| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. සාලකල්‍යාණිකඞ්‌ගපඤ්‌හො
4. Sālakalyāṇikaṅgapañho
4. ‘‘භන්‌තෙ නාගසෙන, ‘සාලකල්‍යාණිකාය එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, සාලකල්‍යාණිකා නාම අන්‌තොපථවියං යෙව අභිවඩ්‌ඪති හත්‌ථසතම්‌පි භිය්‍යොපි, එවමෙව ඛො, මහාරාජ, යොගිනා යොගාවචරෙන චත්‌තාරි සාමඤ්‌ඤඵලානි චතස්‌සො පටිසම්‌භිදා ඡළභිඤ්‌ඤායො කෙවලඤ්‌ච සමණධම්‌මං සුඤ්‌ඤාගාරෙ යෙව පරිපූරයිතබ්‌බං. ඉදං, මහාරාජ, සාලකල්‍යාණිකාය එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, ථෙරෙන රාහුලෙන –
4. ‘‘Bhante nāgasena, ‘sālakalyāṇikāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, sālakalyāṇikā nāma antopathaviyaṃ yeva abhivaḍḍhati hatthasatampi bhiyyopi, evameva kho, mahārāja, yoginā yogāvacarena cattāri sāmaññaphalāni catasso paṭisambhidā chaḷabhiññāyo kevalañca samaṇadhammaṃ suññāgāre yeva paripūrayitabbaṃ. Idaṃ, mahārāja, sālakalyāṇikāya ekaṃ aṅgaṃ gahetabbaṃ. Bhāsitampetaṃ, mahārāja, therena rāhulena –
‘‘‘සාලකල්‍යාණිකා නාම, පාදපො ධරණීරුහො;
‘‘‘Sālakalyāṇikā nāma, pādapo dharaṇīruho;
අන්‌තොපථවියං යෙව, සතහත්‌ථොපි වඩ්‌ඪති.
Antopathaviyaṃ yeva, satahatthopi vaḍḍhati.
‘‘‘යථා කාලම්‌හි සම්‌පත්‌තෙ, පරිපාකෙන සො දුමො;
‘‘‘Yathā kālamhi sampatte, paripākena so dumo;
උග්‌ගඤ්‌ඡිත්‌වාන එකාහං, සතහත්‌ථොපි වඩ්‌ඪති.
Uggañchitvāna ekāhaṃ, satahatthopi vaḍḍhati.
‘‘‘එවමෙවාහං මහාවීර, සාලකල්‍යාණිකා විය;
‘‘‘Evamevāhaṃ mahāvīra, sālakalyāṇikā viya;
අබ්‌භන්‌තරෙ සුඤ්‌ඤාගාරෙ, ධම්‌මතො අභිවඩ්‌ඪයි’’’න්‌ති.
Abbhantare suññāgāre, dhammato abhivaḍḍhayi’’’nti.
සාලකල්‍යාණිකඞ්‌ගපඤ්‌හො චතුත්‌ථො.
Sālakalyāṇikaṅgapañho catuttho.
