣̇знд̇и, д̇амби зд̇зсу бхигкуусу згасса ниг̇г̇ахзна д̣̇ад̇ваа ‘‘баад̇ова д̇ам̣ г̇ахзд̇ваа бажчаа оримаг̇аамз ид̇араани бхад̇д̇аани г̇ан̣хаахий’’д̇и вад̇д̇аб̣б̣о. сажз оримаг̇аамз салаагабхад̇д̇зсу аг̇аахид̇зсвзва г̇аахид̇асан̃н̃ааяа г̇ажчад̇и, барабхааг̇аг̇аамз салаагабхад̇д̇ам̣ г̇аахзд̇ваа буна вихаарам̣ ааг̇анд̇ваа ид̇араани г̇аахзд̇ваа оримаг̇аамо г̇анд̇аб̣б̣о. ‘‘на хи б̣ахисиймааяа сан̇гхалаабхо г̇аахзд̇ум̣ лаб̣бхад̇ий’’д̇и аяам̣ наяо гурунд̣̇ияам̣ вуд̇д̇о.
Sace ekaccesu gāmesu bahūni salākabhattāni sallakkhetvā sattannampi aṭṭhannampi bhikkhūnaṃ dātabbāni. Dadantena pana catunnaṃ pañcannaṃ bhattānaṃ salākāyo ekato bandhitvā dātabbā. Sace taṃ gāmaṃ atikkamitvā añño gāmo hoti, tasmiñca ekameva salākabhattaṃ, taṃ pana pātova denti, tampi etesu bhikkhūsu ekassa niggahena datvā ‘‘pātova taṃ gahetvā pacchā orimagāme itarāni bhattāni gaṇhāhī’’ti vattabbo. Sace orimagāme salākabhattesu agāhitesveva gāhitasaññāya gacchati, parabhāgagāme salākabhattaṃ gāhetvā puna vihāraṃ āgantvā itarāni gāhetvā orimagāmo gantabbo. ‘‘Na hi bahisīmāya saṅghalābho gāhetuṃ labbhatī’’ti ayaṃ nayo kurundiyaṃ vutto.
сажз бана бхигкуу б̣ахуу хонд̇и, г̇аамавасзна салаагаа на баабун̣анд̇и, вийт̇ивасзна ваа вийт̇ияам̣ згаг̇зхавасзна ваа гулавасзна ваа г̇аахзд̇аб̣б̣аа. вийт̇иаад̣̇ийсу жа яад̇т̇а б̣ахууни бхад̇д̇аани, д̇ад̇т̇а г̇аамз вуд̇д̇анаязнзва б̣ахуунам̣ бхигкуунам̣ г̇аахзд̇аб̣б̣аани. салаагаасу асад̇и уд̣̇д̣̇исид̇вааби г̇аахзд̇аб̣б̣аани.
Sace pana bhikkhū bahū honti, gāmavasena salākā na pāpuṇanti, vīthivasena vā vīthiyaṃ ekagehavasena vā kulavasena vā gāhetabbā. Vīthiādīsu ca yattha bahūni bhattāni, tattha gāme vuttanayeneva bahūnaṃ bhikkhūnaṃ gāhetabbāni. Salākāsu asati uddisitvāpi gāhetabbāni.
салаагад̣̇ааяагзна бана вад̇д̇ам̣ ж̇аанид̇аб̣б̣ам̣. д̇зна хи гаалассзва вудтааяа бад̇д̇ажийварам̣ г̇ахзд̇ваа бхож̇анасаалам̣ г̇анд̇ваа асаммадтадтаанам̣ саммаж̇ж̇ид̇ваа баанийяам̣ барибхож̇анийяам̣ убадтаабзд̇ваа ‘‘ид̣̇аани бхигкуухи вад̇д̇ам̣ гад̇ам̣ бхависсад̇ий’’д̇и гаалам̣ саллагкзд̇ваа гхан̣дим̣ бахарид̇ваа бхигкуусу саннибад̇ид̇зсу батамамзва ваараг̇аамз салаагабхад̇д̇ам̣ г̇аахзд̇аб̣б̣ам̣. ‘‘д̇уяхам̣ асугасмим̣ наама ваараг̇аамз салаагаа баабун̣аад̇и д̇ад̇ра г̇ажчаа’’д̇и вад̇д̇аб̣б̣ам̣.
