| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
ಸಲಾಕಭತ್ತಕಥಾ
Salākabhattakathā
ಸಲಾಕಭತ್ತಂ ಪನ ಏವಂ ವೇದಿತಬ್ಬನ್ತಿ ಯೋಜನಾ। ‘‘ವಚನತೋ’’ತಿ ಪದಂ ‘‘ದಾತಬ್ಬಾ’’ತಿ ಪದೇ ಞಾಪಕಹೇತು। ಸಲಾಕಾಯ ವಾತಿ ಕುಸದಣ್ಡೇ ವಾ। ಅಸುಕಸ್ಸ ನಾಮಾತಿ ಅಸುಕಸ್ಸ ನಾಮ ಉಪಾಸಕಸ್ಸ। ಉಪನಿಬನ್ಧಿತ್ವಾತಿ ಲಿಖಿತ್ವಾ, ಛಿನ್ದಿತ್ವಾತಿ ಅತ್ಥೋ। ‘‘ಓಪುಞ್ಜಿತ್ವಾ’’ತಿ ಪದಸ್ಸ ಅತ್ಥಂ ದಸ್ಸೇನ್ತೋ ಆಹ ‘‘ಪುನಪ್ಪುನಂ ಹೇಟ್ಠುಪರಿಯವಸೇನ ಆಲೋಳೇತ್ವಾ’’ತಿ। ಭತ್ತುದ್ದೇಸಕೇನ ದಾತಬ್ಬಾತಿ ಸಮ್ಬನ್ಧೋ।
Salākabhattaṃ pana evaṃ veditabbanti yojanā. ‘‘Vacanato’’ti padaṃ ‘‘dātabbā’’ti pade ñāpakahetu. Salākāya vāti kusadaṇḍe vā. Asukassa nāmāti asukassa nāma upāsakassa. Upanibandhitvāti likhitvā, chinditvāti attho. ‘‘Opuñjitvā’’ti padassa atthaṃ dassento āha ‘‘punappunaṃ heṭṭhupariyavasena āloḷetvā’’ti. Bhattuddesakena dātabbāti sambandho.
ನ ಬಹುಕಾತಿ ಅಪ್ಪಕಾ। ಗಾಮವಸೇನಪೀತಿ ಯೇಭುಯ್ಯೇನ ಸಮಾನಲಾಭಗಾಮವಸೇನಪಿ। ಪಿಸದ್ದೇನ ಕುಲಂ ಅಪೇಕ್ಖತಿ। ಗಾಹೇನ್ತೇನ ಗಾಹಿತಾನೇವಾತಿ ಸಮ್ಬನ್ಧೋ। ಸಟ್ಠಿಸಲಾಕಭತ್ತಾನಿ ಹೋನ್ತೀತಿ ಯೋಜನಾ। ತೇಸನ್ತಿ ದ್ವಿನ್ನಂ ತಿಣ್ಣಂ ಸಲಾಕಭತ್ತಾನಂ।
Na bahukāti appakā. Gāmavasenapīti yebhuyyena samānalābhagāmavasenapi. Pisaddena kulaṃ apekkhati. Gāhentena gāhitānevāti sambandho. Saṭṭhisalākabhattāni hontīti yojanā. Tesanti dvinnaṃ tiṇṇaṃ salākabhattānaṃ.
