| Library / Tipiṭaka / ਤਿਪਿਟਕ • Tipiṭaka / ਪਾਚਿਤ੍ਯਾਦਿਯੋਜਨਾਪਾਲ਼ਿ • Pācityādiyojanāpāḷi |
ਸਲਾਕਭਤ੍ਤਕਥਾ
Salākabhattakathā
ਸਲਾਕਭਤ੍ਤਂ ਪਨ ਏવਂ વੇਦਿਤਬ੍ਬਨ੍ਤਿ ਯੋਜਨਾ। ‘‘વਚਨਤੋ’’ਤਿ ਪਦਂ ‘‘ਦਾਤਬ੍ਬਾ’’ਤਿ ਪਦੇ ਞਾਪਕਹੇਤੁ। ਸਲਾਕਾਯ વਾਤਿ ਕੁਸਦਣ੍ਡੇ વਾ। ਅਸੁਕਸ੍ਸ ਨਾਮਾਤਿ ਅਸੁਕਸ੍ਸ ਨਾਮ ਉਪਾਸਕਸ੍ਸ। ਉਪਨਿਬਨ੍ਧਿਤ੍વਾਤਿ ਲਿਖਿਤ੍વਾ, ਛਿਨ੍ਦਿਤ੍વਾਤਿ ਅਤ੍ਥੋ। ‘‘ਓਪੁਞ੍ਜਿਤ੍વਾ’’ਤਿ ਪਦਸ੍ਸ ਅਤ੍ਥਂ ਦਸ੍ਸੇਨ੍ਤੋ ਆਹ ‘‘ਪੁਨਪ੍ਪੁਨਂ ਹੇਟ੍ਠੁਪਰਿਯવਸੇਨ ਆਲੋਲ਼ੇਤ੍વਾ’’ਤਿ। ਭਤ੍ਤੁਦ੍ਦੇਸਕੇਨ ਦਾਤਬ੍ਬਾਤਿ ਸਮ੍ਬਨ੍ਧੋ।
Salākabhattaṃ pana evaṃ veditabbanti yojanā. ‘‘Vacanato’’ti padaṃ ‘‘dātabbā’’ti pade ñāpakahetu. Salākāya vāti kusadaṇḍe vā. Asukassa nāmāti asukassa nāma upāsakassa. Upanibandhitvāti likhitvā, chinditvāti attho. ‘‘Opuñjitvā’’ti padassa atthaṃ dassento āha ‘‘punappunaṃ heṭṭhupariyavasena āloḷetvā’’ti. Bhattuddesakena dātabbāti sambandho.
ਨ ਬਹੁਕਾਤਿ ਅਪ੍ਪਕਾ। ਗਾਮવਸੇਨਪੀਤਿ ਯੇਭੁਯ੍ਯੇਨ ਸਮਾਨਲਾਭਗਾਮવਸੇਨਪਿ। ਪਿਸਦ੍ਦੇਨ ਕੁਲਂ ਅਪੇਕ੍ਖਤਿ। ਗਾਹੇਨ੍ਤੇਨ ਗਾਹਿਤਾਨੇવਾਤਿ ਸਮ੍ਬਨ੍ਧੋ। ਸਟ੍ਠਿਸਲਾਕਭਤ੍ਤਾਨਿ ਹੋਨ੍ਤੀਤਿ ਯੋਜਨਾ। ਤੇਸਨ੍ਤਿ ਦ੍વਿਨ੍ਨਂ ਤਿਣ੍ਣਂ ਸਲਾਕਭਤ੍ਤਾਨਂ।
Na bahukāti appakā. Gāmavasenapīti yebhuyyena samānalābhagāmavasenapi. Pisaddena kulaṃ apekkhati. Gāhentena gāhitānevāti sambandho. Saṭṭhisalākabhattāni hontīti yojanā. Tesanti dvinnaṃ tiṇṇaṃ salākabhattānaṃ.
