| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
ஸலாகப⁴த்தகதா²வண்ணனா
Salākabhattakathāvaṇṇanā
உபனிப³ந்தி⁴த்வாதி லிகி²த்வா. கா³மவஸேனபீதி யேபு⁴ய்யேன ஸமலாப⁴கா³மவஸேனபி. ப³ஹூனி ஸலாகப⁴த்தானீதி திங்ஸங் வா சத்தாரீஸங் வா ப⁴த்தானி. ‘‘ஸசே ஹொந்தீ’’தி அஜ்ஜா²ஹரித்வா யோஜேதப்³ப³ங்.
Upanibandhitvāti likhitvā. Gāmavasenapīti yebhuyyena samalābhagāmavasenapi. Bahūni salākabhattānīti tiṃsaṃ vā cattārīsaṃ vā bhattāni. ‘‘Sace hontī’’ti ajjhāharitvā yojetabbaṃ.
ஸல்லக்கெ²த்வாதி தானி ப⁴த்தானி பமாணவஸேன ஸல்லக்கெ²த்வா. நிக்³க³ஹேன த³த்வாதி தூ³ரங் க³ந்துங் அனிச்ச²ந்தஸ்ஸ நிக்³க³ஹேன ஸம்படிச்சா²பெத்வா த³த்வா. புன விஹாரங் ஆக³ந்த்வாதி எத்த² விஹாரங் அனாக³ந்த்வா ப⁴த்தங் க³ஹெத்வா பச்சா² விஹாரே அத்தனோ பாபெத்வா பு⁴ஞ்ஜிதும்பி வட்டதி.
Sallakkhetvāti tāni bhattāni pamāṇavasena sallakkhetvā. Niggahena datvāti dūraṃ gantuṃ anicchantassa niggahena sampaṭicchāpetvā datvā. Puna vihāraṃ āgantvāti ettha vihāraṃ anāgantvā bhattaṃ gahetvā pacchā vihāre attano pāpetvā bhuñjitumpi vaṭṭati.
ஏககே³ஹவஸேனாதி வீதி²யம்பி ஏகபஸ்ஸே க⁴ரபாளியா வஸேன. உத்³தி³ஸித்வாபீதி அஸுககுலே ஸலாகப⁴த்தானி துய்ஹங் பாபுணந்தீதி வத்வா.
Ekagehavasenāti vīthiyampi ekapasse gharapāḷiyā vasena. Uddisitvāpīti asukakule salākabhattāni tuyhaṃ pāpuṇantīti vatvā.
வாரகா³மேதி அதிதூ³ரத்தா வாரேன க³ந்தப்³ப³கா³மே. ஸட்டி²தோ வா பண்ணாஸதோ வாதி த³ண்ட³கம்மத்தா²ய உத³கக⁴டங் ஸந்தா⁴ய வுத்தங். விஹாரவாரோதி ஸப்³ப³பி⁴க்கூ²ஸு பி⁴க்க²த்தா²ய க³தேஸு விஹாரரக்க²ணவாரோ.
Vāragāmeti atidūrattā vārena gantabbagāme. Saṭṭhito vā paṇṇāsato vāti daṇḍakammatthāya udakaghaṭaṃ sandhāya vuttaṃ. Vihāravāroti sabbabhikkhūsu bhikkhatthāya gatesu vihārarakkhaṇavāro.
தேஸந்தி விஹாரவாரிகானங். பா²திகம்மமேவாதி விஹாரரக்க²ணகிச்சஸ்ஸ பஹோனகபடிபாத³னமேவ. ஏகஸ்ஸேவ பாபுணந்தீதி தி³வஸே தி³வஸே ஏகேகஸ்ஸேவ பாபிதானீதி அத்தோ².
Tesanti vihāravārikānaṃ. Phātikammamevāti vihārarakkhaṇakiccassa pahonakapaṭipādanameva. Ekasseva pāpuṇantīti divase divase ekekasseva pāpitānīti attho.
