| Library / Tipiṭaka / ติปิฎก • Tipiṭaka / มิลินฺทปญฺหปาฬิ • Milindapañhapāḷi |
๔. สาลกลฺยาณิกงฺคปโญฺห
4. Sālakalyāṇikaṅgapañho
๔. ‘‘ภเนฺต นาคเสน, ‘สาลกลฺยาณิกาย เอกํ องฺคํ คเหตพฺพ’นฺติ ยํ วเทสิ, กตมํ ตํ เอกํ องฺคํ คเหตพฺพ’’นฺติ? ‘‘ยถา, มหาราช, สาลกลฺยาณิกา นาม อโนฺตปถวิยํ เยว อภิวฑฺฒติ หตฺถสตมฺปิ ภิโยฺยปิ, เอวเมว โข, มหาราช, โยคินา โยคาวจเรน จตฺตาริ สามญฺญผลานิ จตโสฺส ปฎิสมฺภิทา ฉฬภิญฺญาโย เกวลญฺจ สมณธมฺมํ สุญฺญาคาเร เยว ปริปูรยิตพฺพํฯ อิทํ, มหาราช, สาลกลฺยาณิกาย เอกํ องฺคํ คเหตพฺพํฯ ภาสิตเมฺปตํ, มหาราช, เถเรน ราหุเลน –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘สาลกลฺยาณิกา นาม, ปาทโป ธรณีรุโห;
‘‘‘Sālakalyāṇikā nāma, pādapo dharaṇīruho;
อโนฺตปถวิยํ เยว, สตหโตฺถปิ วฑฺฒติฯ
Antopathaviyaṃ yeva, satahatthopi vaḍḍhati.
‘‘‘ยถา กาลมฺหิ สมฺปเตฺต, ปริปาเกน โส ทุโม;
‘‘‘Yathā kālamhi sampatte, paripākena so dumo;
อุคฺคญฺฉิตฺวาน เอกาหํ, สตหโตฺถปิ วฑฺฒติฯ
Uggañchitvāna ekāhaṃ, satahatthopi vaḍḍhati.
‘‘‘เอวเมวาหํ มหาวีร, สาลกลฺยาณิกา วิย;
‘‘‘Evamevāhaṃ mahāvīra, sālakalyāṇikā viya;
อพฺภนฺตเร สุญฺญาคาเร, ธมฺมโต อภิวฑฺฒยิ’’’นฺติฯ
Abbhantare suññāgāre, dhammato abhivaḍḍhayi’’’nti.
สาลกลฺยาณิกงฺคปโญฺห จตุโตฺถฯ
Sālakalyāṇikaṅgapañho catuttho.