ਤਨ੍ਤਿ ਬਹੁਸਲਾਕਭਤ੍ਤਗਾਮਂ। ਤਂ ਪਨਾਤਿ ਏਕਸਲਾਕਭਤ੍ਤਂ ਪਨ। ਏਤੇਸੂਤਿ ਭਿਕ੍ਖੂਸੁ। ਨਿਗ੍ਗਹੇਨਾਤਿ ਦੂਰਤ੍ਤਾ ਅਨਿਚ੍ਛਨ੍ਤਸ੍ਸਪਿ ਏਕਸ੍ਸ ਨਿਗ੍ਗਹੇਨ। ਤਨ੍ਤਿ ਸਲਾਕਭਤ੍ਤਂ। ਓਰਿਮਗਾਮੇਤਿ ਓਰਭਾਗੇ ਠਿਤੇ ਗਾਮੇ। ਗਾਹਿਤਸਞ੍ਞਾਯਾਤਿ ਗਾਹਿਤਾ ਇਤਿ ਸਞ੍ਞਾਯ। ਪੁਨ વਿਹਾਰਂ ਆਗਨ੍ਤ੍વਾਤਿ ਪੁਨ વਿਹਾਰਂ ਅਨਾਗਨ੍ਤ੍વਾ ਓਰਿਮਗਾਮੇ ਸਲਾਕਭਤ੍ਤਾਨਿ ਪਠਮਂ ਗਹੇਤ੍વਾ ਪਚ੍ਛਾ વਿਹਾਰਂ ਆਗਨ੍ਤ੍વਾ ਅਤ੍ਤਨੋ ਪਾਪੇਤ੍વਾ ਭੁਞ੍ਜਿਤੁਮ੍ਪਿ વਟ੍ਟਤਿ। ਕਸ੍ਮਾ ਪੁਨ વਿਹਾਰੋ ਆਗਨ੍ਤਬ੍ਬੋ, ਨਨੁ ਅਗਾਹਿਤੋਪਿ ਅਤ੍ਤਨੋ ਪਤ੍ਤਤ੍ਤਾ ਗਹੇਤ੍વਾ ਭੁਞ੍ਜਿਤੁਂ વਟ੍ਟਤੀਤਿ ਆਹ ‘‘ਨ ਹੀ’’ਤਿਆਦਿ। ਹਿ ਯਸ੍ਮਾ ਬਹਿਸੀਮਾਯ ਸਙ੍ਘਲਾਭੋ ਗਾਹੇਤੁਂ ਨ ਲਬ੍ਭਤਿ, ਤਸ੍ਮਾ વਿਹਾਰੋ ਆਗਨ੍ਤਬ੍ਬੋਤਿ ਯੋਜਨਾ। ਏਕਬਾਹવਸੇਨ વਾਤਿ ਏਕਾਯ ਘਰਪਾਲ਼ਿਸਙ੍ਖਾਤਾਯ ਬਾਹਾਯવਸੇਨ વਾ। વੀਥਿਆਦੀਸੁ ਚਾਤਿ વੀਥਿਬਾਹਕੁਲੇਸੁ ਚ, ਨਿਦ੍ਧਾਰਣੇ ਭੁਮ੍ਮਂ। ਯਤ੍ਥਾਤਿ ਯਸ੍ਮਿਂ ਠਾਨੇ। ਸਲਾਕਾਸੁ ਅਸਤਿ ਅਸਨ੍ਤਾਸੂਤਿ ਯੋਜਨਾ। ਉਦ੍ਦਿਸਿਤ੍વਾਪੀਤਿ ‘‘ਅਸੁਕਗਾਮਸ੍ਸ ਸਲਾਕਭਤ੍ਤਾਨਿ ਤੁਯ੍ਹਂ ਪਾਪੁਣਨ੍ਤੀ’’ਤਿ ਗਾਮਾਦੀਨਿ ਉਦ੍ਦਿਸਿਤ੍વਾਪਿ।
Tanti bahusalākabhattagāmaṃ. Taṃ panāti ekasalākabhattaṃ pana. Etesūti bhikkhūsu. Niggahenāti dūrattā anicchantassapi ekassa niggahena. Tanti salākabhattaṃ. Orimagāmeti orabhāge ṭhite gāme. Gāhitasaññāyāti gāhitā iti saññāya. Puna vihāraṃ āgantvāti puna vihāraṃ anāgantvā orimagāme salākabhattāni paṭhamaṃ gahetvā pacchā vihāraṃ āgantvā attano pāpetvā bhuñjitumpi vaṭṭati. Kasmā puna vihāro āgantabbo, nanu agāhitopi attano pattattā gahetvā bhuñjituṃ vaṭṭatīti āha ‘‘na hī’’tiādi. Hi yasmā bahisīmāya saṅghalābho gāhetuṃ na labbhati, tasmā vihāro āgantabboti yojanā. Ekabāhavasena vāti ekāya gharapāḷisaṅkhātāya bāhāyavasena vā. Vīthiādīsu cāti vīthibāhakulesu ca, niddhāraṇe bhummaṃ. Yatthāti yasmiṃ ṭhāne. Salākāsu asati asantāsūti yojanā. Uddisitvāpīti ‘‘asukagāmassa salākabhattāni tuyhaṃ pāpuṇantī’’ti gāmādīni uddisitvāpi.