ரஸஸலாகந்தி உச்சு²ரஸஸலாகங். ‘‘ஸலாகவஸேன கா³ஹிதத்தா பன ந ஸாதி³தப்³பா³’’தி இத³ங் அஸாருப்பவஸேன வுத்தங், ந து⁴தங்க³பே⁴த³வஸேன. ‘‘ஸங்க⁴தோ நிராமிஸஸலாகா…பே॰… வட்டதியேவா’’தி (விஸுத்³தி⁴॰ 1.26) ஹி விஸுத்³தி⁴மக்³கே³ வுத்தங். அக்³க³பி⁴க்கா²மத்தந்தி ஏககடச்சு²பி⁴க்கா²மத்தங். லத்³தா⁴ வா அலத்³தா⁴ வா ஸ்வேபி க³ண்ஹெய்யாஸீதி லத்³தே⁴பி அப்பமத்ததாய வுத்தங். தேனாஹ ‘‘யாவத³த்த²ங் லப⁴தி…பே॰… அலபி⁴த்வா ‘ஸ்வே க³ண்ஹெய்யாஸீ’தி வத்தப்³போ³’’தி.
Rasasalākanti ucchurasasalākaṃ. ‘‘Salākavasena gāhitattā pana na sāditabbā’’ti idaṃ asāruppavasena vuttaṃ, na dhutaṅgabhedavasena. ‘‘Saṅghato nirāmisasalākā…pe… vaṭṭatiyevā’’ti (visuddhi. 1.26) hi visuddhimagge vuttaṃ. Aggabhikkhāmattanti ekakaṭacchubhikkhāmattaṃ. Laddhā vā aladdhā vā svepi gaṇheyyāsīti laddhepi appamattatāya vuttaṃ. Tenāha ‘‘yāvadatthaṃ labhati…pe… alabhitvā ‘sve gaṇheyyāsī’ti vattabbo’’ti.
தத்தா²தி தஸ்மிங் தி³ஸாபா⁴கே³. தங் க³ஹெத்வாதி தங் வாரகா³மே ஸலாகங் அத்தனோ க³ஹெத்வா. தேனாதி தி³ஸங்க³மிகதோ அஞ்ஞேன தஸ்மிங் தி³ஸங்க³மிகே. தே³வஸிகங் பாபேதப்³பா³தி உபசாரஸீமாய டி²தஸ்ஸ யஸ்ஸ கஸ்ஸசி வஸ்ஸக்³கே³ன பாபேதப்³பா³. ஏவங் ஏதேஸு அக³தேஸு ஆஸன்னவிஹாரே பி⁴க்கூ²னங் பு⁴ஞ்ஜிதுங் வட்டதி இதரதா² ஸங்கி⁴கதோ.
Tatthāti tasmiṃ disābhāge. Taṃ gahetvāti taṃ vāragāme salākaṃ attano gahetvā. Tenāti disaṃgamikato aññena tasmiṃ disaṃgamike. Devasikaṃ pāpetabbāti upacārasīmāya ṭhitassa yassa kassaci vassaggena pāpetabbā. Evaṃ etesu agatesu āsannavihāre bhikkhūnaṃ bhuñjituṃ vaṭṭati itarathā saṅghikato.
அம்ஹாகங் கோ³சரகா³மேவாதி ஸலாகப⁴த்ததா³யகானங் கா³மங் ஸந்தா⁴ய வுத்தங். விஹாரே தே²ரஸ்ஸ பத்தஸலாகப⁴த்தந்தி விஹாரே ஏகேகஸ்ஸேவ ஓஹீனத்தே²ரஸ்ஸ ஸப்³ப³ஸலாகானங் அத்தனோ பாபனவஸேன பத்தஸலாகப⁴த்தங்.
Amhākaṃ gocaragāmevāti salākabhattadāyakānaṃ gāmaṃ sandhāya vuttaṃ. Vihāre therassa pattasalākabhattanti vihāre ekekasseva ohīnattherassa sabbasalākānaṃ attano pāpanavasena pattasalākabhattaṃ.
ஸலாகப⁴த்தகதா²வண்ணனா நிட்டி²தா.
Salākabhattakathāvaṇṇanā niṭṭhitā.