ತನ್ತಿ ಬಹುಸಲಾಕಭತ್ತಗಾಮಂ। ತಂ ಪನಾತಿ ಏಕಸಲಾಕಭತ್ತಂ ಪನ। ಏತೇಸೂತಿ ಭಿಕ್ಖೂಸು। ನಿಗ್ಗಹೇನಾತಿ ದೂರತ್ತಾ ಅನಿಚ್ಛನ್ತಸ್ಸಪಿ ಏಕಸ್ಸ ನಿಗ್ಗಹೇನ। ತನ್ತಿ ಸಲಾಕಭತ್ತಂ। ಓರಿಮಗಾಮೇತಿ ಓರಭಾಗೇ ಠಿತೇ ಗಾಮೇ। ಗಾಹಿತಸಞ್ಞಾಯಾತಿ ಗಾಹಿತಾ ಇತಿ ಸಞ್ಞಾಯ। ಪುನ ವಿಹಾರಂ ಆಗನ್ತ್ವಾತಿ ಪುನ ವಿಹಾರಂ ಅನಾಗನ್ತ್ವಾ ಓರಿಮಗಾಮೇ ಸಲಾಕಭತ್ತಾನಿ ಪಠಮಂ ಗಹೇತ್ವಾ ಪಚ್ಛಾ ವಿಹಾರಂ ಆಗನ್ತ್ವಾ ಅತ್ತನೋ ಪಾಪೇತ್ವಾ ಭುಞ್ಜಿತುಮ್ಪಿ ವಟ್ಟತಿ। ಕಸ್ಮಾ ಪುನ ವಿಹಾರೋ ಆಗನ್ತಬ್ಬೋ, ನನು ಅಗಾಹಿತೋಪಿ ಅತ್ತನೋ ಪತ್ತತ್ತಾ ಗಹೇತ್ವಾ ಭುಞ್ಜಿತುಂ ವಟ್ಟತೀತಿ ಆಹ ‘‘ನ ಹೀ’’ತಿಆದಿ। ಹಿ ಯಸ್ಮಾ ಬಹಿಸೀಮಾಯ ಸಙ್ಘಲಾಭೋ ಗಾಹೇತುಂ ನ ಲಬ್ಭತಿ, ತಸ್ಮಾ ವಿಹಾರೋ ಆಗನ್ತಬ್ಬೋತಿ ಯೋಜನಾ। ಏಕಬಾಹವಸೇನ ವಾತಿ ಏಕಾಯ ಘರಪಾಳಿಸಙ್ಖಾತಾಯ ಬಾಹಾಯವಸೇನ ವಾ। ವೀಥಿಆದೀಸು ಚಾತಿ ವೀಥಿಬಾಹಕುಲೇಸು ಚ, ನಿದ್ಧಾರಣೇ ಭುಮ್ಮಂ। ಯತ್ಥಾತಿ ಯಸ್ಮಿಂ ಠಾನೇ। ಸಲಾಕಾಸು ಅಸತಿ ಅಸನ್ತಾಸೂತಿ ಯೋಜನಾ। ಉದ್ದಿಸಿತ್ವಾಪೀತಿ ‘‘ಅಸುಕಗಾಮಸ್ಸ ಸಲಾಕಭತ್ತಾನಿ ತುಯ್ಹಂ ಪಾಪುಣನ್ತೀ’’ತಿ ಗಾಮಾದೀನಿ ಉದ್ದಿಸಿತ್ವಾಪಿ।
Tanti bahusalākabhattagāmaṃ. Taṃ panāti ekasalākabhattaṃ pana. Etesūti bhikkhūsu. Niggahenāti dūrattā anicchantassapi ekassa niggahena. Tanti salākabhattaṃ. Orimagāmeti orabhāge ṭhite gāme. Gāhitasaññāyāti gāhitā iti saññāya. Puna vihāraṃ āgantvāti puna vihāraṃ anāgantvā orimagāme salākabhattāni paṭhamaṃ gahetvā pacchā vihāraṃ āgantvā attano pāpetvā bhuñjitumpi vaṭṭati. Kasmā puna vihāro āgantabbo, nanu agāhitopi attano pattattā gahetvā bhuñjituṃ vaṭṭatīti āha ‘‘na hī’’tiādi. Hi yasmā bahisīmāya saṅghalābho gāhetuṃ na labbhati, tasmā vihāro āgantabboti yojanā. Ekabāhavasena vāti ekāya gharapāḷisaṅkhātāya bāhāyavasena vā. Vīthiādīsu cāti vīthibāhakulesu ca, niddhāraṇe bhummaṃ. Yatthāti yasmiṃ ṭhāne. Salākāsu asati asantāsūti yojanā. Uddisitvāpīti ‘‘asukagāmassa salākabhattāni tuyhaṃ pāpuṇantī’’ti gāmādīni uddisitvāpi.
