| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
8. සලළාගාරසුත්‌තං
8. Salaḷāgārasuttaṃ
906. එකං සමයං ආයස්‌මා අනුරුද්‌ධො සාවත්‌ථියං විහරති සලළාගාරෙ. තත්‍ර ඛො ආයස්‌මා අනුරුද්‌ධො භික්‌ඛූ ආමන්‌තෙසි…පෙ.… එතදවොච – ‘‘සෙය්‍යථාපි, ආවුසො, ගඞ්‌ගා නදී පාචීනනින්‌නා පාචීනපොණා පාචීනපබ්‌භාරා. අථ මහාජනකායො ආගච්‌ඡෙය්‍ය කුද්‌දාලපිටකං 1 ආදාය – ‘මයං ඉමං ගඞ්‌ගානදිං පච්‌ඡානින්‌නං කරිස්‌සාම පච්‌ඡාපොණං පච්‌ඡාපබ්‌භාර’න්‌ති. තං කිං මඤ්‌ඤථාවුසො, අපි නු සො මහාජනකායො ගඞ්‌ගානදිං පච්‌ඡානින්‌නං කරෙය්‍ය පච්‌ඡාපොණං පච්‌ඡාපබ්‌භාර’’න්‌ති? ‘‘නො හෙතං, ආවුසො’’. ‘‘තං කිස්‌ස හෙතු’’? ‘‘ගඞ්‌ගා, ආවුසො, නදී පාචීනනින්‌නා පාචීනපොණා පාචීනපබ්‌භාරා. සා න සුකරා පච්‌ඡානින්‌නං කාතුං පච්‌ඡාපොණං පච්‌ඡාපබ්‌භාරං. යාවදෙව ච පන සො මහාජනකායො කිලමථස්‌ස විඝාතස්‌ස භාගී අස්‌සා’’ති.
906. Ekaṃ samayaṃ āyasmā anuruddho sāvatthiyaṃ viharati salaḷāgāre. Tatra kho āyasmā anuruddho bhikkhū āmantesi…pe… etadavoca – ‘‘seyyathāpi, āvuso, gaṅgā nadī pācīnaninnā pācīnapoṇā pācīnapabbhārā. Atha mahājanakāyo āgaccheyya kuddālapiṭakaṃ 2 ādāya – ‘mayaṃ imaṃ gaṅgānadiṃ pacchāninnaṃ karissāma pacchāpoṇaṃ pacchāpabbhāra’nti. Taṃ kiṃ maññathāvuso, api nu so mahājanakāyo gaṅgānadiṃ pacchāninnaṃ kareyya pacchāpoṇaṃ pacchāpabbhāra’’nti? ‘‘No hetaṃ, āvuso’’. ‘‘Taṃ kissa hetu’’? ‘‘Gaṅgā, āvuso, nadī pācīnaninnā pācīnapoṇā pācīnapabbhārā. Sā na sukarā pacchāninnaṃ kātuṃ pacchāpoṇaṃ pacchāpabbhāraṃ. Yāvadeva ca pana so mahājanakāyo kilamathassa vighātassa bhāgī assā’’ti.
‘‘එවමෙව ඛො, ආවුසො, භික්‌ඛුං චත්‌තාරො සතිපට්‌ඨානෙ භාවෙන්‌තං චත්‌තාරො සතිපට්‌ඨානෙ බහුලීකරොන්‌තං රාජානො වා රාජමහාමත්‌තා වා මිත්‌තා වා අමච්‌චා වා ඤාතී වා සාලොහිතා වා භොගෙහි අභිහට්‌ඨුං පවාරෙය්‍යුං – ‘එහම්‌භො පුරිස, කිං තෙ ඉමෙ කාසාවා අනුදහන්‌ති? කිං මුණ්‌ඩො කපාලමනුසඤ්‌චරසි? එහි හීනායාවත්‌තිත්‌වා භොගෙ ච භුඤ්‌ජස්‌සු පුඤ්‌ඤානි ච කරොහී’’’ති.
‘‘Evameva kho, āvuso, bhikkhuṃ cattāro satipaṭṭhāne bhāventaṃ cattāro satipaṭṭhāne bahulīkarontaṃ rājāno vā rājamahāmattā vā mittā vā amaccā vā ñātī vā sālohitā vā bhogehi abhihaṭṭhuṃ pavāreyyuṃ – ‘ehambho purisa, kiṃ te ime kāsāvā anudahanti? Kiṃ muṇḍo kapālamanusañcarasi? Ehi hīnāyāvattitvā bhoge ca bhuñjassu puññāni ca karohī’’’ti.
‘‘සො වත, ආවුසො, භික්‌ඛු චත්‌තාරො සතිපට්‌ඨානෙ භාවෙන්‌තො චත්‌තාරො සතිපට්‌ඨානෙ බහුලීකරොන්‌තො සික්‌ඛං පච්‌චක්‌ඛාය හීනායාවත්‌තිස්‌සතීති – නෙතං ඨානං විජ්‌ජති. තං කිස්‌ස හෙතු? යඤ්‌හි තං, ආවුසො, චිත්‌තං දීඝරත්‌තං විවෙකනින්‌නං විවෙකපොණං විවෙකපබ්‌භාරං තං වත හීනායාවත්‌තිස්‌සතීති – නෙතං ඨානං විජ්‌ජති. කථඤ්‌චාවුසො, භික්‌ඛු චත්‌තාරො සතිපට්‌ඨානෙ භාවෙති, චත්‌තාරො සතිපට්‌ඨානෙ බහුලීකරොතීති? ඉධාවුසො, භික්‌ඛු කායෙ කායානුපස්‌සී විහරති…පෙ.… වෙදනාසු…පෙ.… චිත්‌තෙ…පෙ.… ධම්‌මෙසු ධම්‌මානුපස්‌සී විහරති ආතාපී සම්‌පජානො සතිමා, විනෙය්‍ය ලොකෙ අභිජ්‌ඣාදොමනස්‌සං. එවං ඛො, ආවුසො, භික්‌ඛු චත්‌තාරො සතිපට්‌ඨානෙ භාවෙති, චත්‌තාරො සතිපට්‌ඨානෙ බහුලීකරොතී’’ති. අට්‌ඨමං.
‘‘So vata, āvuso, bhikkhu cattāro satipaṭṭhāne bhāvento cattāro satipaṭṭhāne bahulīkaronto sikkhaṃ paccakkhāya hīnāyāvattissatīti – netaṃ ṭhānaṃ vijjati. Taṃ kissa hetu? Yañhi taṃ, āvuso, cittaṃ dīgharattaṃ vivekaninnaṃ vivekapoṇaṃ vivekapabbhāraṃ taṃ vata hīnāyāvattissatīti – netaṃ ṭhānaṃ vijjati. Kathañcāvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotīti? Idhāvuso, bhikkhu kāye kāyānupassī viharati…pe… vedanāsu…pe… citte…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ kho, āvuso, bhikkhu cattāro satipaṭṭhāne bhāveti, cattāro satipaṭṭhāne bahulīkarotī’’ti. Aṭṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 8. සලළාගාරසුත්‌තවණ්‌ණනා • 8. Salaḷāgārasuttavaṇṇanā
