| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
४. सालकल्याणिकङ्गपञ्हो
4. Sālakalyāṇikaṅgapañho
४. ‘‘भन्ते नागसेन, ‘सालकल्याणिकाय एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, सालकल्याणिका नाम अन्तोपथवियं येव अभिवड्ढति हत्थसतम्पि भिय्योपि, एवमेव खो, महाराज, योगिना योगावचरेन चत्तारि सामञ्ञफलानि चतस्सो पटिसम्भिदा छळभिञ्ञायो केवलञ्च समणधम्मं सुञ्ञागारे येव परिपूरयितब्बं। इदं, महाराज, सालकल्याणिकाय एकं अङ्गं गहेतब्बं। भासितम्पेतं, महाराज, थेरेन राहुलेन –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘सालकल्याणिका नाम, पादपो धरणीरुहो।
‘‘‘Sālakalyāṇikā nāma, pādapo dharaṇīruho;
अन्तोपथवियं येव, सतहत्थोपि वड्ढति॥
Antopathaviyaṃ yeva, satahatthopi vaḍḍhati.
‘‘‘यथा कालम्हि सम्पत्ते, परिपाकेन सो दुमो।
‘‘‘Yathā kālamhi sampatte, paripākena so dumo;
उग्गञ्छित्वान एकाहं, सतहत्थोपि वड्ढति॥
Uggañchitvāna ekāhaṃ, satahatthopi vaḍḍhati.
‘‘‘एवमेवाहं महावीर, सालकल्याणिका विय।
‘‘‘Evamevāhaṃ mahāvīra, sālakalyāṇikā viya;
अब्भन्तरे सुञ्ञागारे, धम्मतो अभिवड्ढयि’’’न्ति॥
Abbhantare suññāgāre, dhammato abhivaḍḍhayi’’’nti.
सालकल्याणिकङ्गपञ्हो चतुत्थो।
Sālakalyāṇikaṅgapañho catuttho.