ਤਮੇવਤ੍ਥਂ વਿਤ੍ਥਾਰੇਨ੍ਤੋ ਆਹ ‘‘ਤੇਨ ਹੀ’’ਤਿਆਦਿ। ਤਤ੍ਥ ਤੇਨਾਤਿ ਸਲਾਕਦਾਯਕੇਨ ਭਿਕ੍ਖੁਨਾ। ਗਾਹੇਤਬ੍ਬਨ੍ਤਿ ਸਮ੍ਬਨ੍ਧੋ। વਾਰਗਾਮੇਤਿ ਅਤਿਦੂਰਤ੍ਤਾ વਾਰੇਨ ਗਨ੍ਤਬ੍ਬੇ ਗਾਮੇ। ਤਤ੍ਰਾਤਿ ਤਂ ਗਾਮਂ।
Tamevatthaṃ vitthārento āha ‘‘tena hī’’tiādi. Tattha tenāti salākadāyakena bhikkhunā. Gāhetabbanti sambandho. Vāragāmeti atidūrattā vārena gantabbe gāme. Tatrāti taṃ gāmaṃ.
ਅਤਿਰੇਕਗਾવੁਤੇਤਿ ਗਾવੁਤਤੋ ਅਤਿਰੇਕੇ ਠਾਨੇ। ਤਂਦਿવਸਨ੍ਤਿ ਤਸ੍ਮਿਂ ਸਲਾਕਭਤ੍ਤਗਹਣਦਿવਸੇ। ਯੋ ਨ ਗਚ੍ਛਤਿ, ਤਸ੍ਸ ਨ ਦਾਤਬ੍ਬਾਤਿ ਯੋਜਨਾ। ਹੀਤਿ ਯਸ੍ਮਾ। ਤੀਣਿ ਪਨ ਦਿવਸਾਨੀਤਿ ਅਚ੍ਚਨ੍ਤਸਂਯੋਗੇ ਚੇਤਂ ਉਪਯੋਗવਚਨਂ। ਤਨ੍ਤਿ ਓਰਿਮવਾਰਗਾਮਸਲਾਕਂ। ਦਣ੍ਡਕਮ੍ਮਂ ਪਨ ਕਿਨ੍ਤਿ ਗਾਲ਼੍ਹਂ ਕਾਤਬ੍ਬਨ੍ਤਿ ਆਹ ‘‘ਸਟ੍ਠਿਤੋ વਾ ਪਣ੍ਣਾਸਤੋ વਾ ਨ ਪਰਿਹਾਪੇਤਬ੍ਬ’’ਨ੍ਤਿ। વਿਹਾਰવਾਰੋਤਿ વਿਹਾਰਸ੍ਸ ਰਕ੍ਖਨਤ੍ਥਾਯ વਾਰੋ। વਿਹਾਰવਾਰਿਕਸ੍ਸਾਤਿ વਿਹਾਰਂ વਾਰੇਨ, વਾਰਂ ਗਹੇਤ੍વਾ વਾ ਰਕ੍ਖਤੀਤਿ વਿਹਾਰવਾਰਿਕੋ, ਤਸ੍ਸ ਦਾਤਬ੍ਬਾਤਿ ਸਮ੍ਬਨ੍ਧੋ। વਿਹਾਰਗੋਪਕਾਤਿ વਿਹਾਰਂ ਗੋਪੇਨ੍ਤੀਤਿ વਿਹਾਰਗੋਪਕਾ। ਅਞ੍ਞਥਤ੍ਤਨ੍ਤਿ ਪਸਾਦਞ੍ਞਥਤ੍ਤਂ। ਅਞ੍ਞੇਸੁ ਕੁਲੇਸੁ ਦਾਤਬ੍ਬਾਤਿ ਅਞ੍ਞੇਸਂ ਕੁਲਾਨਂ ਯਾਗੁਆਦਯੋ ਦਾਤਬ੍ਬਾ।
Atirekagāvuteti gāvutato atireke ṭhāne. Taṃdivasanti tasmiṃ salākabhattagahaṇadivase. Yo na gacchati, tassa na dātabbāti yojanā. Hīti yasmā. Tīṇi pana divasānīti accantasaṃyoge cetaṃ upayogavacanaṃ. Tanti orimavāragāmasalākaṃ. Daṇḍakammaṃ pana kinti gāḷhaṃ kātabbanti āha ‘‘saṭṭhito vā paṇṇāsato vā na parihāpetabba’’nti. Vihāravāroti vihārassa rakkhanatthāya vāro. Vihāravārikassāti vihāraṃ vārena, vāraṃ gahetvā vā rakkhatīti vihāravāriko, tassa dātabbāti sambandho. Vihāragopakāti vihāraṃ gopentīti vihāragopakā. Aññathattanti pasādaññathattaṃ. Aññesu kulesu dātabbāti aññesaṃ kulānaṃ yāguādayo dātabbā.