ತಮೇವತ್ಥಂ ವಿತ್ಥಾರೇನ್ತೋ ಆಹ ‘‘ತೇನ ಹೀ’’ತಿಆದಿ। ತತ್ಥ ತೇನಾತಿ ಸಲಾಕದಾಯಕೇನ ಭಿಕ್ಖುನಾ। ಗಾಹೇತಬ್ಬನ್ತಿ ಸಮ್ಬನ್ಧೋ। ವಾರಗಾಮೇತಿ ಅತಿದೂರತ್ತಾ ವಾರೇನ ಗನ್ತಬ್ಬೇ ಗಾಮೇ। ತತ್ರಾತಿ ತಂ ಗಾಮಂ।
Tamevatthaṃ vitthārento āha ‘‘tena hī’’tiādi. Tattha tenāti salākadāyakena bhikkhunā. Gāhetabbanti sambandho. Vāragāmeti atidūrattā vārena gantabbe gāme. Tatrāti taṃ gāmaṃ.
ಅತಿರೇಕಗಾವುತೇತಿ ಗಾವುತತೋ ಅತಿರೇಕೇ ಠಾನೇ। ತಂದಿವಸನ್ತಿ ತಸ್ಮಿಂ ಸಲಾಕಭತ್ತಗಹಣದಿವಸೇ। ಯೋ ನ ಗಚ್ಛತಿ, ತಸ್ಸ ನ ದಾತಬ್ಬಾತಿ ಯೋಜನಾ। ಹೀತಿ ಯಸ್ಮಾ। ತೀಣಿ ಪನ ದಿವಸಾನೀತಿ ಅಚ್ಚನ್ತಸಂಯೋಗೇ ಚೇತಂ ಉಪಯೋಗವಚನಂ। ತನ್ತಿ ಓರಿಮವಾರಗಾಮಸಲಾಕಂ। ದಣ್ಡಕಮ್ಮಂ ಪನ ಕಿನ್ತಿ ಗಾಳ್ಹಂ ಕಾತಬ್ಬನ್ತಿ ಆಹ ‘‘ಸಟ್ಠಿತೋ ವಾ ಪಣ್ಣಾಸತೋ ವಾ ನ ಪರಿಹಾಪೇತಬ್ಬ’’ನ್ತಿ। ವಿಹಾರವಾರೋತಿ ವಿಹಾರಸ್ಸ ರಕ್ಖನತ್ಥಾಯ ವಾರೋ। ವಿಹಾರವಾರಿಕಸ್ಸಾತಿ ವಿಹಾರಂ ವಾರೇನ, ವಾರಂ ಗಹೇತ್ವಾ ವಾ ರಕ್ಖತೀತಿ ವಿಹಾರವಾರಿಕೋ, ತಸ್ಸ ದಾತಬ್ಬಾತಿ ಸಮ್ಬನ್ಧೋ। ವಿಹಾರಗೋಪಕಾತಿ ವಿಹಾರಂ ಗೋಪೇನ್ತೀತಿ ವಿಹಾರಗೋಪಕಾ। ಅಞ್ಞಥತ್ತನ್ತಿ ಪಸಾದಞ್ಞಥತ್ತಂ। ಅಞ್ಞೇಸು ಕುಲೇಸು ದಾತಬ್ಬಾತಿ ಅಞ್ಞೇಸಂ ಕುಲಾನಂ ಯಾಗುಆದಯೋ ದಾತಬ್ಬಾ।
Atirekagāvuteti gāvutato atireke ṭhāne. Taṃdivasanti tasmiṃ salākabhattagahaṇadivase. Yo na gacchati, tassa na dātabbāti yojanā. Hīti yasmā. Tīṇi pana divasānīti accantasaṃyoge cetaṃ upayogavacanaṃ. Tanti orimavāragāmasalākaṃ. Daṇḍakammaṃ pana kinti gāḷhaṃ kātabbanti āha ‘‘saṭṭhito vā paṇṇāsato vā na parihāpetabba’’nti. Vihāravāroti vihārassa rakkhanatthāya vāro. Vihāravārikassāti vihāraṃ vārena, vāraṃ gahetvā vā rakkhatīti vihāravāriko, tassa dātabbāti sambandho. Vihāragopakāti vihāraṃ gopentīti vihāragopakā. Aññathattanti pasādaññathattaṃ. Aññesu kulesu dātabbāti aññesaṃ kulānaṃ yāguādayo dātabbā.
