| Library / Tipiṭaka / তিপিটক • Tipiṭaka / ৰিমতিৰিনোদনী-টীকা • Vimativinodanī-ṭīkā |
সলাকভত্তকথাৰণ্ণনা
Salākabhattakathāvaṇṇanā
উপনিবন্ধিত্ৰাতি লিখিত্ৰা। গামৰসেনপীতি যেভুয্যেন সমলাভগামৰসেনপি। বহূনি সলাকভত্তানীতি তিংসং ৰা চত্তারীসং ৰা ভত্তানি। ‘‘সচে হোন্তী’’তি অজ্ঝাহরিত্ৰা যোজেতব্বং।
Upanibandhitvāti likhitvā. Gāmavasenapīti yebhuyyena samalābhagāmavasenapi. Bahūni salākabhattānīti tiṃsaṃ vā cattārīsaṃ vā bhattāni. ‘‘Sace hontī’’ti ajjhāharitvā yojetabbaṃ.
সল্লক্খেত্ৰাতি তানি ভত্তানি পমাণৰসেন সল্লক্খেত্ৰা। নিগ্গহেন দত্ৰাতি দূরং গন্তুং অনিচ্ছন্তস্স নিগ্গহেন সম্পটিচ্ছাপেত্ৰা দত্ৰা। পুন ৰিহারং আগন্ত্ৰাতি এত্থ ৰিহারং অনাগন্ত্ৰা ভত্তং গহেত্ৰা পচ্ছা ৰিহারে অত্তনো পাপেত্ৰা ভুঞ্জিতুম্পি ৰট্টতি।
Sallakkhetvāti tāni bhattāni pamāṇavasena sallakkhetvā. Niggahena datvāti dūraṃ gantuṃ anicchantassa niggahena sampaṭicchāpetvā datvā. Puna vihāraṃ āgantvāti ettha vihāraṃ anāgantvā bhattaṃ gahetvā pacchā vihāre attano pāpetvā bhuñjitumpi vaṭṭati.
একগেহৰসেনাতি ৰীথিযম্পি একপস্সে ঘরপাল়িযা ৰসেন। উদ্দিসিত্ৰাপীতি অসুককুলে সলাকভত্তানি তুয্হং পাপুণন্তীতি ৰত্ৰা।
Ekagehavasenāti vīthiyampi ekapasse gharapāḷiyā vasena. Uddisitvāpīti asukakule salākabhattāni tuyhaṃ pāpuṇantīti vatvā.
ৰারগামেতি অতিদূরত্তা ৰারেন গন্তব্বগামে। সট্ঠিতো ৰা পণ্ণাসতো ৰাতি দণ্ডকম্মত্থায উদকঘটং সন্ধায ৰুত্তং। ৰিহারৰারোতি সব্বভিক্খূসু ভিক্খত্থায গতেসু ৰিহাররক্খণৰারো।
Vāragāmeti atidūrattā vārena gantabbagāme. Saṭṭhito vā paṇṇāsato vāti daṇḍakammatthāya udakaghaṭaṃ sandhāya vuttaṃ. Vihāravāroti sabbabhikkhūsu bhikkhatthāya gatesu vihārarakkhaṇavāro.
তেসন্তি ৰিহারৰারিকানং। ফাতিকম্মমেৰাতি ৰিহাররক্খণকিচ্চস্স পহোনকপটিপাদনমেৰ। একস্সেৰ পাপুণন্তীতি দিৰসে দিৰসে একেকস্সেৰ পাপিতানীতি অত্থো।
Tesanti vihāravārikānaṃ. Phātikammamevāti vihārarakkhaṇakiccassa pahonakapaṭipādanameva. Ekasseva pāpuṇantīti divase divase ekekasseva pāpitānīti attho.
রসসলাকন্তি উচ্ছুরসসলাকং। ‘‘সলাকৰসেন গাহিতত্তা পন ন সাদিতব্বা’’তি ইদং অসারুপ্পৰসেন ৰুত্তং, ন ধুতঙ্গভেদৰসেন। ‘‘সঙ্ঘতো নিরামিসসলাকা…পে॰… ৰট্টতিযেৰা’’তি (ৰিসুদ্ধি॰ ১.২৬) হি ৰিসুদ্ধিমগ্গে ৰুত্তং। অগ্গভিক্খামত্তন্তি এককটচ্ছুভিক্খামত্তং। লদ্ধা ৰা অলদ্ধা ৰা স্ৰেপি গণ্হেয্যাসীতি লদ্ধেপি অপ্পমত্ততায ৰুত্তং। তেনাহ ‘‘যাৰদত্থং লভতি…পে॰… অলভিত্ৰা ‘স্ৰে গণ্হেয্যাসী’তি ৰত্তব্বো’’তি।
Rasasalākanti ucchurasasalākaṃ. ‘‘Salākavasena gāhitattā pana na sāditabbā’’ti idaṃ asāruppavasena vuttaṃ, na dhutaṅgabhedavasena. ‘‘Saṅghato nirāmisasalākā…pe… vaṭṭatiyevā’’ti (visuddhi. 1.26) hi visuddhimagge vuttaṃ. Aggabhikkhāmattanti ekakaṭacchubhikkhāmattaṃ. Laddhā vā aladdhā vā svepi gaṇheyyāsīti laddhepi appamattatāya vuttaṃ. Tenāha ‘‘yāvadatthaṃ labhati…pe… alabhitvā ‘sve gaṇheyyāsī’ti vattabbo’’ti.
তত্থাতি তস্মিং দিসাভাগে। তং গহেত্ৰাতি তং ৰারগামে সলাকং অত্তনো গহেত্ৰা। তেনাতি দিসংগমিকতো অঞ্ঞেন তস্মিং দিসংগমিকে। দেৰসিকং পাপেতব্বাতি উপচারসীমায ঠিতস্স যস্স কস্সচি ৰস্সগ্গেন পাপেতব্বা। এৰং এতেসু অগতেসু আসন্নৰিহারে ভিক্খূনং ভুঞ্জিতুং ৰট্টতি ইতরথা সঙ্ঘিকতো।
Tatthāti tasmiṃ disābhāge. Taṃ gahetvāti taṃ vāragāme salākaṃ attano gahetvā. Tenāti disaṃgamikato aññena tasmiṃ disaṃgamike. Devasikaṃ pāpetabbāti upacārasīmāya ṭhitassa yassa kassaci vassaggena pāpetabbā. Evaṃ etesu agatesu āsannavihāre bhikkhūnaṃ bhuñjituṃ vaṭṭati itarathā saṅghikato.
অম্হাকং গোচরগামেৰাতি সলাকভত্তদাযকানং গামং সন্ধায ৰুত্তং। ৰিহারে থেরস্স পত্তসলাকভত্তন্তি ৰিহারে একেকস্সেৰ ওহীনত্থেরস্স সব্বসলাকানং অত্তনো পাপনৰসেন পত্তসলাকভত্তং।
Amhākaṃ gocaragāmevāti salākabhattadāyakānaṃ gāmaṃ sandhāya vuttaṃ. Vihāre therassa pattasalākabhattanti vihāre ekekasseva ohīnattherassa sabbasalākānaṃ attano pāpanavasena pattasalākabhattaṃ.
সলাকভত্তকথাৰণ্ণনা নিট্ঠিতা।
Salākabhattakathāvaṇṇanā niṭṭhitā.