વਾਰਂ ਗਾਹੇਤ੍વਾਤਿ ਅਞ੍ਞੇਹਿ વਾਰਂ ਗਾਹਾਪੇਤ੍વਾ। ਨੇਸਨ੍ਤਿ વਿਹਾਰવਾਰਿਕਾਨਂ। ਸਲਾਕਾਤਿ ਪਕਤਿਕਤ੍ਤਾਰਂ ਅਪੇਕ੍ਖਿਤ੍વਾ ‘‘ਭવਨ੍ਤੀ’’ਤਿ ਬਹੁવਚਨવਸੇਨ વੁਤ੍ਤਂ। ਫਾਤਿਕਮ੍ਮਮੇવਾਤਿ વਿਹਾਰਰਕ੍ਖਨਤ੍ਥਾਯ ਸਙ੍ਘੇਨ ਦਾਤਬ੍ਬਫਾਤਿਕਮ੍ਮਮੇવ। ਅਞ੍ਞਮ੍ਪੀਤਿ ਪਿਸਦ੍ਦੇਨ ਨ ਕੇવਲਂ ਫਾਤਿਕਮ੍ਮਮੇવ, ਅਞ੍ਞਮ੍ਪੀਤਿ ਦਸ੍ਸੇਤਿ। ਅਤਿਰੇਕਉਤ੍ਤਰਿਭਙ੍ਗਸ੍ਸਾਤਿ ਅਤਿਰੇਕਂ ਉਤ੍ਤਰਿਭਙ੍ਗਮੇਤਸ੍ਸਾਤਿ ਅਤਿਰੇਕਉਤ੍ਤਰਿਭਙ੍ਗਂ, ਤਸ੍ਸ।
Vāraṃ gāhetvāti aññehi vāraṃ gāhāpetvā. Nesanti vihāravārikānaṃ. Salākāti pakatikattāraṃ apekkhitvā ‘‘bhavantī’’ti bahuvacanavasena vuttaṃ. Phātikammamevāti vihārarakkhanatthāya saṅghena dātabbaphātikammameva. Aññampīti pisaddena na kevalaṃ phātikammameva, aññampīti dasseti. Atirekauttaribhaṅgassāti atirekaṃ uttaribhaṅgametassāti atirekauttaribhaṅgaṃ, tassa.
ਸਲਾਕਾ ਲਦ੍ਧਾਤਿ ਸਲਾਕਾ ਏવ ਲਦ੍ਧਾ। ਤਂਦਿવਸਨ੍ਤਿ ਤਸ੍ਮਿਂ ਸਲਾਕਲਦ੍ਧਦਿવਸੇ। ਏਕਸ੍ਸੇવਾਤਿ ਏਕੇਕਸ੍ਸੇવ। વਿਜਟੇਤ੍વਾਤਿ ਤਾਨਿ ਦ੍વੇ ਤੀਣਿ ਏਕਚਾਰਿਕਭਤ੍ਤਾਨਿ વਿਜਟਂ ਨਿਗੁਮ੍ਬਂ ਕਤ੍વਾ।
Salākā laddhāti salākā eva laddhā. Taṃdivasanti tasmiṃ salākaladdhadivase. Ekassevāti ekekasseva. Vijaṭetvāti tāni dve tīṇi ekacārikabhattāni vijaṭaṃ nigumbaṃ katvā.