ವಾರಂ ಗಾಹೇತ್ವಾತಿ ಅಞ್ಞೇಹಿ ವಾರಂ ಗಾಹಾಪೇತ್ವಾ। ನೇಸನ್ತಿ ವಿಹಾರವಾರಿಕಾನಂ। ಸಲಾಕಾತಿ ಪಕತಿಕತ್ತಾರಂ ಅಪೇಕ್ಖಿತ್ವಾ ‘‘ಭವನ್ತೀ’’ತಿ ಬಹುವಚನವಸೇನ ವುತ್ತಂ। ಫಾತಿಕಮ್ಮಮೇವಾತಿ ವಿಹಾರರಕ್ಖನತ್ಥಾಯ ಸಙ್ಘೇನ ದಾತಬ್ಬಫಾತಿಕಮ್ಮಮೇವ। ಅಞ್ಞಮ್ಪೀತಿ ಪಿಸದ್ದೇನ ನ ಕೇವಲಂ ಫಾತಿಕಮ್ಮಮೇವ, ಅಞ್ಞಮ್ಪೀತಿ ದಸ್ಸೇತಿ। ಅತಿರೇಕಉತ್ತರಿಭಙ್ಗಸ್ಸಾತಿ ಅತಿರೇಕಂ ಉತ್ತರಿಭಙ್ಗಮೇತಸ್ಸಾತಿ ಅತಿರೇಕಉತ್ತರಿಭಙ್ಗಂ, ತಸ್ಸ।
Vāraṃ gāhetvāti aññehi vāraṃ gāhāpetvā. Nesanti vihāravārikānaṃ. Salākāti pakatikattāraṃ apekkhitvā ‘‘bhavantī’’ti bahuvacanavasena vuttaṃ. Phātikammamevāti vihārarakkhanatthāya saṅghena dātabbaphātikammameva. Aññampīti pisaddena na kevalaṃ phātikammameva, aññampīti dasseti. Atirekauttaribhaṅgassāti atirekaṃ uttaribhaṅgametassāti atirekauttaribhaṅgaṃ, tassa.
ಸಲಾಕಾ ಲದ್ಧಾತಿ ಸಲಾಕಾ ಏವ ಲದ್ಧಾ। ತಂದಿವಸನ್ತಿ ತಸ್ಮಿಂ ಸಲಾಕಲದ್ಧದಿವಸೇ। ಏಕಸ್ಸೇವಾತಿ ಏಕೇಕಸ್ಸೇವ। ವಿಜಟೇತ್ವಾತಿ ತಾನಿ ದ್ವೇ ತೀಣಿ ಏಕಚಾರಿಕಭತ್ತಾನಿ ವಿಜಟಂ ನಿಗುಮ್ಬಂ ಕತ್ವಾ।
Salākā laddhāti salākā eva laddhā. Taṃdivasanti tasmiṃ salākaladdhadivase. Ekassevāti ekekasseva. Vijaṭetvāti tāni dve tīṇi ekacārikabhattāni vijaṭaṃ nigumbaṃ katvā.