Salākadāyakena pana vattaṃ jānitabbaṃ. Tena hi kālasseva vuṭṭhāya pattacīvaraṃ gahetvā bhojanasālaṃ gantvā asammaṭṭhaṭṭhānaṃ sammajjitvā pānīyaṃ paribhojanīyaṃ upaṭṭhāpetvā ‘‘idāni bhikkhūhi vattaṃ kataṃ bhavissatī’’ti kālaṃ sallakkhetvā ghaṇṭiṃ paharitvā bhikkhūsu sannipatitesu paṭhamameva vāragāme salākabhattaṃ gāhetabbaṃ. ‘‘Tuyhaṃ asukasmiṃ nāma vāragāme salākā pāpuṇāti tatra gacchā’’ti vattabbaṃ.
сажз ад̇ирзгаг̇аавуд̇з г̇аамо ход̇и, д̇ам̣ д̣̇ивасам̣ г̇ажчанд̇аа гиламанд̇и, ‘‘свз д̇уяхам̣ ваараг̇аамз баабун̣аад̇ий’’д̇и аж̇ж̇зва г̇аахзд̇аб̣б̣ам̣. яо ваараг̇аамам̣ бзсияамаано на г̇ажчад̇и, ан̃н̃ам̣ салаагам̣ маг̇г̇ад̇и, на д̣̇аад̇аб̣б̣аа. сад̣̇д̇хаанан̃хи мануссаанам̣ бун̃н̃ахаани сан̇гхасса жа лаабхажчзд̣̇о ход̇и, д̇асмаа д̇асса д̣̇уд̇иязби д̇ад̇иязби д̣̇ивасз ан̃н̃аа салаагаа на д̣̇аад̇аб̣б̣аа, ‘‘ад̇д̇ано бад̇д̇адтаанам̣ г̇анд̇ваа бхун̃ж̇аахий’’д̇и вад̇д̇аб̣б̣о, д̇ийн̣и бана д̣̇ивасаани аг̇ажчанд̇асса ваараг̇аамад̇о оримаваараг̇аамз салаагаа г̇аахзд̇аб̣б̣аа. д̇ан̃жз на г̇ан̣хаад̇и, д̇ад̇о бадтааяа д̇асса ан̃н̃ам̣ салаагам̣ д̣̇аад̇ум̣ на ваддад̇и, д̣̇ан̣д̣агаммам̣ бана г̇аал̣хам̣ гаад̇аб̣б̣ам̣, садтид̇о ваа бан̣н̣аасад̇о ваа на барихаабзд̇аб̣б̣ам̣. ваараг̇аамз г̇аахзд̇ваа вихааравааро г̇аахзд̇аб̣б̣о, ‘‘д̇уяхам̣ вихааравааро баабун̣аад̇ий’’д̇и вад̇д̇аб̣б̣ам̣. вихааравааригасса д̣̇вз д̇иссо яааг̇усалаагааяо д̇иссо жад̇ассо ваа бхад̇д̇асалаагааяо жа д̣̇аад̇аб̣б̣аа, ниб̣ад̣̇д̇хам̣ гад̇ваа бана на д̣̇аад̇аб̣б̣аа. яааг̇убхад̇д̇ад̣̇ааяагаа хи ‘‘амхаагам̣ яааг̇убхад̇д̇ам̣ вихаараг̇обагаава бхун̃ж̇анд̇ий’’д̇и ан̃н̃ат̇ад̇д̇ам̣ аабаж̇ж̇зяяум̣, д̇асмаа ан̃н̃зсу гулзсу д̣̇аад̇аб̣б̣аа.
Sace atirekagāvute gāmo hoti, taṃ divasaṃ gacchantā kilamanti, ‘‘sve tuyhaṃ vāragāme pāpuṇātī’’ti ajjeva gāhetabbaṃ. Yo vāragāmaṃ pesiyamāno na gacchati, aññaṃ salākaṃ maggati, na dātabbā. Saddhānañhi manussānaṃ puññahāni saṅghassa ca lābhacchedo hoti, tasmā tassa dutiyepi tatiyepi divase aññā salākā na dātabbā, ‘‘attano pattaṭṭhānaṃ gantvā bhuñjāhī’’ti vattabbo, tīṇi pana divasāni agacchantassa vāragāmato orimavāragāme salākā gāhetabbā. Tañce na gaṇhāti, tato paṭṭhāya tassa aññaṃ salākaṃ dātuṃ na vaṭṭati, daṇḍakammaṃ pana gāḷhaṃ kātabbaṃ, saṭṭhito vā paṇṇāsato vā na parihāpetabbaṃ. Vāragāme gāhetvā vihāravāro gāhetabbo, ‘‘tuyhaṃ vihāravāro pāpuṇātī’’ti vattabbaṃ. Vihāravārikassa dve tisso yāgusalākāyo tisso catasso vā bhattasalākāyo ca dātabbā, nibaddhaṃ katvā pana na dātabbā. Yāgubhattadāyakā hi ‘‘amhākaṃ yāgubhattaṃ vihāragopakāva bhuñjantī’’ti aññathattaṃ āpajjeyyuṃ, tasmā aññesu kulesu dātabbā.