ਏਕਸਮ੍ਭੋਗਾਤਿ ਏਕਤੋ ਸਮ੍ਭੋਗਾ। ਗਾਹੇਨ੍ਤੇਨ ਦਾਤੁਨ੍ਤਿ ਸਮ੍ਬਨ੍ਧੋ। ਸਮ੍ਮੁਖੀਭੂਤਸ੍ਸਾਤਿ ਉਪਚਾਰਸੀਮਾਯਂ ਠਿਤਸ੍ਸ ਯਸ੍ਸ ਕਸ੍ਸਚਿ, ਪਾਪੇਤ੍વਾਤਿ ਯੋਜਨਾ। ਰਸਸਲਾਕਨ੍ਤਿ ਉਚ੍ਛੁਸਲਾਕਂ। ‘‘ਰਸਾਲਸਲਾਕ’’ਨ੍ਤਿਪਿ ਪਾਠੋ, ਅਯਮੇવਤ੍ਥੋ। ਖੁਦ੍ਦਕવਿਹਾਰੇ ਗਾਹੇਤਬ੍ਬવਿਧਾਨਂ ਦਸ੍ਸੇਤ੍વਾ ਮਹਾਆવਾਸੇ ਤਂ ਦਸ੍ਸੇਨ੍ਤੋ ਆਹ ‘‘ਮਹਾਆવਾਸੇ’’ਤਿਆਦਿ।
Ekasambhogāti ekato sambhogā. Gāhentena dātunti sambandho. Sammukhībhūtassāti upacārasīmāyaṃ ṭhitassa yassa kassaci, pāpetvāti yojanā. Rasasalākanti ucchusalākaṃ. ‘‘Rasālasalāka’’ntipi pāṭho, ayamevattho. Khuddakavihāre gāhetabbavidhānaṃ dassetvā mahāāvāse taṃ dassento āha ‘‘mahāāvāse’’tiādi.
‘‘ਤਕ੍ਕਸਲਾਕਮ੍ਪਿ …ਪੇ॰… ਦਾਤੁਂ વਟ੍ਟਤੀ’’ਤਿ ਇਦਂ ਖੁਦ੍ਦਕવਿਹਾਰਂ ਸਨ੍ਧਾਯ વੁਤ੍ਤਂ, ਤੇਨ વੁਤ੍ਤਂ ‘‘ਮਹਾਆવਾਸੇ’’ਤਿਆਦਿ। ਭੇਸਜ੍ਜਾਦਿਸਲਾਕਾਯੋਤਿ ਏਤ੍ਥ ਆਦਿਸਦ੍ਦੇਨ ਗਨ੍ਧਮਾਲਾਸਲਾਕਾਯੋ ਸਙ੍ਗਣ੍ਹਾਤਿ। ਏਤ੍ਥਾਤਿ ਸਲਾਕਾਸੁ। ਅਗ੍ਗਭਿਕ੍ਖਮਤ੍ਤਨ੍ਤਿ ਅਗ੍ਗਤੋ ਦਾਤਬ੍ਬਂ ਭਿਕ੍ਖਾਮਤ੍ਤਂ। ਤਾਦਿਸਾਨਿ ਭਤ੍ਤਾਨੀਤਿ ਅਗ੍ਗਭਿਕ੍ਖਾਮਤ੍ਤਸਭਾવਾਨਿ ਭਤ੍ਤਾਨਿ। ਨੋ ਚੇਤਿ ਤਾਦਿਸਾਨਿ ਭਤ੍ਤਾਨਿ ਬਹੂਨਿ ਨੋ ਚੇ ਹੋਨ੍ਤਿ। ਲਦ੍ਧਾ વਾ ਅਲਦ੍ਧਾ વਾਤਿ ਲਭਿਤ੍વਾ વਾ ਅਲਭਿਤ੍વਾ વਾ।
‘‘Takkasalākampi …pe… dātuṃ vaṭṭatī’’ti idaṃ khuddakavihāraṃ sandhāya vuttaṃ, tena vuttaṃ ‘‘mahāāvāse’’tiādi. Bhesajjādisalākāyoti ettha ādisaddena gandhamālāsalākāyo saṅgaṇhāti. Etthāti salākāsu. Aggabhikkhamattanti aggato dātabbaṃ bhikkhāmattaṃ. Tādisāni bhattānīti aggabhikkhāmattasabhāvāni bhattāni. No ceti tādisāni bhattāni bahūni no ce honti. Laddhā vā aladdhā vāti labhitvā vā alabhitvā vā.