ಏಕಸಮ್ಭೋಗಾತಿ ಏಕತೋ ಸಮ್ಭೋಗಾ। ಗಾಹೇನ್ತೇನ ದಾತುನ್ತಿ ಸಮ್ಬನ್ಧೋ। ಸಮ್ಮುಖೀಭೂತಸ್ಸಾತಿ ಉಪಚಾರಸೀಮಾಯಂ ಠಿತಸ್ಸ ಯಸ್ಸ ಕಸ್ಸಚಿ, ಪಾಪೇತ್ವಾತಿ ಯೋಜನಾ। ರಸಸಲಾಕನ್ತಿ ಉಚ್ಛುಸಲಾಕಂ। ‘‘ರಸಾಲಸಲಾಕ’’ನ್ತಿಪಿ ಪಾಠೋ, ಅಯಮೇವತ್ಥೋ। ಖುದ್ದಕವಿಹಾರೇ ಗಾಹೇತಬ್ಬವಿಧಾನಂ ದಸ್ಸೇತ್ವಾ ಮಹಾಆವಾಸೇ ತಂ ದಸ್ಸೇನ್ತೋ ಆಹ ‘‘ಮಹಾಆವಾಸೇ’’ತಿಆದಿ।
Ekasambhogāti ekato sambhogā. Gāhentena dātunti sambandho. Sammukhībhūtassāti upacārasīmāyaṃ ṭhitassa yassa kassaci, pāpetvāti yojanā. Rasasalākanti ucchusalākaṃ. ‘‘Rasālasalāka’’ntipi pāṭho, ayamevattho. Khuddakavihāre gāhetabbavidhānaṃ dassetvā mahāāvāse taṃ dassento āha ‘‘mahāāvāse’’tiādi.
‘‘ತಕ್ಕಸಲಾಕಮ್ಪಿ …ಪೇ॰… ದಾತುಂ ವಟ್ಟತೀ’’ತಿ ಇದಂ ಖುದ್ದಕವಿಹಾರಂ ಸನ್ಧಾಯ ವುತ್ತಂ, ತೇನ ವುತ್ತಂ ‘‘ಮಹಾಆವಾಸೇ’’ತಿಆದಿ। ಭೇಸಜ್ಜಾದಿಸಲಾಕಾಯೋತಿ ಏತ್ಥ ಆದಿಸದ್ದೇನ ಗನ್ಧಮಾಲಾಸಲಾಕಾಯೋ ಸಙ್ಗಣ್ಹಾತಿ। ಏತ್ಥಾತಿ ಸಲಾಕಾಸು। ಅಗ್ಗಭಿಕ್ಖಮತ್ತನ್ತಿ ಅಗ್ಗತೋ ದಾತಬ್ಬಂ ಭಿಕ್ಖಾಮತ್ತಂ। ತಾದಿಸಾನಿ ಭತ್ತಾನೀತಿ ಅಗ್ಗಭಿಕ್ಖಾಮತ್ತಸಭಾವಾನಿ ಭತ್ತಾನಿ। ನೋ ಚೇತಿ ತಾದಿಸಾನಿ ಭತ್ತಾನಿ ಬಹೂನಿ ನೋ ಚೇ ಹೋನ್ತಿ। ಲದ್ಧಾ ವಾ ಅಲದ್ಧಾ ವಾತಿ ಲಭಿತ್ವಾ ವಾ ಅಲಭಿತ್ವಾ ವಾ।
‘‘Takkasalākampi …pe… dātuṃ vaṭṭatī’’ti idaṃ khuddakavihāraṃ sandhāya vuttaṃ, tena vuttaṃ ‘‘mahāāvāse’’tiādi. Bhesajjādisalākāyoti ettha ādisaddena gandhamālāsalākāyo saṅgaṇhāti. Etthāti salākāsu. Aggabhikkhamattanti aggato dātabbaṃ bhikkhāmattaṃ. Tādisāni bhattānīti aggabhikkhāmattasabhāvāni bhattāni. No ceti tādisāni bhattāni bahūni no ce honti. Laddhā vā aladdhā vāti labhitvā vā alabhitvā vā.