сажз вихааравааригаанам̣ сабхааг̇аа аахарид̇ваа д̣̇знд̇и, ижжзд̇ам̣ гусалам̣; но жз, ваарам̣ г̇аахзд̇ваа д̇зсам̣ яааг̇убхад̇д̇ам̣ аахараабзд̇аб̣б̣ам̣. д̇аава нзсам̣ салаагаа паад̇игаммамзва бхаванд̇и, вассаг̇г̇зна бад̇д̇адтаанз бана ан̃н̃амби бан̣ийд̇абхад̇д̇асалаагам̣ г̇ан̣хид̇ум̣ лабханд̇иязва. ад̇ирзгауд̇д̇арибхан̇г̇асса згажааригабхад̇д̇асса висум̣ тид̇игам̣ гад̇ваа салаагаа д̣̇аад̇аб̣б̣аа.
Sace vihāravārikānaṃ sabhāgā āharitvā denti, iccetaṃ kusalaṃ; no ce, vāraṃ gāhetvā tesaṃ yāgubhattaṃ āharāpetabbaṃ. Tāva nesaṃ salākā phātikammameva bhavanti, vassaggena pattaṭṭhāne pana aññampi paṇītabhattasalākaṃ gaṇhituṃ labhantiyeva. Atirekauttaribhaṅgassa ekacārikabhattassa visuṃ ṭhitikaṃ katvā salākā dātabbā.
сажз язна салаагаа лад̣̇д̇хаа, со д̇ам̣д̣̇ивасам̣ д̇ам̣ бхад̇д̇ам̣ на лабхад̇и, бунад̣̇ивасз г̇аахзд̇аб̣б̣ам̣. бхад̇д̇амзва лабхад̇и, на уд̇д̇арибхан̇г̇ам̣; звамби буна г̇аахзд̇аб̣б̣ам̣. кийрабхад̇д̇асса салаагааяаби зсзва наяо. сажз бана кийрамзва лабхад̇и, на бхад̇д̇ам̣; кийралаабхад̇о бадтааяа буна на г̇аахзд̇аб̣б̣ам̣. д̣̇вз д̇ийн̣и згажааригабхад̇д̇аани згассзва баабун̣анд̇и, д̣̇уб̣бхигкасамаяз сан̇гханавагзна лад̣̇д̇хагаалз виж̇адзд̇ваа висум̣ г̇аахзд̇аб̣б̣аани, баагад̇игасалаагабхад̇д̇ам̣ алад̣̇д̇хассааби бунад̣̇ивасз г̇аахзд̇аб̣б̣ам̣.
Sace yena salākā laddhā, so taṃdivasaṃ taṃ bhattaṃ na labhati, punadivase gāhetabbaṃ. Bhattameva labhati, na uttaribhaṅgaṃ; evampi puna gāhetabbaṃ. Khīrabhattassa salākāyapi eseva nayo. Sace pana khīrameva labhati, na bhattaṃ; khīralābhato paṭṭhāya puna na gāhetabbaṃ. Dve tīṇi ekacārikabhattāni ekasseva pāpuṇanti, dubbhikkhasamaye saṅghanavakena laddhakāle vijaṭetvā visuṃ gāhetabbāni, pākatikasalākabhattaṃ aladdhassāpi punadivase gāhetabbaṃ.
сажз куд̣̇д̣̇аго вихааро ход̇и, саб̣б̣з бхигкуу згасамбхог̇аа, ужчусалаагам̣ г̇аахзнд̇зна яасса гассажи саммукийбхууд̇асса баабзд̇ваа махаат̇зраад̣̇ийнам̣ д̣̇иваа д̇ажчзд̇ваа д̣̇аад̇ум̣ ваддад̇и. расасалаагам̣ баабзд̇ваа бажчаабхад̇д̇ам̣ бариссаавзд̇ваа ваа паан̣ид̇ам̣ ваа гаарзд̇ваа бин̣д̣абаад̇игаад̣̇ийнамби д̣̇аад̇аб̣б̣ам̣ . ааг̇анд̇угаанам̣ ааг̇ад̇аанааг̇ад̇абхаавам̣ н̃ад̇ваа г̇аахзд̇аб̣б̣аа, махааааваасз тид̇игам̣ гад̇ваа г̇аахзд̇аб̣б̣аа.