ਸਲਾਕਾਸੁ ਗਾਹਿਤਾਸੂਤਿ ਅਞ੍ਞਾਸੁ ਸਲਾਕਾਸੁ ਗਾਹਿਤਾਸੁ। ਸਮੀਪੇ ਠਿਤਸ੍ਸਾਤਿ ਹਤ੍ਥਂ ਅਪਸਾਰੇਤ੍વਾ ਸਮੀਪੇ ਠਿਤਸ੍ਸ। ਅਸ੍ਸਾਤਿ ਭਿਕ੍ਖੁਸ੍ਸ। ਅਯਂ ਸਲਾਕਾਤਿ ‘‘ਅਯਂ ਤਸ੍ਸ ਸਲਾਕਾ’’ਤਿ ਠਪੇਤੁਂ વਟ੍ਟਤਿ। ਅਧਮ੍ਮਿਕਾਤਿ ਕਤਿਕਾ ਅਧਮ੍ਮਯੁਤ੍ਤਾ। ਅਨਾਗਤਸ੍ਸ ਦੇਥਾਤਿ ਅਨਾਗਤਸ੍ਸ ਭਿਕ੍ਖੁਸ੍ਸ ਸਲਾਕਂ ਦੇਥ।
Salākāsu gāhitāsūti aññāsu salākāsu gāhitāsu. Samīpe ṭhitassāti hatthaṃ apasāretvā samīpe ṭhitassa. Assāti bhikkhussa. Ayaṃ salākāti ‘‘ayaṃ tassa salākā’’ti ṭhapetuṃ vaṭṭati. Adhammikāti katikā adhammayuttā. Anāgatassa dethāti anāgatassa bhikkhussa salākaṃ detha.
ਸੋਤਿ ਭਤ੍ਤੁਦ੍ਦੇਸਕੋ, વਦੇਯ੍ਯਾਤਿ ਸਮ੍ਬਨ੍ਧੋ। ਮਯਾ ਮਯ੍ਹਂ ਪਾਪਿਤਨ੍ਤਿ ਸਮ੍ਬਨ੍ਧੋ। ਤਤ੍ਥਾਤਿ ਗਾਮੇ। ਭੁਞ੍ਜੇਯ੍ਯਾਥ ਇਤਿ વਦੇਯ੍ਯ, વਟ੍ਟਤੀਤਿ ਯੋਜਨਾ। ਤਤ੍ਥੇવਾਤਿ ਅਸਨਸਾਲਾਯਮੇવ। ਤਤ੍ਰਾਤਿ ਤਸ੍ਮਿਂ ਗਾਮੇ। વਿਹਾਰਂ ਆਨੇਤ੍વਾਤਿ વਿਹਾਰਂ ਸਲਾਕਭਤ੍ਤਂ ਆਨੇਤ੍વਾ। ਸਲਾਕਗ੍ਗਾਹਣਕਾਲੇਤਿ ਸਲਾਕਾਯ ਭਿਕ੍ਖੂਹਿ ਗਾਹਾਪਨਕਾਲੇ।
Soti bhattuddesako, vadeyyāti sambandho. Mayā mayhaṃ pāpitanti sambandho. Tatthāti gāme. Bhuñjeyyātha iti vadeyya, vaṭṭatīti yojanā. Tatthevāti asanasālāyameva. Tatrāti tasmiṃ gāme. Vihāraṃ ānetvāti vihāraṃ salākabhattaṃ ānetvā. Salākaggāhaṇakāleti salākāya bhikkhūhi gāhāpanakāle.