ಸಲಾಕಾಸು ಗಾಹಿತಾಸೂತಿ ಅಞ್ಞಾಸು ಸಲಾಕಾಸು ಗಾಹಿತಾಸು। ಸಮೀಪೇ ಠಿತಸ್ಸಾತಿ ಹತ್ಥಂ ಅಪಸಾರೇತ್ವಾ ಸಮೀಪೇ ಠಿತಸ್ಸ। ಅಸ್ಸಾತಿ ಭಿಕ್ಖುಸ್ಸ। ಅಯಂ ಸಲಾಕಾತಿ ‘‘ಅಯಂ ತಸ್ಸ ಸಲಾಕಾ’’ತಿ ಠಪೇತುಂ ವಟ್ಟತಿ। ಅಧಮ್ಮಿಕಾತಿ ಕತಿಕಾ ಅಧಮ್ಮಯುತ್ತಾ। ಅನಾಗತಸ್ಸ ದೇಥಾತಿ ಅನಾಗತಸ್ಸ ಭಿಕ್ಖುಸ್ಸ ಸಲಾಕಂ ದೇಥ।
Salākāsu gāhitāsūti aññāsu salākāsu gāhitāsu. Samīpe ṭhitassāti hatthaṃ apasāretvā samīpe ṭhitassa. Assāti bhikkhussa. Ayaṃ salākāti ‘‘ayaṃ tassa salākā’’ti ṭhapetuṃ vaṭṭati. Adhammikāti katikā adhammayuttā. Anāgatassa dethāti anāgatassa bhikkhussa salākaṃ detha.
ಸೋತಿ ಭತ್ತುದ್ದೇಸಕೋ, ವದೇಯ್ಯಾತಿ ಸಮ್ಬನ್ಧೋ। ಮಯಾ ಮಯ್ಹಂ ಪಾಪಿತನ್ತಿ ಸಮ್ಬನ್ಧೋ। ತತ್ಥಾತಿ ಗಾಮೇ। ಭುಞ್ಜೇಯ್ಯಾಥ ಇತಿ ವದೇಯ್ಯ, ವಟ್ಟತೀತಿ ಯೋಜನಾ। ತತ್ಥೇವಾತಿ ಅಸನಸಾಲಾಯಮೇವ। ತತ್ರಾತಿ ತಸ್ಮಿಂ ಗಾಮೇ। ವಿಹಾರಂ ಆನೇತ್ವಾತಿ ವಿಹಾರಂ ಸಲಾಕಭತ್ತಂ ಆನೇತ್ವಾ। ಸಲಾಕಗ್ಗಾಹಣಕಾಲೇತಿ ಸಲಾಕಾಯ ಭಿಕ್ಖೂಹಿ ಗಾಹಾಪನಕಾಲೇ।
Soti bhattuddesako, vadeyyāti sambandho. Mayā mayhaṃ pāpitanti sambandho. Tatthāti gāme. Bhuñjeyyātha iti vadeyya, vaṭṭatīti yojanā. Tatthevāti asanasālāyameva. Tatrāti tasmiṃ gāme. Vihāraṃ ānetvāti vihāraṃ salākabhattaṃ ānetvā. Salākaggāhaṇakāleti salākāya bhikkhūhi gāhāpanakāle.