Sace khuddako vihāro hoti, sabbe bhikkhū ekasambhogā, ucchusalākaṃ gāhentena yassa kassaci sammukhībhūtassa pāpetvā mahātherādīnaṃ divā tacchetvā dātuṃ vaṭṭati. Rasasalākaṃ pāpetvā pacchābhattaṃ parissāvetvā vā phāṇitaṃ vā kāretvā piṇḍapātikādīnampi dātabbaṃ . Āgantukānaṃ āgatānāgatabhāvaṃ ñatvā gāhetabbā, mahāāvāse ṭhitikaṃ katvā gāhetabbā.
д̇аггасалаагамби сабхааг̇адтаанз баабзд̇ваа ваа бажаабзд̇ваа ваа д̇хуумаабзд̇ваа ваа т̇зраанам̣ д̣̇аад̇ум̣ ваддад̇и. махааааваасз вуд̇д̇анаязнзва бадибаж̇ж̇ид̇аб̣б̣ам̣ паласалаагабуувасалаагабхзсаж̇ж̇аг̇анд̇хамааласалаагааяоби висум̣ тид̇игааяа г̇аахзд̇аб̣б̣аа. бхзсаж̇ж̇аад̣̇исалаагааяо жзд̇т̇а гин̃жааби бин̣д̣абаад̇игаанамби вадданд̇и, салаагавасзна г̇аахид̇ад̇д̇аа бана на саад̣̇ид̇аб̣б̣аа. аг̇г̇абхигкаамад̇д̇ам̣ салаагабхад̇д̇ам̣ д̣̇знд̇и, тид̇игам̣ бужчид̇ваа г̇аахзд̇аб̣б̣ам̣. асад̇ияаа тид̇игааяа т̇зраасанад̇о бадтааяа г̇аахзд̇аб̣б̣ам̣. сажз д̇аад̣̇исаани бхад̇д̇аани б̣ахууни хонд̇и, згзгасса бхигкуно д̣̇вз д̇ийн̣и д̣̇аад̇аб̣б̣аани; но жз, згзгамзва д̣̇ад̇ваа бадибаадияаа г̇ад̇ааяа буна т̇зраасанад̇о бадтааяа д̣̇аад̇аб̣б̣ам̣. сажз анд̇араава убажчиж̇ж̇ад̇и, тид̇игаа саллагкзд̇аб̣б̣аа. яад̣̇и бана д̇аад̣̇исам̣ бхад̇д̇ам̣ ниб̣ад̣̇д̇хамзва ход̇и, яасса баабун̣аад̇и, со вад̇д̇аб̣б̣о ‘‘лад̣̇д̇хаа ваа алад̣̇д̇хаа ваа свзби г̇ан̣хзяяаасий’’д̇и. згам̣ аниб̣ад̣̇д̇хам̣ ход̇и, лабханад̣̇ивасз бана яаавад̣̇ад̇т̇ам̣ лабхад̇и, алабханад̣̇ивасаа б̣ахуд̇араа хонд̇и, д̇ам̣ яасса баабун̣аад̇и, со алабхид̇ваа ‘‘свз г̇ан̣хзяяаасий’’д̇и вад̇д̇аб̣б̣о.
Takkasalākampi sabhāgaṭṭhāne pāpetvā vā pacāpetvā vā dhūmāpetvā vā therānaṃ dātuṃ vaṭṭati. Mahāāvāse vuttanayeneva paṭipajjitabbaṃ phalasalākapūvasalākabhesajjagandhamālasalākāyopi visuṃ ṭhitikāya gāhetabbā. Bhesajjādisalākāyo cettha kiñcāpi piṇḍapātikānampi vaṭṭanti, salākavasena gāhitattā pana na sāditabbā. Aggabhikkhāmattaṃ salākabhattaṃ denti, ṭhitikaṃ pucchitvā gāhetabbaṃ. Asatiyā ṭhitikāya therāsanato paṭṭhāya gāhetabbaṃ. Sace tādisāni bhattāni bahūni honti, ekekassa bhikkhuno dve tīṇi dātabbāni; no ce, ekekameva datvā paṭipāṭiyā gatāya puna therāsanato paṭṭhāya dātabbaṃ. Sace antarāva upacchijjati, ṭhitikā sallakkhetabbā. Yadi pana tādisaṃ bhattaṃ nibaddhameva hoti, yassa pāpuṇāti, so vattabbo ‘‘laddhā vā aladdhā vā svepi gaṇheyyāsī’’ti. Ekaṃ anibaddhaṃ hoti, labhanadivase pana yāvadatthaṃ labhati, alabhanadivasā bahutarā honti, taṃ yassa pāpuṇāti, so alabhitvā ‘‘sve gaṇheyyāsī’’ti vattabbo.