ਤਤ੍ਥਾਤਿ ਤਸ੍ਮਿਂ ਦਿਸਾਭਾਗੇ। ਅਞ੍ਞੇਨਾਤਿ ਅਤ੍ਤਨਾ ਅਞ੍ਞੇਨ, ਲਦ੍ਧਾ ਹੋਤੀਤਿ ਸਮ੍ਬਨ੍ਧੋ। ਤੇਨ ਪਨਾਤਿ ਗਮਿਕਤੋ ਇਤਰੇਨ। ਤਸ੍ਮਿਨ੍ਤਿ ਗਮਿਕੇ। ਉਪਚਾਰਸੀਮਂ ਅਨਤਿਕ੍ਕਨ੍ਤੇਯੇવਾਤਿ ਯੋਜਨਾ।
Tatthāti tasmiṃ disābhāge. Aññenāti attanā aññena, laddhā hotīti sambandho. Tena panāti gamikato itarena. Tasminti gamike. Upacārasīmaṃ anatikkanteyevāti yojanā.
ਤਤ੍ਥਾਤਿ ਛਡ੍ਡਿਤવਿਹਾਰੇ। ਤੇਸੂਤਿ ਆવਾਸਿਕੇਸੁ ਭਿਕ੍ਖੂਸੁ, ਗਤੇਸੂਤਿ ਸਮ੍ਬਨ੍ਧੋ। ਸੋવਾਤਿ ਆਗਨ੍ਤੁਕੋ ਏવ। ਯੋ ਪਨ ਗਚ੍ਛਤੀਤਿ ਸਮ੍ਬਨ੍ਧੋ। ਤਨ੍ਤਿ ਸਲਾਕਭਤ੍ਤਂ, ਨ ਪਾਪੁਣਾਤੀਤਿ ਸਮ੍ਬਨ੍ਧੋ।
Tatthāti chaḍḍitavihāre. Tesūti āvāsikesu bhikkhūsu, gatesūti sambandho. Sovāti āgantuko eva. Yo pana gacchatīti sambandho. Tanti salākabhattaṃ, na pāpuṇātīti sambandho.
ਪੁਞ੍ਞੇਨਾਤਿ ਪੁਞ੍ਞਸ੍ਮਾ। ਤਾ ਚ ਖੋ ਪਨਾਤਿ ਸਲਾਕਾਯੋ ਪਨ। ਪਚ੍ਛਿਂ ਪਨਾਤਿ ਸਲਾਕਪਚ੍ਛਿਂ ਪਨ। ਤਤ੍ਥਾਤਿ ਪਚ੍ਛਿਯਂ। ਏਤ੍ਤੋવਾਤਿ ਆਕਿਰਣਟ੍ਠਾਨਤੋવ। ਏਕਨ੍ਤਿ ਏਕਂ ਸਲਾਕਂ। વਤ੍ਤਬ੍ਬਨ੍ਤਿ ਸਲਾਕਦਾਯਕੇਨ વਤ੍ਤਬ੍ਬਂ।
Puññenāti puññasmā. Tā ca kho panāti salākāyo pana. Pacchiṃ panāti salākapacchiṃ pana. Tatthāti pacchiyaṃ. Ettovāti ākiraṇaṭṭhānatova. Ekanti ekaṃ salākaṃ. Vattabbanti salākadāyakena vattabbaṃ.
ਭਿਕ੍ਖੂ ਗਤਾਤਿ ਸਮ੍ਬਨ੍ਧੋ। ਤਤ੍ਥਾਤਿ ਅਞ੍ਞਸ੍ਮਿਂ વਿਹਾਰੇ। ਮਹਾਥੇਰੋਪਿ ਗਚ੍ਛਤੀਤਿ ਸਮ੍ਬਨ੍ਧੋ। ਗਤવਿਹਾਰੇ ਅਭੁਞ੍ਜਿਤ੍વਾવ ਗੋਚਰਗਾਮਂ ਅਨੁਪ੍ਪਤ੍ਤੇਹਿ ਭਿਕ੍ਖੂਹਿ ਪਤ੍ਤਾ ਨ ਦਾਤਬ੍ਬਾਤਿ ਯੋਜਨਾ। વਿਹਾਰਟ੍ਠਕਂ ਭਤ੍ਤਨ੍ਤਿ વਿਹਾਰੇ ਠਿਤਂ ਭਤ੍ਤਂ।
Bhikkhū gatāti sambandho. Tatthāti aññasmiṃ vihāre. Mahātheropi gacchatīti sambandho. Gatavihāre abhuñjitvāva gocaragāmaṃ anuppattehi bhikkhūhi pattā na dātabbāti yojanā. Vihāraṭṭhakaṃ bhattanti vihāre ṭhitaṃ bhattaṃ.