ತತ್ಥಾತಿ ತಸ್ಮಿಂ ದಿಸಾಭಾಗೇ। ಅಞ್ಞೇನಾತಿ ಅತ್ತನಾ ಅಞ್ಞೇನ, ಲದ್ಧಾ ಹೋತೀತಿ ಸಮ್ಬನ್ಧೋ। ತೇನ ಪನಾತಿ ಗಮಿಕತೋ ಇತರೇನ। ತಸ್ಮಿನ್ತಿ ಗಮಿಕೇ। ಉಪಚಾರಸೀಮಂ ಅನತಿಕ್ಕನ್ತೇಯೇವಾತಿ ಯೋಜನಾ।
Tatthāti tasmiṃ disābhāge. Aññenāti attanā aññena, laddhā hotīti sambandho. Tena panāti gamikato itarena. Tasminti gamike. Upacārasīmaṃ anatikkanteyevāti yojanā.
ತತ್ಥಾತಿ ಛಡ್ಡಿತವಿಹಾರೇ। ತೇಸೂತಿ ಆವಾಸಿಕೇಸು ಭಿಕ್ಖೂಸು, ಗತೇಸೂತಿ ಸಮ್ಬನ್ಧೋ। ಸೋವಾತಿ ಆಗನ್ತುಕೋ ಏವ। ಯೋ ಪನ ಗಚ್ಛತೀತಿ ಸಮ್ಬನ್ಧೋ। ತನ್ತಿ ಸಲಾಕಭತ್ತಂ, ನ ಪಾಪುಣಾತೀತಿ ಸಮ್ಬನ್ಧೋ।
Tatthāti chaḍḍitavihāre. Tesūti āvāsikesu bhikkhūsu, gatesūti sambandho. Sovāti āgantuko eva. Yo pana gacchatīti sambandho. Tanti salākabhattaṃ, na pāpuṇātīti sambandho.
ಪುಞ್ಞೇನಾತಿ ಪುಞ್ಞಸ್ಮಾ। ತಾ ಚ ಖೋ ಪನಾತಿ ಸಲಾಕಾಯೋ ಪನ। ಪಚ್ಛಿಂ ಪನಾತಿ ಸಲಾಕಪಚ್ಛಿಂ ಪನ। ತತ್ಥಾತಿ ಪಚ್ಛಿಯಂ। ಏತ್ತೋವಾತಿ ಆಕಿರಣಟ್ಠಾನತೋವ। ಏಕನ್ತಿ ಏಕಂ ಸಲಾಕಂ। ವತ್ತಬ್ಬನ್ತಿ ಸಲಾಕದಾಯಕೇನ ವತ್ತಬ್ಬಂ।
Puññenāti puññasmā. Tā ca kho panāti salākāyo pana. Pacchiṃ panāti salākapacchiṃ pana. Tatthāti pacchiyaṃ. Ettovāti ākiraṇaṭṭhānatova. Ekanti ekaṃ salākaṃ. Vattabbanti salākadāyakena vattabbaṃ.
ಭಿಕ್ಖೂ ಗತಾತಿ ಸಮ್ಬನ್ಧೋ। ತತ್ಥಾತಿ ಅಞ್ಞಸ್ಮಿಂ ವಿಹಾರೇ। ಮಹಾಥೇರೋಪಿ ಗಚ್ಛತೀತಿ ಸಮ್ಬನ್ಧೋ। ಗತವಿಹಾರೇ ಅಭುಞ್ಜಿತ್ವಾವ ಗೋಚರಗಾಮಂ ಅನುಪ್ಪತ್ತೇಹಿ ಭಿಕ್ಖೂಹಿ ಪತ್ತಾ ನ ದಾತಬ್ಬಾತಿ ಯೋಜನಾ। ವಿಹಾರಟ್ಠಕಂ ಭತ್ತನ್ತಿ ವಿಹಾರೇ ಠಿತಂ ಭತ್ತಂ।
Bhikkhū gatāti sambandho. Tatthāti aññasmiṃ vihāre. Mahātheropi gacchatīti sambandho. Gatavihāre abhuñjitvāva gocaragāmaṃ anuppattehi bhikkhūhi pattā na dātabbāti yojanā. Vihāraṭṭhakaṃ bhattanti vihāre ṭhitaṃ bhattaṃ.