яо салаагаасу г̇аахид̇аасу бажчаа ааг̇ажчад̇и, д̇асса ад̇игганд̇аава салаагаа на убадтаабзд̇ваа д̣̇аад̇аб̣б̣аа. салаагам̣ наама гхан̣диббахаран̣ад̇о бадтааяа ааг̇анд̇ваа хад̇т̇ам̣ басаарзнд̇ова лабхад̇и. ан̃н̃асса ааг̇анд̇ваа самийбз тид̇ассааби ад̇игганд̇аа ад̇игганд̇аава ход̇и. сажз банасса ан̃н̃о г̇ан̣ханд̇о ад̇т̇и, саяам̣ анааг̇ад̇оби лабхад̇и. сабхааг̇адтаанз асуго анааг̇ад̇од̇и н̃ад̇ваа ‘‘аяам̣ д̇асса салаагаа’’д̇и табзд̇ум̣ ваддад̇и. сажз ‘‘анааг̇ад̇асса на д̣̇аад̇аб̣б̣аа’’д̇и гад̇игам̣ гаронд̇и, ад̇хаммигаа ход̇и. анд̇оубажаарз тид̇асса хи бхааж̇анийяабхан̣д̣ам̣ баабун̣аад̇и. сажз бана ‘‘анааг̇ад̇асса д̣̇зт̇аа’’д̇и махаасад̣̇д̣̇ам̣ гаронд̇и, д̣̇ан̣д̣агаммам̣ табзд̇аб̣б̣ам̣, ‘‘ааг̇анд̇ваа г̇ан̣ханд̇уу’’д̇и вад̇д̇аб̣б̣ам̣.
Yo salākāsu gāhitāsu pacchā āgacchati, tassa atikkantāva salākā na upaṭṭhāpetvā dātabbā. Salākaṃ nāma ghaṇṭippaharaṇato paṭṭhāya āgantvā hatthaṃ pasārentova labhati. Aññassa āgantvā samīpe ṭhitassāpi atikkantā atikkantāva hoti. Sace panassa añño gaṇhanto atthi, sayaṃ anāgatopi labhati. Sabhāgaṭṭhāne asuko anāgatoti ñatvā ‘‘ayaṃ tassa salākā’’ti ṭhapetuṃ vaṭṭati. Sace ‘‘anāgatassa na dātabbā’’ti katikaṃ karonti, adhammikā hoti. Antoupacāre ṭhitassa hi bhājanīyabhaṇḍaṃ pāpuṇāti. Sace pana ‘‘anāgatassa dethā’’ti mahāsaddaṃ karonti, daṇḍakammaṃ ṭhapetabbaṃ, ‘‘āgantvā gaṇhantū’’ti vattabbaṃ.
чаббан̃жасалаагаа надтаа хонд̇и, бхад̇д̇уд̣̇д̣̇зсаго д̣̇ааяагаанам̣ наамам̣ нассарад̇и, со жз надтасалаагаа махаат̇зрасса ваа ад̇д̇ано ваа баабзд̇ваа бхигкуу вад̣̇зяяа, ‘‘маяаа асугаг̇аамз салаагабхад̇д̇ам̣ маяхам̣ баабид̇ам̣, д̇умхз д̇ад̇т̇а лад̣̇д̇хам̣ салаагабхад̇д̇ам̣ бхун̃ж̇зяяаат̇аа’’д̇и, ваддад̇и. вихаарз абаабид̇ам̣ бана аасанасаалааяа д̇ам̣ бхад̇д̇ам̣ лабхид̇ваа д̇ад̇т̇зва баабзд̇ваа бхун̃ж̇ид̇ум̣ на ваддад̇и. ‘‘аж̇ж̇а бадтааяа маяхам̣ салаагабхад̇д̇ам̣ г̇ан̣хат̇аа’’д̇и вуд̇д̇з д̇ад̇ра аасанасаалааяа г̇аахзд̇ум̣ на ваддад̇и, вихаарам̣ аанзд̇ваа г̇аахзд̇аб̣б̣ам̣. ‘‘свз бадтааяаа’’д̇и вуд̇д̇з бана бхад̇д̇уд̣̇д̣̇зсагасса аажигкид̇аб̣б̣ам̣ ‘‘свз бадтааяа асугагулам̣ наама салаагабхад̇д̇ам̣ д̣̇зд̇и, салаагаг̇г̇аахан̣агаалз сарзяяаасий’’д̇и. д̣̇уб̣бхигкз салаагабхад̇д̇ам̣ бажчинд̣̇ид̇ваа субхигкз ж̇аад̇з гин̃жи д̣̇исваа ‘‘аж̇ж̇а бадтааяа амхаагам̣ салаагабхад̇д̇ам̣ г̇ан̣хат̇аа’’д̇и буна бадтабзнд̇и, анд̇ог̇аамз аг̇аахзд̇ваа вихаарам̣ аанзд̇ваава г̇аахзд̇аб̣б̣ам̣. ид̣̇ан̃хи ‘‘салаагабхад̇д̇ам̣’’ наама. уд̣̇д̣̇зсабхад̇д̇асад̣̇исам̣ на ход̇и, вихаарамзва санд̇хааяа д̣̇ияяад̇и, д̇асмаа б̣ахиубажаарз г̇аахзд̇ум̣ на ваддад̇и. ‘‘свз бадтааяаа’’д̇и вуд̇д̇з бана вихаарз г̇аахзд̇аб̣б̣амзва.
