| Library / Tipiṭaka / တိပိဋက • Tipiṭaka / ဝဇိရဗုဒ္ဓိ-ဋီကာ • Vajirabuddhi-ṭīkā |
သလာကဘတ္တကထာဝဏ္ဏနာ
Salākabhattakathāvaṇṇanā
န ဟိ ဗဟိသီမာယ သင္ဃလာဘောတိ ဧတ္ထ ‘‘ဥဒ္ဒေသဘတ္တာဒီသု ဗဟိသီမာယ ဌိတသ္သပိ စေ ဥပာသကာ ဒေန္တိ, ဂဟေတုံ လဘန္တိ, အတ္တနောပိ ပာပေတ္ဝာ ဂဟဏံ အနုညာတံ, တထာ ဣဓ န ဝဋ္ဋတီ’’တိ ဝုတ္တံ။ န ပာပုဏန္တီတိ ဥဒ္ဒိသိတ္ဝာပိ။ ဝာရဂာမန္တိ ဒူရတ္တာ ဝာရေန နိဂ္ဂဟေန ဂန္တဗ္ဗဂာမေ။ ဖာတိကမ္မမေဝာတိ အတိရေကလာဘာ စ ဘဝန္တိ။ သမ္မုခီဘူတသ္သာတိ ယေဘုယ္ယေန စေ ဘိက္ခူ ဗဟိသီမံ ဂတာ, သမ္မုခီဘူတသ္သ ပာပေတဗ္ဗံ။ သဘာဂတ္တာ ဟိ ဧကေန လဒ္ဓံ သဗ္ဗေသံ ပဟောတိ, တသ္မိမ္ပိ အသတိ အတ္တနော ပာပေတ္ဝာ ဒာတဗ္ဗံ။ ‘‘လဒ္ဓာ ဝာ အလဒ္ဓာ ဝာ’’တိ ဝစနသိလိဋ္ဌဝသေန ဝုတ္တံ။ ဝိဟာရေ အပာပိတံ ပန။ပေ.။ န ဝဋ္ဋတီတိ သလာကဘတ္တံ ဝိဟာရေ ဥဒ္ဒိသိယတိ။ တေန ပန ဒိန္နသလာကေန။ တသ္သာတိ ဂဟေတ္ဝာ ဂတသ္သ။ သလာကာ ဂဟေတဗ္ဗာတိ ယုတ္တံ ဝိယ။ သဗ္ဗပောတ္ထကေသု ‘‘ဂာဟေတဗ္ဗာ’’တိ ပာဌော, တသ္မာ တေနာတိ သလာကဂ္ဂာဟာပကေနာတိ အတ္ထော။ ‘‘စောရိကာယ ဂဟိတတ္တာ န ပာပုဏာတီ’’တိ ဝစနတော ‘‘ကုဋိသောဓနံ ဝဋ္ဋတီ’’တိ စ ဒီပဝာသိနော ဝဒန္တိ ကိရ။ ဧကံ မဟာထေရသ္သာတိ မဟာထေရော ဝိဟာရတော ယေဘုယ္ယေန န ဂစ္ဆတိ, ဣတရေ ကဒာစိ ဂစ္ဆတိ, တသ္မာ သဘာဂာ စေ, အတ္တနော ပာပေတ္ဝာ ပုန ဣတရေသံ ဒိယ္ယတိ။ ဝိဟာရေ ထေရသ္သ ပတ္တသလာကဘတ္တန္တိ မဟာထေရော ဧကကောဝ ဝိဟာရေ ဩဟီနော, ‘‘အဝသ္သံ သဗ္ဗသလာကာ အတ္တနော ပာပေတ္ဝာ ဌိတော’’တိ ပဋိသ္သယံ ဂန္တ္ဝာ အာဂန္တုကဘိက္ခူနမ္ပိ အဒသ္သနတော ကုက္ကုစ္စံ အကတ္ဝာ ဘုဉ္ဇန္တိ။
Na hi bahisīmāya saṅghalābhoti ettha ‘‘uddesabhattādīsu bahisīmāya ṭhitassapi ce upāsakā denti, gahetuṃ labhanti, attanopi pāpetvā gahaṇaṃ anuññātaṃ, tathā idha na vaṭṭatī’’ti vuttaṃ. Na pāpuṇantīti uddisitvāpi. Vāragāmanti dūrattā vārena niggahena gantabbagāme. Phātikammamevāti atirekalābhā ca bhavanti. Sammukhībhūtassāti yebhuyyena ce bhikkhū bahisīmaṃ gatā, sammukhībhūtassa pāpetabbaṃ. Sabhāgattā hi ekena laddhaṃ sabbesaṃ pahoti, tasmimpi asati attano pāpetvā dātabbaṃ. ‘‘Laddhā vā aladdhā vā’’ti vacanasiliṭṭhavasena vuttaṃ. Vihāre apāpitaṃ pana…pe… na vaṭṭatīti salākabhattaṃ vihāre uddisiyati. Tena pana dinnasalākena. Tassāti gahetvā gatassa. Salākā gahetabbāti yuttaṃ viya. Sabbapotthakesu ‘‘gāhetabbā’’ti pāṭho, tasmā tenāti salākaggāhāpakenāti attho. ‘‘Corikāya gahitattā na pāpuṇātī’’ti vacanato ‘‘kuṭisodhanaṃ vaṭṭatī’’ti ca dīpavāsino vadanti kira. Ekaṃ mahātherassāti mahāthero vihārato yebhuyyena na gacchati, itare kadāci gacchati, tasmā sabhāgā ce, attano pāpetvā puna itaresaṃ diyyati. Vihāre therassa pattasalākabhattanti mahāthero ekakova vihāre ohīno, ‘‘avassaṃ sabbasalākā attano pāpetvā ṭhito’’ti paṭissayaṃ gantvā āgantukabhikkhūnampi adassanato kukkuccaṃ akatvā bhuñjanti.
