| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
8. ஸலளாகா³ரஸுத்தங்
8. Salaḷāgārasuttaṃ
906. ஏகங் ஸமயங் ஆயஸ்மா அனுருத்³தோ⁴ ஸாவத்தி²யங் விஹரதி ஸலளாகா³ரே. தத்ர கோ² ஆயஸ்மா அனுருத்³தோ⁴ பி⁴க்கூ² ஆமந்தேஸி…பே॰… ஏதத³வோச – ‘‘ஸெய்யதா²பி, ஆவுஸோ, க³ங்கா³ நதீ³ பாசீனநின்னா பாசீனபோணா பாசீனபப்³பா⁴ரா. அத² மஹாஜனகாயோ ஆக³ச்செ²ய்ய குத்³தா³லபிடகங் 1 ஆதா³ய – ‘மயங் இமங் க³ங்கா³னதி³ங் பச்சா²னின்னங் கரிஸ்ஸாம பச்சா²போணங் பச்சா²பப்³பா⁴ர’ந்தி. தங் கிங் மஞ்ஞதா²வுஸோ, அபி நு ஸோ மஹாஜனகாயோ க³ங்கா³னதி³ங் பச்சா²னின்னங் கரெய்ய பச்சா²போணங் பச்சா²பப்³பா⁴ர’’ந்தி? ‘‘நோ ஹேதங், ஆவுஸோ’’. ‘‘தங் கிஸ்ஸ ஹேது’’? ‘‘க³ங்கா³, ஆவுஸோ, நதீ³ பாசீனநின்னா பாசீனபோணா பாசீனபப்³பா⁴ரா. ஸா ந ஸுகரா பச்சா²னின்னங் காதுங் பச்சா²போணங் பச்சா²பப்³பா⁴ரங். யாவதே³வ ச பன ஸோ மஹாஜனகாயோ கிலமத²ஸ்ஸ விகா⁴தஸ்ஸ பா⁴கீ³ அஸ்ஸா’’தி.
906. Ekaṃ samayaṃ āyasmā anuruddho sāvatthiyaṃ viharati salaḷāgāre. Tatra kho āyasmā anuruddho bhikkhū āmantesi…pe… etadavoca – ‘‘seyyathāpi, āvuso, gaṅgā nadī pācīnaninnā pācīnapoṇā pācīnapabbhārā. Atha mahājanakāyo āgaccheyya kuddālapiṭakaṃ 2 ādāya – ‘mayaṃ imaṃ gaṅgānadiṃ pacchāninnaṃ karissāma pacchāpoṇaṃ pacchāpabbhāra’nti. Taṃ kiṃ maññathāvuso, api nu so mahājanakāyo gaṅgānadiṃ pacchāninnaṃ kareyya pacchāpoṇaṃ pacchāpabbhāra’’nti? ‘‘No hetaṃ, āvuso’’. ‘‘Taṃ kissa hetu’’? ‘‘Gaṅgā, āvuso, nadī pācīnaninnā pācīnapoṇā pācīnapabbhārā. Sā na sukarā pacchāninnaṃ kātuṃ pacchāpoṇaṃ pacchāpabbhāraṃ. Yāvadeva ca pana so mahājanakāyo kilamathassa vighātassa bhāgī assā’’ti.
‘‘ஏவமேவ கோ², ஆவுஸோ, பி⁴க்கு²ங் சத்தாரோ ஸதிபட்டா²னே பா⁴வெந்தங் சத்தாரோ ஸதிபட்டா²னே ப³ஹுலீகரொந்தங் ராஜானோ வா ராஜமஹாமத்தா வா மித்தா வா அமச்சா வா ஞாதீ வா ஸாலோஹிதா வா போ⁴கே³ஹி அபி⁴ஹட்டு²ங் பவாரெய்யுங் – ‘ஏஹம்போ⁴ புரிஸ, கிங் தே இமே காஸாவா அனுத³ஹந்தி? கிங் முண்டோ³ கபாலமனுஸஞ்சரஸி? ஏஹி ஹீனாயாவத்தித்வா போ⁴கே³ ச பு⁴ஞ்ஜஸ்ஸு புஞ்ஞானி ச கரோஹீ’’’தி.
‘‘Evameva kho, āvuso, bhikkhuṃ cattāro satipaṭṭhāne bhāventaṃ cattāro satipaṭṭhāne bahulīkarontaṃ rājāno vā rājamahāmattā vā mittā vā amaccā vā ñātī vā sālohitā vā bhogehi abhihaṭṭhuṃ pavāreyyuṃ – ‘ehambho purisa, kiṃ te ime kāsāvā anudahanti? Kiṃ muṇḍo kapālamanusañcarasi? Ehi hīnāyāvattitvā bhoge ca bhuñjassu puññāni ca karohī’’’ti.
‘‘ஸோ வத, ஆவுஸோ, பி⁴க்கு² சத்தாரோ ஸதிபட்டா²னே பா⁴வெந்தோ சத்தாரோ ஸதிபட்டா²னே ப³ஹுலீகரொந்தோ ஸிக்க²ங் பச்சக்கா²ய ஹீனாயாவத்திஸ்ஸதீதி – நேதங் டா²னங் விஜ்ஜதி. தங் கிஸ்ஸ ஹேது? யஞ்ஹி தங், ஆவுஸோ, சித்தங் தீ³க⁴ரத்தங் விவேகனின்னங் விவேகபோணங் விவேகபப்³பா⁴ரங் தங் வத ஹீனாயாவத்திஸ்ஸதீதி – நேதங் டா²னங் விஜ்ஜதி. கத²ஞ்சாவுஸோ, பி⁴க்கு² சத்தாரோ ஸதிபட்டா²னே பா⁴வேதி, சத்தாரோ ஸதிபட்டா²னே ப³ஹுலீகரோதீதி? இதா⁴வுஸோ, பி⁴க்கு² காயே காயானுபஸ்ஸீ விஹரதி…பே॰… வேத³னாஸு…பே॰… சித்தே…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். ஏவங் கோ², ஆவுஸோ, பி⁴க்கு² சத்தாரோ ஸதிபட்டா²னே பா⁴வேதி, சத்தாரோ ஸதிபட்டா²னே ப³ஹுலீகரோதீ’’தி. அட்ட²மங்.
‘‘So vata, āvuso, bhikkhu cattāro satipaṭṭhāne bhāvento cattāro satipaṭṭhāne bahulīkaronto sikkhaṃ paccakkhāya hīnāyāvattissatīti – netaṃ ṭhānaṃ vijjati. Taṃ kissa hetu? Yañhi taṃ, āvuso, cittaṃ dīgharattaṃ vivekaninnaṃ vivekapoṇaṃ vivekapabbhāraṃ taṃ vata hīnāyāvattissatīti – netaṃ ṭhānaṃ vijjati. Kathañcāvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotīti? Idhāvuso, bhikkhu kāye kāyānupassī viharati…pe… vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, āvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotī’’ti. Aṭṭhamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 8. ஸலளாகா³ரஸுத்தவண்ணனா • 8. Salaḷāgārasuttavaṇṇanā