Chappañcasalākā naṭṭhā honti, bhattuddesako dāyakānaṃ nāmaṃ nassarati, so ce naṭṭhasalākā mahātherassa vā attano vā pāpetvā bhikkhū vadeyya, ‘‘mayā asukagāme salākabhattaṃ mayhaṃ pāpitaṃ, tumhe tattha laddhaṃ salākabhattaṃ bhuñjeyyāthā’’ti, vaṭṭati. Vihāre apāpitaṃ pana āsanasālāya taṃ bhattaṃ labhitvā tattheva pāpetvā bhuñjituṃ na vaṭṭati. ‘‘Ajja paṭṭhāya mayhaṃ salākabhattaṃ gaṇhathā’’ti vutte tatra āsanasālāya gāhetuṃ na vaṭṭati, vihāraṃ ānetvā gāhetabbaṃ. ‘‘Sve paṭṭhāyā’’ti vutte pana bhattuddesakassa ācikkhitabbaṃ ‘‘sve paṭṭhāya asukakulaṃ nāma salākabhattaṃ deti, salākaggāhaṇakāle sareyyāsī’’ti. Dubbhikkhe salākabhattaṃ pacchinditvā subhikkhe jāte kiñci disvā ‘‘ajja paṭṭhāya amhākaṃ salākabhattaṃ gaṇhathā’’ti puna paṭṭhapenti, antogāme agāhetvā vihāraṃ ānetvāva gāhetabbaṃ. Idañhi ‘‘salākabhattaṃ’’ nāma. Uddesabhattasadisaṃ na hoti, vihārameva sandhāya diyyati, tasmā bahiupacāre gāhetuṃ na vaṭṭati. ‘‘Sve paṭṭhāyā’’ti vutte pana vihāre gāhetabbameva.
г̇амиго бхигку яам̣ д̣̇исаабхааг̇ам̣ г̇анд̇угаамо, д̇ад̇т̇а ан̃н̃зна ваараг̇аамасалаагаа лад̣̇д̇хаа ход̇и, д̇ам̣ г̇ахзд̇ваа ид̇арам̣ бхигкум̣ ‘‘маяхам̣ бад̇д̇асалаагам̣ д̇вам̣ г̇ан̣хаахий’’д̇и вад̇ваа г̇анд̇ум̣ ваддад̇и. д̇зна бана убажаарасиймам̣ анад̇игганд̇зязва д̇асмим̣ д̇асса салаагаа г̇аахзд̇аб̣б̣аа.
Gamiko bhikkhu yaṃ disābhāgaṃ gantukāmo, tattha aññena vāragāmasalākā laddhā hoti, taṃ gahetvā itaraṃ bhikkhuṃ ‘‘mayhaṃ pattasalākaṃ tvaṃ gaṇhāhī’’ti vatvā gantuṃ vaṭṭati. Tena pana upacārasīmaṃ anatikkanteyeva tasmiṃ tassa salākā gāhetabbā.
чад̣д̣ид̇авихаарз мануссаа б̣од̇хижзд̇ияаад̣̇ийни ж̇аг̇г̇ид̇ваа бхун̃ж̇анд̇ууд̇и салаагабхад̇д̇ам̣ бадтабзнд̇и, бхигкуу сагадтаанзсу васид̇ваа гаалассзва г̇анд̇ваа д̇ад̇т̇а вад̇д̇ам̣ гарид̇ваа д̇ам̣ бхад̇д̇ам̣ бхун̃ж̇анд̇и, ваддад̇и. сажз д̇зсу сваад̇анааяа ад̇д̇ано баабзд̇ваа г̇ад̇зсу ааг̇анд̇уго бхигку чад̣д̣ид̇авихаарз васид̇ваа гаалассзва вад̇д̇ам̣ гад̇ваа гхан̣дим̣ бахарид̇ваа салаагабхад̇д̇ам̣ ад̇д̇ано баабзд̇ваа аасанасаалам̣ г̇ажчад̇и, сова д̇асса бхад̇д̇асса иссаро. яо бана бхигкуусу вад̇д̇ам̣ гаронд̇зсуязва бхуумияам̣ д̣̇вз д̇аяо саммун̃ж̇аниббахаарз д̣̇ад̇ваа гхан̣дим̣ бахарид̇ваа ‘‘д̇хураг̇аамз салаагабхад̇д̇ам̣ маяхам̣ баабун̣аад̇ий’’д̇и г̇ажчад̇и, д̇асса д̇ам̣ жоригааяа г̇ахид̇ад̇д̇аа на баабун̣аад̇и, вад̇д̇ам̣ гад̇ваа баабзд̇ваа бажчаа г̇ад̇абхигкуунам̣язва ход̇и.
Chaḍḍitavihāre manussā bodhicetiyādīni jaggitvā bhuñjantūti salākabhattaṃ paṭṭhapenti, bhikkhū sakaṭṭhānesu vasitvā kālasseva gantvā tattha vattaṃ karitvā taṃ bhattaṃ bhuñjanti, vaṭṭati. Sace tesu svātanāya attano pāpetvā gatesu āgantuko bhikkhu chaḍḍitavihāre vasitvā kālasseva vattaṃ katvā ghaṇṭiṃ paharitvā salākabhattaṃ attano pāpetvā āsanasālaṃ gacchati, sova tassa bhattassa issaro. Yo pana bhikkhūsu vattaṃ karontesuyeva bhūmiyaṃ dve tayo sammuñjanippahāre datvā ghaṇṭiṃ paharitvā ‘‘dhuragāme salākabhattaṃ mayhaṃ pāpuṇātī’’ti gacchati, tassa taṃ corikāya gahitattā na pāpuṇāti, vattaṃ katvā pāpetvā pacchā gatabhikkhūnaṃyeva hoti.
зго г̇аамо ад̇ид̣̇уурз ход̇и, бхигкуу нижжам̣ г̇анд̇ум̣ на ижчанд̇и, мануссаа ‘‘маяам̣ бун̃н̃зна бариб̣аахираа хомаа’’д̇и вад̣̇анд̇и, яз д̇асса г̇аамасса аасаннавихаарз сабхааг̇абхигкуу, д̇з вад̇д̇аб̣б̣аа ‘‘имзсам̣ бхигкуунам̣ анааг̇ад̇ад̣̇ивасз д̇умхз бхун̃ж̇ат̇аа’’д̇и. салаагаа бана д̣̇звасигам̣ баабзд̇аб̣б̣аа, д̇аа жа ко бана гхан̣диббахаран̣амад̇д̇зна ваа бажчижааланамад̇д̇зна ваа баабид̇аа на хонд̇и, бажчим̣ бана г̇ахзд̇ваа салаагаа бийтагз аагирид̇аб̣б̣аа, бажчи бана мукаваддияам̣ на г̇ахзд̇аб̣б̣аа. сажз хи д̇ад̇т̇а ахи ваа вижчиго ваа бхавзяяа, д̣̇угкам̣ уббаад̣̇зяяа; д̇асмаа хздтаа г̇ахзд̇ваа бажчим̣ бараммукам̣ гад̇ваа салаагаа аагирид̇аб̣б̣аа ‘‘сажзби саббо бхависсад̇и, зд̇д̇ова балааяиссад̇ий’’д̇и. звам̣ салаагаа аагирид̇ваа г̇аамаад̣̇ивасзна буб̣б̣з вуд̇д̇анаязнзва г̇аахзд̇аб̣б̣аа. абижа згам̣ махаат̇зрасса баабзд̇ваа ‘‘авасзсаа маяхам̣ баабун̣анд̇ий’’д̇и ад̇д̇ано баабзд̇ваа вад̇д̇ам̣ гад̇ваа жзд̇ияам̣ ванд̣̇ид̇ваа вид̇аггамаал̣агз тид̇зхи бхигкуухи ‘‘баабид̇аа, аавусо, салаагаа’’д̇и вуд̇д̇з ‘‘аама, бханд̇з, д̇умхз г̇ад̇аг̇ад̇аг̇аамз салаагабхад̇д̇ам̣ г̇ан̣хат̇аа’’д̇и вад̇д̇аб̣б̣ам̣; звам̣ баабид̇ааби хи субаабид̇аава хонд̇и.
Eko gāmo atidūre hoti, bhikkhū niccaṃ gantuṃ na icchanti, manussā ‘‘mayaṃ puññena paribāhirā homā’’ti vadanti, ye tassa gāmassa āsannavihāre sabhāgabhikkhū, te vattabbā ‘‘imesaṃ bhikkhūnaṃ anāgatadivase tumhe bhuñjathā’’ti. Salākā pana devasikaṃ pāpetabbā, tā ca kho pana ghaṇṭippaharaṇamattena vā pacchicālanamattena vā pāpitā na honti, pacchiṃ pana gahetvā salākā pīṭhake ākiritabbā, pacchi pana mukhavaṭṭiyaṃ na gahetabbā. Sace hi tattha ahi vā vicchiko vā bhaveyya, dukkhaṃ uppādeyya; tasmā heṭṭhā gahetvā pacchiṃ parammukhaṃ katvā salākā ākiritabbā ‘‘sacepi sappo bhavissati, ettova palāyissatī’’ti. Evaṃ salākā ākiritvā gāmādivasena pubbe vuttanayeneva gāhetabbā. Apica ekaṃ mahātherassa pāpetvā ‘‘avasesā mayhaṃ pāpuṇantī’’ti attano pāpetvā vattaṃ katvā cetiyaṃ vanditvā vitakkamāḷake ṭhitehi bhikkhūhi ‘‘pāpitā, āvuso, salākā’’ti vutte ‘‘āma, bhante, tumhe gatagatagāme salākabhattaṃ gaṇhathā’’ti vattabbaṃ; evaṃ pāpitāpi hi supāpitāva honti.
бхигкуу саб̣б̣арад̇д̇им̣ д̇хаммасаванад̇т̇ам̣ ан̃н̃ам̣ вихаарам̣ г̇ажчанд̇аа ‘‘маяам̣ д̇ад̇т̇а д̣̇аанам̣ аг̇г̇ахзд̇ваава амхаагам̣ г̇ожараг̇аамзва бин̣д̣ааяа жарид̇ваа ааг̇амиссаамаа’’д̇и салаагаа аг̇г̇ахзд̇ваава г̇ад̇аа, вихаарз т̇зрасса бад̇д̇асалаагабхад̇д̇ам̣ бхун̃ж̇ид̇ум̣ ааг̇ажчанд̇и, ваддад̇и. ат̇а махаат̇зроби ‘‘ахам̣ ид̇ха гим̣ гаромий’’д̇и д̇зхиязва сад̣̇д̇хим̣ г̇ажчад̇и, д̇зхи г̇ад̇авихаарз абхун̃ж̇ид̇ваава г̇ожараг̇аамам̣ ануббад̇д̇зхи ‘‘д̣̇зт̇а, бханд̇з, бад̇д̇з салаагаяааг̇уаад̣̇ийни аахариссаамаа’’д̇и вуд̇д̇з бад̇д̇аа на д̣̇аад̇аб̣б̣аа. ‘‘гасмаа, бханд̇з, на д̣̇зт̇аа’’д̇и ‘‘вихаарадтагам̣ бхад̇д̇ам̣ вихаарз вуд̇т̇аанам̣ баабун̣аад̇и, маяам̣ ан̃н̃асмим̣ вихаарз вуд̇т̇аа’’д̇и. ‘‘д̣̇зт̇а, бханд̇з, на маяам̣ вихаарз баалигааяа д̣̇зма, д̇умхаагам̣ д̣̇зма, г̇ан̣хат̇а амхаагам̣ бхигка’’нд̇и вуд̇д̇з бана ваддад̇и.
Bhikkhū sabbarattiṃ dhammasavanatthaṃ aññaṃ vihāraṃ gacchantā ‘‘mayaṃ tattha dānaṃ aggahetvāva amhākaṃ gocaragāmeva piṇḍāya caritvā āgamissāmā’’ti salākā aggahetvāva gatā, vihāre therassa pattasalākabhattaṃ bhuñjituṃ āgacchanti, vaṭṭati. Atha mahātheropi ‘‘ahaṃ idha kiṃ karomī’’ti tehiyeva saddhiṃ gacchati, tehi gatavihāre abhuñjitvāva gocaragāmaṃ anuppattehi ‘‘detha, bhante, patte salākayāguādīni āharissāmā’’ti vutte pattā na dātabbā. ‘‘Kasmā, bhante, na dethā’’ti ‘‘vihāraṭṭhakaṃ bhattaṃ vihāre vutthānaṃ pāpuṇāti, mayaṃ aññasmiṃ vihāre vutthā’’ti. ‘‘Detha, bhante, na mayaṃ vihāre pālikāya dema, tumhākaṃ dema, gaṇhatha amhākaṃ bhikkha’’nti vutte pana vaṭṭati.
салаагабхад̇д̇агат̇аа нидтид̇аа.
Salākabhattakathā niṭṭhitā.
